Okse ilibro Samuel
11 Ijkuak opeuaya xiuitl* tekiuajkej oyayaj guerra, David okititlanki Joab, itlakeualuan uan israelitas para makinmiktitij ammonitas. Yejuan okiyaualojkej altepetl Rabá pero David omoka Jerusalén.
2 Se tonal ijkuak yotlapoyauik, David omejki uan onejnemito ikpak* ipalacio. Desde ompa okitak omaltijtoka* se siuatl kuajkualtsin. 3 Satepan David ikaj okititlanki matlajtlaniti akin okatka non siuatl uan okiluijkej: “Ye isiua Urías akin hitita, ichpoch Eliam uan itoka Bat-Seba”. 4 Ijkuakon David okintitlanki sekimej tlakamej makiualikilikan Bat-Seba. Ye okalak kanin okatka David uan David omotekak iuan Bat-Seba. (Ijkon opanok ijkuak Bat-Seba omochipajtoka).* Satepan Bat-Seba omokopki ikalijtik.
5 Satepan ijtik Bat-Seba opejki moskaltia ikonetsin uan otlanauati makiluitij David: “Nikpias se nokonetsin”. 6 Ijkuak David ijkon okimatki, otlanauati ijkin makiluitij Joab: “Xikualtitlani Urías akin hitita”. Ikinon Joab okititlanki Urías. 7 Ijkuak Urías oajsito, David okitlajtlani ken okatka Joab, soldados uan kox otlatlantokaj. 8 Satepan David okilui Urías: “Xio mokalijtik ximoseuiti”. Ijkuak Urías okiski ipalacio tekiua, oyajkej ikuitlapan para kimakaskiaj tetliokolil tlen okititlanili tekiua.* 9 Pero Urías amo oyajki ikalijtik uan okochki ikaltempa ipalacio tekiua ijkon ken nochtin itlakeualuan tekiua. 10 Satepan David okimatiltijkej: “Urías amo oyajki ikalijtik”. David okitlajtlani Urías: “Te uejka otiuala, ¿tleka amo otia mokalijtik?”. 11 Urías okinankili David: “Arca, tlakamej tlen pouij itech itribu Judá uan tlakamej israelitas mokajtokej ijtik kaltsitsintin, noteko Joab uan itlakeualuan noijki mokajtokej tlala. ¿Tleka moneki nias nokalijtik nitlakuati, itlaj nikoniti uan nimotekati iuan nosiua? ¡Ijkon ken te tiyoltok ne amo ijkon nikchiuas!”.
12 Ijkuakon David okilui Urías: “Axkan noijki nikan ximokaua uan mostla nimitskauilis xio”. Non tonal Urías omoka Jerusalén uan mostlatika noijki ompa omoka. 13 Satepan David otlanauati makinotsatij para iuan tlakuas uan tlakonis uan ye okitlauanti. Ijkuak otlayouak Urías okochito kanin okochiayaj itlakeualuan iteko pero amo oyajki ikalijtik. 14 Mostlatika David okijkuilili se carta Joab uan Urías okiuikili Joab. 15 Nin tlen okijkuilo David: “Xiktlalikan Urías tlayekapan kanin okachi momijmiktijtokej. Satepan xiakan uan iselti xikajteuakan para makimiktikan”.
16 Joab okiyekitoka altepetl uan okititlanki Urías makinmixnamikiti soldados chijchikauakej tlen okinkokoliayaj. 17 Ijkuak tlakamej oualkiskej itech altepetl uan okixnamikej Joab, sekimej itlakeualuan David omikej, noijki okimiktijkej Urías akin hitita. 18 Joab okimatilti David nochi tlen opanok kanin omomijmiktijtokaj. 19 Ijkin okilui se itlakeual: “Ijkuak tikmatiltis tekiua nochi tlen opanok kanin omomijmiktijtokaj, 20 xamo tekiua kualanis uan mitsiluis: ‘¿Tleka sapanoua onanmotokijkej inauak altepetl ijkuak onankinmixnamikitoj? ¿Amo onankimatiayaj desde tepamitl nanmechualmojmotlaskiaj? 21 ¿Akin okimikti Abimélec ikone Jerubéset? Desde ikpak se tepamitl se siuatl okiualtlamochili se metlapili uan ijkon omiki ompa Tebez. ¿Tleka sapanoua onanmotokijkej inauak tepamitl?’. Ijkuakon xikilui: ‘Motlakeual Urías akin hitita noijki omiki’”.
22 Non tlakeuali okimatiltito David nochi tlen Joab okilui. 23 Satepan non tlakeuali okilui David: “Nonmej tlakamej yotechtlantokaj uan otechixnamikitoj ompa tlala pero tejuan otikchijkej mamokopakan hasta ipuerta non altepetl. 24 Akinmej okinejnekiayaj* arco okinmojmotlakej motlakeualuan desde ipan tepamitl uan sekimej motlakeualuan omikej. Noijki okimiktijkej motlakeual Urías akin hitita”. 25 Ijkuak David ijkon okikak okilui tlakeuali: “Xikyolchikaua Joab uan xikilui: ‘Amo mamitsyolkoko tlen opanok porque san akin uelis kimiktiskej ijkuak onka guerra. Ikinon okachi xikinmixnamiki uan xikmoaxkati non altepetl’”.
26 Ijkuak Bat-Seba okimatki Urías okimiktijkej, omoyolkoko porque omiki inamik. 27 Ijkuak ayakmo omoyolkokouaya, David otlanauati makiualikilikan ikalijtik. Ye omochi isiua uan okipixki ikonetsin pero Jehová amo okipakti tlen okichi David.