Icarta Santiago
5 Axkan techkakikan namejuan tlen nankipiaj miak tomin. Ximoyolkokokan uan xichokakan porque namopan uits tlajyouilistli. 2 Yopalanki nochi tlen nankipiaj uan yopoxkauik namotlaken. 3 Yoxaualouak namooro uan namoplata. Non xauali kiteititis amo kuali tlen nankichiuaj uan kitlamijtias namonakayo. Tlen yonankololojkej yetos ken se tlitl itech itlamian tonalmej. 4 Tlakeualmej tlen otekipanojkej namotlala chikauak kitsajtsiliaj toTajtsin Dios porque amo onankintlaxtlauijkej. Jehová akin kinyekana ángeles yokinkak tlakeualmej ijkuak kitsajtsiliaj makinpaleui. 5 Nikan tlaltikpak namejuan nankipiaj miak tlamantli uan san nanmoyolpaktijtinemij. Namejuan nantlakuaj uan yonanmotomajkej ken se vaca tlen yoajsik tonal kimiktiskej. 6 Onankitlajtlakoltijkej akin yolkuali uan onankimiktijkej. ¿Amo ye namechixnamiki?
7 Nokniuan, ximochiakan hasta ijkuak toTeko yinikan yetos. Akin tlatoka mochia matlaki* tlen okitokak hasta ijkuak peua kiaui uan ijkuak tlami kiaui. 8 Namejuan noijki ximochiakan uan ximoyekketokan porque yiajsis tonal toTeko nikan yetos.
9 Nokniuan, amo ximokualanikan inuan oksekimej uan ijkon amo namechixkomakaskej. Porque san niman uits akin teixkomakas. 10 Nokniuan, xikchiuakan ijkon ken profetas tlen okitematiltijkej itoka Jehová. Yejuan omochixkej uan otlaxikojkej ijkuak otlajyouijkej. 11 Namejuan nankimatij pakij akinmej tlaxikouaj. Yonankikakej Job otlaxiko uan Jehová okiteochi. Ijkon nankimatij Jehová sapanoua tetlasojtla uan teiknomati.
12 Nokniuan, ayakmo xikteneuakan iluikak, tlaltikpak nion okse tlamantli ijkuak nankijtoskej itlaj nankichiuaskej. Okachi kuali tla nankijtoskej: ‘Kema’, ijkon xikchiuakan. Pero tla nankijtoskej: ‘Amo’, amo xikchiuakan uan ijkon amo namechixkomakaskej.
13 ¿Namouan kajki ikaj tlen tlajyouia? Nochipa mamotlatlaujti. ¿Ikaj paki? Makitlakuikili toTajtsin Dios ika salmos. 14 ¿Namouan kajki ikaj tlen mokokoua? Makinnotsa tlayekankej tlen katej itech tlanechikol. Yejuan ipatka motlatlaujtiskej uan kitlaliliskej aceite ika itoka Jehová. 15 Tla tlaneltokaskej ijkuak motlatlaujtiskej, pajtis akin mokokoua uan Jehová kimakas chikaualistli. Noijki toTajtsin Dios kitlapojpoluis tla otlajtlakolchi.
16 Ikinon teixpan ximoyolkuitikan uan ximotlatlaujtikan inpatka oksekimej uan ijkon nanpajtiskej. Itlatlaujtilis akin yolkuali, kipia chikaualistli uan uelis kinpaleuis oksekimej. 17 Elías okatka se tlakatl tlen omomachiliaya ken tejuan. Pero ijkuak omotlatlaujti ika nochi iyolo para amo makiaui, amo okiauik ipan tlaltikpak eyi xiuitl uan tlajko. 18 Satepan oksepa omotlatlaujti ikinon okiauik uan tlali okitemakak tlakilotl.
19 Nokniuan, tla ikaj kikaua tlen melauak uan okse kipaleuia mamokopa, 20 xikmatikan akin kipaleuia mamokopa tlen otlajtlakolchi kimakixtis imak mikilistli uan toTajtsin Dios kitlapojpoluilis nochi itlajtlakol.