Achto ilibro Samuel
22 Satepan David okiski kanin okatka uan omotlatito ijtik cueva tlen kajki Adulam. Ijkuak ikniuan uan nochtin akinmej ochantiayaj iuan ipapa okimatkej, oyajkej kanin ye okatka. 2 Noijki ompa oyajkej akinmej otlajyouiayaj noso itlaj okiteuikiliayaj uan akinmej amo opakiayaj.* Ijkuakon okatkaj kanaj 400 tlakamej iuan David uan ye opejki kinyekana.
3 Satepan David oyajki altepetl Mizpé tlen kajki Moab uan okilui akin ompa otlanauatiaya: “Nimitstlatlaujtia xikinkauilikan nopapa uan nomama nikan namouan mamokauakan hasta manikmati tlen kichiuas nopatka toTajtsin Dios”. 4 Ikinon nochi tonalmej tlen David omotlatijtoka, ipapanuan omokajkej iuan tekiua tlen otlanauatiaya Moab.
5 Satepan profeta Gad okilui David: “Ayakmo ompa ximotlatijto, xio itech tlali tlen kajki Judá”. Ijkuakon David oyajki Héret uan okalak kanin kojyo.
6 Saúl okimatki yokajsikaj David uan tlakamej tlen iuan okatkaj. Ijkon okiluijkej ijkuak okatka* itlampa se tamariscokouitl itech tepetsintli tlen kajki Guibeá. Ye okikitskijtoka ilanza uan itlakeualuan okiyaualojtokaj. 7 Ijkuakon Saúl okinmilui itlakeualuan tlen okiyaualojtokaj: “Namechtlatlaujtia tlakamej benjaminitas, techkakikan. ¿Nankineltokaj ikone Jesé nannochtin namechmakas tlalmej uan uvajkojmej? ¿Nankineltokaj kichiuas xikinnauatikan mil tlakamej uan cien tlakamej? 8 ¡Nochtin namejuan nantechixnamikij! ¡Amikaj onechilui nokone okichi se acuerdo iuan ikone Jesé! Amikaj nechiknomati nion amikaj onechilui nokone okitekauili notlakeual itlaj manechtokti* ijkon ken axkan panotok”.
9 Ijkuakon Doeg akin edomita tlen okinyekanaya itlakeualuan Saúl, okijto: “Onikitak ikone Jesé okitato Ahimélec ikone Ahitub ompa altepetl Nob. 10 Ijkuakon Ahimélec ipatka David okitlajtlani Jehová uan okimakak seki tlamantli, hasta okimakak iespada Goliat”. 11 Tekiua san niman otlanauati makinotsatij teopixki Ahimélec ikone Ahitub uan nochtin teopixkej tlen okatkaj ikalijtik ipapa ompa Nob. Nochtin yejuan oyajkej kanin okatka tekiua.
12 Ijkuakon Saúl okijto: “¡Techkaki ikone Ahitub!”. Ye okinankili: “Nikan nika noteko”. 13 Saúl okilui: “¿Tleka te uan ikone Jesé nantechixnamikij? ¿Tleka otikmakak pan, se espada uan ipatka otiktlajtlani toTajtsin Dios? Ye nechkokolia uan axkan kineki itlaj nechtoktis* ijkon ken axkan panotok”. 14 Ijkuak Ahimélec ijkon okikak, okinankili tekiua: “¿Tikpia se motlakeual ijkon ken David tlen amo tlakajkayaua? Ye momo, kinyekana soldados akinmej mitsmaluiaj uan akinmej katej mokalijtik kitlakaitaj. 15 Desde yiuejkika niktlajtlania toTajtsin Dios ika itoka David. ¡Ne amo keman nikchiuaskia tlen axkan tikijtojtok! Noteko amo techtlajtlakolti nion xiktlajtlakolti ikaj tlen chanti ikalijtik nopapa. Amo onikmatiaya tlen axkan techiluijtok”.
16 Pero tekiua okilui: “Ahimélec, te uan nochtin akinmej chantij ikalijtik mopapa nanmikiskej”. 17 Tekiua okinmilui akinmej okimaluiayaj: “¡Xikinmiktikan iteopixkauan Jehová! ¡Yejuan kipaleuiaj David! ¡Okimatiayaj ye san cholojtinemi uan amitlaj onechiluijkej!”. Pero akinmej okimaluiayaj tekiua, amo okinekej itlaj kintoktiskej* iteopixkauan Jehová. 18 Ijkuakon tekiua okinauati Doeg akin edomita: “¡Xio uan xikinmiktiti!”. San niman Doeg oyajki uan okinmiktito teopixkej, non tonal okinmikti 85 tlakamej tlen okiuikayaj efod* de lino. 19 Noijki okinmikti akinmej ochantiayaj Nob, inmialtepe teopixkej. Okinmikti ika espada tlakamej, siuamej, konemej, konemej tlen ok chichij noijki toros, burros uan ichkamej.*
20 Pero Abiatar se ikone Ahimélec, ixui Ahitub ouelik ocholo uan oyajki iuan David para kipaleuiskia. 21 Abiatar okilui David: “Saúl yokinmikti iteopixkauan Jehová”. 22 Ijkuak David okikak non, okilui Abiatar: “Non tonal ijkuak ompa onikitak Doeg akin edomita, onikmatki ye nochi kiluiskia Saúl. Ne notlajtlakol okinmiktijkej akinmej ochantiayaj ikalijtik mopapa. 23 Nouan ximokaua, amo ximomojti porque tla ikaj kinekis mitsmiktis, yetoskia ken ne kineki nechmiktis. Ne nimitsmaluis”.