Apocalipsis

20 Onikitak se ángel oualtemouaya iluikak uan okikitskijtoka illave tekochtli uejkatlan. Noijki okikitskijtoka se ueyi cadena. 2 Okikitski dragón tlen achto kouatl. Non ye Diablo uan Satanás. Ye okilpi 1,000 xiuitl. 3 Okitlamotlak kanin tlauejkatlan uan ompa okitsaki. Kuali okitsaki kanin tlauejkatlan para ayakmo makinkajkayaua akinmej chantij itech altepemej hasta matlami 1,000 xiuitl. Satepan kikajkauaskej kanaj keski tonal.

4 Onikinmitak tronos uan akinmej ompa omotlalijkej okinkauilijkej matlaixkomakakan. Onikinmitak akinmej okinmiktijkej porque okitematiltijkej akin Jesús uan otetlapouijkej akin toTajtsin Dios. Yejuan amo okiueyichijkej yolkatl temomojti, amo okiueyichijkej iimagen uan amo okiselijkej marca inmixkuak nion itech inma. Yejuan oksepa oyolikej uan otlanauatijkej 1,000 xiuitl iuan Cristo. 5 Yejuan achto kinyolitiskej. Oksekimej tlen oixpolikej amo yoliskej hasta ijkuak tlamis 1,000 xiuitl. 6 Pakij uan yolchipauakej akinmej achto kinyolitiskej uan yejuan amo kinmajsis ojpa mikilistli. Yejuan yetoskej iteopixkauan toTajtsin Dios uan Cristo. Noijki tlanauatiskej 1,000 xiuitl iuan Cristo.

7 Satanás kikixtiskej kanin tsaktos ijkuak tlamis 1,000 xiuitl. 8 Ye yas kinkajkayauati akinmej chantij itech nonmej altepemej tlen katej itech naui ilados tlaltikpak. Ijkon kichiuas para kinnechikos ijkuak mochiuas guerra. Nonmej altepemej kijtosneki ye Gog uan Magog. Yetoskej sapanoua miakej ken xali tlen kajki itempa mar. 9 Yejuan oyajkej ipan nochi tlaltikpak uan otlayaualojkej kanin chantij akinmej yolchipauakej. Noijki okiyaualojkej altepetl tlen toTajtsin Dios kipatioita. Pero itech iluikak ouala tlitl uan okintlati. 10 Diablo tlen okinkajkayajtoka okitlamotlakej kanin mantok tlitl uan azufre. Ompa yokatkaj yolkatl temomojti uan profeta tekajkaya. Yejuan tlajka uan youak nochipa tlajyouiskej.

11 Onikitak se ueyi trono istak uan noijki onikitak akin ompa okatka.* Tlaltikpak uan iluikak okicholilijkej uan ayakmo keman okinmitakej. 12 Noijki onikinmitak omoketokaj ixpan trono akinmej ueyititokej uan akinmej amo ueyititokej tlen yoixpolikej. Noijki omotlapojkej rollos pero omotlapo okse rollo tlen kijtoua akinmej yoltoskej. Akinmej yoixpolikej okinmixkomakakej tlen okichijkej ijkon ken ijkuilitok itech rollos. 13 Mar okintemakti mikamej tlen ijtik okatkaj, mikilistli uan Mikatekochtli* noijki okintemaktijkej mikamej tlen inmijtik okatkaj. Sejse okinmixkomakakej ijkon ken okichijkej. 14 Mikilistli uan Mikatekochtli* okintlamotlakej kanin mantok tlitl. Kanin mantok tlitl kijtosneki ojpa mikilistli. 15 Noijki okintlamotlakej kanin mantok tlitl akinmej intoka amo ijkuilitok itech libro tlen kijtoua akinmej yoltoskej.