Rut
2 Elimélec tlen okatka inamik Noemí, okipiaya se ifamiliar tlen okipiaya miak tomin uan omotokayotiaya Boaz.
2 Rut tlen okatka moabita okilui Noemí: “Techkauili manio tetlala para nikitas kox ikaj nechkauilis manikololojtij imiauayo cebada tlen kikajtiuij”. Noemí okilui: “Xio nochpoch”. 3 Ikinon Rut oyajki tetlala uan opejki kololoua tlen okikajtiayaj tlakeualmej. Satepan oajsito itlala Boaz tlen okatka ifamiliar Elimélec. 4 Ijkuakon Boaz omokopato Belén uan okinmilui itlakeualuan: “Jehová namouan mayeto”. Yejuan okinankilijkej: “Jehová mamitsteochiua”.
5 Satepan Boaz okitlajtlani tlakatl tlen okinyekanaya itlakeualuan: “¿Akin non ichpochtli? ¿Akinmej ifamiliares?”. 6 Ye okilui: “Non ichpochtli ochantiaya Moab uan ouala iuan Noemí. 7 Ye onechilui kox uelis kololojtias imiauayo cebada tlen kikajtiuij tlakeualmej. Desde kualkan opejki tekipanoua uan yikin omoseuito ijkuak omotlalito itlampa kaltsintli”.
8 Satepan Boaz okilui Rut: “Nokone, amo oksekan xikololoti tlen kikajtiuij, nikan ximokaua inuan siuamej tlen nechpaleuiaj. 9 Xikita kanin tlaololojtokej uan inuan xio. Yonikinnauati telpochmej amo mamitskuejsokan.* Ijkuak tiamikis xio kanin katej atekonmej uan xikoni atl tlen kikixtiaj telpochmej”.
10 Rut omotlankuaketski ijkuak okikak tlen okijto Boaz, omoixtlapacho tlalpan uan okilui: “Ne amo nikan noaltepe, ¿tleka techpaleuia uan mitstekipachoua tlen nechpanoua?”. 11 Boaz okilui: “Onechiluijkej nochi tlen otikchi para tikpaleuis momonna desde ijkuak omiki monamik. Otikka mopapa, momama uan moaltepe uan otichantiko kanin amo titlaixmati. 12 Jehová mamitstlaxtlaui tlen yotikchi uan Jehová inDios israelitas ajsitok mamitsteochiua, porque otimopaleui itlampa iajasuan”.* 13 Rut okilui: “Nimitstlasojkamatilia noteko porque otechpaleui, maski amo nimotlakeual otechyolseui uan tlen otikijto onechyolajsik”.
14 Ijkuak yitlakuaskiaj, Boaz okilui Rut: “Xiuiki, xiktilana seki pan uan xikapacho ijtik vinagre”. Ikinon ye omotlali inuan akinmej otekipanojtokaj uan Boaz okimakak seki semilla tlen okitliuatskej. Ye otlakua hasta oixuik* pero amo okitlami tlen okimakakej. 15 Ijkuak ye oksepa tekipanoskia, Boaz okinnauati itlakeualuan: “Xikkauilikan noijki matlaololo kanin nankitlalijtiuij imiauayo cebada tlen yonankitekej uan amo xikuejsokan.* 16 Noijki xikojkopintiakan uan xikkajtiuiaj seki imiauayo cebada tlen yonankilpijkej para ye makololojtij uan xikkauilikan ijkon makichiua”.
17 Rut otekipano hasta yitiotlak. Ijkuak okichipa nochi cebada tlen okololo, okiski kanaj 13 kilos.* 18 Satepan tlen okololo okiuikak ikalijtik uan okititi imonna. Noijki okikixti tlakuali tlen amo okitlami uan okimakak.
19 Imonna okitlajtlani: “¿Axkan kanin otikololoto cebada? ¿Kanin otitekipanoto? ToTajtsin Dios makiteochiua akin omitsiknomatki”. Rut okijto akin iuan otekipano. Okilui: “Axkan onitekipano itlala se tlakatl tlen itoka Boaz”. 20 Ijkuak Noemí ijkon okikak, okilui: “Jehová makiteochiua, toTajtsin Dios kinmiknomati akinmej yoltokej uan akinmej yomikej”. Noijki okilui: “Non tlakatl ifamiliar nonamik uan ye uelis techpaleuis para ayakmo matitlajyouikan”. 21 Rut tlen okatka moabita okilui Noemí: “Boaz onechilui manio inuan akinmej kipaleuiaj para manikololojtij tlen kikajtiuij, okijto uelis ijkon nikchiuas hasta ijkuak tlamis kololoskej tlen okitokakej”. 22 Noemí okilui isiuamo: “Ijkon xikchiua nochpoch, xiuia inuan itlakeualuan ijkon amikaj mitskuejsos”.*
23 Ikinon Rut oyaya kololoti tlen okikajtiayaj siuamej tlen okipaleuiayaj Boaz. Ijkon okichi hasta ijkuak otlankej okololojkej cebada uan hasta ijkuak otlankej okololojkej trigo. Ye omoka iuan imonna.