Josué
3 Josué san kualkan* omejki, ye uan nochtin israelitas okiskej Sitim, oyajkej kanin kajki aueyatl* Jordán, ompa omokajkej se youak uan satepan okipanouijkej.
2 Ijkuak yopanok eyi tonal, akinmej okinnauatiayaj israelitas opanokej ik kanin nochtin okatkaj 3 uan okinmiluijkej: “Xiakan uan xikintokakan teopixkej levitas ijkuak nankinmitaskej kiuikaj iarca Jehová namoDios tlen ika omochi acuerdo.* 4 Pero amo okachi innauak ximotokikan, san xikintokakan kanaj 900 metros* para nankimatiskej ik kanin nanyaskej, porque amo keman ik ompa nanpanouaj”.
5 Josué okinmilui: “Ximoyektlalikan, porque mostla Jehová kinchiuas milagros”.
6 Satepan ye okinmilui teopixkej: “Xikajkokuikan arca tlen ika omochi acuerdo uan xipanokan inmixpan israelitas”. Teopixkej okajkolmamajkej arca tlen ika okichijkej acuerdo uan opanokej inmixpan israelitas.
7 Jehová okilui Josué: “Ne nimitspaleuis ijkon ken onikpaleui Moisés. Ikinon desde axkan ne nikchiuas israelitas mapeuakan mamitstlakaitakan. 8 Ijkin xikinnauati teopixkej tlen kiuikaj arca tlen ika omochi acuerdo: ‘Ijkuak nanmajsitiuij itempa aueyatl Jordán, moneki ompa nanmoketsatiuij’”.
9 Satepan Josué okinmilui israelitas mamotokikan uan makikakikan tlen okijto Jehová. 10 Josué okinmilui: “ToTajtsin Dios tlen yoltok, namoixpan kinmixpolos cananeos, hititas, heveos, perizitas, guirgaseos, amorreos uan jebuseos, ijkon nankitaskej ye namechpaleuijtok. 11 Namoixpan yas arca tlen ika omochi acuerdo tlen iaxka akin tlanauatia ipan nochi tlaltikpak ijkuak nankipanouiskej Jordán. 12 Xikinpejpenakan 12 tlakamej itech intribus israelitas. Itech sejse tribu makipejpenakan se tlakatl. 13 Teopixkej kiuikaskej iarca Jehová akin tlanauatia ipan nochi tlaltikpak, ijkuak yejuan moketsaskej ipan aueyatl Jordán, non aueyatl ayakmo panos uan atl mochiuas ken yetoskia se tepamitl”.
14 Israelitas okiskej kanin okatkaj. Teopixkej tlen okiuikayaj arca tlen ika omochi acuerdo oyayaj inmixpan israelitas ijkuak kipanouiskiaj aueyatl Jordán. 15 Nin aueyatl Jordán omoueyitiliaya ijkuak okololouayaj tlen okitokayaj. Ijkuak teopixkej tlen okiuikayaj Arca oajsitoj itempa non aueyatl, okinkalakijkej inmikxiuan ijtik atl. 16 Satepan atl omochi ken yetoskia se tepamitl ik altepetl Adán tlen okatka inakastlan Zaretán, ikinon ayakmo opanouaya. Noijki ouaki atl tlen oajsiaya mar Arabá noso mar Salado.* Israelitas ueli opanokej Jericó porque atl ayakmo opanouaya. 17 Ijkon nochtin israelitas opanokej ik kanin ayakmo okatka atl ijkuak teopixkej omoketokaj itlajkotia Jordán uan okipixtokaj iarca Jehová tlen ika omochi acuerdo.