Okse carta para Tesalonicenses

1 Ne Pablo, Silvano* uan Timoteo tiktitlaniliaj nin carta tlanechikol tlen kajki Tesalónica. Non tlanechikol kajki iuan toTajtsin Dios uan toTeko Jesucristo:

2 ToTajtsin Dios uan toTeko Jesucristo manamechtliokolikan tlen kuali uan manamechmakakan yolseuilistli.

3 Nokniuan, moneki nochipa namopatka tiktlasojkamatiliskej toTajtsin Dios. Moneki ijkon tikchiuaskej porque okachi nantlaneltokaj uan okachi nankintlasojtlaj oksekimej. 4 Ikinon timechueyitlaliaj itech itlanechikoluan toTajtsin Dios. Porque namejuan nantlaxikouaj uan nantlaneltokaj maski namechtlajyouiltiaj uan nankijyouiaj okseki tlamantli. 5 Nochi non kiteititia toTajtsin Dios tlaixkomaka ken moneki. Noijki kichiuas manamechnamiki xikselikan iTekiuajkayo toTajtsin Dios porque ikinon nantlajyouiaj.

6 ToTajtsin Dios yolkuali ikinon kintlajyouiltis akinmej namechtlajyouiltiaj. 7 Pero namejuan tlen nantlajyouijtokej, toTajtsin Dios kichiuas touan kuali xiyetokan ijkuak toTeko Jesús monextis iluikak inuan iángeles tlen chijchikauakej 8 itech se ueyi tlitl. Ijkuakon kintlajyouiltis akinmej amo kixmatij toTajtsin Dios uan akinmej amo kitlakamatij* kuali tlajtoli tlen kijtoua akin toTeko Jesús. 9 ToTeko kintlajtlakoltis uan yejuan sepa ixpoliuiskej. Ye ayakmo kinmitas nion ayakmo kinpaleuis ika iueyi chikaualis. 10 Ijkon panos para kiueyitlaliskej inuan akinmej yolchipauakej tlen iaxkauan. Non tonal, nochtin tlen tlaneltokaj kitaskej uan motlajtlachialtiskej. Porque namejuan onankiselijkej uan onankineltokakej tlen otimechtlapouijkej.

11 Ikinon nochipa namopatka timotlatlaujtiaj. Ijkon toTajtsin Dios kitas namechnamiki namechnotsas uan ika ichikaualis kichiuas nochi tlen kuali kineki kichiuas. Noijki kitlamis nochi tlen nankichiuaj porque nantlaneltokaj. 12 Ijkon itoka toTeko Jesús kiueyitlaliskej ika tlen namejuan nankichiuaj uan noijki porque iuan nanmouikaj. Non kiteititis toTajtsin Dios uan toTeko Jesucristo kitetliokoliaj tlen kuali.