Achto ilibro Samuel
24 Ijkuak Saúl okinkuitlapantokak filisteos uan omokopato, okiluijkej: “David kajki En-Guedí, kanin tlauaki”.
2 Ikinon Saúl okinuikak 3,000 soldados tlen okachi kuali otemiktiayaj tlen okatkaj altepetl Israel uan oyajkej okitemotoj David uan tlakamej tlen iuan okatkaj. Otlatemotoj kanin tlauejkapan uan teyo, kanin opanouayaj tentsomej tlen nemij itech tepetl. 3 Ijkuakon Saúl oajsito kanin okatkaj ichkacorralmej tlen ochijtoka ika tetl* uan okatkaj inakastlan ojtli. Ompa okatka se cueva uan Saúl ompa okalakito para yaskia baño. Pero okachi tlaijtik itech non cueva ompa okatkaj* David uan tlakamej tlen iuan oyayaj. 4 Nonmej tlakamej okiluijkej David: “Nin tonal Jehová ijkin mitsiluia: ‘Axkan nimitsmaktilia akin mitskokolia. Uelis tiktoktis* san tlen te tiknekis’”. Ijkuakon David omoketski uan san ichtaka okitekili Saúl se pedazo itlaken makoto. 5 Satepan David amo kuali omomachili porque okitekili se pedazo itlaken Saúl. 6 Ye okinmilui tlakamej tlen iuan oyayaj: “Amitlaj moneki niktoktis* noteko, porque Jehová okipejpenki. Jehová amo kuali kitas tla itlaj niktoktis akin Jehová okipejpenki”. 7 Ijkuak David ijkon okijto, okintlakaualti tlakamej uan amo okinkauili makixnamikikan Saúl. Ijkuakon Saúl okiski ijtik cueva uan oyajki.
8 David omoketski, okiski ijtik cueva uan chikauak okilui Saúl: “¡Notekiua tlen ueyititok!”. Ijkuak Saúl otlachixki ikuitlapan, David omotlankuaketski uan tlalpan omoixtlapacho. 9 David okitlajtlani Saúl: “¿Tleka tikinkaki akinmej kijtouaj: ‘David kineki itlaj mitstoktis’?* 10 Axkan te kuali otikitak ijtik nin cueva Jehová nomak omitstemakti. Onechiluijkej manimitsmikti pero ne onimitsiknomatki uan onikijto: ‘Amo nikajkokuis noma para itlaj niktoktis noteko, porque Jehová okipejpenki’. 11 Noteko,* xikita nikan nikkitskijtok se pedazo motlaken makoto. Uelis nimitsmiktiskia ijkuak onimitstekili motlaken pero amo ijkon onikchi. Xikita, ne amitlaj nikneki nimitstoktis* nion nikneki nimitsixnamikis. Ne amitlaj onimitstokti* pero te techtemojtinemi porque tikneki techmiktis. 12 Jehová matechixkomaka uan ye Jehová akin manechmakopa. Pero ne, amo nimokuayejyekoua* itlaj nimitstoktis. 13 Ijkon ken kijtoua se tlajtoli tlen yiuejkika moixmati: ‘Akinmej amo yolkualmej kichiuaj tlen amo kuali’. Ikinon ne amitlaj nimitstoktis. 14 ¿Akin kineki kikitskis intekiua israelitas? ¿Akin tikuitlapantoka? Ne, ken se itskuintli tlen yomiki noso ken se tekpi. 15 Jehová mayeto tojuez uan matechixkomaka, ye kita tlen panotok uan nechpaleuis. Momak nechmakixtis uan nechixkomakas”.
16 Ijkuak David otlanki ijkon okijto, Saúl otlajtlanki: “Nokone David, ¿te akin techualtlapouijtok?”. Ijkuakon Saúl opejki chikauak choka 17 uan okilui David: “Te okachi tiyolkuali amo ken ne, porque maski itlaj onimitstokti, te amo ijkon otechtokti.* 18 Yotechititi tiyolkuali maski Jehová onechtemakti momak, amo otechmikti. 19 Ijkuak ikaj kajsi akin kikokolia, ¿amitlaj kitoktia?* Jehová mitsteochiuas porque axkan te itlaj otikchi nopatka. 20 Axkan ne kuali nikmati te tiyetos titekiua uan ompa Israel uejkauas titlanauatis. 21 Axkan, xikijto* ika itoka Jehová amo tikinpojpolos noxuiuan ijkuak ne ayakmo niyetos. Noijki xikijto amo tikpojpolos notoka itech ifamilia nopapa”. 22 Ikinon David okilui Saúl kichiuaskia ijkon ken omokajkej. Satepan Saúl oyajki ikalijtik uan David iuan tlakamej otlejkokej kanin omotlatijtokaj.