Achto ilibro Samuel
10 Samuel okonanki se tekontsin tlen okipiaya aceite uan okikuatlalili Saúl, okixpipitso* uan okilui: “Jehová omitspejpenki para xikinnauati israelitas. 2 Axkan techkauas, tipanos ik kanin okitokakej Raquel ompa Zelzá, itech tlali tlen kajki Benjamín. Ijkuakon tikinnamikis ome tlakamej uan yejuan mitsiluiskej: ‘Yokinmajsikej burros tlen opolikaj. Axkan mopapa nankitekipachouaj uan ayakmo kitekipachoua iburros uan kijtojtinemi: “¿Tlen moneki nikchiuas para nikajsis nokone?”’. 3 Te xinejnemi hasta tiajsiti Tabor kanin kajki ueyi kouitl, ompa tikinnamikis eyi tlakamej tlen yauij altepetl Betel para kiueyichiuatiuij akin melauak toTajtsin Dios. Se tlakatl kinuikas eyi tentsojkonemej, okse kinuikas eyi panes uan okse kiuikas se ueyi komitl tlen kipia vino. 4 Yejuan mitstlajtlaniskej ken tika uan ijkuak mitsmakaskej ome panes, xikinseli. 5 Satepan tiajsiti kanin kajki itepetsin akin melauak toTajtsin Dios, kanin katej miakej soldados filisteos. Ijkuak tiajsiti itech non altepetl, tikinmitas sekimej profetas temotiuitsej kanin otlaueyichiuatoj.* Yejuan tlajtojtiaskej ken tlajtouaj profetas uan inyekapan sekimej kitsotsontiaskej itlaj cuerdajyo, noijki kitsilinijtiaskej pandereta, kitsotsontiaskej arpa uan kipitstiaskej flauta. 6 Jehová ika iespíritu mitsmakas chikaualis uan te tias uan inuan titlajtojtias ken tlajtouaj profetas. Timokopas okse persona. 7 Ijkuak panos nochi non, xikchiua nochi tlen tiuelis porque akin melauak toTajtsin Dios mitspaleuijtok. 8 Satepan achto te xitemo Guilgal. Ompa timonamikiskej para tikintemakaskej tetliokolilmej tlen mochichinouaj* uan tetliokolilmej tlen tesetiliaj. Ompa techchia chikome tonal hasta maniajsiti uan nimitsiluis tlen moneki tikchiuas”.
9 Nochi tlen omoijtojka non tonal omochi. Ijkuak Saúl okikajte Samuel, toTajtsin Dios opejki kipatilia iyolo uan omokopki okse persona. 10 Ijkuak oyayaj para ajsiskiaj kanin kajki tepetsintli, okinnamik sekimej profetas. Ijkuakon toTajtsin Dios ika iespíritu okimakak chikaualis Saúl uan ye oyajki inuan profetas uan opejki tlajtoua ken tlajtouaj profetas. 11 Akinmej okixmatiayaj Saúl okitakej ye oyaya iuan profetas uan otlajtojtiaya ken yejuan tlajtouaj, ijkuak ijkon okitakej, okimoluijkej: “¿Tlen okipanok Saúl ikone Quis? ¿Ye noijki profeta?”. 12 Ijkuakon se tlakatl tlen ompa okatka okijto: “¿Akin inpapa nonmej profetas?”. Ijkuakon opejki moijtoua nin tlajtoli: “¿Saúl noijki profeta?”.
13 Saúl oyajki kanin tlaueyichiuaj ijkuak otlanki otlajto ken tlajtouaj profetas. 14 Satepan ikni ipapa Saúl okintlajtlani ye uan itlakeual: “¿Kanin onanuiaj?”. Saúl okinankili: “Otikintemotoj burros pero satepan otikitatoj Samuel porque amo otikinmajsiayaj”. 15 Itío Saúl noijki okintlajtlani: “¿Tlen onamechilui Samuel? Nanmechtlatlaujtia techiluikan tlen onamechilui”. 16 Saúl okinankili itío: “Ye otechilui okinmajsikej burros”. Pero Saúl amo okilui itío ye yetoskia tekiua ijkon ken okiluijka Samuel.
17 Samuel okinmilui israelitas mamonechikokan ixpan Jehová ompa Mizpá 18 uan okinmilui: “Nin tlen kijtoua Jehová inDios israelitas: ‘Ne onikinkixti israelitas ompa Egipto, onikinmakixti inmak egipcios uan onikinpaleui para ayakmo makintlajyouiltikan oksekimej tekiuajkej. 19 Pero axkan namejuan nankixtopeuaj namoDios, akin onamechmakixti ijkuak onantlajyouijtokaj uan onanmoyolkokojtokaj. Namejuan onankijtojkej: “¡Non amo toteki! Tejuan tiknekij se tekiua para matechnauati”. Ikinon sejse tribus uan sejse familias ximonechikokan ixpan Jehová’”.
20 Samuel okichi mamotokikan sejse intribus israelitas uan okipejpenkej itribu Benjamín. 21 Satepan okichi mamotoki itribu Benjamín uan itech non tribu okichi mamotokikan sejse familias. Uan okipejpenkej familia matritas. Satepan itech non familia okipejpenkej Saúl ikone Quis. Pero opejki kitemouaj uan amo kanaj okajsikej. 22 Ikinon okitlajtlanijkej Jehová: “¿Yinikan kajki non tlakatl?”. Jehová okinnankili: “Tlatitok itlajkotia nochi tlen nankiualikaj”. 23 Yejuan omotlalojkej* uan okikixtitoj. Ijkuak Saúl omoketsato intlajkotia israelitas okitakej okatka uejkapantik* uan nochtin san oajsiayaj iajkol. 24 Samuel okinmilui israelitas: “¿Yonankitakej akin okipejpenki Jehová? Itech nochtin israelitas amikaj onka okse ken ye”. Ijkuakon chikauak okijtojkej: “¡Maueyitito totekiua!”.*
25 Satepan Samuel okinyekilui israelitas tlen kitlajtlaniskiaj tekiuajkej, nochi non okijkuilo itech se libro uan non libro okitlali ijtik itabernáculo Jehová. Satepan nochtin okinmilui mamokopakan inkalijtik. 26 Saúl noijki omokopki Guibeá kanin ochantiaya, noijki iuan oyajkej soldados akinmej Jehová okinyolini. 27 Pero sekimej tlakamej tlen amitlaj inpati okijtojkej: “¿Ken uelis techmakixtis nin tlakatl?”. Ijkuakon opejki kitlauelitaj uan amitlaj okitliokolijkej pero Saúl amitlaj okijto.