Okse ilibro Samuel
6 David oksepa okinnechiko 30,000* tlakamej, yejuan okatkaj soldados israelitas tlen okachi kuali otemiktiayaj. 2 Ijkuakon David uan nochtin tlakamej tlen iuan okatkaj oyajkej Baale-Judá okikuitoj* iArca akin melauak toTajtsin Dios. Iyekapan Arca miakej kijtouaj itoka Jehová akin kinnauatia nochtin ángeles, ye kajki* ipan itrono intlajkotia querubines. 3 Para kikixtiskiaj iArca akin melauak toTajtsin Dios desde ikalijtik Abinadab tlen okatka ipan se tepetsintli, okitlalijkej ipan se yankuik carreta. Uzá uan Ahió, ikoneuan Abinadab okiuikayaj non yankuik carreta.
4 Ijkuakon iArca akin melauak toTajtsin Dios, okikixtijkej ikalijtik Abinadab tlen okatka ipan tepetsintli, Ahió onejnentiaya iyekapan Arca. 5 David uan nochtin israelitas omijtotiayaj uan otlakuikayaj ixpan Jehová. Yejuan okitsotsonayaj nochi tlen ochijtoka ika enebrokouitl, arpas uan seki tlamantli cuerdajyo uan noijki panderetas, sistros uan címbalos. 6 Pero ijkuak oajsitoj kanin tlaejekaniaj* tlen iaxka Nacón, iArca akin melauak toTajtsin Dios youetsiskia porque okiuikayaj toros ikinon Uzá san niman okikitski. 7 Tlen okichi Uzá sapanoua okikualani Jehová. Akin melauak toTajtsin Dios san niman ompa okimikti porque amo otetlakaitak. Uzá omiki inakastlan iArca akin melauak toTajtsin Dios. 8 David okualanki* porque Jehová okualanki iuan Uzá uan okimikti. Kanin ijkon opanok, hasta axkan itoka Pérez-Uzá.* 9 Non tonal David okimakasik* Jehová uan okijto: “¿Ken nikuikas iArca Jehová?”. 10 David amo okinek kiuikas iArca Jehová itech iAltepe David, kanin ye okatka. Ye okichi makiuikakan ikalijtik Obed-Edom, akin guitita.
11 Eyi metstli iArca Jehová omoka ikalijtik Obed-Edom akin guitita, ikinon Jehová nochipa okiteochiuaya Obed-Edom uan nochtin akinmej iuan ochantiayaj. 12 Satepan ijkin okiluijkej tekiua David: “Jehová kiteochijtok ikalijtik Obed-Edom uan nochi tlen kipia porque ompa kajki iArca akin melauak toTajtsin Dios”. Ijkuak David ijkon okikak sapanoua opaki uan oyajki ikalijtik Obed-Edom okikixtito iArca akin melauak toTajtsin Dios para kitlejkoltis kanin okatka iAltepe David. 13 Ijkuak tepitsin onejnenkej akinmej okiuikayaj iArca Jehová, ye okimikti se toro uan se yolkatl tomauak.
14 David omijtotiaya uan hasta omoyaualouaya* ixpan Jehová uan okonakijtoka* se efod* de lino. 15 David uan nochtin israelitas sapanoua opakiayaj uan okipitsayaj kuakouitl ijkuak okiuikayaj iArca Jehová. 16 Ijkuak iArca Jehová okikalakijkej itech iAltepe David, Mical ichpoch Saúl opejki kitlauelita David porque desde iventana okitak otsikuiniaya,* omijtotiaya uan omoyaualouaya ixpan Jehová. 17 Satepan iArca Jehová okikalakijkej ijtik kaltsintli* tlen David okichijka uan okitlalijkej kanin omonekiaya, ijkuakon David okintemakak ixpan Jehová tetliokolilmej tlen mochichinouaj* uan tetliokolilmej tlen tesetiliaj. 18 Ijkuak David otlanki okintemakak tetliokolilmej tlen mochichinouaj uan tetliokolilmej tlen tesetiliaj, okinteochi israelitas ika itoka Jehová akin kinnauatia nochtin ángeles. 19 Noijki okinmakak nochtin israelitas, sejse tlakatl uan sejse siuatl se pan yaualtik,* se pan tlen okichijkej ika dátiles uan noijki okinmakak se pan tlen okichijkej ika pasas, satepan sejse oyajki ikalijtik.
20 Ijkuak David omokopki ikalijtik para kinteochiuas akinmej iuan ochantiayaj, Mical ichpoch Saúl okinamikito uan okilui: “¡Axkan sapanoua omoueyitlali intekiua israelitas! ¡Otimopinati ijkuak otimonexti ika amo miak motlaken inmixpan itlakeualuan motekipanojkauan, otikchi ken akin yokuatlapolo tlen teixpan moxixipetsoua!”. 21 David okilui Mical: “Ixpan Jehová ne onimijtotiaya uan onitlakuikaya. Ye onechpejpenki uan amo okipejpenki mopapa nion akinmej iuan ochantiayaj. Jehová onechtlali manikyekana ialtepe Israel ikinon ixpan Jehová ok nimijtotis uan nitlakuikas, 22 amo nimoueyinekis nion nikchiuas okseki tlamantli para nikteititis ne amitlaj nopati. Pero nechueyitlaliskej tlakeualmej tlen otikinmijto”. 23 Mical ichpoch Saúl amo okinpixki ikoneuan hasta ijkuak omiki.