Achto carta para Timoteo
3 Nin tlamantli uelis kineltokaskej: se tlakatl kineki kichiuas se kuali tekitl tla mochijchikaua yetos tlayekanki. 2 Ikinon se tlayekanki amo makichiua itlaj tlen ika kiteluiskej, makipia san se isiua, nochi makichiua ken moneki, kuali mamokuayejyeko,* nochi kuali makichiua, kuali makinseli oksekimej uan makimati ken tlamachtis. 3 Amo matlauana, amo mateuiteki, mateajsikamati, amo mamokualanijtinemi nion amo makixneki tomin. 4 Non tlakatl moneki kuali kiyekanas ifamilia, ikoneuan matetlakamatikan* uan makichiuakan tlen kuali. 5 Porque tla se tlakatl amo kimati kiyekanas ifamilia, ¿ken kimaluis itlanechikol toTajtsin Dios? 6 Amo mayeto se tlakatl tlen yikin opejki tlaneltoka para amo moueyinekis uan amo kixkomakaskej ken Diablo. 7 Noijki akinmej amo tlaneltokaj makitakan kuali tlen kichiua. Ijkon amo uelis kiteluiskej uan amo uetsis itech itrampa Diablo.
8 Noijki siervos ministeriales makimatikan ken kichiuaskej inteki, amo matlakajkayauakan, amo makonikan miak vino, amo makixnekikan tomin uan amo makichiuakan tlen san yejuan kinpaleuis. 9 Nochipa makineltokakan tlamantli santo tlen amo omomatiaya uan makipiakan chipauak intlalnamikilis.
10 Achto makinmitakan kox uelis kichiuaskej inteki. Tla amikaj kinteluia ijkuakon makinpaleuikan tlayekankej.
11 Siuamej noijki moneki kimatiskej ken kichiuaskej inteki. Amo makinteneuakan* oksekimej para amo kuali makinmitakan. Kuali makipiakan innemilis uan nochipa makiteititikan kineltokaj toTajtsin Dios.
12 Siervos ministeriales makipiakan san se insiua. Noijki kuali makinyekanakan infamilia uan inkoneuan. 13 Tlakamej tlen kichiuaj kuali inteki, kimotlaniliaj makintlakaitakan uan amitlaj kintsakuilis makijtokan kineltokaj Cristo Jesús.
14 Nimitsijkuililia nochi nin tlamantli maski nikneki san niman nimitstlajpaloti. 15 Pero tla niuejkauas, nikneki xikmati ken moneki tikpias monemilis itech ifamilia toTajtsin Dios, nin kijtosneki itlanechikol toTajtsin Dios tlen yoltok. Non tlanechikol kichikajtok uan kipaleuia tlen melauak. 16 Melauak miak ipati tlamantli santo tlen amo omomatiaya uan kijtoua akin kiteititiskia kiueyichiua toTajtsin Dios: ‘Jesús omochiuako tlakatl, toTajtsin Dios okitak yolkuali ijkuak oksepa okikopki se espíritu, oyajki kanin katej ángeles, itech altepemej omotematilti akin ye, ipan tlaltikpak okineltokakej, okiselijkej ompa iluikak uan okiueyitlalijkej’.