Deuteronomio
33 Moisés itekipanojka akin melauak toTajtsin Dios, ijkin okinteochi israelitas achto mikiskia. 2 Ye okijto:
“Desde Sinaí Jehová ouala
uan desde Seír inpan opetlanki.
Desde itepeyo Parán iueyitilis opetlanki,
iuan okatkaj miles iángeles
uan iyekma okatkaj isoldados.
3 Ye okitlasojtlak ialtepe.
Nochtin akinmej yolchipauakej tlen pouij itech altepetl katej momak.
Yejuan okatkaj* mokxitlan
uan opejki kinkakij motlajtoluan.
4 (Moisés otechinmakak tlanauatilmej,
nonmej tlanauatilmej iaxkauan ixuiuan* Jacob).
5 Ye omochi tekiua ompa Jesurún,*
ijkuak akinmej kiyekanaj altepetl omonechikojkej
inuan nochtin itribus Israel.
6 Rubén mayolto uan amo mamiki
uan tlakamej tlen iuan pouij amo mapojpoliuikan”.
7 Moisés ijkin okiteochi Judá:
“Jehová xikkaki Judá
uan xikkopa itech ialtepe.
Ika imauan yokipaleui tlen iaxka
uan te xikpaleui makinmixnamiki akinmej kikokoliaj”.
8 Ijkin okijto de Leví:
“ToTajtsin Dios, tlakatl akin amo mitskaua iaxka Tumim uan Urim,
akin otikyejyeko ompa Masá.
Te opejki tikixnamiki ompa Meribá kanin okiski atl,
9 tlakamej de Leví amo okipaleuijkej inpapa nion inmama.
Amo okinpaleuijkej inmikniuan
nion okinpaleuijkej inkoneuan.
Porque yejuan okitlakamatkej* motlajtol
uan okichijkej tlen kijtoua moacuerdo.
10 Yejuan makimachtikan Jacob tlen otikijto mamochiua
uan Israel makimachtikan moTlanauatil.
Makitemakakan kopali ajuiak tlen tikajuiakmatis
uan itech altar makitemakakan tetliokolil ajsitok.
11 Jehová xikteochiua inchikaualis
uan ika pakilis xikseli tlen kichiuaj.
Xikinmetsposteki* akinmej kinmixnamikij,
ijkon akinmej kinkokoliaj ayakmo kinmixnamikiskej”.
12 Ijkin okijto de Benjamín:
“Akin kitlasojtla Jehová amitlaj kipanos porque iuan chanti
uan nochipa kimaluia,
ye chantis itech iajkoluan”.
13 Ijkin okijto de José:
“Jehová makiteochiua itlal
ika nochi tlen kuali tlen kajki iluikak,
ika ajuachtli, ika atl tlen meya itlampa tlali,
14 ika tlen kuali kitemaka tonaltsin,
ika tlen okachi kuajkuali motemaka sejse metstli,
15 ika tlen okachi kuali kitemakaj tepemej tlen yiuejkika katej,
ika tlen okachi kuali kitemakaj tepetsitsintin tlen nochipa katej,
16 ika nochi tlamantli kuali tlen kipia tlaltikpak uan tlen itech onka
uan ika itlateochiualis akin chanti itech xiuitl uitsyo.
Nochi non mauiki ipan itsonteko José,
ipan itsonteko akin okipejpenkej uan amo ikniuan.
17 Ueyititos ken se toro tlen achto oneski,*
ikuakonuan yetoskej ken ikuakonuan se toro tlen amo okimansojtilijkej.
Uan ika ikuakonuan kintopeuas altepemej
uan san sekan kintopeuas hasta kanin tlami tlaltikpak.
Yejuan sapanoua miakej tlakamej tlen pouij itech Efraín
uan noijki miakej tlakamej pouij itech Manasés”.
18 Ijkin okijto de Zabulón:
“Xipaki Zabulón ijkuak tikisas
uan te Isacar xipaki itech mokaltsitsinuan.
19 Yejuan kinnotsaskej altepemej mayakan itech tepetl.
Ompa kitemakaskej tetliokolil akinmej kichiuaj tlen kuali
porque ijtik mar kikixtiskej miak tlamantli patio
uan ijtik xali kikixtiskej miak tlamantli ipati tlen tlatitok”.
20 Ijkin okijto de Gad:
“Kiteochiuaskej akin kiueyitilis kanin tlamij itlaluan Gad.
Ye ompa motoloua* ken kichiua se león,
san mochixtok para temakopinas uan tekuakopinas.
21 Ye kimopejpenilis tlali tlen okachi kuali,
porque akin kintemaka tlanauatilmej ompa yokitlalxelili.
Akinmej kiyekanaj altepetl monechikoskej.
Ye kichiuas tlen kuali ipatka Jehová
uan kinmiluis israelitas tlen omoijto mamochiua”.
22 Ijkin okijto de Dan:
“Dan se león konetl
uan ualtsikuinis* desde Basán”.
23 Ijkin okijto de Neftalí:
“Neftalí paki porque Jehová kiselia
uan yokiteochi miak.
Kimoaxkatia tlali tlen kajki ik kanin kisa tonaltsin uan ik sur”.
24 Ijkin okijto de Aser:
“Aser okiteochijkej porque okinpixki ikoneuan.
Ikniuan makipatioitakan
uan makinsiaua* ikxiuan ika aceite.
25 Tlen ika tiktsakua mopuertas chijtokej de tepostli uan cobre,
uan mojmostla kuali tiyetos.
26 Amo onka okse ken iDios Jesurún, ye melauak toTajtsin Dios,
ye kipanouijtikisa iluikak para mitspaleuiti,
akin ueyititok uits ipan mixtli.
27 Desde yiuejkika uelis mopaleuiskej itech toTajtsin Dios.
Ye nochipa kajki, ye nochipa mitspaleuis uan mitsmaluis.
Ye moixpan kinpojpolos akinmej mitskokoliaj
uan kijtos: ‘¡Xikinmikti!’.
28 Israel kuali yetos
uan ixuiuan Jacob chantiskej
itech tlali kanin onka semilla uan vino yankuik,
kanin uetsi ajuachtli tlen uits iluikak.
29 ¡Xipaki Israel!
¿Onka okse altepetl ken te,
akin Jehová okimakixti?
Ye moescudo tlen mitsmaluia
uan moueyi espada.
Akinmej mitskokoliaj moixpan motilantiaskej
uan titlajtlaksas* ipan inkuitlapan”.