Okse ilibro Samuel
21 Ijkuak David okatka, eyi xiuitl amo okipiayaj tlen kikuaskej. Ijkuakon David okitlajtlani Jehová uan Jehová okinankili: “Itlajtlakol Saúl uan akinmej iuan ochantiayaj porque ye okinmikti gabaonitas”. 2 (Gabaonitas opouiayaj inuan amorreos tlen ok omokauayaj, yejuan amo okatkaj israelitas. Israelitas okijtojkaj* kinkauiliskiaj mayoltokan pero Saúl okinekiaya nochtin kinmiktis porque okachi okipatioitaya altepetl Israel uan Judá). Ikinon tekiua David okinnotski gabaonitas para inuan motlapouis. 3 David okinmilui gabaonitas: “¿Ken uelis namechpaleuis? Tejuan otitlajtlakolchijkej, ¿tlen uelis tikchiuaskej para nankiteochiuaskej tlen Jehová otechmakak?”. 4 Gabaonitas okiluijkej: “Amo tiktlajtlanij plata nion oro por tlen Saúl uan ifamilia otechtoktijkej.* Tejuan amo uelis tikmiktiskej nion se israelita”. David okinmilui: “Techtlajtlanilikan san tlen nankinekiskej uan ne nikchiuas”. 5 Yejuan okiluijkej tekiua: “Non tlakatl okinmikti sekimej de tejuan uan okijto nochtin techpojpoloskia itech intlal israelitas, 6 ikinon tiknekij techinmakakan chikome ikoneuan Saúl. Porque ompa Guibeá kanin ochantiaya Saúl akin Jehová okipejpenki, teixpan tikinpiloskej* ixpan Jehová”. Tekiua okijto: “Ne namechinmaktilis”.
7 Pero tekiua David okiknomatki Mefibóset ikone Jonatán ixui Saúl, porque David uan Jonatán ikone Saúl ixpan Jehová okijtojkaj* itlaj kichiuaskiaj. 8 Tekiua okipejpenki Armoní uan Mefibóset tlen okatkaj ikoneuan Rizpá ichpoch Ayá, nonmej ome ikoneuan Saúl. Noijki okinpejpenki makuili ikoneuan Mical* ichpoch Saúl, tlen okinpixki iuan Adriel ikone Barzilái akin meholatita. 9 Satepan nonmej chikome tlakamej okinmaktili gabaonitas uan okinpilojkej ipan tepetl ixpan Jehová kanin san sekan omikej. Okinmiktijkej ijkuak yikin opeuayaj kololouaj cebada. 10 Satepan Rizpá ichpoch Ayá okonanki tlakemitl tetsojtsopiti* uan okiso ipan tetl.* Ompa omoka desde ijkuak opeuayaj kololouaj cebada hasta ijkuak opejki kiaui kanin okatkaj akinmej okinpilojkej. Tlajka amo okinkauili totomej* mamotokikan uan youak amo okinkauili yolkamej tlen amo mansojtsitsintin mamotokikan.
11 David okimatiltijkej tlen okichi okse isiua Saúl tlen omotokayotiaya Rizpá ichpoch Ayá. 12 Satepan David okintemoto iomiouan Saúl uan iomiouan Jonatán. Tlakamej tlen okatkaj Jabés-Galaad okinpixtokaj nonmej omimej porque okinmichtekej tiankisko de Bet-San, kanin filisteos okinpilojkaj ijkuak okitlanilijkej Saúl ompa Guilboa. 13 David okinuikak iomiouan Saúl uan iomiouan Jonatán uan okinmololojkej iomiouan tlakamej tlen okinpilojkej. 14 Satepan ompa altepetl Zelá tlen poui itech itribu Benjamín kanin otoktoka Quis ipapa Saúl, okintokakej iomiouan Saúl uan iomiouan Jonatán. Ijkuak okichijkej tlen tekiua otlanauati, toTajtsin Dios okinkak ijkuak yejuan omotlatlaujtiayaj ipatka inmialtepe.
15 Oksepa opejki momijmiktiaj filisteos uan israelitas. Ijkuakon David uan itlakeualuan okinmiktitoj filisteos pero David ayakmo otlaxikouaya. 16 Isbí-Benob akin opouiaya inuan refaím, okinekiaya kimiktis David. Ye okiuikaya ilanza de cobre, tlen okatka etik kanaj eyi kilo uan tlajko,* noijki okiuikaya iespada yankuik. 17 Pero Abisái ikone Zeruyá san niman okipaleuiko David. Abisái okixnamik non filisteo uan okimikti. Ijkuakon itlakeualuan David okiluijkej:* “Ayakmo touan tias ijkuak titemiktitiuij para amo tikseuis intlauil israelitas”.
18 Satepan israelitas okinmiktitoj filisteos ompa Gob. Non tonal Sibecái akin husatita okimikti Saf akin opouiaya inuan refaím.
19 Israelitas oksepa okinmiktitoj filisteos ompa Gob. Elhanán ikone Jaaré-Oreguim akin betlemita okimikti Goliat akin guitita, ikojyo ilanza okatka ken se kouitl tlen ika otlaijkitiayaj.*
20 Israelitas otemijmiktitoj Gat, itech non altepetl okatka se tlakatl sapanoua uejkapantik,* sejse ima okipiaya chikuase imajpiluan uan sejse ikxi okipiaya chikuase ikxipiluan, ik nochi okinpiaya veinticuatro. Ye noijki opouiaya inuan refaím. 21 Non tlakatl san okinpepeualtiaya israelitas ikinon Jonatán okimikti. Jonatán ipapa Simeí ikni David.
22 Nonmej naui tlakamej opouiayaj inuan refaím tlen ochantiayaj Gat. David uan itlakeualuan okinmiktijkej nonmej tlakamej.