Achto ilibro Samuel
21 Satepan David oyajki altepetl Nob, kanin okatka teopixki Ahimélec. Ijkuak Ahimélec okitak, omomojti hasta ouiuiokak uan okitlajtlani: “¿Tleka san moselti tika? ¿Tleka amikaj mouan kajki?”. 2 David okinankili teopixki Ahimélec: “Tekiua onechnauati itlaj manikchiua uan onechilui: ‘Amikaj makimati tlen onimitsnauati tikchiuas nion ken tikchiuas’. Ne yonikinmilui sekimej tlakamej kanin timonamikiskej. 3 Uan noijki tla tikinpia makuili panes noso san tlen tikinpia, techinmaka”. 4 Pero teopixki okinankili David: “Amo nikpia okse pan, san nikpia pan tlen kitemakaj ixpan toTajtsin Dios. Uelis nimitsmakas non pan tla tlakamej tlen mouan katej, amo omotekakej inuan siuamej”. 5 David okinankili: “Ne nimitsiluia, tejuan amo otimotekakej iuan se siuatl ijkuak otiajkej guerra. Tla tlakamej kichiuaj tlen moneki para makinseli toTajtsin Dios ijkuak yaskej guerra, ¡axkan okachi ijkon okichijkej!”. 6 Ijkuakon teopixki okimakak pan tlen okitemakayaj ixpan toTajtsin Dios, porque san non pan okipiaya. Non pan ayakmo okatka itech tabernáculo ixpan Jehová, porque non tonal yokipatlakaj ika pan tlen yikin okichijkaj ijkon ken okichiuayaj.
7 Ijkuakon Doeg akin edomita, itlakeual Saúl tlen okinyekanaya itlajpixkej ik ompa okatka non tonal, porque omonekiaya mokauaskia ixpan Jehová.
8 David okilui Ahimélec: “¿Amo tikpia se lanza noso se espada? Ne amo onikualikak noespada nion noteposuan porque tlen tekiua onechnauati, okinek san niman manikchiua”. 9 Teopixki okinankili: “Nikpia iespada Goliat, filisteo tlen otikmikti ixtlauak* Elá. Kajki ikuitlapan efod* uan kimilitok ika se tsotsoli.* San non nikpia para nimitsmakas, tla tiknejnekis* xikuika”. David okilui: “Kema, techmaka porque amo onka okse espada ken non”.
10 Non tonal, David okiski kanin okatka uan ok okicholiliaya Saúl. Satepan oajsito kanin okatka tekiua Akís tlen otlanauatiaya Gat. 11 Uan itlakeualuan tekiua Akís okiluijkej: “¿Amo ye nin David akin tlanauatia itech ialtepe? ¿Amo otlajtojtokaj itech nin David ijkuak omijtotijtiayaj uan otlakuikayaj:
‘Saúl yokinmikti mil
uan David yokinmikti diez mil’?”.
12 David opejki mokuayejyekoua* ijkuak okikak nochi non uan opejki kimakasi* tekiua Akís tlen otlanauatiaya Gat. 13 Ikinon ijkuak ik ompa okatka, opejki kichiua ken yokuatlapolo. Opejki tlatlajkuiloua ipan puertas kanin kalakij itech altepetl uan itenkualak opejki temoua ipan itentsojmio. 14 Akís okinmilui itlakeualuan: “¡Nin tlakatl yokuatlapolo! ¿Tleka nikan onankiualikakej? 15 Nikan katej miakej akinmej yokuatlapolojkej, ¿tleka nantechualikiliaj okse akin yokuatlapolo? ¿Nanmokuayejyekouaj* nikkalakis nokalijtik?”.