Tlen okijkuilo Mateo
9 Jesús otlejkok itech se barco, oyajki okse lado itempa mar uan oajsito ialtepe. 2 Sekimej okiualikilijkej se tlakatl tlen amo ueli omoliniaya uan okiualikayaj ipan ipetl. Ijkuak Jesús okitak yejuan otlaneltokayaj, okilui tlakatl tlen amo ueli omoliniaya: “¡Amo ximoyolkoko nokone! Ne yonimitstlapojpoluili motlajtlakol”. 3 Ijkuakon sekimej tlakamej tlen otlamachtiayaj tlanauatil, okijtojkej: “Nin tlakatl kiuijuikaltia Dios”. 4 Jesús okimatiaya tlen omokuayejyekouayaj* uan okinmilui: “¿Tleka nanmokuayejyekouaj* tlen amo kuali? 5 ¿Tlen okachi amo oui? ¿Nikiluis yoniktlapojpoluili itlajtlakol noso nikiluis mamoketsa uan manejnemi? 6 Pero ijkon nankitaskej iKone Tlakatl yokinauatijkej makintlapojpoluili intlajtlakol akinmej chantij tlaltikpak...”. Ijkuakon okilui tlakatl tlen amo ueli omoliniaya: “Ximoketsa, xikonana mopetl uan xiuia mochan”. 7 Ye omoketski uan oyajki ichan. 8 Nochtin omotlajtlachialtijkej ijkuak okitakej tlen opanok. Noijki okiueyichijkej toTajtsin Dios porque okinmakak non chikaualistli sekimej tlakamej.
9 Ijkuak Jesús oyajki, okitak se tlakatl itoka Mateo okatka* kanin otominololouayaj uan okilui: “Nouan xiuiki”. Mateo san niman omoketski uan oyajki iuan Jesús. 10 Satepan ijkuak Jesús uan idiscípulos otlakuajtokaj ichan Mateo, oajsitoj miakej tominololojkej uan akinmej otlajtlakolchiuayaj. Yejuan san sekan otlakuajkej. 11 Pero fariseos okinmitakej uan okintlajtlanijkej idiscípulos Jesús: “¿Tleka namotlamachti tlakua inuan tominololojkej uan akinmej tlajtlakolchiuaj?”. 12 Jesús okinkak uan okinmilui: “Akinmej amo mokokouaj amo moneki kinpajtiskej, pero kokoxkej moneki kinpajtiskej. 13 Xiuiaj uan ximomachtikan tlen kijtosneki ninmej tlajtolmej: ‘Ne nikneki xiteiknomatikan uan amo san techintliokolikan yolkamej’. Ne onikinmiluiko tlajtlakolejkej mamoyolkopakan uan amo ijkon onikinmiluiko akinmej yolkualmej”.
14 Satepan idiscípulos Juan okitlajtlanijkej Jesús: “¿Tleka tejuan uan fariseos amo titlakuaj* pero modiscípulos tlakuaj?”. 15 Ye okinnankili: “Ijkuak ikaj monamiktia, akinmej mouikaj iuan novio amo moyolkokouaj porque novio inuan kajki. Pero ajsis tonal kiuikaskej novio uan ijkuakon amo tlakuaskej.* 16 Amikaj kijtsoma se tsotsoli* yankuik ipan se tsotsoli* tlen yotlajtlanki, porque tsotsoli* yankuik kototsiuis uan tsotsoli* tlen yotlajtlanki okachi tsomonis. 17 Noijki amikaj kitlalia yankuik vino ijtik kuetlaxtekonmej tlen yotlajtlankej. Tla ikaj ijkon kichiuas, kuetlaxtekonmej tsojtsomoniskej uan vino ijtlakauis. Ikinon yankuik vino kitlaliaj ijtik kuetlaxtekonmej yankuikej uan ijkon amitlaj ijtlakaui”.
18 Ijkuak Jesús otlajtojtoka, se tekiua ixpan omotlankuaketski uan okilui: “Xamo notakotsin yoixpoliuik, pero ipan xiktlaliti moma uan ijkon moyolitis”.
19 Jesús uan idiscípulos oyajkej iuan non tekiua. 20 Ijkuakon se siuatl tlen yokipiaya 12 xiuitl oeskisaya, omotoki ikuitlapan Jesús uan okikitskili itempa itlaken. 21 Porque ye okimoluiaya: “Nipajtis tla san nikkitskilis itlaken”. 22 Jesús omokopki uan ijkuak okitak, okilui: “¡Amo ximoyolkoko nokone! Yotipajtik porque titlaneltoka”. Uan siuatl san niman opajtik.
23 Ijkuak Jesús oajsito ichan tekiua, okinmitak akinmej okipitsayaj flauta uan akinmej ompa okatkaj ochokayaj. 24 Ye okinmilui: “Xikisakan porque takotsin san kochi uan amo oixpoliuik”. Yejuan san okiuetskilijkej ijkuak ijkon okinmilui. 25 Satepan okinkixtijkej akinmej ompa okatkaj. Jesús okalak kanin okatka takotsin, okimakitski uan ye omejki. 26 Nochtin tlen ik ompa ochantiayaj okimatkej tlen opanok.
27 Ijkuak Jesús yoyaya, okajsitoj ome tlakamej tlen amo otlachiayaj uan okitsajtsilijkej: “¡IKone David, techiknomati!”. 28 Jesús okalak itech se kali uan nonmej tlakamej inauak omotokijkej. Ye okintlajtlani: “¿Nankineltokaj uelis namechpajtis?”. Yejuan okinankilijkej: “Kema toTeko”. 29 Jesús okintlali imauan inpan inmixtololouan uan okinmilui: “Nantlachiaskej porque nantlaneltokaj”. 30 Yejuan otlachixkej. Pero Jesús okinnauati: “Amikaj xikiluikan tlen opanok”. 31 Pero ijkuak oyajkej, okintlapouijtiajkej akinmej ik ompa ochantiayaj tlen okichi Jesús.
32 Ijkuak nonmej tlakamej oyajkej, oksekimej tlakamej okiualikilijkej Jesús se tlakatl tlen amo otlajtouaya uan okipiaya se ejekatl.* 33 Tlakatl opejki tlajtoua ijkuak Jesús okikixtili ejekatl.* Akinmej ompa okatkaj omotlajtlachialtijkej uan okijtojkej: “Amo keman itlaj ijkon opanouaya itech altepetl Israel”. 34 Pero fariseos okijtojkej: “Ye kinkixtia ejekamej* porque Diablo kimaka chikaualistli”.
35 Jesús oyajki itech altepemej uan altepetsitsintin. Ye otlamachtiaya itech sinagogas* uan otetlapouiaya kuali tlajtoli tlen kijtoua toTajtsin Dios ualtlanauatis ipan tlaltikpak. Noijki okinpajtiaya nochtin kokoxkej. 36 Ijkuak Jesús okinmitaya oksekimej, okinmiknomatiaya porque otlajyouiayaj uan okatkaj inselti ken ichkamej tlen amikaj okinmaluiaya. 37 Ye okinmilui idiscípulos: “Moneki tikololoskej miak tlatoktli pero amo katej miakej tlakeualmej. 38 Ikinon xiktlatlaujtikan akin iaxka tlatoktli makinualtitlani tlakeualmej makololokan”.