Josué
9 Nochtin tekiuajkej tlen okatkaj ik inakastlan aueyatl* Jordán ik kanin motlatia tonaltsin okimatkej tlen opanok. Yejuan okatka ik tepeyo, ik Sefelá, noijki ik inakastlan mar Grande* uan iyekapan tepeyo Líbano. Yejuan okinnauatiayaj hititas, amorreos, cananeos, perizitas, heveos uan jebuseos. 2 Tekiuajkej okinekiayaj kimiktiskej Josué uan israelitas, ikinon yejuan okijtojkej mopaleuiskiaj.
3 Akinmej chantij altepetl Gabaón noijki okimatkej Josué okixixini altepetl Jericó uan altepetl Hai. 4 Yejuan kuali omokuayejyekojkej* tlen kichiuaskej ikinon ijtik costales tlen yotlajtlankej okitlalijkej tlen kikuaskiaj uan ijtik kuetlaxtekonmej tlen yotsayankej uan san okinyektlalijkej okitlalijkej vino. Nochi non okitlalijkej ipan inburros. 5 Okimotlalilijkej inkakuan* tlen yotlajtlankej uan san okinyektlalijkej noijki intlaken tlen yotlajtlanki. Nochi pan tlen kikuaskiaj youaki uan yopayaxiuik.* 6 Yejuan okitatoj Josué ompa Guilgal kanin okatka uan okiluijkej ye uan nochtin israelitas: “Tejuan toaltepe uejka kajki. Touan xikchiuakan se acuerdo”. 7 Pero israelitas okinmiluijkej heveos:* “Xamo amo uejka nanchantij. ¿Tleka nankinekij namouan matikchiuakan se acuerdo?”. 8 Yejuan okinankilijkej Josué: “Tejuan timotlakeualuan”.
Josué okintlajtlani: “¿Akinmej namejuan uan kanin nanuitsej?”. 9 Yejuan okinankilijkej: “Tejuan uejka kajki toaltepe pero otiualajkej porque tiktlakaitaj itoka Jehová moDios, akin miakej kixmatij, otikkakej tlen okichi Egipto 10 uan tlen okintokti* akinmej okinauatiayaj amorreos tlen ochantiayaj ik okse lado Jordán, tekiua Sehón de Hesbón uan Og de Basán akin ochantiaya Astarot. 11 Ikinon akinmej techyekanaj uan akinmej touan chantij otechiluijkej: ‘Xikuikakan tlen nankikuaskej uan xikinmitatij. Noijki otechiluijkej matikijtokan: “Tiyetoskej timotlakeualuan. Touan xikchiuakan se acuerdo”’. 12 Nin pan okatka totonik ijkuak otiualkiskej tokalijtik pero axkan xikitakan, youaki uan yopayaxiuik. 13 Noijki ok okatkaj yankuikej kuetlaxtekonmej tlen ika tikualikaj vino pero axkan yotsayankej. Totlaken uan tokakuan* yotlajtlankej porque uejka otiualajkej”.
14 Akinmej okinyekanayaj israelitas okiyekitakej tlakuali tlen okiualikayaj pero amo okitlajtlanijkej Jehová tlen omonekiaya kichiuaskej. 15 Josué inuan okichi se acuerdo para amo kinmiktiskiaj nion itlaj kintoktiskiaj* uan akinmej okinauatiayaj israelitas okijtojkej* kichiuaskiaj ijkon ken omoijtojka.
16 Ijkuak opanok eyi tonal okichijkej acuerdo, okimatkej amo uejka ochantiayaj. 17 Satepan israelitas oyajkej uan ipan eyi tonal oajsitoj kanin yejuan ochantiayaj ompa altepetl Gabaón, Kefirá, Beerot uan Quiryat-Jearim. 18 Pero israelitas amitlaj okintoktijkej* porque akinmej okinauatiayaj okijtojkej ixpan Jehová inDios israelitas amitlaj kintoktiskiaj. Nochtin israelitas opejki kinteneuaj* akinmej okinyekanayaj, 19 pero yejuan okinmiluijkej: “Amitlaj uelis tikintoktiskej* porque ika itoka Jehová inDios israelitas otikijtojkej* ijkon tikchiuaskiaj. 20 Para amo tikualaniskej toTajtsin Dios, tejuan tikchiuaskej ken otikijtojkej uan amo tikinmiktiskej”. 21 Akinmej okinyekanayaj israelitas okijtojkej ijkon kichiuaskiaj. Satepan noijki okijtojkej: “Uelis yoltoskej pero moneki kololoskej tlakotl uan kitemoskej atl para tinochtin”.
22 Josué okinnotski gabaonitas uan okinmilui: “Namejuan onantechkajkayajkej ijkuak onankijtojkej: ‘Tejuan uejka kajki toaltepe’ pero otikmatkej amo uejka nanchantij. 23 Ikinon nochipa nantlajyouiskej uan nanyetoskej tlakeualmej tlen nankololoskej tlakotl uan nankitemoskej atl para ikal noTajtsin Dios”. 24 Yejuan okinankilijkej Josué: “Tejuan otikmatkej ijkuak Jehová moDios okilui itekipanojka Moisés namejuan nankimoaxkatiskiaj tlali uan nankinmiktiskiaj nochtin akinmej ompa chantij. Amo otiknekiaya timikiskej, ikinon ijkon otikchijkej. 25 Tejuan tikchiuaskej tlen otikijto. Touan xikchiua tlen kuali uan tlen moneki tla ijkon yotikpejpenki”. 26 Josué ijkon okichi uan okinpaleui para israelitas amo makinmiktikan. 27 Desde non tonal Josué okinnauati makololokan tlakotl uan makitemokan atl para israelitas uan para ialtar Jehová kanin ye* kijtoskia. Hasta axkan ijkon kichiuaj.