Carta para Romanos
9 Ne nikchiua ken Cristo ikinon nikijtoua tlen melauak uan amo nitlakajkayaua. Notlalnamikilis moyekana ika espíritu santo uan kitematiltia 2 sapanoua nimoyolkokoua uan san nimotekipachoua. 3 Porque ne niknekiskia manechtlajyouiltikan inpatka nokniuan judíos tlen amo kichiuaj ken Cristo tla ijkon uelis nikinpaleuiskia. 4 Yejuan israelitas tlen toTajtsin Dios okinseli ken ikoneuan uan okinueyitlali. Ye inuan okichi acuerdos* uan okinmakak iTlanauatil Moisés. Noijki kipiaj tlateochiualistli porque kiueyichiuaj uan ye okinmilui tlen kichiuas. 5 Yejuan inmixuiuan touejkatatajuan uan ompa okiski Cristo. Nochipa makiueyichiuakan toTajtsin Dios tlen nochi kinauatia. Amén.
6 ¿Kijtosneki amo omochi tlen okijto toTajtsin Dios? Amo. Porque amo nochtin ikoneuan Israel melauak israelitas. 7 Noijki amo nochtin tlen ualeuatokej itech Abrahán melauak ikoneuan. ToTajtsin Dios okilui Abrahán: “Moxuiuan ualeuatoskej itech Isaac”. 8 Non kijtosneki amo nochtin ikoneuan Abrahán melauak ikoneuan toTajtsin Dios. Yiuejkika toTajtsin Dios okijto itlaj kichiuaskia uan axkan kinpejpentok sekimej tlen melauak ikoneuan. 9 Porque toTajtsin Dios okijto: “Niuits kanaj ipan se xiuitl uan Sara kipias se ikone”. 10 Noijki ijkon opanok ijkuak Rebeca okinpixki gemelos tlen okatkaj ikoneuan touejkatata Isaac. 11 Ijkuak yejuan ayamo onesiayaj* uan ayamo okichiuayaj tlen kuali noso tlen amo kuali, toTajtsin Dios yokijtojka akin kipejpenaskia. Porque toTajtsin Dios kipejpena akin ye kineki uan amo techpejpena ika tlen tikchiuaj. 12 ToTajtsin Dios okilui Rebeca: “Mokone tlen tlayekana* yetos itlakeual mokone xokoyotl”. 13 Ijkon ken ijkuilitok: “Oniktlasojtlak Jacob pero onikkokoli Esaú”.
14 ¿Tlen tikijtoskej? ¿Kijtosneki toTajtsin Dios amo yolkuali? ¡Amo! 15 Porque ye okilui Moisés: “Ne niktlasojtlas akin ne niknekis niktlasojtlas uan nikiknomatis akin ne niknekis nikiknomatis”. 16 Ikinon toTajtsin Dios techpejpena porque teiknomati uan amo techpejpena porque tiknekij noso porque timochijchikauaj. 17 Itech iTlajtol toTajtsin Dios ijkuilitok tlen ye okilui faraón: “Onimitskauili xiyolto para nimitsititis nochikaualis uan ijkon mamotematilti notoka ipan nochi tlaltikpak”. 18 Ye kiknomati akin ye kineki kiknomatis pero kikauilia mayoltlakuaua akin amo tlakaki.
19 Pero sekimej nechtlajtlaniskej: “¿Tleka ye ok techtlajtlakoltia? ¿Akin uelis kiluis amo makichiua tlen ye kineki?”. 20 ¿Akinmej namejuan para nankinanankiliskej toTajtsin Dios? ¿Uelis se komitl kiluis akin okichi: “¿Tleka ijkon otechchi?”? 21 Akin kinchiua konmej, ¿amo uelis kichiuas ika sokitl* se komitl tlen kinejnekiskej* se tonal miak ipati uan okse kichiuas tlen nochipa kinejnekiskej?* 22 ToTajtsin Dios noijki ijkon kichiua. Ye kineki kiteititis ikualanilis inpan akinmej amo yolkualmej uan kinmatiltis oksekimej kipia chikaualistli. Pero ye kinchixtok akinmej kikualaniaj maski kinnamiki ixpoliuiskej. 23 Ijkon okichi para kinmititis akinmej kinmiknomati ye sapanoua ueyititok. Yejuan kiseliskej tetliokolil tlen ye yokinyektlalili. 24 Amo san tejuan tijudíos otechpejpenki. Noijki okinpejpenki oksekimej itech okseki altepemej. 25 Panotok ijkon ken ye okijto itech libro Oseas: “Akin amo noaltepe niknotsas noaltepe, uan siuatl tlen amo oniktlasojtlaya niknotsas ‘notlasojtsin’. 26 Kanin onikinmilui: ‘Namejuan amo nanpouij itech noaltepe’, satepan ompa nikinmiluis: ‘Ne niDios tlen niyoltok uan namejuan nannokoneuan’”.
27 Isaías noijki otlajto itech Israel uan okijto: “Amo miakej israelitas momakixtiskej maski yetoskej miakej ken xali tlen kajki itempa mar. 28 Porque Jehová san niman kinmixkomakas akinmej chantij ipan tlaltikpak”. 29 Isaías noijki okijto nin profecía: “Tla Jehová akin kinyekana ángeles amo kinkauiliskia mayoltokan toxuiuan, techpanoskia ijkon ken okinpanok akinmej ochantiayaj Sodoma uan Gomorra”.
30 ¿Tlen tikijtoskej? Akinmej amo judíos amo okitemouayaj makinmitakan yolkualmej, pero okinmitakej yolkualmej porque otlaneltokakej. 31 Maski israelitas omochijchikauayaj kitlakamatiskej* tlanauatil para makinseli toTajtsin Dios, amo ouelik okichijkej nochi tlen kijtoua tlanauatil. 32 ¿Tleka? Porque yejuan san okichijkej tlen kijtoua tlanauatil pero amo otlaneltokakej. Omokxitlanuijkej ika “tetl tlen teikxitlanuia”. 33 Ijkon ken ijkuilitok: “Ompa Sion niktlalia se tetl tlen teikxitlanuia uan tetsakuilia, pero amo mopinatis akin kineltokas”.