Tlen okijkuilo Lucas
19 Jesús oajsito Jericó uan opanotia itech non altepetl. 2 Ompa okatka se tlakatl tlen omotokayotiaya Zaqueo. Ye okinyekanaya tominololojkej uan okipiaya miak tomin. 3 Zaqueo okinekiaya kitas akin okatka Jesús, pero amo ueli okitaya porque miakej ompa okatkaj uan ye amo okatka uejkapantik. 4 Ikinon ye otlayekanki uan otlejkoto itech se higoskouitl. Ijkon kitaskia Jesús ijkuak ik ompa panoskia. 5 Ijkuak Jesús ik ompa opanok, oajkotlachixki uan okilui: “Zaqueo, san niman xitemo porque axkan nimokalotis mochan”. 6 Ye san niman otemok uan opaki porque kikalotiskia Jesús. 7 Ijkuak nochtin okitakej, okimoluijkej: “Omokalotito ichan se tlakatl tlen tlajtlakolchiua”. 8 Zaqueo omoketski uan okilui Jesús: “NoTeko, tlajko tlen nikpia nikinmakas akinmej amitlaj kipiaj. Noijki nikinkopilis naui uelta okachi akinmej onikintlachteki”. 9 Jesús okilui: “Axkan toTajtsin Dios yokinmakixti akinmej nikan chantij, porque te noijki tiikone Abrahán. 10 Porque iKone Tlakatl okintemoko uan okinpaleuiko akinmej opolitokaj”.
11 Jesús yiajsiskia Jerusalén ikinon okinmilui okse neskayotl* akinmej okikaktokaj, porque yejuan okineltokayaj san niman ualaskia iTekiuajkayo toTajtsin Dios. 12 Ye okijto: “Se tlakatl tlen oueyititoka, uejka oyajki para yetos tekiua uan satepan oksepa ualmokopaskia. 13 Okinnotski majtlaktli itlakeualuan, okinmakak majtlaktli tomin de plata* uan okinmilui: ‘Xiktekipanoltikan notomin hasta ijkuak nimokopati’. 14 Pero akinmej ochantiayaj itech ialtepe okikokoliayaj uan okintitlankej sekimej tlakamej makijtotij: ‘Amo tiknekij matechnauati nin tlakatl’”.
15 “Ijkuak tlakatl yokatka tekiua, omokopato uan okinnotski itlakeualuan tlen okinmakak tomin. Okintlajtlani kech okitlanilijkej itomin. 16 Tlakeuali tlen achto oajsito, okilui: ‘NoTeko, tomin tlen otechmakak oniktlanili majtlaktli tomin de plata’. 17 Tekiua okilui: ‘¡Kuali tlen otikchi uan kuali titekipanoua! Kuali otikchi maski amo miak otikseli ikinon tikinyekanas majtlaktli altepemej’. 18 Satepan oajsito okse tlakeuali uan okilui: ‘NoTeko, tomin tlen otechmakak oniktlanili makuili tomin de plata’. 19 Tekiua noijki okilui: ‘Te tikinyekanas makuili altepemej’. 20 Pero oajsito okse tlakeuali uan okilui: ‘NoTeko, nikan kajki motomin. Onikkimilo ika se tsotsoli* uan oniktlati. 21 Ne onimomojti porque nikmati te san niman tikualani. Tikmoaxkatia tlen amo otiktlati uan tikololoua tlen amo otiktokak’. 22 Tekiua okilui: ‘Te amo tiyolkuali, nimitsixkomakas ika tlen otikijto. ¿Yotikmatiaya san niman nikualani, nikmoaxkatia tlen amo oniktlati uan nikololoua tlen amo oniktokak? 23 Tla otikmatiaya, ¿tleka amo otikuikak notomin itech banco? Ijkon ijkuak ne niualaskia, nikseliskia tlen kitlaniskia notomin’”.
24 “Tekiua okinmilui akinmej ompa okatkaj: ‘Xikkixtilikan tomin tlen kipixtok uan xikmakakan akin kipia majtlaktli tomin de plata’. 25 Pero yejuan okiluijkej: ‘ToTeko, ye yikipia majtlaktli tomin de plata’. 26 Ye okinmilui: ‘Ne namechiluia, akin itlaj kipia okachi kimakaskej. Pero akin amitlaj kipia kikixtiliskej nochi tlen kipia. 27 Noijki xikinualikakan akinmej nechkokoliaj uan amo okinekiayaj maniyeto nitekiua. Noixpan xikinmiktikan’”.
28 Jesús oyajki* Jerusalén ijkuak otlanki okintlapoui. 29 Ijkuak yiajsiskia itech altepemej Betfagué uan Betania kanin kajki tepetl tlen itoka Olivos, ye okintitlanki ome discípulos 30 uan okinnauati: “Xiakan itech neka altepetl tlen nankitaj. Ijkuak namajsitiuij, nankitaskej se burrito ilpitok tlen ayamo ikaj ipan motlalia. Xiktotomakan uan xikualikakan. 31 Tla ikaj namechtlajtlanis: ‘¿Tleka nankitotomaj?’. Namejuan xiknankilikan: ‘ToTeko kineki matikuikilikan’”. 32 Nonmej discípulos oyajkej uan okajsitoj burrito ijkon ken okinmilui Jesús. 33 Ijkuak yokitotontokaj, itekouan burrito okintlajtlanijkej: “¿Tleka nankitotomaj?”. 34 Yejuan okinnankilijkej: “ToTeko kineki matikuikilikan”. 35 Yejuan okiuikilijkej burrito. Satepan ika intlaken okipejpechtijkej uan Jesús ipan omotlali.
36 Yejuan okisouayaj intlaken ipan ojtli ijkuak Jesús opanotiaya. 37 Ijkuak yiajsiskia kanin temoua ojtli tlen uits itech tepetl Olivos, nochtin discípulos opakej. Noijki chikauak omokakiaya okiueyichiuayaj toTajtsin Dios porque okinmitakej miakej milagros. 38 Yejuan okijtouayaj: “¡Yokiteochijkej akin uits ken Tekiua ika itoka Jehová! ¡Kuali matimouikakan iuan toTajtsin Dios uan maueyitito ompa iluikak!”. 39 Pero sekimej fariseos tlen ompa okatkaj, okiluijkej Jesús: “Tlamachti, xikinmajua modiscípulos”. 40 Ye okinmilui: “Ne namechiluia, tla yejuan amitlaj kijtoskiaj, temej* chikauak tlajtoskiaj”.
41 Ijkuak Jesús yiajsiskia Jerusalén, okitak altepetl uan okichokili. 42 Ye okijto: “Tla nin tonal nankajsikamatiskiaj tlen namechpaleuis xikpiakan yolseuilistli... Pero axkan namejuan amo uelis nankitaskej. 43 Porque ajsis tonal akinmej namechkokoliaj namechyaualoskej ika kouitl yakauitstik, uan amo namechkauiliskej xikisakan. 44 Namechixpoloskej inuan namokoneuan. Noijki ayakmo nepanitos nion se tetl, porque amo onankinekej nankimatiskej keman onamechixkomakakej”.
45 Satepan Jesús okalak templo okinkixtito akinmej otlanemakayaj. 46 Ye okinmilui: “ITlajtol toTajtsin Dios kijtoua: ‘Nokalijtik kitokayotiskej kali kanin motlatlaujtiaj’, pero namejuan yonankikopkej se kali kanin nantlachtekij”.
47 Jesús mojmostla otlamachtiaya itech templo. Pero teopixkej tlen otlayekanayaj, akinmej otlamachtiayaj tlanauatil uan akinmej okinyekanayaj judíos, opejki kitemouaj ken kimiktiskej. 48 Pero amo ueli itlaj okitoktiayaj porque nochtin okinekiayaj kikakiskej.