Achto ilibro Samuel
11 Se tonal Nahás akin ammonita, otlejkok iuan isoldados para kinmixnamikiskiaj akinmej chantij Jabés ompa Galaad. Nochtin tlakamej tlen chantij Jabés okiluijkej Nahás: “Touan xikchiua se acuerdo uan timitstekichiuiliskej”. 2 Pero Nahás akin ammonita okinnankili: “Nikchiuas se acuerdo namouan pero tla ne nochtin nanmechkixtilis namoixtololo tlen nankipia namoyekma, ijkon uelis nikinpinauis nochtin israelitas”. 3 Tlayekankej tlen chantij Jabés okijtojkej: “Techkauili mapano chikome tonal para matikintitlanikan sekimej tlakamej itech nochi intlal israelitas. Uan tla amikaj techmakixtikij, tikseliskej timitstekichiuiliskej”. 4 Ijkuak nonmej tlakamej oajsitoj ialtepe Saúl ompa Guibeá, yejuan okinmiluijkej israelitas tlen opanotoka, ijkuakon nochtin opejki chikauak chokaj.
5 Saúl omokopato tlala uan okinualikayaj iyolkauan. Ye otlajtlanki: “¿Tlen kinpanoua israelitas? ¿Tleka nochtin chokaj?”. Ijkuakon okiluijkej tlen okijtojkej tlakamej tlen ochantiayaj Jabés. 6 ToTajtsin Dios ika iespíritu okimakak chikaualis. Saúl okualankamik ijkuak okikak tlen okiluijkej. 7 Ikinon okonanki ome toros uan okintejteki, satepan okinmilui sekimej tlakamej makiuikakan sejse pedazo itech nochi intribus israelitas, nonmej tlakamej okijtojtiayaj: “¡Akinmej amo kipaleuiskej Saúl uan Samuel, ijkin tikintoktiskej* inyolkauan!”. Ijkuak non okikakej, nochtin sapanoua okitlakaitakej* Jehová uan san sekan oyajkej para temiktitiuij. 8 Ijkuakon ompa Bézec, Saúl okinpo 300,000* tlakamej tlen pouij itech intribus israelitas uan 30,000* tlakamej tlen pouij itech itribu Judá. 9 Noijki tlakamej tlen okijtojkej tlen opanotoka okinmiluijkej: “Xikinmiluikan tlakamej tlen chantij Jabés ompa Galaad: ‘Mostla kanaj tlajkotonal timechmakixtiskej’”. Tlakamej ijkon okinmiluitoj akinmej chantij Jabés uan yejuan opakej. 10 Tlakamej tlen chantij Jabés okinmiluitoj ammonitas: “Mostla timechtekichiuiliskej uan uelis nantechtoktiskej* san tlen namejuan nankinekiskej”.
11 Mostlatika, Saúl okinxelo itech eyi grupos isoldados. Ijkuak ayamo otlanesiaya* yejuan oyajkej ik kanin omokajtokaj ammonitas uan opejki kinmiktiaj hasta kanaj tlajko tonal. Akinmej amo okinmiktijkej ocholojkej, omoxexelojkej uan insejselti oyajkej. 12 Satepan sekimej okitlajtlanijkej Samuel: “¿Akinmej amo okinekiayaj Saúl mayeto tekiua? Matechinmaktilikan para tikinmiktiskej”. 13 Pero Saúl okijto: “Axkan Jehová yokinmakixti israelitas, ikinon amo moneki nion se tlakatl kimiktiskej”.
14 Satepan Samuel okinmilui israelitas: “Tiauij Guilgal uan oksepa matikinmiluitij Saúl tekiua”. 15 Ikinon nochtin oyajkej Guilgal uan ompa ixpan Jehová okitlalijkej Saúl ken tekiua. Satepan okimakakej Jehová tetliokolilmej tlen tesetiliaj. Ijkuakon Saúl uan israelitas oiluichijkej uan opakej.