Achto ilibro Samuel
9 Itech itribu Benjamín okatka se tlakatl tlen omotokayotiaya Quis, non benjaminita okipiaya miak tomin. Ye ixui Abiel, Abiel ikone Zeror, Zeror ikone Becorat uan Becorat ixui Afías. 2 Quis okipiaya se itelpoch tlen omotokayotiaya Saúl tlen kuajkualtsin okatka. Nion se israelita okatka kuajkualtsin ijkon ken ye. Noijki okatka uejkapantik* uan nochtin san oajsiayaj iajkol.
3 Se tonal Quis ipapa Saúl, opolikej iburros uan Quis okilui Saúl: “Nimitstlatlaujtia, xikuika se tlakeuali uan xikintemoti burros”. 4 Yejuan otlatemojkej itech nochi tepeyo tlen kajki Efraín uan itech tlali tlen kajki Salisá pero amo okinmajsikej. Okipanouijkej tlali tlen kajki Saalim pero noijki amo okinmajsikej. Otlatemojkej itech nochi intlal benjaminitas pero amo kanaj okinmajsikej.
5 Ijkuak oajsitoj itech tlali tlen kajki Zuf, Saúl okilui tlakeuali tlen iuan okatka: “Tiauij, matimokopakan tlamo nopapa tiktekipachoskej uan ayakmo kitekipachos iburros”. 6 Pero tlakeuali okilui: “¡Xikita! Itech non altepetl kajki se tlakatl tlen kitekichiuilia akin melauak toTajtsin Dios uan miakej kitlakaitaj. Nochi tlen kijtoua mochiua. Matikitatij, xamo ye techiluis ik kanin tiaskej”. 7 Saúl okilui itlakeual: “¿Tlen tikuikiliskej tla ompa tiaskej? Ayakmo tikpiaj pan itech tobolsa. Amo tikpiaj tlen tikmakaskej tlakatl tlen kitekichiuilia akin melauak toTajtsin Dios. ¿Kox ok tikpiaj itlaj tlen uelis tikmakaskej?”. 8 Pero itlakeual Saúl oksepa okilui: “Xikita ne nikpia seki plata,* nikmakas non tlakatl tlen kitekichiuilia akin melauak toTajtsin Dios uan ye techiluis ik kanin tiaskej”. 9 (Yiuejkika ijkuak se israelita okinekiaya itlaj kitlajtlanis toTajtsin Dios, okijtouaya: “Matikitatij tlachixki”. Porque profetas tlen axkan katej, achto okinmiluiayaj tlachixkej). 10 Ijkuakon Saúl okilui itlakeual: “Kuali tlen tikijtoua, tiauij”. Satepan oyajkej itech altepetl kanin okatka tlakatl tlen kitekichiuilia akin melauak toTajtsin Dios.
11 Ijkuak otlejkotiayaj para ajsitiuij itech non altepetl, okinmajsitoj sekimej ichpochmej tlen okikixtijtokaj atl uan okintlajtlanijkej: “¿Ik nikan kajki tlachixki?”. 12 Yejuan okinankilijkej: “Xikitakan kajki okachi tlayekapan. Yikin oajsiko itech altepetl porque axkan israelitas kitemakaskej tetliokolil kanin tlaueyichiuaj,* ikinon san niman xiakan. 13 Nankajsitiuij ijkuak nankalakiskej altepetl. Ye tlejkos tlakuatij kanin tlaueyichiuaj, ikinon san niman xiakan. Porque akinmej ompa katej amo tlakuaskej hasta ijkuak ye ajsiti uan kiteochiuas tetliokolil. Hasta ijkuak ye ajsiti tlakuaskej akinmej ompa katej, ok nankajsitiuij tla san niman nantlejkoj”. 14 Yejuan otlejkokej itech altepetl uan ijkuak oyayaj itlajkotia non altepetl, okitakej Samuel oualaya para iuan tlejkoskiaj kanin otlaueyichiuayaj.
15 Se tonal achto ajsiskia Saúl, Jehová okilui Samuel: 16 “Mostla kanaj nin hora nimitstitlanilis se tlakatl tlen poui itech itribu Benjamín. Moneki tikkuatlalilis aceite uan ijkon kiyekanas noaltepe. Ye kinmakixtis israelitas inmak filisteos, porque yonikak uan yonikitak israelitas tlajyouiaj uan san moyolkokouaj”. 17 Ijkuak Samuel okitak Saúl, Jehová okilui: “Nikan kajki tlakatl tlen onimitsilui: ‘Kinnauatis israelitas’”.
18 Ijkuakon Saúl omotoki inauak Samuel itlajkotia puerta tlen kajki itech non altepetl uan okitlajtlani: “¿Uelis techiluis kanin ikalijtik tlachixki?”. 19 Samuel okinankili Saúl: “Ne nitlachixki. Nouan xitlejko kanin tlaueyichiuaj, axkan nantlakuaskej nouan uan mostla san kualkan* uelis nanyaskej. Nimitsiluis nochi tlen tikneki tikmatis. 20 Amo ximotekipacho, porque burros tlen opolikej yiuiptla, yokinmajsikej. ¿Akin iaxka nochi tlamantli patio tlen inmiaxka israelitas? ¿Amo moaxka uan iaxka ifamilia mopapa?”. 21 Ijkuak Saúl ijkon okikak, okijto: “¿Tleka ijkon techiluia? Ne nibenjaminita uan notribu okachi tsikitsin uan amo ken oksekimej intribus israelitas. Nofamilia amo okachi ipati ken familias tlen pouij itech itribu Benjamín”.
22 Satepan Samuel okiuikak Saúl uan itlakeual kanin tlakuaskiaj, okintlali kanin motlaliaj akinmej okachi ueyititokej. Ompa okatkaj kanaj 30 tlakamej. 23 Samuel okilui akin otlakualchi: “Xikualika nakatl tlen onimitsiluijka xikxelo”. 24 Akin otlakualchi okiualikak ajsitok se imets* yolkatl tlen okimiktijkej uan okimakakej Saúl. Ijkuakon Samuel okilui: “Nikan kajki tlen otimitstlatilijkej, xikkua porque okixelojkej para axkan tikkuas, porque ne onikijtojka: ‘Onikinyole sekimej matlakuakij’”. Non tonal Saúl uan Samuel san sekan otlakuajkej. 25 Satepan okikajkej kanin otlaueyichiuayaj uan oyajkej altepetl. Samuel ok omotlapoui iuan Saúl ikpak* kali. 26 Mostlatika ijkuak yitlanestiuits, san kualkan omejkej. Ijkuakon Saúl okatka ikpak non kali, Samuel okinotski uan okilui: “Ximoyektlali porque nimitskajkauati”. Saúl omotlayektlalili uan satepan okiskej. 27 Ijkuak okistiayaj itech non altepetl, Samuel okilui Saúl: “Xikilui motlakeual matlayekana”. Uan itlakeual otlayekanki. Noijki okilui: “Te nikan ximokaua porque moneki nimitsiluis tlen toTajtsin Dios onechilui”.