Tlen okijkuilo Mateo

23 Ijkuakon Jesús okintlapoui idiscípulos uan akinmej ompa okatkaj. Ye okinmilui: 2 “Fariseos uan akinmej tlamachtiaj tlanauatil kineltokaj tlamachtiaj tlen Moisés otlamachti. 3 Xikchiuakan nochi tlen yejuan namechiluiaj, pero amo xikchiuakan tlen yejuan kichiuaj porque yejuan amo kichiuaj tlen tlamachtiaj. 4 Intlanauatiluan yetoskiaj ken itlaj etik tlen kinmamaltiaj oksekimej. Pero yejuan amo kinekij koliniskej nion ika se inmajpil. 5 Kinekij oksekimej makitakan nochi tlen kichiuaj. Kinueyitiliaj cajitas* tlen kinuikaj inmixkuak uan itech inma para amitlaj makinpano. Noijki kiueyitiliaj itempa intlaken. 6 Itech iluitl kinpaktia motlaliskej kanin nochtin kinmitaskej. Noijki motlaliaj tlayekapan itech sinagogas.* 7 Kinpaktia makintlajpalokan tiankisko uan makinnotsakan tlamachtijkej. 8 Pero namejuan amikaj xikkauilikan manamechnotsa tlamachti, porque nankipiaj san se namoTlamachti uan nochtin namejuan namiknimej. 9 Noijki amikaj xiknotsakan namotajtsin nikan tlaltikpak, porque nankipiaj san se namoTajtsin ompa iluikak. 10 Noijki amikaj xikkauilikan manamechnotsa tekiua, porque san Cristo namoTekiua. 11 Porque akin okachi ueyititok, moneki kinpaleuis oksekimej. 12 Kipinauiskej akin moueyineki pero kiueyitlaliskej akin yolyamanki”.

13 “¡Mialmastin namejuan fariseos uan akinmej nantlamachtiaj tlanauatil! ¡Nankipiaj ome namoixko! Porque nankintsakuiliaj oksekimej para amo makalakikan itech Tekiuajkayotl tlen kajki iluikak. Nion namejuan amo nankalakij uan amo nankinkauiliaj makalakikan akinmej mochijchikauaj kalakiskej”. 14 *

15 “¡Mialmastin namejuan fariseos uan akinmej nantlamachtiaj tlanauatil! ¡Nankipiaj ome namoixko! Porque uejka nanyauij nankitemotiuij ikaj matlaneltoka, pero ijkuak peua tlaneltoka nankichiuaj okachi matlajtlakolchiua uan mauia ijtik Gehena”.*

16 “¡Mialmastin namejuan tlen nantlayekanaj pero amo nantlachiaj! Porque nankijtouaj: ‘Amitlaj ipati tla ikaj kiteneua templo ijkuak kijtoua itlaj kichiuas. Pero akin kiteneua oro tlen kajki templo, moneki kichiuas tlen yokijto’. 17 ¡Amo kuali nanmokuayejyekouaj* uan amo nantlachiaj! ¿Tlen okachi ipati? ¿Oro noso templo kanin kinejnekij* oro para kitekichiuiliskej toTajtsin Dios? 18 Noijki nankijtouaj: ‘Amitlaj ipati tla ikaj kiteneua altar ijkuak kijtoua itlaj kichiuas. Pero akin kiteneua tetliokolil tlen kajki ipan altar, moneki kichiuas tlen yokijto’. 19 ¡Namejuan amo nantlachiaj! ¿Tlen okachi ipati? ¿Tetliokolil noso altar kanin kitlaliaj tlen kimakaj toTajtsin Dios? 20 Porque akin kiteneua altar ijkuak kijtoua itlaj kichiuas, kiteneua altar uan noijki nochi tlen ipan kajki. 21 Akin kiteneua templo ijkuak kijtoua itlaj kichiuas, noijki kiteneua toTajtsin Dios porque ye iaxka templo. 22 Uan akin kiteneua iluikak ijkuak kijtoua itlaj kichiuas, noijki kiteneua itrono toTajtsin Dios uan akin ompa kajki”.*

23 “¡Mialmastin namejuan fariseos uan akinmej nantlamachtiaj tlanauatil! ¡Nankipiaj ome namoixko! Porque nankitemakaj* menta, eneldo uan comino, pero amo nankichiuaj tlen okachi ipati tlen kijtoua iTlanauatil Moisés. Amo nankichiuaj tlen kuali, amo nanteiknomatij uan amo nantlaneltokaj. Omonekiaya nankitemakaskej non tlamantli, pero amo omonekiaya nankilkauaskej nankichiuaskej tlen okachi ipati. 24 ¡Namejuan nantlayekanaj pero amo nantlachiaj. Nankitsetselouaj tlen nankonij para amo mapano se moyotl pero nankitolouaj se camello!”.

25 “¡Mialmastin namejuan fariseos uan akinmej nantlamachtiaj tlanauatil! ¡Nankipiaj ome namoixko! Porque san panixko nankichipauaj namocopa uan namoplato. Pero namoyolipan nantlaixnekij uan san nankinekij nanmoyolpaktiskej. 26 Fariseo tlen amo titlachia, achto xikijtichipaua mocopa uan moplato uan ijkon panixko noijki chipauis”.

27 “¡Mialmastin namejuan fariseos uan akinmej nantlamachtiaj tlanauatil! ¡Nankipiaj ome namoixko! Porque nanmotaj ken kanin toktokej akinmej yoixpolikej. Kualtsin tlamota porque tlatenexuiaj, pero tlaijtik san onka omitl uan nochi tlen palantok. 28 Namejuan noijki teixpan nankiteititiaj nanyolkualmej, pero nankichiuaj tlen amo kuali uan nankipiaj ome namoixko”.

29 “¡Mialmastin namejuan fariseos uan akinmej nantlamachtiaj tlanauatil! ¡Nankipiaj ome namoixko! Porque nantlayektlaliaj kanin toktokej profetas uan nantlachijchiuaj kanin toktokej yolkualmej 30 uan nankijtouaj: ‘Tla tiyoltoskiaj ijkuak okatkaj touejkatatajuan, amo titlapaleuiskiaj makinmiktikan profetas’. 31 Pero tlen nankijtouaj kiteititia namejuan inkoneuan akinmej okinmiktijkej profetas. 32 Ikinon xiktlamikan tekitl tlen okipeualtijkej namouejkatatajuan”.

33 “Namejuan nankouamej, ¿ken nanmopaleuiskej para amo manamechtlamotlakan ijtik Gehena?* 34 Ne namechintitlanilis profetas, tlamachtijkej uan ixtlamatkej. Sekimej nankinmiktiskej uan nankinpiloskej itech kouitl. Oksekimej nankinuitekiskej ika mekatl itech sinagogas,* uan nankintemojtinemiskej itech altepemej para nankintlajyouiltiskej. 35 Namejuan namechtlajtlakoltiskej porque ipan tlaltikpak okinokijkej* inmieso akinmej yolkualmej. Opejki desde Abel hasta ijkuak ixpan templo inakastlan altar onankimiktijkej Zacarías, ikone Baraquías. 36 Ne namechiluia, akinmej axkan yoltokej kitlaxtlauaskej nochi tlen opanok”.

37 “Namejuan tlen nanchantij Jerusalén, nankinmiktiaj profetas uan nankinmojmotlaj ika tetl akinmej namechintitlaniliaj. ¡Miak uelta oniknekiaya namechnechikos ken se gallina kinnechikoua ikoneuan itlampa iajasuan!* Pero namejuan amo onankinekej. 38 Axkan toTajtsin Dios kikaua nin templo uan namechkajteuilia. 39 Ne namechiluia, amo oksepa nantechitaskej hasta ijkuak nankijtoskej: ‘¡Yokiteochijkej akin uits ika itoka Jehová!’”.