Okse ilibro Samuel

13 Itelpoch David tlen omotokayotiaya Absalón okipiaya se ikni siuatl sapanoua kuajkualtsin uan omotokayotiaya Tamar. Pero okse itelpoch David tlen omotokayotiaya Amnón opejki kitlasojtla Tamar. 2 Amnón sapanoua omotekipachouaya uan hasta omokoko por Tamar. Ijkon omomachiliaya porque Tamar ayamo ikaj iuan omotekaya uan okitaya amo uelis iuan yetoskia. 3 Amnón okipiaya se iyolikni tlen omotokayotiaya Jehonadab ikone Simeá, ikni David. Jehonadab okatka ixtlamatki. 4 Ye okitlajtlani Amnón: “Te tiikone tekiua, ¿tleka mojmostla san kualkan* timoyolkokoua? ¿Techilui tlen mitspanoua?”. Amnón okinankili: “Ne niktlasojtla Tamar ikni nokni Absalón”. 5 Jehonadab okilui: “Ximoteka kanin tikochi uan san ikxikchiua timokokoua, ijkuak mopapa mitsitaki xikilui: ‘Nimitstlatlaujtia, xikilui nokni Tamar mauiki uan manechualikili tlen nikkuas. Tla ye noixpan tlakualchiuas uan nechmakas tlen kinmakaj akinmej mokokouaj, ne nikkuas’”.

6 Ijkuakon Amnón omotekak uan san ikokichi omokokouaya ikinon tekiua okitako, Amnón okilui tekiua: “Nimitstlatlaujtia xikilui mauiki nokni Tamar uan manechinchiuili ome panes tlen mamotakan ken se yolo uan manechinmaka para manikinkua”. 7 Tamar okatka kalijtik uan David otlanauati ijkin makiluitij: “Nimitstlatlaujtia xio ikalijtik mokni Amnón uan xiktlakualchiuiliti”. 8 Ikinon Tamar oyajki ikalijtik ikni Amnón, ye ouetoka kanin okochiaya. Tamar ixpan okipatlak tixtli, okinchi panes uan okinmikxiti. 9 Satepan okonanki panes uan okinuikili Amnón pero ye amo okinek kinkuas uan okijto: “Nochtin xikisakan”. Ijkuakon nochtin okiskej.

10 Amnón okilui Tamar: “Xikualika tlen otikchi nikan kanin nikochi uan techtlamaka”. Tamar okonanki panes tlen omotayaj ken se yolo uan okinuikili Amnón kanin okochiaya. 11 Ijkuak inauak omotoki para kitlamakaskia, Amnón okikitski uan okilui: “Xiuiki nokni nouan ximoteka”. 12 Tamar okilui: “Amo nokni, amo techpinati, amo ijkon kichiuaj itech altepetl Israel. Amo xikchiua nin tlamantli tepinati. 13 ¿Tlen moneki nikchiuas para nochtin makilkauakan nin tlamantli tepinati? Mitsitaskej ken se tlakatl tlen amitlaj ipati nikan Israel. Nimitstlatlaujtia ximotlapoui iuan tekiua porque ye kitekauilis mouan maniyeto”. 14 Pero Amnón amo okikak tlen okilui, ye okatka okachi chikauak ikinon okichiualti iuan mamoteka uan okipijpinati. 15 San niman Amnón opejki sapanoua kikualankita, achto okitlasojtlaya pero satepan sapanoua okikualankaitak uan okilui: “¡Ximeua uan xio!”. 16 Ijkuakon Tamar okilui: “¡Amo nokni, amo techkixti! ¡Non okachi tepinati amo ken achto otechtokti!”.* Pero Amnón amo okinek kikakis.

17 Amnón okinotski telpochtli tlen okipaleuiaya uan okilui: “Nimitsnauatia xikkixti nin siuatl uan kuali xitlatsakua”. 18 Tamar okonakijtoka* se kualtsin itlaken. (Porque ijkon omotlakentiayaj ichpochuan tekiua tlen ayamo omotekayaj iuan se tlakatl). Itlakeual Amnón okikixti Tamar uan kuali otlatsak. 19 Ijkuakon Tamar okimokuatlalili tlikonextli, okitsayanki itlaken kualtsin tlen okonakijtoka, onejnentiaya, otsajtsitiaya uan omokuakitskijtiaya.

20 Ijkuak Absalón ijkon okitak okitlajtlani: “¿Ye mokni Amnón ijkon omitstokti?* Tamar amitlaj xikijto, ye noijki mokni. Amo san ximokuayejyekojto* tlen omitspanok”. Satepan Tamar, ochantito iuan ikni Absalón para amikaj makita. 21 Tekiua David okualankamik ijkuak okimatki tlen opanok. Pero amo okinekiaya kiyolkokos Amnón porque okatka achto ikone uan okitlasojtlaya. 22 Absalón okikokoliaya Amnón porque okipijpinati ikni Tamar ikinon amo okilui tlen kuali nion tlen amo kuali uan amitlaj okilui.

23 Ijkuak opanok ome xiuitl, itlakeualuan Absalón tlen otlaximayaj okatkaj Baal-Hazor ik Efraín,* ijkuakon Absalón okinyole nochtin ikoneuan tekiua iuan mailuichiuatij. 24 Absalón okitato tekiua uan okilui: “Nikinxintok nochkauan. Nimitstlatlaujtia xiuiki uan xikinualika motlakeualuan”. 25 Tekiua okinankili: “Amo nokone, timitstekimakaskej tla nochtin tiaskej”. Maski Absalón okilui miak uelta iuan mauia, tekiua amo okinek iuan yas pero okiteochi. 26 Ijkuakon Absalón okilui: “Nimitstlatlaujtia tla te amo touan tiualas, touan mauiki nokni Amnón”. Tekiua okitlajtlani: “¿Tleka tikneki ye namouan mauia?”. 27 Ken Absalón miak uelta okilui tekiua, David okinauati Amnón uan oksekimej ikniuan iuan mauiaj.

28 Absalón okinnauati itlakeualuan: “Xitlachixtokan, ijkuak nankitaskej Amnón yolpaki porque okonik vino, ne namechiluis: ‘¡Xikitskikan Amnón!’. Ijkuakon namejuan moneki nankimiktiskej. Amo ximomojtikan porque ne ijkon namechnauatijtok, ximoyolchikauakan uan amo ximomojtikan”. 29 Ijkuakon itlakeualuan Absalón okitoktijkej* Amnón ijkon ken okinnauatijka. Ijkuak ijkon opanok, nochtin ikoneuan tekiua otlejkokej ipan inmula uan ocholojkej. 30 Ijkuak yejuan ocholojkej, ijkin okimatiltijkej David: “Absalón okinmikti nochtin ikoneuan tekiua, amikaj yoltok”. 31 Ijkuak tekiua ijkon okikak, omoketski, okitsayanki itlaken uan tlalpan omotekak uan nochtin itlakeualuan inauak omokajkej uan noijki okitsayankej intlaken.

32 Pero Jehonadab ikone Simeá, ikni David, okilui: “Noteko amo xikneltoka nochtin mokoneuan okinmiktijkej porque san ye Amnón okimiktijkej. Absalón ijkon otlanauati porque okitlauelitaya Amnón desde ijkuak okipijpinati ikni Tamar. 33 Noteko uan notekiua amo xikneltoka okinmiktijkej nochtin mokoneuan porque san Amnón okimiktijkej”.

34 Ijkuakon Absalón ocholo. Satepan akin otlamaluijtoka otlachixki tlakuitlapan uan okinmitak miakej oualajtokaj ipan ojtli tlen kajki inakastlan tepetl. 35 Ijkuakon Jehonadab okilui tekiua: “¡Xikita! Mokoneuan yomokopkej, ne amo onimitskajkaya”. 36 Ijkuak Jehonadab otlanki ijkon okijto, ikoneuan tekiua okalakej uan otlauelchokatiualayaj. Tekiua uan nochtin itlakeualuan noijki ochokakej porque sapanoua omoyolkokouayaj. 37 Pero Absalón ocholo kanin okatka Talmái ikone Amihud akin otlanauatiaya Guesur. David miak tonal okichokili ikone Amnón. 38 Ijkuak Absalón ocholo, omokauato Guesur eyi xiuitl.

39 Satepan, tekiua David omoyolseui maski omiki Amnón uan okinekiaya kitati Absalón.