Tlen okijkuilo Juan
2 Eyi tonal satepan, sekimej omonamiktijkej ompa Caná tlen kajki Galilea. Noijki ompa okatka imama Jesús. 2 Jesús uan idiscípulos noijki okinyolejkej itech non iluitl.
3 Ijkuak yotlantoka vino, imama Jesús okilui: “Ayakmo kipiaj vino”. 4 Pero Jesús okinankili: “Siuatsintli, tejuan amo toteki. Ayamo ajsi nohora”. 5 Imama Jesús okinmilui akinmej otetlamakayaj: “Xikchiuakan nochi tlen ye namechiluis”. 6 Ompa okatkaj chikuase atekonmej de tetl para momajtekiskiaj ijkuak otlakuayaj ijkon ken otlanauatiayaj judíos. Sejse atekomatl okipiaya kanaj 44 noso 66 litros. 7 Jesús okinmilui: “Xikintemitikan atekonmej”. Yejuan kuali okintemitijkej. 8 Satepan okinmilui: “Axkan seki xikkixtikan uan xikuikilikan akin kiyekana iluitl”. Yejuan ijkon okichijkej. 9 Akin okiyekanaya iluitl okiyeko atl tlen Jesús okikopki vino. Ye amo okimatiaya kanin okikuitoj* vino (pero akinmej otetlamakayaj okimatiayaj porque yejuan okixkijtikej atl) ikinon okinotski novio 10 uan okilui: “Nochtin achto kitemakaj kuali vino, pero ayakmo kitemakaj kuali vino ijkuak nochtin youintikej. Pero te hasta axkan otikkixti kuali vino tlen otiktlatijtoka”. 11 Jesús okichi nin achto milagro itech altepetsintli Caná tlen kajki Galilea. Ijkon okiteititi ichikaualis uan idiscípulos okineltokakej.
12 Satepan Jesús oyajki* Capernaúm iuan imama, ikniuan uan idiscípulos, pero san kanaj keski tonal ompa omokajkej.
13 Jesús oyajki* Jerusalén ijkuak judíos yikichiuaskiaj Pascua. 14 Itech templo okinmajsito akinmej okinnemakayaj toros, ichkamej uan palomas. Noijki ompa okatkaj* akinmej otominpatlayaj. 15 Jesús okiyektlali se mekatl uan okinkixti akinmej otlanemakayaj, inmichkauan uan intoros. Noijki okintlatlamochili intomin uan inmesas akinmej otominpatlayaj. 16 Ye okinmilui akinmej okinnemakayaj palomas: “¡Xikkixtikan nochi tlen nikan kajki! ¡Ayakmo xikchiuakan se tiankisko ikalijtik noTajtsin!”. 17 Ijkuakon idiscípulos okilnamikej tlen kijtoua iTlajtol toTajtsin Dios: “Noyolo tlatla ken tlitl porque nikpatioita mokalijtik”.
18 Judíos okitlajtlanijkej ijkuak okitakej: “¿Tlen milagro techititis para tikmatiskej mitsnamiki tlen otikchi?”. 19 Jesús okinnankili: “Xikxixinikan nin templo uan ipan eyi tonal oksepa nikchiuas”. 20 Judíos okiluijkej: “Ijkuak okichijkej nin templo ouejkakej 46 xiuitl, ¿tleka te tikijtoua ipan eyi tonal oksepa tikchiuas?”. 21 Pero templo tlen Jesús okijto okijtosnekiaya icuerpo. 22 Ijkuak toTajtsin Dios okiyoliti Jesús, idiscípulos okilnamikej ye ijkon okijtouaya. Noijki okineltokakej tlen kijtoua iTlajtol toTajtsin Dios uan tlen okijto Jesús.
23 Ijkuak Jesús okatka Jerusalén itech iluitl Pascua, miakej okineltokakej porque okitakej okinchiuaya milagros. 24 Pero Jesús amo okinneltokiliaya yejuan porque nochtin okinmixmatiaya. 25 Amo omonekiaya ikaj kiluis tlen omokuayejyekouayaj* oksekimej, porque yokimatiaya tlen okipiayaj inyolipan.