XIKMATI NIN

ToTajtsin Dios okichi makijkuilokan iTlajtol para matechpaleui. Moneki tiktlajtoltiskej para tikixmatiskej akin melauak toTajtsin Dios (Juan 17:3; 2 Timoteo 3:16). Ompa kijtoua tleka Jehová otechchi, tleka okichi tlaltikpak uan ken tiyetoskej satepan (Génesis 3:15; Apocalipsis 21:3, 4).

Maski katej miakej libros, san iTlajtol toTajtsin Dios miakej yokinpaleui. Biblia techyolinia matitetlasojtlakan, matiteiknomatikan uan matiyetokan tiyolkualmej ijkon ken kichiua Jehová. Noijki techyolchikaua uan techpaleuia matitlaxikokan ijkuak sapanoua titlajyouiaj, uan kijtoua tlamantli tlen miakej kichiuaj pero toTajtsin Dios amo kipaktia (Salmo 119:105; Hebreos 4:12; 1 Juan 2:15-17).

ITlajtol toTajtsin Dios okijkuilojkej ika hebreo, arameo uan griego, yokitlajtolkopkej tlajko noso ajsitok ika kanaj 3,000 tlajtolmej. Noijki san iTlajtol toTajtsin Dios okachi yokitlajtolkopkej uan yokixexelojkej. Ijkon panotok porque Mateo 24:14 kijtoua: “Ipan nochi tlaltikpak, motetlapouis kuali tlajtoli para nochtin makimatikan toTajtsin Dios ualtlanauatis ipan tlaltikpak uan ijkuakon tlatlamis”.

Tikmatij sapanoua ipati tlen kijtoua iTlajtol toTajtsin Dios ikinon otiktlajtolkopkej ijkon ken yiuejkika okijkuilojkej, kuali moajsikamati uan amo oui motlajtoltia. Ninmej tlamachtilmej “Nikan kijtoua ken omotlajtolkopki Biblia”, “Tlen kipia nin Biblia” uan “¿Tlen opanok para tikpiaskej Biblia?” kiyekijtouaj ken okitlajtolkopkej nin Biblia uan tlen tlamantli san nin Biblia kipia.

Akinmej kitlasojtlaj uan kiueyichiuaj toTajtsin Dios Jehová, kinekij kipiaskej se Biblia tlen kuali mamoajsikamati uan amitlaj makipatilikan (1 Timoteo 2:4). Ikinon otiktlajtolkopkej nin Biblia ika inglés para mamotlajtolkopa ika okseki tlajtolmej. Tejuan timotlatlaujtiaj mamitspaleui nin Biblia xikixmati toTajtsin Dios (Hechos 17:27).