Tlen okijkuilo Marcos
15 Ijkuak otlaneski, omonechikojkej nochtin tlen opouiayaj Sanedrín. Teopixkej tlen otlayekanayaj, tlayekankej uan akinmej otlamachtiayaj tlanauatil. Yejuan omotlapouijkej tlen kitoktiskiaj Jesús. Satepan okilpijkej uan okimaktilitoj tekiua Pilato. 2 Pilato okitlajtlani Jesús: “¿Te tikinnauatia judíos?”. Ye okinankili: “Te ijkon yotikijto”. 3 Pero teopixkej tlen otlayekanayaj okijtouayaj miak tlamantli para kiteluiskej. 4 Pilato oksepa okitlajtlani Jesús: “¿Amitlaj tikijtos? Xikkaki nochi tlen mitstlajtlakoltiaj”. 5 Pero Jesús amo okinankili uan Pilato omotlajtlachialti.
6 Ijkuak okichiuayaj Pascua, Pilato okikixtiaya se tlen otsaktoka. Okikixtiayaj akin okipejpenayaj. 7 Ijkuakon otsaktoka se tlakatl itoka Barrabás. Ye inuan oksekimej okintsakej porque otemiktijkej ijkuak okinmixnamikej tekiuajkej. 8 Miakej okitatoj Pilato uan okiluijkej makichiua tlen nochipa okichiuaya. 9 Ye okintlajtlani: “¿Nankinekij manikkajkaua tlakatl tlen kinnauatia judíos?”. 10 Pilato okitaya teopixkej tlen otlayekanayaj okitemaktijkej Jesús porque okinexikolitayaj. 11 Pero teopixkej tlen otlayekanayaj okintlatlaluijkej akinmej ompa okatkaj makijtokan makikixtikan Barrabás. 12 Pilato oksepa okintlajtlani: “¿Tlen nankinekij maniktokti nin tlakatl tlen nankijtouaj kinnauatia judíos?”. 13 Yejuan oksepa chikauak okijtojkej: “¡Makipilokan itech kouitl!”. 14 Pero Pilato okintlajtlani: “¿Tleka? ¿Tlen okichi?”. Yejuan okachi chikauak okijtojkej: “¡Makipilokan itech kouitl!”. 15 Pilato okikajka Barrabás porque okinekiaya kichiuas tlen okiluijkej. Pero otlanauati makiuitekikan Jesús ika mekatl uan okitemakti makimiktikan itech kouitl.
16 Satepan sekimej soldados okiuikakej Jesús ichan tekiua uan ompa okinnechikojkej nochtin soldados. 17 Okitlalilijkej se tsotsoli* morado, okichijkej se corona ika uitstli uan okikuatlalilijkej. 18 Chikauak okiluiayaj: “¡Panolti intekiua judíos!”. 19 Noijki okikuauitekej ika se akatl, okichijchakej uan ixpan omotlankuaketsayaj. 20 Ijkuak otlanki okipinauijkej, okikixtilijkej tsotsoli* morado uan oksepa okitlalilijkej itlaken tlen achto okipiaya. Satepan okikixtijkej uan okipilotoj itech se kouitl. 21 Ik ompa opanok Simón tlen ouia tlala. Nin tlakatl oneski* altepetl Cirene uan okatka inpapa Alejandro uan Rufo. Ye okinauatijkej makimama kouitl* tlen itech kipiloskiaj Jesús.
22 Okiuikakej Jesús itech tlali tlen itoka Gólgota, nin tlajtoli kijtosneki “Tsontekomatl”. 23 Ompa okimakakej vino tlen okinelojkej iuan mirra* pero ye amo okinek konis. 24 Satepan okipilojkej itech kouitl. Soldados okimotlatlanilijkej itlaken para kitaskiaj tlen kimokauiskej. 25 Okipilojkej itech kouitl kanaj las 9 kualkan. 26 Noijki ikpak* okijkuilojkej tleka okimiktijkej. Ompa okijtouaya: “Ye kinnauatia judíos”. 27 Noijki inajnakastlan okinpilojkej itech kouitl ome ichtekej, se iyekma uan okse iopochma. 28 * 29 Akinmej ik ompa opanouayaj okiuijuikaltiayaj, okoliniayaj intsonteko uan okiluiayaj: “Te otikijto tikxixinis templo uan ipan eyi tonal oksepa tikchiuas, 30 ximopaleui uan xitemo”. 31 Noijki okipinauiayaj teopixkej tlen otlayekanayaj uan akinmej otlamachtiayaj tlanauatil. Yejuan okimoluiayaj: “¡Ye okinpaleui oksekimej pero ineuian amo ueli mopaleuia! 32 Ye Cristo uan kinnauatia israelitas, matemo uan tikneltokaskej”. Noijki okiuijuikaltijkej tlakamej tlen inajnakastlan okinpilojkej.
33 Itech non altepetl opejki tlayoua kanaj tlajkotonal hasta kanaj las 3 tiotlak. 34 Kanaj las 3 tiotlak Jesús chikauak okijto: “Éli, Éli, ¿láma sabakhtháni?”, nin tlajtoli kijtosneki: “NoTajtsin Dios, noTajtsin Dios, ¿tleka otechka noselti?”. 35 Sekimej tlen ompa okatkaj, okikakej uan okijtojkej: “¡Xikkakikan, kinotsa Elías!”. 36 Se tlakatl omotlalo okikalakito se esponja ijtik vino xokok. Satepan okilpi itech se akatl, okimakak Jesús makoni uan okijto: “¡Xikkauakan! Matikitakan kox kitemouiki Elías”. 37 Jesús chikauak otsajtsik uan oixpoliuik. 38 Ijkuakon otlajkotsayanki tsotsoli* tilauak tlen opilkatoka itech templo. 39 Tlakatl tlen okinyekanaya soldados omoketoka ik kanin opilkatoka Jesús uan okitak nochi tlen opanok ijkuak oixpoliuik. Ye okijto: “Nin tlakatl melauak okatka iKone toTajtsin Dios”.
40 Sekimej siuamej san uejka okitokaj Jesús. Ompa okatkaj María Magdalena uan María imama Santiago* uan Josés. Noijki ompa okatka Salomé. 41 Ninmej siuamej okipaleuiayaj Jesús ijkuak okatka Galilea. Noijki ompa okatkaj oksekimej siuamej tlen oyajkej iuan Jesús ompa Jerusalén.
42 Ijkuak yotiotlakik, nochtin otlayektlalijtokaj porque mostlatika sábado moseuiskiaj. 43 Ikinon José tlen oualaya Arimatea omoyolchika uan okiluito Pilato makimaka icuerpo Jesús. José oueyititoka itech Sanedrín uan noijki okichiaya iTekiuajkayo toTajtsin Dios. 44 Pero Pilato omotlajtlaniaya kox yoixpoliuik Jesús, ikinon otlanauati makinotsatij tlakatl tlen okinyekanaya soldados uan okitlajtlani. 45 Tlakatl tlen okinyekanaya soldados okilui yoixpoliuik, uan Pilato okikauili José makiuika icuerpo Jesús. 46 José okitemoui icuerpo Jesús uan okikimilo ika se kuali tsotsoli* de lino tlen okiko. Satepan okitokak Jesús itech se tetl tlen yokikoyonijkaj uan okitentsaki ika se ueyi tetl. 47 Pero María Magdalena uan María imama Josés omokajkej otlachixtokaj kanin okitokakej Jesús.