Okse carta para Tesalonicenses
3 Nokniuan, saiktlami namechiluia nochipa topatka ximotlatlaujtikan uan ijkon san niman mamotematilti iTlajtol Jehová. Noijki makitlakaitakan iTlajtol ijkuak kiseliskej ken namejuan onankichijkej. 2 Noijki ximotlatlaujtikan amitlaj matechtoktikan tlakamej amo yolkualmej tlen tetlajyouiltiaj, porque amo nochtin tlaneltokaj. 3 Pero toTeko nochipa kichiua tlen kijtoua. Ye namechyolchikauas uan namechmakixtis imak Satanás. 4 Tejuan tikchiuaj ken toTeko ikinon tikneltokaj namejuan nankitlakamatij* tlen timechnauatiaj uan nochipa nankitlakamatiskej.* 5 ToTeko manamechpaleui xiktlasojtlakan toTajtsin Dios uan xitlaxikokan para nochipa nankichiuaskej ken Cristo.
6 Nokniuan, ika itoka toTeko Jesucristo axkan timechnauatiaj amo ximouikakan inuan tokniuan tlen amo tetlakamatij* nion amo kichiuaj tlen otimechmachtijkej. 7 Namejuan nankimatij ken nankichiuaskej ken tejuan, porque tejuan otitetlakamatkej* ijkuak namouan otikatkaj. 8 Amikaj san otechtliokoli tlen tikkuaskej. Tejuan chikauak otitekipanojkej tlajka uan youak, amo otimoseuijkej uan ijkon amo otimechtlajtlanilijkej tomin. 9 Tejuan uelis timechiluiskiaj techpaleuikan, pero amo ijkon otikchijkej para timechititiskiaj tlen moneki nankichiuaskej. 10 Ijkuak namouan otikatkaj, tejuan otimechnauatiayaj: “Amo matlakua akin amo kineki tekipanos”. 11 Porque yotikmatkej sekimej tlen namouan katej amo tetlakamatij.* Yejuan amo tekipanouaj uan mokajkalakiaj kanin amo kinnotsaj. 12 Yejuan tikinnauatiaj uan tikintlatlaujtiaj ika itoka toTeko Jesucristo, amo mamokajkalakikan kanin amo kinnotsaj uan makimotlanilikan tlen kikuaskej.
13 Pero namejuan nokniuan nochipa xikchiuakan tlen kuali. 14 Pero tla ikaj amo kichiua tlen tikijtouaj itech nin carta, kuali xikitakan akin ijkon kichiua uan ayakmo iuan ximouikakan para mapinaua. 15 Pero amo xikkokolikan uan xiknejmachtikan ken se tokni.
16 ToTeko tlen teyolseuia nochipa manamechyolseui itech nochi tlamantli. ToTeko namouan mayeto.
17 Ne niPablo, uan namechontlajkuililia para namechontlajpalos. Ne nochipa ijkin nikinmijkuiloua nocartas para xikmatikan ne onamechtlajkuilili.
18 ToTeko Jesucristo nochipa nannochtin manamechtliokoli tlen kuali.