Tlen okijkuilo Juan
21 Satepan Jesús oksepa okinmonextili discípulos itempa mar Tiberíades. Ijkin okinmonextili: 2 san sekan okatkaj Simón Pedro, Tomás tlen okiluiayaj Gemelo, Natanael tlen oualaya Caná ompa Galilea, ikoneuan Zebedeo uan ok ome discípulos. 3 Simón Pedro okinmilui: “Ne nimichkitskiti”. Yejuan okiluijkej: “Tejuan mouan tiaskej”. Oyajkej uan otlejkokej itech se barco pero non youak amo okikitskijkej nion se michin.
4 Ijkuak otlaneski, Jesús okatka itempa mar pero idiscípulos amo okixmatkej. 5 Ijkuakon Jesús okintlajtlani: “Nokoneuan, ¿amo nankipiaj nion se michin tlen nankikuaskej?”. Yejuan okinankilijkej: “Amo”. 6 Ye okinmilui: “Xiktlamotlakan michayatl ik namoyekma inakastlan barco uan nankinmajsiskej michimej”. Ijkuak okikajkajkej michayatl, okinkitskijkej miakej michimej uan amo ueli okikixtiayaj. 7 Ijkuakon discípulo tlen Jesús okitlasojtlaya okilui Pedro: “¡Ye toTeko!”. Ijkuak Pedro ijkon okikak, okonaki itlaken porque amo nochi otlakentoka uan omotlamotlak ijtik mar. 8 Pero oksekimej discípulos oajsitoj itempa mar itech se barco tsikitsin. Yejuan okitilantiajkej michayatl tlen otentiaya ika michimej. Okatkaj kanaj 90 metros ik itempa mar.
9 Ijkuak oajsitoj itempa mar, okitakej oxotlatoka tlitl uan ipan tlixochtli okatka michin uan pan. 10 Jesús okinmilui: “Xikinualikakan seki michimej tlen yikin onankinkitskijkej”. 11 Simón Pedro otlejkok itech barco uan okitilantia michayatl tlen otentoka ika michimej. Ijtik michayatl okatkaj 153 uejueyij michimej pero amo okotonki maski miakej okinpiaya. 12 Jesús okinmilui: “Xitlakuakij”. Pero nion se discípulo omixeui okitlajtlani akin ye porque yokimatiayaj ye Jesús. 13 Jesús omotoki, okonanki pan uan okinmakak. Satepan noijki okonanki michin uan okinmakak. 14 Ijkuakon yieyi uelta Jesús okinmonextili discípulos ijkuak yokiyolitijkaj.
15 Ijkuak otlanki otlakuajkej, Jesús okitlajtlani Simón Pedro: “Simón ikone Juan, ¿okachi techtlasojtla noso okachi tikintlasojtla ninmej?”. Ye okinankili: “Kema noTeko, te tikmati nimitstlasojtla”. Jesús okilui: “Xikintlamaka nochkauan”. 16 Satepan oksepa okitlajtlani: “Simón ikone Juan, ¿techtlasojtla?”. Ye okinankili: “Kema noTeko, te tikmati nimitstlasojtla”. Jesús okilui: “Xikinmalui nochkatsitsiuan ken se tlajpixki”. 17 Jesús okitlajtlani ipan eyi uelta: “Simón ikone Juan, ¿techtlasojtla?”. Pedro omoyolkoko porque Jesús eyi uelta okitlajtlani kox okitlasojtlaya. Okilui: “NoTeko, te nochi tikmati uan tikmati nimitstlasojtla”. Jesús okilui: “Xikintlamaka nochkatsitsiuan. 18 Ne melauak nimitsiluia, ijkuak otikatka titelpochtli moselti otimotlakentiaya uan otiaya san kanin otiknekiaya. Pero ijkuak tikokoxkatis,* tikinmajkokuis momauan uan okse mitstlakentis uan mitsuikas kanin amo tiknekis”. 19 Jesús ijkon okijto para kiteititiskia ken ixpoliuiskia Pedro uan ijkon kiueyichiuaskia toTajtsin Dios. Satepan okilui: “Nouan xiuiki”.
20 Pedro omokopki uan okitak okintokaya discípulo tlen Jesús okitlasojtlaya. Non discípulo ye tlen omotekak ielpan Jesús ijkuak otlakuajtokaj uan okitlajtlani akin kitemaktiskia. 21 Ijkuak Pedro okitak non discípulo, okitlajtlani Jesús: “NoTeko, ¿ye tlen kipanos?”. 22 Jesús okinankili: “¿Kox moteki tla ne nikneki nikan mamokaua hasta ijkuak ne niuits? Te nouan xiuiki”. 23 Ikinon tokniuan okijtojtinemiayaj non discípulo amo ixpoliuiskia. Pero Jesús amo okijto amo ixpoliuiskia. Ye okijto: “¿Kox moteki tla ne nikneki nikan mamokaua hasta ijkuak ne niuits?”.
24 Non discípulo kitematiltia nin tlamantli uan ye okijkuilo. Tikmatij melauak tlen ye kitematiltia.
25 Jesús okichi ok miak tlamantli pero tla nochi moijkuiloskia, rollos tlen moijkuiloskiaj xamo amo akiskiaj nikan tlaltikpak.