Josué
13 Josué yokokoxkatika* uan yimikiskia. Ikinon Jehová okilui: “Ok poliui miak tlali tlen nankimoaxkatiskej pero yotikokoxkatik* uan yitimikis. 2 Ninmej tlalmej ok poliuij nankinmoaxkatiskej: ik kanin katej filisteos uan guesuritas 3 (desde aueyatl* Nilo tlen kajki iyekapan altepetl Egipto hasta ik norte kanin peua altepetl Ecrón. Nochi nin omoijtouaya okatka inmiaxka cananeos). Noijki intlaluan makuili tekiuajkej tlen okinnauatiayaj filisteos: ik kanin kajki altepetl Gaza, altepetl Asdod, altepetl Asquelón, altepetl Gat, altepetl Ecrón uan intlal avim 4 tlen kajki ik sur, nochi intlal cananeos, noijki ompa Meará tlen inmiaxka sidonios uan hasta altepetl Afec ik kanin peua intlal amorreos. 5 Intlal guebalitas uan nochi Líbano tlen kajki ik kanin kisa tonaltsin, desde Baal-Gad hasta ikxitlan tepetl Hermón uan hasta altepetl Lebó-Hamat, 6 nochtin akinmej chantij tepeyo, desde Líbano hasta Misrefot-Maim uan nochtin sidonios. Ne nikinkixtilis* intlal inmixpan israelitas. Ijkon ken ne onimitsnauati, te san moneki tikinxexelilis tlali tlen nikinmakas israelitas. 7 Ikinon moneki tikinxexelilis nochi nin tlali chiknaui intribus israelitas uan tlajko itribu Manasés”.
8 Ok tlajko itribu Manasés, rubenitas uan gaditas okiselijkej tlali tlen Moisés okinmakak ik aueyatl Jordán ik kanin kisa tonaltsin. Nin tlen okinmakak Moisés itekipanojka Jehová: 9 desde Aroer tlen kajki itempa ibarranca Arnón, noijki altepetl tlen kajki itlajkotia non ixtlauak uan tlakpak kanin nochi tlalmelaktik tlen kajki Medebá hasta altepetl Dibón, 10 nochi altepemej kanin otlanauatiaya tekiua Sehón intekiua amorreos akin otlanauatiaya Hesbón hasta kanin peua intlal ammonitas, 11 noijki nochi Galaad, intlal guesuritas, intlal maacatitas, tepetl Hermón, tlali tlen kajki Basán uan hasta altepetl Salecá. 12 Nochi tlen okinauatiaya tekiua Og de Basán akin opouiaya inuan saiktlami refaím uan otlanauatiaya altepetl Astarot uan altepetl Edréi. Nochtin yejuan Moisés okintlanili uan okinkixtili intlal. 13 Pero israelitas amo okinkixtilijkej intlal akinmej chantij Guesur uan Maacat ikinon guesuritas uan maacatitas hasta axkan chantij kanin okinmakakej intlal israelitas.
14 San levitas amitlaj okinkajteuili Moisés. Porque yejuan kinkajteuiliaj tetliokolilmej tlen kichichiniliaj* Jehová inDios israelitas, ijkon ken ye okinmilui.
15 Ijkuakon Moisés okinxexelili tlali sejse familias tlen pouij itech itribu Rubén, 16 intlal opeuaya Aroer tlen kajki itempa ibarranca Arnón, noijki altepetl tlen kajki itlajkotia non ixtlauak uan tlakpak kanin nochi tlalmelaktik tlen kajki ik Medebá. 17 Altepetl Hesbón uan nochtin ialtepeuan tlen katej tlakpak kanin tlalmelaktik. Noijki altepetl Dibón, Bamot-Baal, Bet-Baal-Meón, 18 Jáhaz, Quedemot, Mefaat, 19 Quiryataim, Sibmá, Zéret-Sáhar tlen kajki ipan tepetl inakastlan ixtlauak. 20 Ompa Bet-Peor, tlalmej tlen ixtemotokej* tlen katej Pisgá, Bet-Jesimot, 21 noijki nochtin altepemej tlen katej tlakpak kanin tlalmelaktik. Moisés okitlanili nochi tlen okinauatiaya Sehón akin otlanauatiaya Hesbón intekiua amorreos. Noijki okintlanili akinmej okinauatiaya madianitas, tekiua Eví, tekiua Réquem, tekiua Zur, tekiua Hur uan tekiua Reba, yejuan okipaleuiayaj tekiua Sehón uan ochantiayaj itech non altepetl. 22 Israelitas noijki okimiktijkej ika espada Balaam ikone Beor akin okatka tlachixki. 23 Intlal tlen okinmakakej nochtin familias tlen okatkaj rubenitas otlamiaya hasta aueyatl Jordán uan noijki altepemej uan altepetsitsintin tlen ompa okatkaj.
24 Moisés okinmakak tlen omonekiaya nochtin familias tlen pouij itech itribu Gad. 25 Itech tlalmej tlen okinmakakej poui altepetl Jazer, nochtin altepemej tlen kinpia Galaad uan tlajko intlal ammonitas hasta Aroer tlen kajki iyekapan altepetl Rabá, 26 desde altepetl Hesbón hasta altepetl Ramat-Mizpé uan altepetl Betonim, noijki Mahanaim hasta kanin tlami Debir. 27 Ompa ixtlauak, noijki altepetl Bet-Haram, altepetl Zafón, Sucot uan seki tlali kanin otlanauatiaya tekiua Sehón de Hesbón, intlal otlamiaya ik sur kanin peua mar Kinéret* uan inakastlan Jordán ik kanin kisa tonaltsin. 28 Nochi altepemej uan altepetsitsintin okinmakakej familias tlen okatkaj gaditas ijkon ken omonekiaya.
29 Moisés okinmakak tlali tlen omonekiaya sejse familias tlen pouij itech tlajko itribu Manasés. 30 Intlal opeuaya Mahanaim uan nochi tlali tlen kajki Basán, nochi tlali tlen okinauatiaya tekiua Og de Basán uan altepetsitsintin tlen iaxkauan Jaír ompa Basán uan 60 altepemej. 31 Tlajko tlali tlen kajki Galaad, Astarot uan Edréi, altepemej kanin otlanauatiaya Og ompa Basán, nochi tlen omonekiaya okimokauijkej ixuiuan Makir, ikone Manasés, para tlajko ixuiuan Makir tlen okinxexelilijkej sejse familias.
32 Ye nin tlen Moisés okitemakak ompa Moab kanin tlauaki ik okse lado itempa aueyatl Jordán uan ik Jericó kanin kisa tonaltsin.
33 Pero Moisés amitlaj okinkajteuili intribu levitas, yejuan okinkajteuilijkej tlateochiuali para kitekichiuiliskia Jehová inDios israelitas, ijkon ken ye okinmiluijka.