Josué
5 Intekiuajkej amorreos tlen okatkaj okse lado* aueyatl* Jordán uan intekiuajkej cananeos tlen okatkaj ik kanin kajki mar, san niman omomojtijkej uan ayakmo okinekiayaj momijmiktiskej inuan israelitas porque okimatkej Jehová okiuatski Jordán inmixpan israelitas para makipanouikan.
2 Ijkuakon Jehová okilui Josué: “Xikinchiua cuchillos ika tetl tlakuauak* para tikinkuaximilis intlakayo* nochtin tlakamej israelitas”. 3 Josué okinchi cuchillos ika tetl tlakuauak uan okinkuaximili intlakayo* nochtin tlakamej israelitas ompa Guibeat-Haaralot.* 4 Josué okinkuaximili intlakayo nochtin tlakamej porque tlakamej tlen ueli oyayaj guerra tlen okiskej Egipto omiktiajkej kanin tlauaki, ijkuak okikajtejkej non altepetl. 5 Nochtin tlakamej tlen okiskej Egipto okinkuaximilijkej intlakayo* pero akinmej onestiajkej* kanin tlauaki amo okinkuaximilijkej intlakayo. 6 Israelitas onejnenkej 40 xiuitl kanin tlauaki hasta ijkuak omikej nochtin tlakamej tlen ueli oyayaj guerra. Yejuan okiskej Egipto uan amo okitlakamatkej* Jehová. Ikinon Jehová okinmilui* amo kinkauiliskia makitakan tlali tlen Jehová okinmiluijka inuejkatatajuan kimakaskia ialtepe,* tlali kanin onka miak leche uan neujtli.* 7 Ikinon okinpatkayoti ika inkoneuan. Josué okinkuaximili intlakayo porque ijkuak okatkaj kanin tlauaki, yejuan amo okinkuaximilijkej intlakayo.
8 Ijkuak nochtin tlakamej otlanki okinkuaximilijkej intlakayo, nochtin omokajkej kanin okatkaj hasta ijkuak opajtikej.
9 Jehová okilui Josué: “Tlen axkan onikchi, kichiuas Egipto ayakmo manamechpinaui”. Ikinon ompa okitokayotijkej Guilgal* uan hasta axkan ijkon kiluiaj.
10 Israelitas ok omokajkej Guilgal uan tonal 14 itech non metstli ijkuak yitiotlak, okichijkej iluitl Pascua kanin tlauaki ik Jericó. 11 Ijkuak otlanki iluitl Pascua uan opejki okse tonal, okikuajkej tlen otlakiaya,* okikuajkej semilla tliuaki uan pan tlen amo okipiaya levadura. 12 Tonal ijkuak opejki kikuaj tlen otlakiaya, otlanki maná. Non xiuitl israelitas opejki kikuaj tlen otlakiaya Canaán porque otlanki maná.
13 Ijkuak Josué yokatka ik Jericó okitak se tlakatl tlen okikitskijtoka iespada. Josué okinamikito non tlakatl uan okitlajtlani: “¿Techpaleuis noso tikinpaleuis akinmej techkokoliaj?”. 14 Ye okinankili: “Amo, ne oniuala ken akin kinyekana isoldados Jehová”. Ijkuak Josué ijkon okikak omoixtlapacho porque okitlakaitak uan okitlajtlani: “Noteko, ¿tlen tikneki tikiluis motlakeual?”. 15 Akin kinyekana isoldados Jehová okilui Josué: “Xikinmokixtili mokakuan,* porque timoketok ipan tlali santo”. Ikinon Josué san niman ijkon okichi.