Jueces
2 Ijkuakon iángel Jehová okiski Guilgal, oyajki Bokim uan okijto: “Onamechkixti altepetl Egipto uan onikchi xiajsikij itech tlali tlen onikinmilui* namouejkatatajuan nikinmakaskia. Noijki onikijto: ‘Acuerdo* tlen onamechilui nochipa nikchiuas. 2 Namejuan amo moneki nankichiuaskej se acuerdo inuan akinmej chantij itech nin tlali uan moneki nankinpojpoloskej inmialtares’. Pero namejuan amo onantechtlakamatkej,* ¿tleka ijkon onankichijkej? 3 Ikinon noijki onamechilui: ‘Ne amo nikinkixtis akinmej ik nikan chantij, yejuan yetoskej ken se trampa para namejuan uan indioses namechyoltilanaskej’”.
4 Ijkuak iángel Jehová ijkon okinmilui israelitas, nochtin otlauelchokakej. 5 Ikinon ompa okitokayotijkej Bokim* uan ompa okitlatliokolijkej Jehová.
6 Ijkuak Josué okinmilui israelitas mauiaj, sejse yejuan oyajki itech tlali tlen okinkajteuilijkej. 7 Israelitas okitekichiuilijkej Jehová ijkuak oyoltoka Josué uan noijki ijkuak oyoltokaj tlayekankej maski yomika Josué. Porque tlayekankej okitakej ken Jehová okinpaleui israelitas. 8 Josué ikone Nun itekipanojka Jehová, okipiaya 110 xiuitl ijkuak omiki. 9 Ye okitokatoj itech tlali kanin okikajteuilijkaj ompa Timnat-Heres itech tepeyo tlen kajki Efraín, ik inorte tepetl Gaas. 10 Nochtin tlen ijkuakon okatkaj, omikej uan okintokakej ijkon ken inuejkatatajuan.* Pero nochtin tlen satepan oneskej* amo okixmatiayaj Jehová nion okimatiayaj ken okinpaleui israelitas.
11 Israelitas otlajtlakolchijkej ixpan Jehová uan okinueyichijkej Baales. 12 Yejuan opejki kinueyichiuaj oksekimej dioses tlen ik ompa okatkaj uan okikajkej Jehová inDios inpapanuan, akin okinkixti Egipto. Inmixpan nonmej dioses omotlankuaketsayaj uan okikualanijkej Jehová. 13 Okikajkej Jehová, okiueyichijkej Baal uan imágenes de Astoret. 14 Ijkuakon israelitas okikualanijkej Jehová ikinon okitekauili makintlachtekilikan. Noijki akinmej okinkokoliayaj tlen ik ompa ochantiayaj okinmaktili uan ayakmo okintlanilijkej. 15 Maski san kanin oyayaj Jehová inuan okualantoka uan okitekauili makinpano tlen amo kuali. Ijkon ken Jehová okinmiluijka uan ijkon ken Jehová okijtojka.* Ijkuakon yejuan san omotekipachouayaj. 16 Ikinon Jehová okinmakaya jueces tlen okinmakixtiayaj inmak akinmej okintlachtekiliayaj.
17 Amo okinkakej jueces tlen ompa okatkaj, israelitas yetoskia ken oauilnemiayaj ijkuak okinueyichiuayaj oksekimej dioses uan inmixpan omotlankuaketsayaj. San niman okikajkej ojtli kanin onemiayaj inuejkatatajuan. Yejuan amo okintlakamatkej* itlanauatiluan Jehová ijkon ken okichijkej inuejkatatajuan. 18 Ijkuak Jehová okintitlaniliaya se juez, Jehová iuan okatka, ye okinmakixtiaya israelitas inmak akinmej okinkokoliayaj ijkuak okatka non juez. Ijkuak Jehová okikakiaya ken okintlajyouiltiayaj uan okintoktiayaj* tlen amo kuali, ye okinmiknomatiaya.
19 Ijkuak juez omikiaya tepapanuan okichiuayaj tlen amo kuali pero inkoneuan okachi okichiuayaj tlen amo kuali. Yejuan okinueyichiuayaj, okintekichiuiliayaj uan omotlankuaketsayaj inmixpan oksekimej dioses. Yejuan nochipa okichiuayaj tlen amo kuali uan otlaixnamikiayaj. 20 Ijkon israelitas okikualanijkej Jehová uan ye okijto: “Nin altepetl amo okichi acuerdo tlen onikchi iuan iuejkatatajuan uan amo nechtlakamatij.* 21 Ne amo nikixtis inmixpan nion se altepetl tlen Josué okikajte ijkuak omiki. 22 Ijkon uelis nikinyejyekos israelitas uan nikitas kox ok katej uan nemij itech iojui Jehová ijkon ken okichijkej inpapanuan”. 23 Ikinon Jehová amo okinkixti nonmej altepemej uan amo san niman okinpojpolo nion okinmaktili Josué.