Achto ilibro Samuel
30 Uiptlatika ijkuak David uan itlakeualuan oajsitoj Ziclag, amalequitas okimoaxkatijkaj tlali tlen kajki Négueb* uan Ziclag. Okixnamikej uan okichichinojkej* altepetl Ziclag. 2 Okinuikakej siuamej uan nochtin tlen okatkaj itech non altepetl, noijki okinuikakej desde konemej hasta akinmej yokipiayaj miak xiuitl. Nochtin okinuikakej uan amikaj okimiktijkej. 3 Ijkuak David uan itlakeualuan ompa oajsitoj, okitakej non altepetl okichichinojkaj* uan okinuikilijkej insiuauan uan inkoneuan. 4 David uan itlakeualuan opejki sapanoua chokaj. Ochokakej hasta ijkuak ayakmo ueli ijkon okichijkej. 5 Noijki okinuikakej ome isiuauan David, Ahinoam tlen ialtepe okatka Jezreel uan Abigaíl, inamik Abigaíl omotokayotiaya Nabal tlen okatka carmelita pero yomika. 6 David sapanoua omotekipachouaya uan noijki tlakamej okijtouayaj kimojmotlaskiaj ika tetl.* Yejuan oyolchichiakej porque okinuikilijkej inkoneuan. Ikinon David okitemo Jehová iDios para moyolchikauaskia.
7 Satepan David okilui teopixki Abiatar, ikone Ahimélec: “Nimitstlatlaujtia, techualikili efod”.* Ijkuakon Abiatar, okiualikili efod 8 uan David okitlajtlani Jehová: “¿Moneki nikinkuitlapantokas akinmej otechtlachtekijkej? ¿Nikinmajsiti?”. Ye okinankili: “Xikinkuitlapantoka, porque tikinmajsiti uan nochi tikinkixtilis”.
9 San niman David uan 600 tlakamej tlen iuan okatkaj oyajkej uan oajsitoj barranca Besor. Ompa omokajkej sekimej itlakeualuan David. 10 Ye uan 400 itlakeualuan oyajkej pero 200 ik ompa omokajkej porque osotlauatokaj para kipanouiskej barranca Besor.
11 Ompa tlala, itlakeualuan David okajsikej se tlakatl egipcio uan okiuikilijkej David. Okimakakej atl uan okitlamakakej, 12 noijki okimakakej ome panes* tlen ochijtokaj ika pasas uan se pedazo pan tlen ochijtoka ika higos tlen okinpatlachojkej. Ijkuak ye otlakua omochika, porque eyi tonal amo otlakua uan amo oatlik. 13 Ijkuakon David okitlajtlani: “¿De kanin tiuits? ¿Akin moteko?”. Ye okinankili: “Ne nitlakeuali egipcio uan noteko se amalequita. Yiuiptla, noteko onechkajte porque onimokoko. 14 Tejuan otikmoaxkatijkej isur intlal keretitas, tlali tlen kajki Judá, isur itlal Caleb uan altepetl Ziclag otikchichinojkej”.* 15 Ijkuak David ijkon okikak, okitlajtlani: “¿Uelis techuikas kanin katej akinmej tlachtektinemij?”. Ye okinankili: “Ne nimitsuikas kanin katej akinmej tlachtektinemij, tla tikijtos* ika itoka Dios amo techmiktis uan amo techtemaktis imak noteko”.
16 Ijkuakon ye okiuikak tlala uan akinmej otlachtekiayaj ompa okatkaj, otlakuajtokaj uan itlaj okonitokaj. Yejuan oiluichijtokaj porque miak tlamantli okitlankej Judá uan kanin ochantiayaj filisteos. 17 David okinmixnamik uan opejki kinmiktia san kualkan* hasta ijkuak otlayouak.* Amikaj okse ocholo, san omomakixtijkej 400 tlakamej tlen ocholojkej ipan camellos. 18 Nochi tlen amalequitas okiuikakaj, David oksepa okimoaxkati uan noijki ome isiuauan okinmakixtito. 19 Nochi tlen inmiaxka oksepa okipixkej uan okinmakixtijkej desde konemej hasta akinmej yokipiayaj miak xiuitl. Okinmakixtijkej inkoneuan uan nochi tlen okipiayaj. David oksepa okimoaxkati, nochi tlen okinuikilijkaj. 20 David okinmokaui nochtin ichkamej* uan vacas, itlakeualuan okinuikakej inyekapan inyolkauan. Yejuan okijtouayaj: “Nin tlen okitlanki David”.
21 Ijkuakon David oyajki kanin okatkaj 200 tlakamej tlen omokajkej ibarranca Besor porque osotlauatokaj uan amo iuan oyajkaj. Yejuan okinamikitoj David uan akinmej iuan oyayaj. Ijkuak yoajsitiayaj, David okintlajtlani ken okatkaj. 22 Pero sekimej tlakamej tlen amitlaj inpati tlen oyayaj iuan David uan okichiuayaj tlen amo kuali, okijtojkej: “Tejuan amo tikinmakaskej tlen oksepa otikmoaxkatitoj porque yejuan amo touan oyajkej, san makinuikakan insiua uan inkoneuan uan mauiaj”. 23 Pero David okinmilui: “Nokniuan, amo ijkon xikchiuakan ika tlen Jehová otechmakak, ye otechmalui uan otechinmaktili akinmej otechtlachtekilijkej. 24 ¿Nankineltokaj oksekimej noijki ijkon mokuayejyekouaj?* Nochtin kiseliskej ijkon ken moneki, akinmej otemiktitoj uan akinmej omokajkej okimaluijtokaj tlen toaxka. Tinochtin timotlaxexeliliskej”. 25 Desde non tonal David okijto ijkon mamochiua uan non omochi se tlanauatil itech altepetl Israel. Hasta axkan ijkon mochiua.
26 Ijkuak David omokopki Ziclag, okintitlanili tlayekankej akinmej okatkaj iyolikniuan tlen okatkaj Judá, seki tlamantli tlen okitlankej. Noijki otlanauati makinmiluikan: “Nin otiktlankej uan timechtliokoliaj* porque otikinkixtilijkej akinmej kikokoliaj Jehová”. 27 Seki tlamantli tlen okitlankej, David okintitlanili akinmej ochantiayaj Betel, Ramot tlen kajki Négueb,* Jatir, 28 Aroer, Sifmot, Estemoa, 29 Racal, inmialtepeuan jerahmeelitas, inmialtepeuan quenitas, 30 Hormá, Borasán, Atac 31 uan Hebrón. Noijki okititlanki kanin David uan itlakeualuan onentinemiayaj.