Okse ilibro Samuel
4 Is-Bóset ikone Saúl sapanoua omomojti uan israelitas sapanoua omotekipachojkej ijkuak okimatkej Abner okimiktijkej ompa Hebrón. 2 Ikone Saúl okipaleuiayaj ome tlakamej, yejuan okinyekanayaj akinmej otlachtekiayaj. Se omotokayotiaya Baaná uan okse Recab, yejuan ikoneuan Rimón akin beerotita tlen opouiaya itech itribu Benjamín. (Ijkuakon altepetl Beerot, noijki okijtouayaj poui itech itribu Benjamín. 3 Berotitas ocholojkej Guitaim uan hasta axkan ompa chantij ken akinmej uitsej itech okse altepetl).
4 Jonatán ikone Saúl okipiaya se ikone tlen omotokayotiaya Mefibóset, ye okatka koxo porque ijkuak okipiaya makuili xiuitl, akin okichichitiaya okinapalo uan iuan ocholo pero ijkuak ocholojtoka okimakajka ikinon okoxotiak. Ijkon opanok porque ompa Jezreel omomatki Saúl uan Jonatán okinmiktijkej.
5 Recab uan Baaná ikoneuan Rimón akin beerotita, oyajkej ikalijtik Is-Bóset ijkuak chikauak otlatotoniaya, ijkuakon Is-Bóset tlajkotonal omoseuijtoka. 6 Recab uan ikni Baaná okalakej ikalijtik Is-Bóset ken yetoskia okitemotoj trigo pero satepan itlaj okijtitsoponilijkej Is-Bóset uan ocholojkej. 7 Ijkuak yejuan okalakej kalijtik, Is-Bóset okatka icuarto uan omoseuijtoka ipan tlen okochiaya. Yejuan itlaj okijtitsoponilijkej uan okimiktijkej, satepan okikechtsontekej uan okiuikakej itsonteko. Nochi youak onejnenkej ipan ojtli tlen yaui Arabá. 8 Satepan oajsitoj Hebrón, okiuikilijkej tekiua David itsonteko Is-Bóset uan okiluijkej: “Otimitsualikilijkej itsonteko Is-Bóset ikone Saúl akin omitskokoliaya uan okinekiaya mitsmiktis. Axkan Jehová kikauilia noteko uan notekiua makintlaxtlauilti Saúl uan ixuiuan tlen okichijkej”.
9 Pero David okinnankili Recab uan Baaná, ikoneuan Rimón akin beerotita: “Ijkon ken Jehová melauak yoltok, akin onechmakixti ijkuak san onimotekipachouaya, 10 tlakatl akin omokuayejyekouaya* onechiluiko itlaj kuali ijkuak okijto: ‘Saúl omiki’, onikchi makikitskikan uan makimiktikan ompa Ziclag, ¡ijkon oniktokti* porque onechiluiko tlen opanok! 11 ¡Noijki ijkon nikintoktis* akinmej okimiktijkej se tlakatl tlen amitlaj okichi tlen omoseuijtoka ipan tlen okochiaya ompa ikalijtik! ¿Amo moneki namechtlajyouiltis uan namechmiktis porque onankimiktijkej?”. 12 Ijkuakon David okinnauati itlakeualuan makinmiktikan. Okintekilijkej inmauan uan inmikxiuan uan ompa Hebrón okinpilojkej inakastlan se tanque. Pero itsonteko Is-Bóset okitokatoj Hebrón kanin otoktoka Abner.