Éxodo
15 Ijkuakon Moisés uan israelitas ijkin okitlakuikilijkej Jehová:
“Niktlakuikilis Jehová porque otlatlanki uan okiueyichijkej.
Ijtik mar okitlamotlak caballo uan akin ipan oyaya.
2 Jah* nochikaualis uan notlapaleuil, ye nechmakixtia.
Ye noDios uan nikueyichiuas. Ye iDios nopapa uan ne nikueyitlalis.
3 Jehová se soldado chikauak. Ye itoka Jehová.
4 Ijtik mar okintlamotlak icarretas faraón uan isoldados,
isoldados tlen okachi chijchikauakej oapolakej ijtik mar Rojo.
5 Atl tlen motlauiteki okinpacho uan ijkon ken se tetl,* yejuan oapolakej tlauejkatlan.
6 Oh, Jehová, moyekma sapanoua chikauak.
Oh, Jehová, moyekma kintlajtlamia akinmej mitskokoliaj.
7 Te tiueyititok uan tikchiua mauetsikan akinmej mitsixnamikij.
Mokualanilis ken tlitl uan kinchichinoua* ken sakatl.
8 San otikyekaijyopitski atl uan omoketski ken se tepamitl,
atl amo omolini, amo otlatenki.
Atl tlen omotlauitekiaya, otetsauak* itlajkotia mar.
9 Akin techkokolia okijto: ‘¡Nikinkuitlapantokas! ¡Nikinmajsiti!
¡Nikxexelos nochi tlen nikmoaxkatis, nikonanas nochi tlen niknekis!
¡Nikkixtis noespada! ¡Noma kinnauatis!’.
10 Te otitlaijyopitski uan oapolakej ijtik mar.
Yejuan oapolakej ijkon ken tepostli etik apolaki ijtik atl tlen chikauak.
11 Amo katej oksekimej dioses ijkon ken te, oh, Jehová.
Te tisanto, amo onka okse dios ken te.
Te moneki sapanoua mitstlakaitaskej* uan mitsueyichiuaskej ika tlakuikalmej, te akin tikchiua tlamantli tetlajtlachialti.
12 Otikmela moyekma uan tlali okintolo.
13 Te otikteititi titetlasojtla uan amo titekaua ijkuak otikyekanki moaltepe tlen otikmakixti.
Ika mochikaualis tikinyekanas kanin santo tlen te otikpejpenki.
14 Altepemej kikakiskej, yejuan momojtiskej.
Akinmej chantij Filistea san motekipachojtoskej.
15 Ijkuakon akinmej tlayekanaj Edom sapanoua momojtiskej.
Tekiuajkej chijchikauakej tlen tlanauatiaj Moab uiuiokaskej.
Nochtin akinmej chantij Canaán ayakmo yetoskej yolchikauakej.
16 Yejuan sapanoua momojtiskej.
Te tikpia miak chikaualis, ikinon yejuan ayakmo moliniskej ijkon ken se tetl,
hasta mapano moaltepe, oh, Jehová,
hasta mapano altepetl tlen te otikchi.
17 Te tikinualikas uan tikintlalis ipan tepetl tlen moaxka,
kanin te otitlayektlali para ompa tiyetos, oh, Jehová,
kanin santo, oh, Jehová, tlen te otiktlali ika momauan.
18 Jehová nochipa tlanauatis.
19 Ijkuak icarretas faraón tlen ika otemiktiayaj, icaballos uan akinmej inpan oyayaj okalakej ijtik mar,
Jehová okichi atl oksepa mamosetili uan oapolakej,
pero israelitas onejnenkej ipan tlali uaki itlajkotia mar”.
20 Ijkuakon Míriam tlen okatka profeta uan noijki okatka ikni Aarón, okonanki se pandereta uan nochtin siuamej opejki kitokaj, okintsilintiayaj panderetas uan omijtotijtiayaj. 21 Míriam otlakuikaya uan ijkin okinnankiliaya tlakamej:
“Xiktlakuikilikan Jehová porque ye sapanoua omoueyitlali.
Caballo uan akin ipan oyaya okintlamotlak ijtik mar”.
22 Satepan Moisés okinuikak israelitas tlen okatkaj mar Rojo. Oyajkej Sur kanin tlauaki, eyi tonal onejnenkej kanin tlauaki uan amo okajsikej atl. 23 Satepan oajsitoj Mará,* pero amo ueli ompa oatlikej porque atl okatka chichik. Ikinon ye okitokayoti kanin okatkaj, Mará. 24 Israelitas opejki kiteneuaj* Moisés. Yejuan okijtouayaj: “¿Tlen tikoniskej?”. 25 Moisés okitlatlaujti Jehová makipaleui uan Jehová okiuikak kanin okatka se kouitl. Ijkuakon Moisés okitlamotlak kouitl ijtik atl uan atl omokopki tsopelik.*
Ompa toTajtsin Dios okinmakak israelitas se tlanauatil para makimatikan tlen okinekiaya makichiuakan. ToTajtsin Dios okinyejyeko para kitaskia kox kitlakamatiskiaj* noso amo. 26 Okinmilui: “Tla kuali nankikakij tlen kijtoua Jehová namoDios, tla nankichiuaj tlen ye kuali kita, tla kuali nankinkakij itlanauatiluan uan nankitlakamatij* tlen okijto xikchiuakan, amo namechtitlanilis kokolistli tlen onikintitlanili egipcios, porque ne Jehová namechpajtijtok”.
27 Satepan oajsitoj Elim, kanin okatkaj 12 ameyalmej uan 70 soyakojmej. Ikinon ompa omokajkej inakastlan atl.