Tlen okijkuilo Lucas
14 Se sábado, Jesús otlakuato ichan se fariseo tlen otlayekanaya. Akinmej ompa okatkaj san okitayaj Jesús. 2 Ixpan Jesús okatka se tlakatl tlen opojposauiaya. 3 Jesús okintlajtlani fariseos uan akinmej kuali okixmatiayaj iTlanauatil Moisés: “¿Uelis ikaj kipajtiskej sábado noso amo?”. 4 Pero yejuan amitlaj okijtojkej. Jesús okikitski tlakatl, okipajti uan okilui mauia. 5 Satepan okinmilui: “Tla se sábado namokone noso namotoro uetsis ijtik se tekochtli, ¿amo san niman nankikixtiskej?”. 6 Yejuan amo ouelik okinankilijkej.
7 Jesús okitak akinmej otlakuatoj okinekiayaj motlaliskej kanin omotlaliayaj akinmej oueyititokaj ikinon okinmilui: 8 “Ijkuak mitsyoleuaskej kanin monamiktiskej, amo ximotlali kanin motlaliaj akinmej ueyititokej. Xamo noijki okiyolejkej ikaj okachi ueyititok. 9 Uits akin onamechyole uan mitsiluis: ‘Xikkauili nin tlakatl ompa mamotlali’. Ijkuakon tipinauas uan timotlaliti tlakuitlapan. 10 Ikinon ijkuak tias kanin monamiktiskej, ximotlali tlakuitlapan uan ijkon akin omitsyole mitsiluis: ‘Noyolikni, ximotlaliti kanin motlaliaj akinmej ueyititokej’. Ijkon mitstlakaitaskej akinmej ompa yetoskej. 11 Porque kipinauiskej akin moueyineki, pero kiueyitlaliskej akin yolyamanki”.
12 Satepan Jesús okilui tlakatl tlen okiyole matlakuati: “Ijkuak titetlamakas, amo xikinnotsa moyolikniuan, mokniuan, mofamiliares nion akinmej ik ompa chantij tlen kipiaj tomin. Tla ijkon tikchiuas, yejuan noijki mitsyoleuaskej xitlakuati uan ijkon mitskopiliskej tlen otikinmakak. 13 Ijkuak titetlamakas, xikinyoleua akinmej amitlaj kipiaj, akinmej amo nejnemij uan akinmej amo tlachiaj. 14 Ijkon tipakis porque yejuan amo uelis mitskopiliskej tlen otikinmakak. Uan toTajtsin Dios mitsteochiuas ijkuak kinyolitis akinmej yolkualmej”.
15 Ijkuak Jesús ijkon okijto, se tlakatl tlen noijki okiyolejkej okilui: “Pakis akin tlakuas itech iTekiuajkayo toTajtsin Dios”.
16 Jesús okilui: “Se tlakatl otlakualchi uan miakej okinyole. 17 Ijkuak yitlakuaskiaj, tlakatl okititlanki itlakeual makinmiluiti akinmej okinyole: ‘Xiualakan, yikajki tlakuali’. 18 Pero nochtin okijtojkej amo uelis yaskiaj. Se okijto: ‘Nimitstlatlaujtia techtlapojpolui, amo uelis nias porque onimotlalkoui uan moneki nitlachiati’. 19 Okse okijto: ‘Nimitstlatlaujtia techtlapojpolui, amo uelis nias porque onikinko majtlaktli toros uan nikinmitati’. 20 Okse okijto: ‘Amo uelis nias porque yikin onimonamikti’. 21 Tlakeuali okiluito iteko nochi tlen okiluijkej. Iteko okualanki uan okinauati: ‘Xio itech altepetl kanin miakej panouaj uan itech ojpitsaktij. Xikinualika akinmej amitlaj kipiaj, akinmej amo nejnemij uan akinmej amo tlachiaj’. 22 Satepan tlakeuali okilui iteko: ‘Noteko, yonikchi tlen otechnauati uan ok akiskej oksekimej’. 23 Iteko okinauati: ‘Xio itech ojtli uan xikinchiualti maualakan akinmej tikinmitas uan ijkon temis nochan. 24 Ne namechiluia, akinmej onikinyole amo kiyekoskej notlakual’”.
25 Miakej oyayaj iuan Jesús ikinon ye omokopki uan okinmilui: 26 “Tla ikaj nouan uits pero okachi kitlasojtla ipapa, imama, isiua, ikoneuan, ikniuan noso ineuian motlasojtla, amo uelis yetos nodiscípulo. 27 Noijki amo uelis yetos nodiscípulo akin nouan uits pero amo kiselia makitlajyouiltikan.* 28 Tla ikaj kineki kichiuas se torre, ¿amo achto kitas kox kajxilis itomin tlen ika kichiuas? 29 Tlamo kipeualtis uan amo kitlamis. Kipinauiskej nochtin tlen kitaskej 30 uan kijtoskej: ‘Nin tlakatl opejki kichiua se torre uan amo okitlami’. 31 Noijki tla se tekiua kimomakati iuan okse tekiua, ¿amo achto kitas kox ika 10,000 soldados kitlanilis okse tekiua tlen kinualika 20,000 soldados? 32 Tla kita amo uelis kitlanilis, ijkuak ok uejka uits tekiua, kintitlanis sekimej tlakamej makiluitij ayakmo iuan kimomakas. 33 Noijki kuali xikmatikan, amo uelis nanyetoskej nodiscípulos tla amo nankikauaj nochi tlen nankipiaj”.
34 “Istatl melauak kuali pero tla ayakmo poyek, ¿ken uelis oksepa tlapoyelis? 35 San kitlamotlaskej porque amo kipaleuis tlali nion amo mochiuas abono. Mayektlakaki akin kineki tlakakis”.