Tlen okijkuilo Juan
10 “Ne melauak namechiluia, akin san tsikuini ijtik ichkacorral uan amo kalaki kanin kajki puerta kijtosneki ye se ichteki. 2 Pero tlajpixki kalaki kanin kajki puerta. 3 Akin tlamaluia kitlatlapolia tlajpixki uan ichkamej kitenkakij. Tlajpixki kinnotsa ichkamej ika intoka uan kinkixtia. 4 Kinyekana ichkauan ijkuak nochtin yokinkixti. Ichkamej kitokaj porque kitenkakij. 5 Amo keman kitokaskej akin amo kixmatij. Choloskej porque amo kitenkakij akin amo kixmatij”. 6 Jesús okinmilui nin neskayotl* pero yejuan amo okajsikamatkej tlen okinmilui.
7 Jesús oksepa okinmilui: “Ne melauak namechiluia, ne nika ken se puerta kanin kalakij ichkamej. 8 Nochtin tlen nopatka oualajkej yejuan ichtekej, pero ichkamej amo okintenkakej. 9 Ne nika ken se puerta uan momakixtis akin nonauak uits para kalakis. Uelis kalakis uan kisas uan kajsis tlen kikuas. 10 Ichteki san uits tlachtekiki, temiktiki uan tlaxixiniki. Pero ne oniuala para miakej makipiakan yolilistli uan uejkika mayoltokan. 11 Ne kuali nitlajpixki. Se kuali tlajpixki kitemaka iyolilis inpatka ichkauan. 12 Akin san tetlajpialia, kinkajteua ichkamej uan choloua ijkuak kita ompa uits tekuani. Ijkon kichiua porque amo ye tlajpixki nion amo iaxkauan ichkamej. Tekuani kinmiktia sekimej ichkamej uan oksekimej kinchochololtia. 13 Akin tetlajpialia choloua porque san kineki makitlaxtlauikan pero amo kintlasojtla ichkamej. 14 Ne kuali nitlajpixki. Nikinmixmati nochkauan uan nochkauan nechixmatij, 15 ijkon ken noTajtsin nechixmati uan ne noijki nikixmati. Ne niktemaka noyolilis inpatka nochkauan”.
16 “Nikinpia oksekimej ichkamej tlen amo katej itech nin corral. Yejuan noijki nikinualikas uan kikakiskej notlajtol. Nochtin san sekan yetoskej uan kipiaskej san se tlajpixki. 17 NoTajtsin nechtlasojtla porque niktemaka noyolilis uan satepan oksepa nikselis. 18 Amikaj nechkixtilia noyolilis, niktemaka porque ne nikneki. Ne uelis niktemakas noyolilis uan uelis oksepa nikselis. Ijkon onechnauati noTajtsin manikchiua”.
19 Ijkuak ijkon okijto, judíos oksepa omoxexelojkej. 20 Miakej okijtouayaj: “Nin tlakatl kipia se ejekatl* uan yokuatlapolo. ¿Tleka nankikakij?”. 21 Oksekimej okijtouayaj: “Akin kipia se ejekatl* amo ijkon kijtoskia. Se ejekatl* amo ueli kinpajtia akinmej amo tlachiaj”.
22 Itech nonmej tonalmej, judíos okichiuayaj iluitl ompa Jerusalén para kilnamikiskiaj ijkuak okiyektlalijkej templo. Ijkuakon oseuaya 23 uan Jesús onejnentiaya itech templo kanin kajki korredor tlen itoka Salomón. 24 Ijkuakon judíos okiyaualojkej uan okiluijkej: “¿Keman tikijtos kox te tiCristo? Xikyekijto tla te tiCristo”. 25 Jesús okinmilui: “Ne yonamechilui pero namejuan amo nantechneltokiliaj. Ika itoka noTajtsin nikchiua tlen ye kineki uan non kiteititia akin ne. 26 Pero namejuan amo nankineltokaj porque amo nannochkauan. 27 Nochkauan kikakij notlajtol. Ne nikinmixmati uan yejuan nechtokaj. 28 Ne nikinpaleuis nochipa mayoltokan. Amo keman ixpoliuiskej uan amikaj nechinkixtilis. 29 Okachi ipati tlen noTajtsin onechmakak. Ichkamej tlen katej imak noTajtsin amikaj uelis kinkixtilis. 30 Ne uan noTajtsin san sekan tikatej”.
31 Judíos oksepa okonankej tetl uan okinekiayaj kimojmotlaskej Jesús. 32 Ye okinmilui: “Namoixpan yonikchi miak tlamantli kuali tlen onechnauati noTajtsin. ¿Tlen amo kuali onikchi para nantechmojmotlaskej ika tetl?”. 33 Judíos okinankilijkej: “Timitsmojmotlaskej porque otikuijuikalti toTajtsin Dios uan amo porque otikchi itlaj amo kuali. Te san titlakatl pero tikijtoua te tidios”. 34 Jesús okinmilui: “Itech namoTlanauatil ijkuilitok: ‘Ne onikijto namejuan nandioses’. 35 Tla toTajtsin Dios okinnotski dioses akinmej iTlajtol okiteititi omonekiaya tlajyouiskej (iTlajtol toTajtsin Dios amo uelis mopatlas), 36 ¿tleka nankijtouaj onikuijuikalti toTajtsin Dios ijkuak onikijto ne niiKone? Ye onechpejpenki uan onechualtitlanki nikan tlaltikpak. 37 Amo techneltokilikan tla amo nikchiua tlen kineki noTajtsin. 38 Pero tla nikchiua, xikneltokakan tlen nikchiua maski ne amo techneltokakan. Ijkon nochipa nankimatiskej noTajtsin nouan kajki uan ne nika iuan noTajtsin”. 39 Satepan oksepa okinekiayaj kikitskiskej pero ye okincholili.
40 Jesús oksepa oyajki okse lado itempa aueyatl Jordán, kanin Juan achto oteapolaktiaya uan ompa omoka. 41 Miakej okitatoj uan okijtojkej: “Juan amo okichi nion se milagro, pero melauak nochi tlen okijto kichiuaskia nin tlakatl”. 42 Ompa miakej okineltokakej Jesús.