Jueces

6 Pero israelitas oksepa opejki kichiuaj tlen amo kuali ixpan Jehová. Ikinon Jehová chikome xiuitl okinka israelitas imak Madián. 2 Madián opejki kintlajyouiltia israelitas. Madianitas okichijkej israelitas mamotlatitij itech tepeyo, ijtik cuevas uan kanin tlafiero. 3 Madianitas, amalequitas uan akinmej ochantiayaj ik kanin kisa tonaltsin okinmixnamikiayaj israelitas ijkuak otlatokayaj. 4 Noijki ik ompa omokauayaj para kinmiktiskiaj israelitas uan nochi tlen okitokayaj itech intlaluan hasta Gaza okinxixiniliayaj. Amitlaj okinkauiliayaj tlen kikuaskiaj israelitas, nion ichkamej,* toros noso burros. 5 Porque yejuan okinualikayaj inyolkauan, inkaltsitsinuan uan okatkaj sapanoua miakej ken chapulimej. Yejuan uan incamellos okatkaj sapanoua miakej uan amikaj ueli okinpouaya. Itech altepetl kanin oajsiayaj nochi okipojpolouayaj. 6 Satepan Madián okichi israelitas ayakmo itlaj makipiakan uan matlajyouikan miak, ikinon israelitas okitlatlaujtijkej Jehová makinpaleui.

7 Ijkuak israelitas okitlatlaujtijkej Jehová makinmakixti imak Madián, 8 Jehová okintitlanili se profeta uan okinmilui: “Nin tlen kijtoua Jehová inDios israelitas: ‘Ne onamechkixti Egipto kanin onankatkaj ken tlakeualmej. 9 Onamechmakixti inmak egipcios uan inmak nochtin akinmej onamechtlajyouiltiayaj. Yejuan namoixpan onikinkixti, onikintlalkuili uan intlal onamechmaktili. 10 Uan onikinmilui: “Ne Jehová nimoDios. Amo xikinueyichiuakan indioses amorreos, tlen katej kanin namejuan nanchantij”. Pero namejuan amo otechtlakamatkej’”.*

11 Satepan iángel Jehová oajsiko uan omotlali itlampa se ueyi kouitl tlen okatka Ofrá. Non ueyi kouitl okatka iaxka Joás akin abí-ezrita. Gedeón ikone Joás, okichipajtoka trigo kanin okipatskayaj uvas para madianitas amo makitakan. 12 Iángel Jehová okimonextili uan okilui: “Te akin tichikauak, Jehová mitspaleuijtok”. 13 Gedeón okilui: “Noteko, techtlapojpolui pero tla Jehová techpaleuijtok, ¿tleka techpanotok tlen amo kuali? Amo tikitaj nochi tlamantli kuali tlen topapanuan otechiluijkej. Porque yejuan otechiluiayaj: ‘Jehová otechkixti Egipto’. Pero axkan Jehová otechilka uan otechka imak Madián”. 14 Jehová ixpan omokopki uan okilui: “Xio, te tichikauak uan tikinmakixtis israelitas imak Madián, porque ne nimitstitlantok”. 15 Gedeón okilui: “Techtlapojpolui Jehová, ¿ne nikinmakixtis israelitas? Nofamilia amo okachi ipati ken oksekimej familias tlen pouij itech itribu Manasés, ne amitlaj nopati itech ikalijtik nopapa”. 16 Pero Jehová okilui: “Te tikintlanilis madianitas ken otiktlaniliskia se tlakatl porque ne nimitspaleuis”.

17 Satepan Gedeón okilui: “Tla techselia, itlaj xikchiua para manikneltoka techtlapouijtok. 18 Nikneki itlaj nimitsmakas uan niktlalis moixpan, ikinon nimitstlatlaujtia amo xio”. Ijkuakon ángel okinankili: “Nikan niyetos hasta ximokopati”. 19 Gedeón oyajki okiposonito se tentsojkonetl uan ika kanaj 11 kilos* harina okichi pan tlen amo okipiaya levadura. Nakatl okitlali ijtik se chikiuitl uan iayo ijtik se olla. Satepan okiuikak nochi tlakuali uan okitlamakak ángel itlampa non ueyi kouitl.

20 Iángel akin melauak toTajtsin Dios okilui: “Xikonana pan tlen amo kipia levadura noijki nakatl uan xikintlali ipan non ueyi tetl* uan iayo ompa xiknoki”.* Gedeón ijkon okichi. 21 Satepan iángel Jehová okimela itlako tlen okikitskijtoka uan ika iyakyo* itlako okitsopiti nakatl uan pan tlen amo okipiaya levadura. Itech non tetl okiski tlitl tlen okitlami nakatl uan pan tlen amo okipiaya levadura. Ijkuakon iángel Jehová san oualpoliuik. 22 Gedeón okajsikamatki* okitlapoui iángel Jehová.

Ijkuakon san niman okijto: “¡Oh, noTeko Jehová tejuatsin tiUeyititok! ¡Ne onikitak ixko iángel Jehová!”. 23 Pero Jehová okilui: “Ximoyolseui uan amo ximomojti. Amo timikis”. 24 Gedeón ompa okichiuili Jehová se altar uan hasta axkan itoka Jehová-Salom.* Axkan ok kajki Ofrá inmialtepe abí-ézritas.

25 Non youak Jehová okilui: “Xikonana se toro tlen moskaltijtok tlen iaxka mopapa, toro tlen moskaltijtok* tlen kipia chikome xiuitl. Satepan xikxixini ialtar Baal tlen kipia mopapa uan xikteki kouitl tlen kiueyichiuaj tlen kajki inakastlan altar. 26 Satepan, tlakpak ik kanin tika xikchiuili se altar Jehová moDios ika temej.* Ijkuakon xikonana toro tlen moskaltijtok, xiktlali ipan kouitl tlen kiueyichiuaj tlen otiktek uan xiktemaka ken se tetliokolil tlen kichichinouaj”.* 27 Ijkuakon Gedeón okinnotski majtlaktli itlakeualuan uan okichi ijkon ken Jehová okinauati. Pero ken okinmimakasiaya* akinmej chantij ikalijtik ipapa uan tlakamej tlen chantij itech non altepetl, nochi non okichi ijkuak tlayoua uan amo tlajka.

28 San kualkan* ijkuak yitlanestiuits, tlakamej tlen chantij itech non altepetl omejkej, okitakej ikaj okixixini ialtar Baal uan okitekej kouitl tlen okiueyichiuayaj tlen okatka inakastlan. Noijki okichijkej se yankuik altar uan ipan okimiktijkej toro tlen omoskaltijtoka. 29 Yejuan omotlajtlanijkej: “¿Akin ijkon okichi?”. Ijkuak okimatkej akin ijkon okichi, okijtojkej: “Ijkon okichi Gedeón ikone Joás”. 30 Satepan tlakamej tlen chantij itech non altepetl okiluijkej Joás: “¡Techmaktili mokone para matikmiktikan! Ye okixixini ialtar Baal uan okitek kouitl tlen otikueyichiuayaj tlen okatka inakastlan”. 31 Pero Joás okinnankili akinmej okixnamikej: “¿Moneki nankipaleuiskej Baal? ¿Moneki nankimakixtiskej? Akin kinekis kipaleuis kimiktiskej nin kualkan. Ialtar okinxixinijkej ikinon tla ye se dios iselti mamopaleui”. 32 Desde non tonal ipapa Gedeón okitokayoti Jerubaal.* Ye okijtouaya: “Baal iselti mamopaleui porque okixixinijkej ialtar”.

33 Madianitas, amalequitas uan akinmej ochantiayaj ik kanin kisa tonaltsin omosetilijkej uan okipanouijkej aueyatl.* Yejuan omokajkej ixtlauak* Jezreel. 34 Jehová okimakak Gedeón iespíritu, ye okipitski kuakouitl uan abí-ezritas iuan omonechikojkej uan iuan oyajkej. 35 Ye okintitlanki sekimej tlakamej itech itlaluan itribu Manasés uan yejuan noijki omonechikojkej uan iuan oyajkej. Noijki okintitlanki sekimej tlakamej itech intlaluan itribu Aser, itribu Zabulón uan itribu Neftalí, yejuan otlejkokej para iuan monechikoskiaj.

36 Gedeón okilui akin melauak toTajtsin Dios: “Tla ika ne tikinmakixtis israelitas ijkon ken otikijto, 37 ijkin xikchiua, nikajteuas ichkatsojmitl* kanin tlaejekaniaj,* tla ajuachtli kisiauas* ichkatsojmitl pero tlali amo siauas,* kijtosneki ika ne tikinmakixtis israelitas ijkon ken otikijto”. 38 Tlen okijto omochi. Gedeón mostlatika san kualkan omejki, okipatskak ichkatsojmitl uan okiski miak atl para temiskia se ueyi xikali. 39 Maski ijkon, Gedeón okilui akin melauak toTajtsin Dios: “Amo nouan xikualani, san nikneki nimitstlajtlanilis okse tlamantli. Nimitstlatlaujtia, ika ichkatsojmitl techkauili manikchiua okse tlamantli. Nikneki nochi tlali masiaua* ika ajuachtli pero ichkatsojmitl mayeto uaki”. 40 Ijkon okichi toTajtsin Dios non youak. Ajuachtli okisiaj* nochi tlali pero ichkatsojmitl okatka uaki.