Tlen okijkuilo Mateo
15 Sekimej fariseos uan akinmej otlamachtiayaj tlanauatil tlen oualayaj Jerusalén, omotokijkej inauak Jesús uan okiluijkej: 2 “¿Tleka modiscípulos amo kichiuaj tlen otechmachtijkej touejkatatajuan? Yejuan amo momajtekiaj ijkuak tlakuaj”.
3 Jesús okinnankili: “¿Tleka amo nankichiuaj tlen toTajtsin Dios namechnauatia uan san nankichiuaj tlen onamechmachtijkej? 4 ToTajtsin Dios okijto: ‘Xiktlakaita mopapa uan momama’. Noijki okijto: ‘Kimiktiskej akin kiuijuikaltia ipapa noso imama’. 5 Pero namejuan nankijtouaj: ‘Tla ikaj kiluis ipapa noso imama “amo uelis nimitspaleuis porque nochi tlen nikpia iaxka toTajtsin Dios”, 6 ye ayakmo moneki kitlakaitas ipapa uan imama’. Ijkon nankichiuaj ayakmo makipatioitakan iTlajtol toTajtsin Dios porque san nankichiuaj tlen onamechmachtijkej. 7 Nankipiaj ome namoixko ikinon profeta Isaías okijto tlen namechpanoskia: 8 ‘Akinmej pouij itech nin altepetl san kijtouaj nechueyichiuaj pero amo nechtlasojtlaj. 9 Amitlaj ipati nechueyichiuaj porque san tlamachtiaj tlen tlanauatiaj tlakamej’”. 10 Ijkuakon Jesús okinnotski akinmej ompa okatkaj uan okijto: “Kuali techkakikan uan xikajsikamatikan tlen namechiluis: 11 Tlen kikua se tlakatl amo kisokiotia, pero kisokiotia tlen kijtoua”.
12 Idiscípulos inauak omotokijkej uan okiluijkej: “¿Yotikmatki fariseos okualankej ijkuak okikakej tlen otikijto?”. 13 Jesús okinnankili: “Kiuiuitlaskej nochi tlatoktli tlen amo okitokak noTajtsin tlen kajki iluikak. 14 Xikinkauakan. Yejuan amo tlachiaj pero kinyekanaj oksekimej. Tla ikaj tlen amo tlachia kiyekana okse tlen amo tlachia, san sekan uetsitiuij ijtik se tekochtli”. 15 Pedro okilui: “Techyekilui tlen kijtosneki tlen otikijto”. 16 Jesús okinankili: “¿Namejuan noijki ayamo nankajsikamatij? 17 ¿Amo nankitaj nochi tlen tikkuaj ajsi toijtik uan satepan tikkixtiaj? 18 Pero nochi tlen tikijtouaj kisa toyolipan uan non techsokiotia. 19 Ijkuak ikaj amo kuali mokuayejyekoua* non kisa iyolipan: temiktia, kikajkayaua isiua noso inamik, auilnemi,* tlachteki, tlakajkayaua uan tlauijuikaltia. 20 Akin kichiua nin tlamantli ye non kisokiotia. Pero amo mosokiotia akin amo momajtekia ijkuak tlakua”.
21 Satepan Jesús oyajki altepetl Tiro uan Sidón. 22 Ijkuakon se siuatl tlen oualaya Fenicia uan ompa ochantiaya, okajsito Jesús uan chikauak okilui: “¡NoTeko, iKone David, techiknomati! Notakotsin kipia se ejekatl* uan tlajyouia”. 23 Ye amo okinankili siuatl, pero discípulos omotokijkej inauak Jesús uan okiluijkej: “Xikilui mauia porque tokuitlapan tsajtsitiuits”. 24 Ye okinmilui: “ToTajtsin Dios onechualtitlanki manikintemoki san israelitas tlen politokej ken ichkamej”. 25 Siuatl omotoki inauak, ixpan omotlankuaketski uan okilui: “¡NoTeko techpaleui!”. 26 Jesús okinankili: “Amo kuali tla tikinkixtiliskej intlakual konemej uan tikinmakaskej itskuintsitsintin”. 27 Siuatl okijto: “Melauak tlen tikijtoua noTeko. Pero itskuintsitsintin kikuaj intenpayax inteko tlen uetsi itlampa mesa”. 28 Jesús okinankili: “¡Siuatsintli, te melauak titlaneltoka! Mamochiua tlen tikneki”. Ijkuakon itakotsin siuatl oualpajtik.
29 Satepan Jesús oyajki uan oajsito ik itempa mar Galilea. Otlejkok itech se tepetl uan ompa omotlali. 30 Miakej ompa okajsitoj uan okinuikiliayaj akinmej amo onejnemiayaj, akinmej amo otlachiayaj, akinmej amo otlajtouayaj uan miakej kokoxkej. Okintlaliayaj ikxitlan Jesús uan ye okinpajtiaya. 31 Nochtin omotlajtlachialtijkej uan okiueyichijkej inDios israelitas ijkuak okitakej opejki tlajtouaj akinmej amo otlajtouayaj, opejki nejnemij akinmej amo onejnemiayaj uan opejki tlachiaj akinmej amo otlachiayaj.
32 Satepan Jesús okinnotski idiscípulos uan okinmilui: “Nikinmiknomati akinmej nikan katej, porque yikipia eyi tonal nouan katej uan amo kipiaj tlen kikuaskej. Amo nikneki san ijkon nikintitlanis porque tlamo sotlauatiuij itech ojtli”. 33 Idiscípulos okiluijkej: “Nikan amikaj chanti. ¿Kanin tikkuitiuij* pan para kuali tikintlamakaskej nochtin tlen nikan katej?”. 34 Jesús okintlajtlani: “¿Keski pan nankipiaj?”. Yejuan okinankilijkej: “Tikpiaj chikome pan uan kanaj keski michintsitsintin”. 35 Jesús okinmilui akinmej ompa okatkaj mamotlalikan ipan tlali. 36 Satepan okonanki chikome pan uan noijki michimej, uan okitlasojkamatili toTajtsin Dios. Okipojposteki pan, okinmakak idiscípulos uan yejuan okinmajmakakej akinmej ompa okatkaj. 37 Nochtin otlakuajkej uan oixuikej. Satepan discípulos okololojkej nochi tlen omoka uan okitemitijkej chikome uejueyij chikiuitl. 38 Otlakuajkej 4,000 tlakamej uan noijki siuamej uan konemej. 39 Ijkuak Jesús okinmilui mayakan akinmej ompa okatkaj, otlejkok itech se barco uan oyajki altepetl Magadán.