Rut
4 Boaz otlejkok hasta kanin okatka ipuerta altepetl uan ompa omotlali. Ijkuak okitak opanok tlakatl tlen okatka ifamiliar Elimélec, okilui: “Te,* nikan xiuiki uan ximotlali”. Ikinon tlakatl omotoki uan omotlali. 2 Satepan Boaz okinnotski majtlaktli tlayekankej tlen okatkaj altepetl uan okinmilui: “Nikan ximotlalikan”. Uan yejuan omotlalijkej.
3 Boaz okilui non tlakatl: “Noemí okatka Moab pero yomokopato uan moneki kinemakas itlal tofamiliar Elimélec. 4 Onimokuayejyeko* nimitsiluis kox tikneki tikkouas non tlali. Tla tikneki ijkon tikchiuas, xikkoua inmixpan akinmej nikan chantij uan inmixpan akinmej nikan tlayekanaj. Porque te okachi mitsnamiki tikkouas, pero tla amo tikneki tikkouas, techilui porque ne noijki nechnamiki nikkouas”. Non tlakatl okijto: “Nikneki nikkouas”. 5 Boaz okilui: “Ijkuak tikkouas non tlali, moneki tikmatis amo san iaxka Noemí, noijki iaxka Rut tlen uits altepetl Moab uan okatka isiua Mahlón. Tla tikkouas, tlen okikajteuilijkej non tlakatl ok yetos iaxka”. 6 Ijkuak tlakatl okikak tlen okilui Boaz, okijto: “Amo uelis nikkouas porque amitlaj niktlanis tla ijkon nikchiuas. Te xikkoua porque ne amo uelis ijkon nikchiuas”.
7 Yiuejkika ompa Israel, ijkuak ikaj okinamikiaya kipaleuis se ifamiliar pero okikauiliaya okse tlakatl ijkon makichiua, omonekiaya kimokixtilis ikak* uan kimakas. Ompa Israel ijkon okichiuayaj para kiteititiskej omoyekkajkej. 8 Ikinon non tlakatl okimokixtili ikak ijkuak okilui Boaz ye makikoua tlali. 9 Boaz okinmilui tlayekankej uan nochtin akinmej ompa okatkaj: “Namoixpan nikkouilia Noemí nochi tlen okatka iaxka Elimélec uan nochi tlen okatka inmiaxka Kilión uan Mahlón. 10 Noijki nimonamiktis iuan Rut tlen ouala altepetl Moab uan okatka isiua Mahlón. Ijkon tlen okikajteuilijkej non tlakatl ok yetos iaxka uan ikniuan uan akinmej nikan chantij amo kilkauaskej itoka. Namoixpan nikijtojtok ijkon nikchiuas”.
11 Nochtin akinmej okatkaj ik ipuerta altepetl uan noijki tlayekankej, okijtojkej: “¡Toixpan yotikijto! Jehová makiteochiua siuatl tlen yetos mokalijtik para mayeto ken Raquel uan Lea, intech okiski altepetl Israel. Kuali makisa tlen tikchiuas altepetl Efrata uan nochtin kuali mamitsitakan altepetl Belén. 12 Moxuiuan tlen Jehová kichiuas xikinpia iuan Rut, mamomiakilikan ijkon ken ifamilia Pérez, itelpoch Tamar tlen okipixki iuan Judá”.
13 Boaz omonamikti iuan Rut. Satepan Boaz iuan omotekak, uan Jehová okichi Rut makipia se ikone. 14 Uan siuamej okiluijkej Noemí: “Makiueyichiuakan Jehová, ye okichi mamitspaleuikan. ¡Makixmatikan itoka chokotsin itech altepetl Israel! 15 Nin chokotsin okichi oksepa xiyolto uan ye mitsmaluis ijkuak yitikpias miak xiuitl, porque ye ikone mosiuamo tlen mitstlasojtla. Uan mosiuamo okachi kuali amo ken tikinpiaskia chikome mokoneuan”. 16 Noemí okinapalo chokotsin uan ye okiskalti. 17 Siuamej tlen ik ompa ochantiayaj okitlalilijkej itoka chokotsin. Yejuan okijtojkej: “Noemí okipixki se ikone”. Uan okitokayotijkej Obed. Ye ipapa Jesé uan Jesé ipapa David.
18 Ninmej ixuiuan Pérez: Pérez okatka ipapa Hezrón, 19 Hezrón okatka ipapa Ram, Ram okatka ipapa Aminadab, 20 Aminadab okatka ipapa Nahsón, Nahsón okatka ipapa Salmón, 21 Salmón okatka ipapa Boaz, Boaz okatka ipapa Obed, 22 Obed okatka ipapa Jesé, uan Jesé okatka ipapa David.