Achto ilibro Samuel
8 Ijkuak Samuel okokoxkatik,* okintlali ikoneuan ken injueces israelitas. 2 Ikone tlen achto oneski* omotokayotiaya Joel uan okse ikone omotokayotiaya Abías. Yejuan okatkaj ken jueces ompa altepetl Beer-Seba. 3 Pero ikoneuan Samuel amo okichiuayaj ijkon ken ye. Yejuan otlakajkayauayaj para kipiaskiaj miak tlamantli patio, okinekiayaj itlaj kiseliskej uan amo kuali otlaixkomakayaj.
4 Satepan nochtin akinmej okinyekanayaj israelitas omonechikojkej uan okitatoj Samuel ompa Ramá. 5 Uan okiluijkej: “¡Xikita! Te yotikokoxkatik* uan mokoneuan amo kichiuaj ijkon ken te. Xiktlali se tekiua para matechixkomaka ijkon ken okseki altepemej”. 6 Pero Samuel amo okipakti ijkuak okiluijkej: “Xiktlali se tekiua para matechixkomaka”. Ijkuakon Samuel okitlatlaujti Jehová. 7 Uan Jehová okinankili: “Xikchiua nochi tlen omitsiluijkej israelitas, porque amo te akin amo mitsseliaj. Amo kinekij ne maniyeto intekiua. 8 Desde ijkuak onikinkixti Egipto ijkon kichijtokej. Nochipa nechkaua uan kinueyichiuaj oksekimej dioses. Uan axkan te ijkon mitstoktiaj.* 9 Ikinon xikchiua tlen mitsiluiaj pero moneki xikinyekilui tlen kinpanos. Xikinmilui tekiua tlen kinnauatis kinmiluis makichiuakan tlen ye kinekis”.
10 Samuel omotlapoui inuan akinmej okitlajtlanilijkej se tekiua uan okinmilui nochi tlen Jehová okiluijka. 11 Ye okinmilui: “Tekiua tlen namechnauatis ijkuak ye kinekis kinuikas namokoneuan para yaskej ipan carretas tlen ika temiktiaj, kintlalis soldados tlen yaskej ipan caballos uan oksekimej motlaloskej* inyekapan carruajes.* 12 Sekimej kintlalis makinyekanakan isoldados, akinmej kinyekanaskej mil soldados uan akinmej kinyekanaskej cincuenta soldados. Oksekimej kintlalis matlaxouakan uan matlaololokan itlala, oksekimej kintlalis makinchiuakan teposmej tlen ika temiktiskej uan tlen kinejnekiskej* para incarretas. 13 Noijki kinuikaskej namochpochuan para matlakualchiuakan, mapanchiuakan uan makichiuakan itlaj ajuiak. 14 Kimokauis namotlal tlen okachi kuali, uvajkojmej uan olivoskojmej uan nochi non kinmakas itlakeualuan. 15 Kimokauis se majtlaktli parte de nochi trigo uan uvajkojmej tlen kisas namotlal uan kinmakas itlakeualuan akinmej ueyititokej uan oksekimej itlakeualuan. 16 Kinuikas namotlakeualuan, namotoros, namovacas, namoburros uan kintekipanoltis. 17 Kimokauis se majtlaktli parte de namochkauan uan namotentsonuan uan nanyetoskej itlakeualuan. 18 Ajsis tonal nanmoyolkokoskej porque onankipejpenkej se tekiua. Pero Jehová amo namechnankilis ijkuak ijkon panos”.
19 Pero israelitas amo okikakilijkej Samuel uan okijtojkej: “¡Non amo toteki! ¡Tejuan tiknekij se tekiua! 20 Totekiua techixkomakas, techyekanas uan yas kinmijmiktiti akinmej techkokoliaj, ijkon tiyetoskej ken okseki altepemej”. 21 Samuel okilui Jehová nochi tlen okijtojkej israelitas. 22 Jehová okilui Samuel: “Xikinkaki uan xiktlali se tekiua para makinnauati”. Ijkuakon Samuel okinmilui tlakamej israelitas: “Sejse namejuan ximokopakan namoaltepe”.