Jueces

8 Tlakamej tlen pouij itech itribu Efraín okikualankatlajtlanijkej Gedeón: “¿Tleka ijkon otikchi? ¿Tleka amo otechilui otikinmixnamikito akinmej ochantiayaj Madián?”. 2 Gedeón okinnankili: “¿Kox ipati tlen ne onikchi ijkon ken tlen namejuan nankichiuaj? ¿Amo okachi kuali tlen kikajtiuij akinmej pouij itech itribu Efraín uan amo tlen okitokakej akinmej pouij iuan Abí-Ézer? 3 ToTajtsin Dios onamechmaktili príncipes madianitas, Oreb uan Zeeb. ¿Kox ipati tlen ne onikchi ijkon ken tlen namejuan nankichiuaj?”. Ijkuak ijkon okinmilui, yejuan omoyolseuijkej.

4 Satepan Gedeón oajsito aueyatl* Jordán uan okipanoui. Ye uan 300 soldados tlen iuan okatkaj okinkuitlapantokakej akinmej okinkokoliayaj maski osotlauatokaj. 5 Ikinon okinmilui tlakamej tlen okatkaj altepetl Sucot: “Tlakamej tlen nouan uitsej sotlauaj, namechtlatlaujtia xikinmakakan pan. Ne nikinkuitlapantoka Zébah uan Zalmuná, akinmej tlanauatiaj Madián”. 6 Pero príncipes tlen okatkaj Sucot okiluijkej: “¿Tleka moneki tikintlamakaskej mosoldados? ¿Yotikinkitski Zébah uan Zalmuná?”. 7 Gedeón okinnankili: “Ijkuak Jehová nechinmaktilis Zebah uan Zalmuná ne niktejtekis namonakayo ika uitstli tlen kajki kanin tlauaki porque amo kuali tlen onankijtojkej”. 8 Satepan Gedeón otlejkok altepetl Penuel uan noijki ijkon okintlajtlani tlakamej tlen ompa okatkaj pero yejuan okinankilijkej ijkon ken tlakamej tlen okatkaj Sucot. 9 Ikinon noijki okinmilui tlakamej tlen okatkaj Penuel: “Ijkuak nitlatlanis, nikxixiniki nin torre”.

10 Zébah uan Zalmuná okatkaj Carcor inuan kanaj 15,000* insoldados. Itech nochtin insoldados tlen ochantiayaj ik kanin kisa tonaltsin san yejuan omokajkej porque 120,000* tlakamej tlen okinpiayaj inmiespada okintlanilijkej. 11 Gedeón ok otlejkok itech ojtli kanin opanouayaj akinmej san onentinemiayaj, tlen kajki Nóbah uan Jogbehá ik kanin kisa tonaltsin. Ijkuakon okinmixnamik akinmej okikokoliayaj pero yejuan amo okimatiayaj kox kinmixnamikis. 12 Zébah uan Zalmuná ocholojkej, yejuan otlanauatiayaj Madián. Pero Gedeón okinkuitlapantokak uan okinkitski, non okichi nochtin sapanoua mamomojtikan.

13 Ijkuak otlanki guerra, Gedeón ikone Joás omokopki uan oyajki Heres ipan ojtli tlen ik ompa otlejkouaya. 14 Ijkuak oyaya ipan non ojtli okikitski se telpochtli tlen oualaya Sucot uan okitlajtlani seki tlamantli. Non telpochtli okijkuilili intoka 77 tlakamej tlen okatkaj príncipes uan tlayekankej ompa Sucot. 15 Gedeón okinmitato tlakamej tlen okatka Sucot uan okinmilui: “Nikan katej Zébah uan Zalmuná, intlajtlakol yejuan onantechpinauijkej uan onankijtojkej: ‘¿Tleka moneki tikintlamakaskej mosoldados? ¿Yotikinkitski Zébah uan Zalmuná?’”. 16 Satepan okinkitski tlayekankej uan príncipes tlen okatkaj Sucot uan ika uitstli tlen kajki kanin tlauaki okintlajyouilti. 17 Noijki okixixini torre tlen okatka Penuel uan tlakamej tlen okatkaj itech altepetl okinmikti.

18 Gedeón okitlajtlani Zébah uan Zalmuná: “¿Ken omotayaj tlakamej tlen onankinmiktijkej itech tepetl Tabor?”. Yejuan okinankilijkej: “Omotayaj ken se ikone tekiua, ijkon ken te”. 19 Ye okinmilui: “Yejuan okatkaj nokniuan, ikoneuan nomama. Ne namechiluia,* ijkon ken Jehová melauak yoltok, ne amo namechmiktis tla namejuan amo nankinmiktiskiaj nokniuan”. 20 Ijkuakon okinauati Jéter, ikone tlen achto oneski:* “¡Xikinmikti!”. Pero ye amo okikixti iespada uan omomojtiayaj porque ok okatka telpochtli. 21 Ikinon Zébah uan Zalmuná okiluijkej: “Tla melauak titlakatl, te techmikti”. Ijkuakon Gedeón okinmikti Zébah uan Zalmuná uan okonanki tlamantli kualtsitsintin tlen omotayaj ken metstli tlen okiuikayaj camellos itech inkech.

22 Satepan tlakamej israelitas okiluijkej Gedeón: “Te technauati uan noijki motelpoch uan moxui, porque te otechmakixti imak Madián”. 23 Pero Gedeón okinmilui: “Jehová namechnauatis uan amo ne nion notelpoch timechnauatiskej”. 24 Ye noijki okinmilui: “Nikneki techmakakan tlen sejse onankitlanitoj, se anillo de oro tlen okimotlaliliayaj itech inyekatsol”. (Akinmej okintlanilijkej okatkaj ismaelitas tlen okinpiayaj anillo de oro itech inyekatsol). 25 Yejuan okiluijkej: “Timitsmakaskej non”. Satepan okisojkej se tlakemitl uan sejse yejuan ompa okitlalijkej tlen okitlankej, se anillo de oro tlen okimotlaliliayaj itech inyekatsol. 26 Anillos de oro tlen Gedeón okitlajtlanki okipiaya kanaj 19 kilos.* Noijki okitlajtlanki tlamantli kualtsitsintin tlen omotayaj ken metstli, pipilolmej, intsotsol* morado akinmej otlanauatiayaj Madián uan koskamej tlen okinuikayaj itech inkech camellos.

27 Ika non oro Gedeón okichi se efod* uan satepan okiteititi itech altepetl Ofrá. Ompa nochtin israelitas okiueyichijkej non efod uan tlen okichijkej yetoskia ken oauilnemiayaj uan non omochi ken se trampa para Gedeón uan akinmej iuan ochantiayaj.

28 Ijkon israelitas opejki kinauatiaj madianitas. Ikinon madianitas ayakmo itlaj okintoktijkej* israelitas. Ijkuak Gedeón oyoltoka, amo omochi guerra uan kuali okatkaj 40 xiuitl kanin ochantiayaj.

29 Jerubaal* ikone Joás omokopki ikalijtik uan ompa omokaj.

30 Gedeón okinpixki miakej isiuauan ikinon okinpixki 70 ikoneuan. 31 Okse isiua tlen okatka ompa Siquem okipixki se ikone uan Gedeón okitokayoti Abimélec. 32 Gedeón ikone Joás opaki uan ijkuak yokipiaya miak xiuitl omiki. Okitokatoj ompa Ofrá inmialtepe abí-ezritas, kanin okitokakej ipapa tlen omotokayotiaya Joás.

33 Satepan ijkuak Gedeón omiki, israelitas oksepa okinueyichijkej Baales, yetoskia ken oauilnemiayaj uan okipejpenkej Baal-Berit mayeto indios. 34 Israelitas okilkajkej Jehová inDios okinmakixtijka inmak nochtin akinmej ik ompa okatkaj uan okinkokoliayaj. 35 Noijki, yejuan amo okinmititijkej okintlasojtlayaj uan okinkajtejkej akinmej ochantiayaj iuan Jerubaal noso Gedeón, maski ye okichi tlen kuali inpatka israelitas.