Okse ilibro Samuel
8 Satepan David okintlanili filisteos uan okinmakixtili Meteg-Amá.
2 Noijki okintlanili moabitas. Okichi mamotekakan tlalpan uan okintamachi ika se mekatl. Okinxexelo ika grupos, ome grupos mikiskiaj uan se grupo yoltoskia. Moabitas omochijkej itlakeualuan David uan okitlatlaxtlauiliayaj.
3 David noijki okitlanili Hadadézer ikone Rehob akin otlanauatiaya Zobá, ijkuak oyayaj para oksepa kinnauatis akinmej ochantiayaj ik kanin kajki aueyatl* Éufrates. 4 Ijkuakon David okinkitski 1,700 tlakamej tlen oyayaj inpan incaballos uan noijki okinkitski 20,000* soldados, satepan okinkoxotili caballos tlen okinuikayaj carretas pero amo ijkon okintokti* 100 caballos.
5 David okinmikti 22,000* sirios tlen ochantiayaj Damasco porque okinekiayaj kipaleuiskej tekiua Hadadézer tlen otlanauatiaya Zobá. 6 Satepan David okintlali soldados ompa Damasco tlen poui Siria, sirios omochijkej itlakeualuan David uan okitlatlaxtlauiliayaj. Maski David san kanin oyaya, Jehová okichiuaya matlatlani. 7 Satepan David okinkuili itlakeualuan Hadadézer inmiescudos yaualtikej* de oro uan satepan okinuikak Jerusalén. 8 Tekiua David okiuikak miak cobre tlen okatka itech altepemej Bétah uan Berotái, ialtepeuan Hadadézer.
9 Ijkuakon tekiua Toi tlen otlanauatiaya Hamat, okimatki tekiua David okintlanili isoldados Hadadézer. 10 Ikinon Toi okititlanki Joram tlen okatka ikone, makitlajtlaniti David ken okatka uan makilui kuali tlen okichi ijkuak okixnamik Hadadézer uan okitlanili porque Hadadézer miak uelta omoixnamik iuan Toi. Joram okiuikili David seki tlamantli de plata, oro uan cobre. 11 Nochi non, tekiua David okimakak Jehová, okichi ijkon ken ijkuak okitemakak plata uan oro tlen okimoaxkati ijkuak okintlanili altepemej: 12 Siria, Moab, inmialtepe ammonitas, filisteos uan amalequitas. Noijki tlen okitlanili Hadadézer, ikone Rehob akin otlanauatiaya Zobá. 13 Miakej okixmatkej David ijkuak okinmikti 18,000* edomitas ompa ixtlauak* Istatl. 14 Ye okintlali soldados ompa Edom. Itech nochi Edom okintlali soldados uan nochtin edomitas omochijkej itlakeualuan David. Maski David san kanin oyaya, Jehová okichiuaya matlatlani.
15 David ok otlanauati itech nochi altepetl Israel, ye okichi tlen kuali uan ken omonekiaya itech nochi ialtepe. 16 Joab ikone Zeruyá okinyekanaya soldados, Jehosafat ikone Ahilud okijkuilouaya tlen opanouaya itech non tekiuajkayotl. 17 Sadoc ikone Ahitub uan Ahimélec ikone Abiatar otlapaleuiayaj ken teopixkej uan Seraya otlajkuilouaya. 18 Benaya ikone Jehoiadá okinyekanaya keretitas uan peletitas. Ikoneuan David otlapaleuiayaj ken teopixkej.