Jueces

9 Satepan Abimeléc ikone Jerubaal, okinmitato ikniuan imama ompa Siquem. Yejuan uan ifamilia iabuelito,* ijkin okinmilui: 2 “Namechtlatlaujtia xikinmiluikan akinmej tlayekanaj nikan Siquem: ‘¿Nankinekij manamechnauatikan 70 ikoneuan Jerubaal? Noso ¿manamechnauati san se tlakatl? Amo xikilkauakan ne noijki nikpia namoeso’”.

3 Satepan ikniuan imama oyajkej uan okinmiluitoj nochi non, akinmej otlayekanayaj Siquem uan yejuan okijtojkej kipaleuiskiaj Abimélec, porque okijtouayaj: “Ye tokni”. 4 Noijki okimakakej kanaj 800 gramos* plata tlen okatka itech itemplo Baal-Berit. Ika non plata, Abimélec okintlake sekimej tlakamej tlen amitlaj okichiuayaj uan amitlaj okipatioitayaj para iuan mayakan. 5 Satepan oyajki ikalijtik ipapa, ompa Ofrá uan ipan se tetl* okinmikti ikniuan, 70 ikoneuan Jerubaal. Pero amo okimikti Jotán ikone Jerubaal akin xokoyotl porque omotlati.

6 Satepan nochtin akinmej otlayekanayaj Siquem uan nochi Bet-Miló omonechikojkej kanin okatka ueyi kouitl, ik kanin okatka tlaketsali ompa Siquem. Ompa okipejpenkej Abimélec mayeto tekiua.

7 Ijkuak Jotán okiluijkej tlen opanotoka, san niman oyajki ipan tepetl Guerizim uan desde ompa okintsajtsili: “¡Techkakikan akinmej nantlayekanaj Siquem uan toTajtsin Dios namechkakis!”.

8 “Se tonal, sekimej kojmej oyajkej okipejpenatoj se tekiua para makinnauati. Yejuan okiluijkej olivoskouitl: ‘Tiknekij te technauati’. 9 Pero olivoskouitl okinnankili: ‘Tla niyetos nitekiua,* ayakmo nikkixtis aceite tlen monejneki* para kiueyichiuaskej Dios uan tlakamej. Ikinon amo nikneki niyetos nitekiua’. 10 Satepan kojmej okiluijkej higoskouitl: ‘Tiknekij te technauati’. 11 Pero higoskouitl okinnankili: ‘Tla niyetos nitekiua,* ayakmo niktemakas kuali tlakilotl tsopelik.* Ikinon amo nikneki niyetos nitekiua’. 12 Ijkuakon kojmej okiluijkej uvajkouitl: ‘Tiknekij te technauati’. 13 Pero uvajkouitl okinnankili: ‘Tla niyetos nitekiua,* ayakmo nikkixtis yankuik vino tlen kiyolpaktia Dios uan tlakamej. Ikinon amo nikneki niyetos nitekiua’. 14 Satepan okseki kojmej okiluijkej xiuitl uitsyo: ‘Tiknekij te technauati’. 15 Xiuitl uitsyo okinmilui okseki kojmej: ‘Tla nankinekij nantechpejpenaskej para manamechnauati, xiualakan manamechekauili.* Tla amo nanuitsej, makisa tlitl itech xiuitl uitsyo uan makinchichino* cedros tlen katej Libano’”.

16 “¿Onankichijkej tlen kuali uan onantetlakaitakej ijkuak onankitlalijkej Abimélec ken tekiua? ¿Onankichiuilijkej tlen kuali Jerubaal uan akinmej chantij ikalijtik? ¿Onankichiuilijkej ijkon ken okinamikiaya? 17 Nopapa onamechmakixti imak Madián uan uelis mikiskia ijkuak namopatka oteixnamikito. 18 Pero axkan namejuan nankinmixnamikij akinmej chantij ikalijtik nopapa uan san ipan se tetl onankinmiktijkej 70 ikoneuan. Abimélec ikone okse isiua* nopapa, onankitlalijkej ken tekiua ompa Siquem san porque namokni. 19 Tla namejuan onankichiuilijkej tlen kuali Jerubaal uan akinmej iuan chantij, xipakikan por Abimélec uan ye mapaki por namejuan. 20 Pero tla amo, makisa tlitl itech Abimélec uan makinchichino akinmej tlayekanaj Siquem uan Bet-Miló uan intech akinmej tlayekanaj Siquem uan Bet-Miló makisa tlitl uan makichichino* Abimélec”.

21 Jotán ocholo, oyajki Beer uan ompa ochantito porque okimakasiaya* ikni Abimélec.

22 Abimélec okinnauati israelitas eyi xiuitl. 23 ToTajtsin Dios okitekauili mamokualanikan Abimélec uan akinmej otlayekanayaj Siquem, ikinon yejuan okitemaktijkej Abimélec. 24 Nochi non opanok porque okinmakopakej 70 ikoneuan Jerubaal tlen okinmiktijkej, ijkon akinmej otemiktijkej okitlaxtlajkej tlen okichijkej. Ijkon okipanok Abimélec porque okinmikti ikniuan uan akinmej otlayekanayaj Siquem porque okipaleuijkej matemikti. 25 Akinmej otlayekanayaj Siquem okintlalijkej sekimej tlakamej ikpak* tepemej para makichixtokan Abimélec. Nonmej tlakamej okintlachtekiliayaj akinmej ik ompa opanouayaj. Satepan nochi non okimatiltijkej Abimélec.

26 Ijkuakon Gaal ikone Ébed uan ikniuan oajsitoj, okalakej altepetl Siquem uan akinmej otlayekanayaj Siquem opejki kineltokiliaj Gaal. 27 Yejuan oyajkej tlala, okitekitoj uvas kanin otlaktoka, ipan otlajtlaksakej* uan oiluichijkej. Satepan okalakej itech itemplo indios, opejki tlakuaj, tlakonij uan opejki kiuijuikaltiaj* Abimélec. 28 Gaal ikone Ébed okijto: “¿Akin Abimélec ikone Jerubaal? ¿Akin Zebul non okipatkayoti Siquem? ¿Tleka yejuan moneki tikintekichiuiliskej? ¡Okachi kuali matikintekichiuilikan ixuiuan Hamor ipapa Siquem! ¿Tleka moneki matiktekichiuilikan Abimélec? 29 Tla ne nikyekanaskia nin altepetl, ayakmo nikkauiliskia Abimélec matlanauati”. Ijkuakon okipepeualti Abimélec uan okilui: “¡Tla tikneki xikinmiakili mosoldados uan xiuiki matimomijmiktikan!”.

30 Zebul akin okatka príncipe itech non altepetl, okualankamik ijkuak okimatki tlen okijto Gaal ikone Ébed. 31 Ikinon okintitlanki sekimej tlakamej makichtakailuitij Abimélec: “Techkaki, Gaal ikone Ébed uan ikniuan tlen katej Siquem, kinmiluijtokej akinmej ompa chantij mamitsixnamikikan. 32 Te uan mosoldados xiajsikij youak uan xikinchixtokan tlala. 33 San kualkan* ijkuak kisas tonaltsin ximoyektlali uan xikixnamiki altepetl. Ijkuak Gaal uan isoldados kisaskej uan kinekiskej mitsmiktiskej ximochijchikaua xikintlanili”.

34 Abimélec uan akinmej iuan oyayaj okiskej youak, omoxelojkej ika naui grupos uan okinchiatoj ik kanin otlamiaya altepetl Siquem. 35 Ijkuak Gaal ikone Ébed okiski itech ipuerta altepetl, Abimélec uan nochtin akinmej iuan oyayaj okiskej kanin omotlatijtokaj. 36 Ijkuak Gaal okinmitak, okilui Zebul: “¡Xikita! Mota sekimej ualtemouaj itech tepemej”. Pero Zebul okilui: “Tlen tikita amo tlakamej, ye iekauilo* tepemej”.

37 Satepan Gaal okilui: “¡Xikita! Mota sekimej ualtemouaj ik itlajkotia tlala uan se grupo yiajsiti ipan ojtli kanin kajki ueyi kouitl ompa Meonenim”. 38 Zebul okitlajtlani: “¿Amo te akin timoueyineki? Uan otikijto: ‘¿Akin Abimélec para matiktekichiuilikan?’. ¿Amo yejuan ninmej akinmej otikintlauelitaya? Xio uan xikinmijmiktiti”.

39 Ikinon Gaal oyajki inyekapan akinmej otlayekanayaj Siquem uan okixnamik Abimélec. 40 Satepan Gaal ocholo uan Abimélec okikuitlapantokak. Miakej okinmiktijkej uan ouetokaj hasta kanin okatka ipuerta non altepetl.

41 Abimélec ok ochantiaya Arumá. Zebul okikixti Gaal uan ikniuan ompa Siquem. 42 Mostlatika sekimej okiskej tlala. Ijkuak Abimélec okimatki, 43 okinnotski isoldados, okinxelo eyi grupos uan omochixtokaj. Ijkuak okitak okisayaj akinmej ompa ochantiayaj, okinmixnamik uan okinmikti. 44 Abimélec uan grupos tlen iuan okatkaj opejki tlaixnamikij uan omochiatoj ik kanin kalakij itech altepetl. Pero ome grupos okinmixnamikej uan okinmiktijkej nochtin akinmej okatkaj tlala. 45 Nochi non tonal Abimélec okinmijmikti akinmej ompa ochantiayaj uan okimoaxkati altepetl. Okinmiktij akinmej ompa ochantiayaj, okipojpolo non altepetl uan okistaui.

46 Ijkuak akinmej otlayekanayaj itech itorre Siquem okimatkej non, san niman omopaleuitoj itech cuarto tlen kipia itemplo El-Berit.* 47 Ijkuak Abimélec okiluijkej akinmej otlayekanayaj itech itorre Siquem san sekan ompa omotlatijkej, 48 ye uan nochtin tlakamej tlen iuan okatkaj otlejkokej tepetl Zalmón. Abimélec okonanki se hacha uan okitsonteki imamayo se kouitl. Okiajkolmama uan okinmilui oksekimej: “¡San niman xikchiuakan ijkon ken onikchi!”. 49 Ikinon nochtin okitekej imamayo se kouitl uan okitokakej Abimélec. Satepan okitlalijkej imamayo kouitl ik kanin okatka non cuarto uan ika okichichinojkej.* Ijkuakon omikej kanaj 1,000 tlakamej uan siuamej, noijki nochtin tlen okatkaj itech itorre Siquem.

50 Satepan Abimélec okinmijmiktito akinmej ochantiayaj altepetl Tebez uan okimoaxkati non altepetl. 51 Itlajkotia non altepetl okatka se torre tlen kuali ochijtoka. Ompa omotlatitoj tlakamej uan siuamej, noijki nochtin akinmej okiyekanayaj non altepetl. Ompa omokaltsakej uan otlejkokej hasta tlakpak. 52 Abimélec oajsito kanin okatka non torre para kixixiniskia. Ijkuak omotoki kanin okalakiayaj para kichichinoskia,* 53 se siuatl okiualtlamotlak se metlapili ipan itsonteko Abimélec uan okikuatlapanki. 54 Abimélec san niman okinotski akin okipaleuiaya uan okinuikiliaya iteposuan uan okilui: “Xikkixti moespada uan techmikti para amo makijtokan onechmikti se siuatl”. Ikinon itlakeual okitsoponili espada uan omiki.

55 Tlakamej israelitas omokopkej inkalijtik ijkuak okitakej Abimélec omiki. 56 Ijkon toTajtsin Dios okitlajyouilti Abimélec porque okinmikti 70 ikniuan uan ijkon itlaj okitokti* ipapa. 57 ToTajtsin Dios okitekauili makinpano nochi tlen amo kuali okichiuayaj tlakamej tlen okatkaj Siquem. Okinpanok ijkon ken otlauijuikaltijka Jotán ikone Jerubaal.