Hechos de apóstoles
12 Ijkuakon tekiua Herodes opejki kintlajyouiltia sekimej tlen omonechikouayaj.* 2 Otlanauati makimiktikan ika espada Santiago tlen okatka ikni Juan. 3 Okitak judíos okinpakti tlen okichi ikinon otlanauati makitsakuakan Pedro. (Non opanok ijkuak okichijtokaj iluitl ijkuak okikuayaj pan tlen amo okipiaya levadura). 4 Pedro okikitskijkej uan okitsakej. Herodes okintlali naui grupos soldados tlen okimaluiayaj Pedro. Sejse grupo okinpiaya naui soldados. Herodes okinekiaya kixkomakas inmixpan oksekimej ijkuak tlamiskia Pascua. 5 Pedro otsaktoka pero tokniuan tlen omonechikouayaj* nochipa okitlatlaujtiayaj toTajtsin Dios makipaleui.
6 Non youak Herodes omokuayejyeko* mostlatika kixkomakaskia Pedro inmixpan oksekimej. Pedro okochtoka uan oilpitoka ika ome cadenas intlajko ome soldados. Oksekimej soldados otlamaluijtokaj kaltempa. 7 Pero san niman ompa oualmonexti iángel Jehová uan otlapetlanki kanin otsaktoka Pedro. Ángel okolini iajkolpa, okijxiti uan okilui: “¡Ximejteua!”. Ijkuakon ouetskej cadenas tlen ika omailpitoka. 8 Ángel okilui: “Ximotlajkoilpi uan ximokakti”.* Pedro ijkon okichi. Satepan ángel okilui: “Xikmokenti motsotsol* uan techtoka”. 9 Pedro okiski uan okitokak ángel pero amo okimatiaya kox melauak tlen okichijtoka ángel. Ye omokuayejyeko* san itlaj okimonextili. 10 Achto okipanouijkej se grupo soldados uan satepan okipanouijkej okse grupo. Ijkuakon oajsitoj kanin okatka puerta de tepostli. Itech non puerta okisayaj ijkuak oyayaj itech altepetl uan non puerta iselti omotlapo. Yejuan okiskej uan onejnentiajkej itech se ojtli. Satepan ángel san niman okikajte Pedro. 11 Ijkuakon Pedro okajsikamatki melauak tlen opanotoka uan okijto: “Axkan nikmati Jehová okiualtitlanki iángel manechpaleuiki imak Herodes. Noijki amo onechpanok tlen judíos okinekiayaj manechpano”.
12 Ijkuak Pedro okitak tlen opanok, oyajki ichan María imama Juan. Juan noijki okiluiayaj Marcos. Ompa ichan omonechikojkej miakej discípulos uan omotlatlaujtiayaj. 13 Ijkuak Pedro okiuiuitek* puerta, se ichpochtli itoka Rode tlen ompa otlapaleuiaya otlachiato akin otlauiuitekiaya.* 14 Ichpochtli opaki ijkuak okitenkak Pedro pero amo okitlatlapoli. Ye omotlalo okinmiluito akinmej okatkaj kalijtik Pedro okatka kaltempa. 15 Yejuan okiluijkej: “Te tikuatlapoloua”. Pero ye okachi okinmiluiaya melauak ompa okatka ikinon yejuan okijtojkej: “Non se ángel”. 16 Pedro ok okatka kaltempa uan okiuiuitektoka* puerta. Yejuan omotlajtlachialtijkej ijkuak otlatlapojkej uan okitakej ompa okatka. 17 Pedro okinchiuili señas ika ima para amitlaj makijtokan uan okinyekilui Jehová okikixti kanin otsaktoka. Satepan okinmilui: “Xikinmiluitij tokniuan tlen opanok uan noijki xikiluitij Santiago”. Ijkuak ijkon okijto, okiski uan oksekan oyajki.
18 Ijkuak otlaneski, soldados omomojtiayaj porque amo okimatiayaj tlen okipanok Pedro. 19 Herodes otlanauati kuali makitemokan pero amo okajsikej. Ikinon okintlajtlani akinmej otlamaluijtokaj tlen opanok uan satepan otlanauati makintlajyouiltikan. Herodes okatka Judea uan satepan oyajki* Cesarea uan ompa omoka seki tonal.
20 Herodes okintlauelitaya akinmej ochantiayaj Tiro uan Sidón. Yejuan omotlakualkouiayaj itech altepetl kanin otlanauatiaya Herodes, ikinon san sekan okiluitoj Blasto makinpaleui kitatiuij tekiua porque okinekiayaj iuan moyekuikaskej. Blasto okiyekanaya ichan Herodes. 21 Se tonal ijkuak miakej omonechikojkej, Herodes omoyektlakenti, omotlali kanin otlaixkomakaya uan opejki kintlapouia akinmej ompa okatkaj. 22 Akinmej omonechikojkej chikauak okijtojkej: “¡Tlajtoua se dios uan amo se tlakatl!”. 23 Iángel Jehová san niman okichi mamokoko Herodes porque amo okiueyichi toTajtsin Dios. Okikuajkej okuilimej uan oixpoliuik.
24 Pero iTlajtol Jehová okachi omotematiltiaya uan miakej okineltokayaj.
25 Bernabé uan Saulo omokopkej Antioquía ijkuak yokinpaleuijkej tokniuan ompa Jerusalén. Yejuan okiuikakej Juan tlen noijki okiluiayaj Marcos.