LEVÍTICO

1 Jehová okinotski Moisés uan desde kanin okatka kalnechikol iuan omotlapoui. Ye okilui: 2 “Ximotlapoui inuan israelitas uan xikinmilui: ‘Tla ikaj kitliokolis Jehová se yolkatl mansojtsin, moneki kitemakas se toro noso se vaca, se ichka* noso se tentso’”.

3 “‘Tla ikaj kitemakas se toro para makichichinokan,* amo moneki kitemakas tla mokokoua. Moneki kiuikas yolkatl ikaltempa kalnechikol uan ixpan Jehová kitemakas ika nochi iyolo. 4 Moneki kitlalis ima ipan itsonteko yolkatl tlen kichichinoskej.* Kiseliskej tlen kitemakatok uan kitlapojpoluiskej’”.

5 “‘Ixpan Jehová moneki kimiktiskej toro tlen moskaltijtok. Ikoneuan Aarón tlen teopixkej, kitemaktiskej estli uan non estli kitsitsikuitsaskej* itech nochi ilados altar, altar tlen kajki ikaltempa kalnechikol. 6 Yolkatl tlen kichichinoskej moneki kixipeuaskej uan kitejtekiskej. 7 Ikoneuan Aarón tlen teopixkej moneki kitlaliskej ijtik altar tlixochtli* uan ipan tlixochtli kitlaliskej kouitl. 8 Ikoneuan Aarón tlen teopixkej kitlaliskej ipan tlitl tlen kajki ijtik altar, nakatl tlen okitejtekej, itsonteko uan ichiauak. 9 Ikuetlaxkol* yolkatl uan ikxiuan kinpakaskej ika atl uan teopixki nochi moneki kichichinos* ipan altar para mapopoka. Non se tetliokolil tlen kichichinouaj,* tlen kichiuaj ika tlitl uan Jehová sapanoua kajuiakmati’”.

10 “‘Tla ikaj kitemakas se ichka tlen moskaltijtok noso se tentso para makichichinokan, moneki yetos se okichtli tlen amo mokokoua. 11 Ik inorte altar moneki kimiktiskej non yolkatl ixpan Jehová. Ikoneuan Aarón tlen teopixkej, moneki kitsitsikuitsaskej estli itech nochi ilados altar. 12 Ye kitejtekis yolkatl uan teopixki kitlalis non nakatl ipan tlitl tlen kajki ijtik altar. Noijki ompa kitlalis itsonteko uan ichiauak. 13 Ika atl ye kipakas ikuetlaxkol uan ikxiuan yolkatl uan teopixki moneki nochi kitemakas uan kichichinos para mapopoka ipan altar. Non se tetliokolil tlen kichichinouaj, tlen kichiuaj ika tlitl uan Jehová sapanoua kajuiakmati’”.

14 “‘Tla ikaj kintemakas totomej* para kinchichiniliskej* Jehová, moneki kintemakas palomas uejueyij noso palomaskonemej. 15 Teopixki kintemakas sejse totomej ipan altar. Ika iste kinkechkotonas uan kinchichinos* para mapopokakan ipan altar, pero kikauas estli matemo itech se ilado altar. 16 Ye kinkixtilis inbuche uan inmijuio. Uan kanin kajki tlikonextli,* itech se ilado altar ik kanin kisa tonaltsin, kitlamotlas tlen okinkixtili. 17 Moneki kintlapos ik kanin kinpiaj inmiajasuan* pero amo moneki kintlajkokotonas. Teopixki moneki kinchichinos para mapopokakan ipan altar, ipan kouitl tlen xotlatok. Non se tetliokolil tlen kichichinouaj, tlen kichiuaj ika tlitl uan Jehová sapanoua kajuiakmati’”.

2 “‘Tla ikaj kimakas Jehová tetliokolil tlen mochiuas ika semilla, moneki kimakas harina tlen okachi kuechtik. Ipan kinokis* aceite uan kitlalilis kopali istak. 2 Satepan kinuikilis ikoneuan Aarón tlen teopixkej. Ijkuakon teopixki kitilanas ika ima seki harina tlen okachi kuechtik tlen yikipia aceite uan kopali istak. Kipopokaltis ipan altar para moteititis omotemakak tetliokolil. Non se tetliokolil tlen mochiuas ika tlitl uan Jehová sapanoua kajuiakmatis. 3 Tlen ok mokauas ijkuak kitemakaskej tetliokolil tlen mochiuas ika semilla, yetos inmiaxka Aarón uan ikoneuan. De nochi tetliokolilmej tlen kinchiuiliskej Jehová ika tlitl, non okachi ipati uan kinxeliliskej Aarón uan ikoneuan’”.

4 “‘Tla tiktemakas tetliokolil tlen mochiuas ika semilla tlen tikikxitis ijtik horno, moneki yetos harina tlen okachi kuechtik. Moneki tikinchiuas panes yaualtikej* ika aceite pero amo makipiakan levadura. Noso tikinchiuas galletas kanauakej tlen tikintlalilis aceite pero amo makipiakan levadura’”.

5 “‘Tla tiktemakas tetliokolil tlen mochiuas ika semilla tlen tikikxitis ipan komali, moneki yetos harina tlen okachi kuechtik tlen tiknelos iuan aceite pero amo kipias levadura. 6 Moneki tikpojpostekis uan ipan tikkopilis aceite uan ijkon tiktetliokolis semilla’”.

7 “‘Tla tiktemakas tetliokolil tlen mochiuas ika semilla tlen tikikxitis ijtik se olla, moneki tikchiuas ika harina tlen okachi kuechtik uan kipias aceite. 8 Ijkuak tikmakas Jehová tetliokolil tlen mochiuas ika semilla, moneki tikchiuas ika non tlamantli. Satepan moneki tikuikilis teopixki uan ye kiuikas ik kanin kajki altar. 9 Satepan teopixki kitilanas tepitsin tetliokolil tlen kichiuaskej ika semilla para moteititis omotemakak tetliokolil uan kipopokaltis ipan altar. Non se tetliokolil tlen kichiuaskej ika tlitl uan Jehová sapanoua kajuiakmatis. 10 Tlen ok mokauas ijkuak kitemakaskej tetliokolil tlen mochiuas ika semilla, yetos inmiaxka Aarón uan ikoneuan. De nochi tetliokolilmej tlen kinchiuiliskej Jehová ika tlitl, non okachi ipati uan kinxeliliskej Aarón uan ikoneuan’”.

11 “‘Ijkuak nankimakaskej Jehová tetliokolil tlen mochiuas ika semilla, amo moneki nankineloskej ika levadura. Porque amo moneki nankipopokaltiskej tixtli tlen osamauak nion neujtli* ken tetliokolilmej tlen kinchiuiliaj Jehová ika tlitl’”.

12 “‘Uelis nankimakaskej Jehová ken tetliokolil tlen achto tlaki* pero amo uelis nankichichinoskej* ipan altar para maajuiaya’”.

13 “‘Ijkuak tikintemakas tetliokolilmej tlen mochiuaskej ika semilla, moneki tikinpoyelis. Amo xikilkaua tikinpoyelis porque istatl mitsilnamiktis iacuerdo* moDios. Ijkuak itlaj tiktetliokolis noijki tiktemakas istatl’”.

14 “‘Tla tikmakas Jehová tetliokolil tlen mochiuas ika semilla, moneki yetos tlen achto chikaua. Moneki tiktemakas semilla yankuik, tlen motliuatsas uan yetos payaxtik. 15 Ipan tiknokis* aceite uan tiktlalilis kopali istak, non se tetliokolil tlen mochiuas ika semilla. 16 Teopixki kipopokaltis tepitsin tetliokolil, kijtosneki tepitsin semilla payaxtik tlen kipias aceite uan kopali istak. Non yetos se tetliokolil tlen kichiuiliskej Jehová ika tlitl’”.

3 “‘Tla ikaj kitemakas se toro noso se vaca ken se tetliokolil tlen tesetilia, moneki kimakas Jehová se yolkatl tlen amo mokokoua. 2 Ye moneki kitlalis ima ipan itsonteko itetliokolil uan moneki kimiktiskej yolkatl ikaltempa kalnechikol. Satepan ikoneuan Aarón tlen teopixkej, moneki kitsitsikuitsaskej* estli itech nochi ilados altar. 3 Ye kitemakas seki tlamantli tlen kipia tetliokolil tlen tesetilia ken tetliokolil tlen kichichiniliskej* Jehová. Kitemakas chiauak tlen kikimiloua ikuetlaxkol* yolkatl uan nochi chiauak tlen pepechitok itech ikuetlaxkol. 4 Noijki kintemakas ome iriñones yolkatl tlen katej ik ilomo uan chiauak tlen ika kimilitokej. Ijkuak kinkixtilis iriñones noijki kikixtilis chiauak tlen kajki ipan iyel. 5 Ikoneuan Aarón nochi kichichinoskej* para mapopoka ipan altar, kitlaliskej ipan tetliokolil tlen mochichinos* tlen yetos ipan kouitl tlen xotlatos. Non se tetliokolil tlen mochiuas ika tlitl uan Jehová sapanoua kajuiakmatis’”.

6 “‘Tla ikaj kimakas Jehová se ichka* noso se tentso ken se tetliokolil tlen tesetilia, moneki kitemakas se yolkatl tlen amo mokokoua uan uelis yetos se okichtli noso se siuatl.* 7 Tla kitemakas se ichka* tlen moskaltijtok, moneki kiuikas ixpan Jehová. 8 Akin kitemakas tetliokolil, kitlalis ima ipan itsonteko yolkatl uan moneki kimiktiskej yolkatl iyekapan kalnechikol. Satepan ikoneuan Aarón kitsitsikuitsaskej estli itech nochi ilados altar. 9 Ye kitemakas ichiauak tetliokolil tlen tesetilia ken se tetliokolil tlen kichichiniliskej Jehová. Ye kitekilis ikuitlapil tomauak desde kanin kajki iespinazo. Noijki kikixtilis chiauak tlen kikimilojtok ikuetlaxkol uan chiauak tlen itech pepechitok. 10 Noijki kintemakas ome iriñones yolkatl tlen katej ik ilomo uan chiauak tlen ika kimilitokej. Ijkuak kinkixtilis iriñones noijki kikixtilis chiauak tlen kajki ipan iyel. 11 Teopixki nochi kichichinos* para mapopoka ipan altar, non yetos tlakuali,* se tetliokolil tlen kichiuiliskej Jehová ika tlitl’”.

12 “‘Tla ikaj kitemakas se tentso, moneki kiuikas ixpan Jehová. 13 Ye kitlalis ima ipan itsonteko yolkatl uan moneki kimiktiskej iyekapan kalnechikol. Satepan ikoneuan Aarón kitsitsikuitsaskej estli itech nochi ilados altar. 14 Tlen kitemakas ken se tetliokolil tlen kichichiniliskej Jehová, yetos chiauak tlen kikimilojtok ikuetlaxkol yolkatl uan nochi chiauak tlen itech pepechitok. 15 Noijki kintemakas ome iriñones yolkatl tlen katej ik ilomo uan chiauak tlen ika kimilitokej. Ijkuak kinkixtilis iriñones noijki kikixtilis chiauak tlen kajki ipan iyel. 16 Teopixki nochi kichichinos para mapopoka ipan altar, non yetos tlakuali, se tetliokolil tlen mochiuas ika tlitl uan kualtsin ajuiak. Nochi chiauak iaxka Jehová’”.

17 “‘Nin tlanauatil nochipa moneki kitlakamatiskej* akinmej nestiaskej,* maski san kanin chantiskej. Amo moneki nankikuaskej chiauak nion estli’”.

4 Jehová noijki okilui Moisés: 2 “Ijkin xikinmilui israelitas: ‘Tla ikaj motlapololtia uan tlajtlakolchiua uan kichiua itlaj tlen Jehová amo kitekauilia, ijkin makichiua:

3 Tla teopixki tlen okipejpenkej tlajtlakolchiua, yetoskia ken altepetl noijki otlajtlakolchi. Teopixki moneki kitemakas ixpan Jehová se toro tlen moskaltijtok tlen amo mokokoua. Non yetos se tetliokolil para makitlapojpoluikan itlajtlakol porque omotlapololti. 4 Ye kiuikas toro ixpan Jehová ikaltempa kalnechikol, kitlalis ima ipan itsonteko yolkatl uan kimiktis ixpan Jehová. 5 Ijkuakon teopixki tlen okipejpenkej kiuikas seki ieso toro ijtik kalnechikol. 6 Ye kisiauas* imajpil ijtik estli uan ixpan Jehová, chikome uelta tepitsin kitsitsikuitsas* estli, iyekapan tsotsoli* tilauak tlen kajki kanin santo. 7 Teopixki kitlalilis seki estli ikuakonuan altar kanin kichichinouaj* kopali ajuiak, tlen kajki ixpan Jehová ijtik kalnechikol. Estli tlen ok mokauas kinokis* ikxitlan altar tlen kajki ikaltempa kalnechikol kanin kichichinouaj tetliokolil’”.

8 “‘Satepan kikixtilis nochi ichiauak toro tlen kitemakas para makitlapojpoluikan akin omotlapololti. Kikixtilis chiauak tlen kikimilojtok ikuetlaxkol* uan chiauak tlen itech pepechitok. 9 Noijki kinkixtilis ome iriñones tlen kinpia ik ilomo uan chiauak tlen ika kimilitokej. Ijkuak kinkixtilis iriñones noijki kikixtilis chiauak tlen kajki ipan iyel. 10 Ye kikixtilis tlamantli tlen noijki kikixtiliskej toro tlen motemakas ken tetliokolil tlen tesetilia uan satepan teopixki nochi kichichinos* para mapopoka ipan altar kanin mochichinoskej* tetliokolilmej’”.

11 “‘Pero ieuayo toro, nochi inakayo, itsonteko, ikxiuan, ikuetlaxkol uan ikuitl, 12 nochi non ye moneki kichiuas makiuikakan uejka kanin amikaj chanti, kanin tlachipauak uan mochapania tlikonextli.* Ye nochi kichichinos ipan kouitl tlen xotlatos, moneki kichichinoskej* kanin kichapaniaj tlikonextli’”.

13 “‘Tla akinmej pouij itech altepetl Israel motlajtlakolmamaltiaj porque omotlapololtijkej uan otlajtlakolchijkej uan tlanechikol* amo okimatiaya okichijkej tlen Jehová okijto amo makichiuakan 14 pero satepan momati tlen okichijkej, tlanechikol moneki kitemakas se toro tlen moskaltijtok porque omotlapololtijkej uan kiuikaskej toro iyekapan kalnechikol. 15 Ixpan Jehová akinmej kiyekanaj altepetl kitlaliskej inma ipan itsonteko toro uan kimiktiskej ixpan Jehová’”.

16 “‘Satepan teopixki tlen okipejpenkej kiuikas seki ieso toro ijtik kalnechikol. 17 Ye moneki kisiauas imajpil ijtik estli uan ixpan Jehová, chikome uelta tepitsin kitsitsikuitsas estli iyekapan tsotsoli tilauak. 18 Satepan kintlalilis seki estli ikuakonuan altar, tlen kajki ixpan Jehová ijtik kalnechikol. Estli tlen ok mokauas kinokis ikxitlan altar kanin kichichinouaj tetliokolil, tlen kajki ikaltempa kalnechikol. 19 Kikixtilis nochi ichiauak toro uan kichichinos para mapopoka ipan altar. 20 Nin toro kichiuiliskej ijkon ken toro tlen motemakas ijkuak motlapololtiskej. Ijkon kichiuas teopixki uan tetliokolil tlen kitemakas kichipauas itlajtlakol altepetl uan ijkon kitlapojpoluiskej. 21 Ye kichiuas makiuikakan toro uejka kanin amikaj chanti uan kichichinos ijkon ken okichichino* achto toro. Non se tetliokolil tlen motemakas ijkuak motlapololtis nochi altepetl para makintlapojpoluikan’”.

22 “‘Tla se tlakatl tlen kinyekana israelitas tlajtlakolchiua uan kichiua itlaj tlen Jehová iDios amo kitekauilia, 23 noso tla kita otlajtlakolchi porque amo okitlakamatki* se tlanauatil, moneki kiuikas se tentsojkonetl tlen amo mokokoua para kitemakas tetliokolil. 24 Kitlalis ima ipan itsonteko tentsojkonetl uan kimiktis kanin kimiktiaj tetliokolil tlen kichichinouaj ixpan Jehová. Non se tetliokolil porque omotlapololti. 25 Teopixki ika imajpil kitlalis tepitsin ieso non yolkatl itech ikuakonuan altar kanin kichichinoskej tetliokolil uan estli tlen ok mokauas kinokis ikxitlan altar, kanin kichichinoskej tetliokolil. 26 Noijki ipan altar kichichinos nochi ichiauak tetliokolil para mapopoka, ijkon ken okichichino ichiauak tetliokolil tlen tesetilia para mapopoka. Non kichiuas teopixki para makitlapojpoluikan akin otlajtlakolchi uan ijkon kitlapojpoluiskej’”.

27 “‘Tla ikaj tlen chanti itech altepetl motlapololtia uan tlajtlakolchiua porque kichiua itlaj tlen Jehová amo kitekauilia, 28 moneki kiuikas se tentsojkonetl siuatl* tlen amo mokokoua uan kitemakas porque omotlapololti. Noijki moneki ijkon kichiuas tla ye kita otlajtlakolchi. 29 Kitlalis ima ipan itsonteko yolkatl uan kimiktis kanin kimiktiaj tetliokolil tlen kichichinouaj. 30 Teopixki ika imajpil kitlalis tepitsin ieso non yolkatl itech ikuakonuan altar kanin kichichinoskej tetliokolil, uan estli tlen ok mokauas kinokis ikxitlan altar. 31 Teopixki kikixtilis nochi ichiauak yolkatl ijkon ken kikixtilis ichiauak yolkatl tlen motemakas ken tetliokolil tlen tesetilia. Satepan teopixki nochi kichichinos para mapopoka ipan altar uan Jehová sapanoua kajuiakmatis non tetliokolil. Non kichiuas teopixki para makitlapojpoluikan akin otlajtlakolchi uan ijkon kitlapojpoluiskej’”.

32 “‘Pero tla ye kitemaka se ichkakonetl* porque omotlapololti, moneki kitemakas se ichkakonetl siuatl tlen amo mokokoua. 33 Kitlalis ima ipan itsonteko yolkatl uan kimiktis kanin kimiktiaj tetliokolil tlen kichichinouaj. Ijkon kitemakas tetliokolil porque omotlapololti. 34 Teopixki ika imajpil kitlalis tepitsin ieso non yolkatl itech ikuakonuan altar kanin kichichinoskej tetliokolil, uan estli tlen ok mokauas kinokis ikxitlan altar. 35 Teopixki kikixtilis nochi ichiauak yolkatl ijkon ken kikixtilis ichiauak ichka* tlen moskaltijtok, tlen motemakas ken tetliokolil tlen tesetilia. Satepan teopixki nochi kichichinos para mapopoka ipan altar, inpan tetliokolilmej tlen kinchiuiliskej Jehová ika tlitl. Non kichiuas teopixki para makitlapojpoluikan akin otlajtlakolchi uan ijkon kitlapojpoluiskej’”.

5 “‘Tla ikaj okitak ikaj otlajtlakolchi noso okimatki tlen opanok uan kikaki kintemojtokej akinmej okitakej tlen opanok para makijtotij, pero amo kijtoua tlen kimatok, ye motlajtlakolmamaltis uan kitlaxtlauas tlen okichi”’.

2 “‘Tla ikaj kikitskia itlaj sokio, ken se yolkatl mansojtsin tlen yomiki, se yolkatl tlen amo mansojtsin tlen yomiki noso yolkamej tsikitsitsintin* tlen katej tlaltikpak tlen yomikej, akin ijkon kichiua mosokiotia uan motlajtlakolmamaltia. Motlajtlakolmamaltia maski amo okimatiaya tlen okichi. 3 Tla ikaj amo kimati uan kikitskia akin sokio noso itlaj tlen Dios kita sokio, uan satepan kita tlen okichi, ye motlajtlakolmamaltia’”.

4 “‘Tla ikaj okijtojtikiski* itlaj kichiuas, maski yetos itlaj kuali noso amo kuali, pero amo kuali omokuayejyeko* uan satepan kita san otlajtojtikiski, akin ijkon kichiua motlajtlakolmamaltia’”.*

5 “‘Tla ikaj otlajtlakolchi uan okichi se de non tlamantli, moneki kijtos tlen tlajtlakoli okichi. 6 Ye moneki kiuikilis Jehová se tetliokolil porque otlajtlakolchi, kiuikas se borregakonetl noso se tentsojkonetl siuatl* porque omotlapololti. Satepan teopixki kitemakas tetliokolil para makitlapojpoluikan akin otlajtlakolchi’”.

7 “‘Pero tla amo kajxilia kitemakas se ichka,* moneki kitliokolis Jehová ome palomas uejueyij noso ome palomaskonemej para makitlapojpoluikan porque otlajtlakolchi. Se tototl* kitemakas porque omotlapololti uan okse kitetliokolis para makichichinokan.* 8 Ye kiuikilis teopixki totomej* uan teopixki achto kitemakas tetliokolil porque omotlapololti akin otlajtlakolchi. Ika iste kikechkotonas tototl pero amo kikopinilis itsonteko. 9 Ika seki ieso yolkatl tlen motemakas, teopixki kitsitsikuitsas* se ilado altar. Pero estli tlen ok mokauas kinokis* ikxitlan altar. Non se tetliokolil porque omotlapololti. 10 Ye kitetliokolis okse tototl para makichichinokan, kichiuas ijkon ken yomoijto mochiuas. Satepan teopixki kitemakas tetliokolil para makitlapojpoluikan akin otlajtlakolchi uan ijkon kitlapojpoluiskej’”.

11 “‘Pero tla amo kajxilia kintemakas ome palomas uejueyij noso ome palomaskonemej, moneki kitemakas kanaj se kilo* harina tlen okachi kuechtik para makitlapojpoluikan tlajtlakoli tlen okichi. Non yetos se tetliokolil porque omotlapololti ikinon amo moneki kitlalilis aceite nion kopali istak. 12 Satepan kiuikilis teopixki uan ye kitilanas ika ima seki harina para moteititis omotemakak tetliokolil. Satepan kichichinos* para mapopoka ipan altar inpan tetliokolilmej tlen kinchichiniliaj* Jehová. Non se tetliokolil porque omotlapololti. 13 Ijkon kitemakas teopixki tetliokolil para makitlapojpoluikan akin otlajtlakolchi maski okichi se tlajtlakoli tlen yomoijto. Tlen ok mokauas kimokauis teopixki ijkon ken ijkuak kitemakaskej tetliokolil tlen mochiuas ika semilla’”.

14 Jehová ok omotlapoui iuan Moisés uan okilui: 15 “Tla ikaj motlapololtia uan amo kitlakamati* Dios uan tlajtlakolchiua porque amo kuali kinejneki* tlen san iaxka Jehová, ye moneki kiuikilis Jehová se ichka tlen amo mokokoua para makitlapojpoluikan itlajtlakol. Ika tetl* tlen ika tlatamachiuaj kanin santo, kitaskej kech plata ipati yolkatl. 16 Ye itlaj kitemakas para kitlaxtlauas tlen amo kuali okichi porque amo kuali okinejneki* tlen Dios kita santo. Tlen kitemakas moneki kajxitilis se makuili parte tlen ipati. Nochi non kimakas teopixki, ijkon teopixki kitemakas ichka para makitlapojpoluikan akin otlajtlakolchi uan ijkon kitlapojpoluiskej”.

17 “Tla ikaj tlajtlakolchiua uan kichiua tlen Jehová amo kitekauilia, ye motlajtlakolmamaltia maski san omotlapololti uan moneki kitlaxtlauas tlen okichi. 18 Moneki kiuikilis teopixki se ichka tlen amo mokokoua, ipati yolkatl moneki yetos tlen kijtos teopixki. Satepan teopixki kitemakas tetliokolil para makitlapojpoluikan akin omotlapololti maski amo okinekiaya tlajtlakolchiuas uan amo okimatiaya tlen okichi uan ijkon kitlapojpoluiskej. 19 Ye omotlajtlakolmamalti porque amo okitlakamatki* Jehová ikinon ye moneki kitemakas non tetliokolil porque otlajtlakolchi”.

6 Satepan Jehová okilui Moisés: 2 “Tla ikaj amo kitlakamati* Jehová porque tlajtlakolchiua ijkuak kimokauia tlen ikni okilui makimaluili noso tlen okitlaneti, tla kitlachtekilia noso kikajkayaua, 3 noso tla kajsi itlaj tlen okipolojkej pero amo kitekopilia uan tlakajkayaua uan kijtoua* amo otlajtlakolchi maski amo melauak, nin moneki kichiuas: 4 tla otlajtlakolchi uan itlajtlakol tlen okichi, moneki kitekopilis tlen okichteki, tlen okitekixtili, tlen okimoaxkati porque otlakajkaya, tlen okiluijkej makimalui, tlen okipolojkej uan ye okajsik, 5 noso okse tlamantli tlen okijto* pero amo melauak, moneki kitekopilis nochi tlen ipati uan kajxitilis se makuili parte tlen ipati. Non kimakas akin iaxka ijkuak moteititis melauak otlajtlakolchi. 6 Para kimakas Jehová tetliokolil porque otlajtlakolchi, moneki kiuikilis teopixki se ichka* tlen amo mokokoua uan ipati ichka moneki yetos ijkon ken moijtos. Non kiuikas para kitemakas itetliokolil porque otlajtlakolchi. 7 Teopixki kitemakas tetliokolil ixpan Jehová uan ijkon kitlapojpoluiskej akin otlajtlakolchi maski san tlen tlajtlakoli okichi”.

8 Jehová ok omotlapoui iuan Moisés uan okilui: 9 “Ijkin xikinnauati Aarón uan ikoneuan, xikinmilui: ‘Ijkin moneki mochiuas ijkuak kitemakaskej tetliokolil tlen mochichinos.* Tetliokolil moneki yetos ipan tlitl tlen yetos ijtik altar nochi se youak hasta ijkuak tlanesis. Non tlitl xotlatos. 10 Teopixki konakis* itlaken de lino tlen kipiaskej teopixkej uan noijki para amo maxipetsito konakis icalzón de lino. Satepan kikixtis tlikonextli* tlen kisas ijkuak kichichinoskej* tetliokolil ipan altar uan kitlalis inakastlan altar. 11 Satepan motlapatilis uan kiuikas tlikonextli kanin tlachipauak, uejka kanin amikaj chanti. 12 Tlitl moneki xotlatos ijtik altar uan amo moneki seuis. Nochi kualkan teopixki kichichinos* kouitl ijtik altar uan ipan kitlalis tetliokolil tlen mochichinos. Noijki ipan tlitl kichichinos para mapopoka inchiauak yolkamej tlen kintemakaskej ken tetliokolilmej tlen tesetiliaj. 13 Tlitl moneki xotlatos ijtik altar uan amo moneki seuis’”.

14 “‘Nin moneki mochiuas ijkuak kitemakaskej tetliokolil tlen mochiua ika semilla. Namejuan ikoneuan Aarón, moneki nankiuikiliskej Jehová non tetliokolil iyekapan altar. 15 Se kitilanas ika ima seki harina tlen okachi kuechtik tlen motemakas ken tetliokolil tlen mochiua ika semilla. Kitilanas iuan tepitsin iaceite uan nochi kopali istak tlen ipan kipias, satepan kichichinos para mapopoka ipan altar uan ijkon kiteititis omotemakak tetliokolil. Non yetos ken se tetliokolil tlen Jehová sapanoua kajuiakmatis. 16 Ijkuak motemakas non tetliokolil, Aarón uan ikoneuan kikuaskej tlen ok mokauas. Kichiuaskej pan tlen amo kipias levadura uan kikuaskej kanin santo. Kikuaskej itech ipatio kalnechikol. 17 Amo kikxitiskej iuan itlaj tlen kipias levadura. Non onikinmakak para mayeto inmiaxka ijkuak nechchichiniliskej* tetliokolil. Non sapanoua santo, ijkon ken tetliokolil tlen kitemakaj ijkuak motlapololtiaj uan ijkuak tlajtlakolchiuaj. 18 Kikuaskej nochtin ikoneuan Aarón tlen tlakamej uan noijki ixuiuan tlen nestiaskej,* non nochipa kinxeliliskej ijkuak kinchichiniliskej* tetliokolilmej Jehová. Mokopas santo nochi tlen monejnekis* ijkuak motemakaskej nonmej tetliokolilmej’”.

19 Jehová oksepa omotlapoui iuan Moisés uan okilui: 20 “Aarón uan ikoneuan kimakaskej Jehová kanaj se kilo* harina tlen okachi kuechtik ijkuak kipejpenaskej Aarón para mayeto tlayekanteopixki. Ijkon moneki motemakatias tetliokolil tlen mochiua ika semilla. Tlajko kilo kitemakaskej kualkan uan ok tlajko kilo kitemakaskej tiotlak. 21 Kitlaliliskej aceite uan kikxitiskej ipan komali. Yeknelitos ika aceite uan ijkuak motemakas tlen omoikxiti ken tetliokolil tlen mochiua ika semilla, moneki mopojpostekis. Non yetos ken se tetliokolil tlen Jehová sapanoua kajuiakmatis. 22 Non tetliokolil noijki kitemakaskej ixuiuan Aarón tlen satepan kinpejpentiaskej para mayetokan tlayekanteopixkej. Ijkuak kimakaskej Jehová non tetliokolil nochi moneki kichichinoskej para mapopoka uan nin tlanauatil nochipa moneki kitlakamatiskej.* 23 Ijkuak se teopixki ipatka kitemakas tetliokolil tlen mochiua ika semilla, moneki nochi kitetliokolis uan amo moneki kikuaskej”.

24 Jehová oksepa omotlapoui iuan Moisés uan okilui: 25 “Xikinnauati nin tlamantli Aarón uan ikoneuan, xikinmilui: ‘Nin moneki mochiuas ijkuak kitemakaskej tetliokolil porque omotlapololtijkej. Yolkatl tlen kitetliokoliskej ijkuak motlapololtiskej, kimiktiskej ixpan Jehová ompa kanin noijki kimiktiskej yolkatl tlen mochichinos. Non yetos sapanoua santo. 26 Ijkuak teopixki kitemakas tetliokolil ijkuak ikaj motlapololtis, kikuas tlen yokixelilijkej. Kikuas kanin kajki ipatio kalnechikol, kanin santo’”.

27 “‘Mokopas santo nochi tlen monejnekis ijkuak motemakas yolkatl. Tla ikaj kitsitsikuitsa* itlaken ika ieso non yolkatl, moneki tikpakas tlakemitl tlen omoesui kanin santo. 28 Tla kiposoniaj nakatl ijtik se cazuela, moneki kitlapanaskej cazuela. Pero tla kiposoniaj nakatl ijtik itlaj de cobre, moneki kichichikiskej uan kipajpakaskej ika atl’”.

29 “‘San tlakamej teopixkej kikuaskej. Non sapanoua santo. 30 Pero amo moneki kikuaskej nion se yolkatl tlen motemakas ijkuak ikaj motlapololtis tla kiuikaj tepitsin ieso ijtik kalnechikol kanin santo para makitlapojpoluikan. Moneki kichichinoskej’”.

7 “‘Ijkin moneki mochiuas ijkuak motemakas tetliokolil tla ikaj otlajtlakolchi. Non sapanoua santo. 2 Kanin kinmiktiskej yolkamej tlen kintemakaskej para makinchichinokan* noijki ompa kimiktiskej yolkatl tlen kitemakaskej ijkuak ikaj tlajtlakolchiuas uan ika ieso kitsitsikuitsaskej* nochi ilados altar. 3 Teopixki kitemakas nochi ichiauak yolkatl, ikuitlapil tomauak uan chiauak tlen kikimiloua ikuetlaxkol.* 4 Noijki kintemakas ome iriñones yolkatl tlen katej ik ilomo uan chiauak tlen ika kimilitokej. Ijkuak kinkixtilis iriñones noijki kikixtilis chiauak tlen kajki ipan iyel. 5 Teopixki nochi kichichinos* para mapopoka ipan altar ijkon ken tetliokolil tlen kichichiniliskej* Jehová. Non tetliokolil kitemakaskej ijkuak ikaj tlajtlakolchiuas. 6 Kikuaskej nochtin tlakamej teopixkej uan moneki kikuaskej kanin santo. Tlen kinxeliliskej sapanoua santo. 7 Tlen mochiuas ijkuak motemakas tetliokolil tla ikaj motlapololtis, noijki mochiuas ijkuak motemakas tetliokolil tla ikaj tlajtlakolchiuas. Teopixki tlen kitemakas tetliokolil para makitlapojpoluikan akin otlajtlakolchi kimokauis nakatl’”.

8 “‘Ijkuak ikaj kitemakas se yolkatl para makichichinokan,* teopixki tlen kichichinos yolkatl kimokauis ieuayo’”.

9 “‘Nochi tetliokolil tlen mochiuas ika semilla tlen iksis ijtik horno, ijtik se olla noso ipan komali, yetos iaxka teopixki tlen kitemakas. Yetos iaxka non teopixki. 10 Pero tla tetliokolil tlen mochiuas ika semilla nelitos iuan aceite noso motemakas uaki, yetos inmiaxka ikoneuan Aarón. Yejuan kinmakaskej san se tlatamachiuali’”.

11 “‘Ijkin moneki mochiuas ijkuak ikaj kinekis kimakas Jehová itetliokolil tlen tesetilia. 12 Tla kitemakas itetliokolil para kiteititis motlasojkamati, moneki kitemakas iuan panes yaualtikej* tlen amo kipiaskej levadura uan tlen kinchiuaskej ika aceite. Noijki iuan galletas kanauakej tlen amo kipiaskej levadura uan tlen kintlaliliskej aceite. Noijki iuan non tetliokolil kintemakas panes yaualtikej. Panes kinchiuaskej ika harina tlen okachi kuechtik tlen yeknelitos uan kisiauaskej* ika aceite. 13 Inuan nonmej panes noijki kintemakas panes yaualtikej tlen kipiaskej levadura uan yolkatl tlen kimakas Dios para motlasojkamatis. 14 De non tetliokolil moneki kitemakas sejse tlatlamantli pan, para mayeto se tetliokolil santo para Jehová. Non yetos iaxka teopixki tlen kitsitsikuitsas* ieso yolkatl tlen kitemakaskej ken tetliokolil tlen tesetilia. 15 Inakayo yolkatl tlen kitemakas para kitlasojkamatilis Dios, moneki kikuaskej tonal ijkuak ye kitemakas. Ye amitlaj moneki kikauas para mostlatika’”.

16 “‘Tla kitemaka itetliokolil porque omoka itlaj kichiuas noso tla kitemaka ika nochi iyolo, moneki kikuaskej yolkatl tonal ijkuak ye kitemakas uan mostlatika ok uelis kikuaskej tlen ok mokauas. 17 Tla uiptlatika ok mokaua inakayo yolkatl tlen motemakas, moneki kichichinoskej.* 18 Pero tla uiptlatika kikuaj seki inakayo yolkatl tlen okitemakakej ken tetliokolil tlen tesetilia, Dios amo kiselis akin okitemakak yolkatl nion kiselis itetliokolil. Non tetlajyalti uan akin okikua nakatl moneki kitlaxtlauas itlajtlakol. 19 Amo moneki nankikuaskej nakatl tlen mosokiotis ika itlaj sokio, moneki kichichinoskej. Akin chipauak uelis kikuas nakatl tlen chipauak’”.

20 “‘Pero tla ikaj tlen amo chipauak kikua inakayo yolkatl tlen kimakaskej Jehová ken tetliokolil tlen tesetilia, moneki kimiktiskej. 21 Tla ikaj kikitskia se persona tlen amo chipauak, se yolkatl tlen amo chipauak noso itlaj tetlajyalti tlen amo chipauak uan satepan kikua seki inakayo yolkatl tlen kimakaskej Jehová ken tetliokolil tlen tesetilia, akin ijkon kichiuas moneki kimiktiskej’”.*

22 Jehová ok omotlapoui iuan Moisés uan okilui: 23 “Xikinmilui israelitas amo makikuakan ichiauak se toro, ichiauak se ichka* tlen moskaltijtok nion ichiauak se tentso. 24 Tla nankajsij se yolkatl tlen omiki noso se yolkatl tlen okimikti okse yolkatl, uelis nankinejnekiskej* ichiauak para nankichiuaskej okseki tlamantli pero amo xikkuakan ichiauak. 25 Tla ikaj kikuas ichiauak yolkatl tlen kitemakas para makichichinilikan* Jehová, moneki kimiktiskej”.

26 “Maski san kanin nanchantiskej amo xikkuakan estli, amo xikkuakan inmieso totomej* nion inmieso oksekimej yolkamej. 27 Akin kikuas estli moneki kimiktiskej”.

28 Jehová ok okilui Moisés: 29 “Xikinmilui israelitas: ‘Ijkuak ikaj kiuikilis Jehová se tetliokolil tlen tesetilia, moneki kiuikas seki tlamantli tlen kipia tetliokolil para kimakas Jehová. 30 Kikitskijtias ichiauak yolkatl uan ielpan, ken tetliokolil tlen kichichiniliskej Jehová. Kiuiuionis ken tetliokolil tlen kiuiuioniskej ixpan Jehová. 31 Teopixki kichichinos ichiauak yolkatl para mapopoka ipan altar, pero ielpan yetos inmiaxka Aarón uan ikoneuan’”.

32 “‘Ijkuak nankintemakaskej tetliokolilmej tlen tesetiliaj, nankimakaskej teopixki ikxi yolkatl tlen kipia ik iyekma. Non yetos se tetliokolil santo. 33 Ikone Aarón tlen kitemakas inmieso uan inchiauak yolkamej, tlen kintemakaskej ken tetliokolilmej tlen tesetiliaj, kimokauis ikxi yolkatl tlen kipia ik iyekma, non yetos iaxka. 34 Ijkuak israelitas kintemakaskej tetliokolilmej tlen tesetiliaj, ne nikmokauis ielpan tetliokolil tlen kiuiuioniskej uan ikxi tetliokolil santo uan nikinmakas teopixki Aarón uan ikoneuan. Non tlanauatil nochipa kitlakamatiskej* israelitas’”.

35 “‘Non omonekiaya kinxeliliskej teopixkej. Ijkuak kinchichiniliskiaj* tetliokolilmej Jehová, omonekiaya kinmakaskej Aarón uan ikoneuan tlen okinxelilijkaj tonal ijkuak kinpejpenaskiaj para mayetokan iteopixkauan Jehová. 36 Tonal ijkuak Jehová okinpejpenki teopixkej, otlanauati makinmakakan tlen okinxelilijkaj, tlen israelitas okitemakakej. Non tlanauatil moneki nochipa kitlakamatiskej inkoneuan tlen nestiaskej’”.*

37 Ijkon mochiuas ijkuak motemakas tetliokolil tlen mochichinos,* tetliokolil tlen mochiuas ika semilla, tetliokolil ijkuak ikaj motlapololtis, tetliokolil ijkuak ikaj tlajtlakolchiuas, tetliokolil ijkuak kintlaliskej teopixkej uan tetliokolil tlen tesetilia. 38 Ijkon ken Jehová okinauati Moisés itech tepetl Sinaí, tonal ijkuak ye okinnauati israelitas makinmakakan intetliokoliluan Jehová, kanin tlauaki ompa Sinaí.

8 Jehová ok omotlapoui iuan Moisés uan okilui: 2 “Xikinuika Aarón uan ikoneuan, noijki intlakenuan, aceite santo, toro tlen kitemakaskej porque tlajtlakolejkej, ome ichkamej* uan chikiuitl kanin katej panes tlen amo kipiaj levadura. 3 Noijki xikinmilui nochtin israelitas mayakan ikaltempa kalnechikol”.

4 Moisés okichi nochi ijkon ken Jehová okinauati uan israelitas omonechikojkej ikaltempa kalnechikol. 5 Satepan Moisés okinmilui israelitas: “Jehová ijkin otechnauati matikchiuakan”. 6 Ijkuakon Moisés okichi Aarón uan ikoneuan inauak mamotokikan uan okinchipa ika atl. 7 Satepan Moisés okonakilti* Aarón itlaken de lino, okitlajkoilpi, okonakilti itlaken makoto, efod* uan para amo mamolini efod kuali okitilini ika tlajkoilpikatl tlen okijkitijkej.* 8 Noijki okitlalili elpantlakemitl uan ijtik okintlali Urim uan Tumin. 9 Satepan Moisés okikuakimilo Aarón ika tlakemitl, ipan non tlakemitl okitlalili tepostli kanauak santo de oro tlen opetlantoka, tlen kiteititia toTajtsin Dios okixelo, tepostli omoka ixkuak Aarón. Moisés okichi ijkon ken Jehová okinauati.

10 Satepan Moisés okonanki tepitsin aceite santo uan okitlalili tabernáculo uan nochi tlen ompa okatka, ijkon okichi mayetokan santos. 11 Satepan ika tepitsin aceite okitsitsikuitski* altar chikome uelta uan nochi tlen ompa kinejnekiskiaj.* Noijki okitlalili aceite akaxitl uan tlen ipan omoketoka uan ijkon okichi mayetokan santos. 12 Saiktlami okinoki* seki aceite santo ipan itsonteko Aarón uan okipejpenki para mayeto santo.

13 Ijkuakon Moisés okichi ikoneuan Aarón inauak mamotokikan, okintlalili intlakenuan, okintlajkoilpi uan okinkuakimilo ika tlakemitl. Moisés okichi ijkon ken Jehová okinauati.

14 Satepan okichi makiuikilikan toro tlen kitemakaskiaj para makintlapojpoluikan, ijkuakon Aarón uan ikoneuan okintlalijkej inmauan ipan itsonteko toro tlen okitemakakej porque tlajtlakolejkej. 15 Moisés okimikti yolkatl uan ika imajpil okintlalili tepitsin estli nochtin ikuakonuan altar uan okichipa altar para amo makipia tlajtlakoli. Estli tlen omoka okinoki ikxitlan altar para mochiuaskia santo, ijkon uelis kintemakaskiaj tetliokolilmej para makintlapojpoluikan. 16 Satepan okikixtili yolkatl nochi ichiauak tlen okikimilojtoka ikuetlaxkol,* chiauak tlen okipiaya ipan iyel, ome iriñones uan chiauak tlen inpan okipiayaj. Uan Moisés nochi okichichino* para mapopoka ipan altar. 17 Satepan Moisés okijto makichichinotij* ieuayo toro, inakayo uan ikuitl uejka kanin amikaj chanti. Omochi ijkon ken Jehová okinauati Moisés.

18 Satepan okichi makiuikilikan ichka* tlen kitetliokoliskiaj para makichichinokan,* ijkuakon Aarón uan ikoneuan okintlalijkej inmauan ipan itsonteko non ichka. 19 Moisés okimikti ichka uan ika ieso okitsitsikuitski nochi ilados altar. 20 Moisés okitejteki ichka uan satepan okichichino para mapopoka itsonteko, nakatl tlen okitejteki uan ichiauak. 21 Ye okipaki ika atl ikuetlaxkol yolkatl uan ikxiuan uan okichichino nochi ichka para mapopoka ipan altar. Non okatka se tetliokolil tlen mochichinoua* uan kualtsin ajuiak, se tetliokolil tlen kichiuiliaj Jehová ika tlitl ijkon ken Jehová okinauati Moisés.

22 Satepan Moisés okichi makiuikilikan okse ichka tlen kitemakaskiaj porque kintlaliskiaj teopixkej, ijkuakon Aarón uan ikoneuan okintlalijkej inmauan ipan itsonteko non ichka. 23 Moisés okimikti ichka uan tepitsin ieso okitlalili Aarón itech inakas tlen kajki iyekma. Noijki okitlalili estli itech imajpil tomauak tlen kajki iyekma uan itech ikxipil tomauak tlen kajki iyekma. 24 Moisés noijki okichi ikoneuan Aarón mamotokikan uan okintlalili tepitsin ieso yolkatl itech innakas tlen kajki inyekma, itech inmajpil tomauak tlen kajki inyekma uan itech inmikxipil tomauak tlen kajki inyekma. Uan ika estli tlen ok omoka, Moisés okitsitsikuitski nochi ilados altar.

25 Satepan okikixtili ichiauak ichka, ikuitlapil tomauak, nochi chiauak tlen okikimilojtoka ikuetlaxkol, chiauak tlen okipiaya ipan iyel uan ome iriñones uan chiauak tlen inpan okipiayaj. Noijki okikixtili ikxi tlen kajki iyekma. 26 Ijtik chikiuitl kanin okatkaj panes tlen amo okipiayaj levadura tlen okatka ixpan Jehová, okikixti se pan yaualtik* tlen amo okipiaya levadura, se pan yaualtik tlen okipiaya aceite uan se galleta kanauak. Satepan okintlali ipan ichiauak yolkatl uan ipan ikxi tlen okipiaya iyekma. 27 Nochi non okinkitskilti Aarón uan ikoneuan uan opejki kiuiuionia ken tetliokolil tlen mouiuionia ixpan Jehová. 28 Satepan Moisés okonanki tlen okikitskijtokaj, okitlali ipan tetliokolil tlen mochichinoua uan okichichino para mapopoka ipan altar. Tetliokolil tlen okitemakakej, motemaka ijkuak kintlaliaj teopixkej uan kualtsin ajuiak. Se tetliokolil tlen kichiuiliaj Jehová ika tlitl.

29 Satepan Moisés okonanki ielpan yolkatl uan okiuiuioni ken tetliokolil tlen kiuiuioniaj ixpan Jehová. Ielpan ichka tlen kitemakaj ijkuak kintlaliaj teopixkej okimokaui Moisés, ijkon ken Jehová okinauati Moisés.

30 Satepan Moisés okonanki tepitsin estli tlen okatka ipan altar uan tepitsin aceite santo uan okitsitsikuichili* Aarón uan ikoneuan uan noijki okintsitsikuichili* intlakenuan. Ijkon Moisés okichi mayetokan santos Aarón, ikoneuan uan intlakenuan.

31 Ijkuakon Moisés okinmilui Aarón uan ikoneuan: “Xikposonikan nakatl ikaltempa kalnechikol, ompa nankikuaskej iuan pan tlen kajki ijtik chikiuitl.* Xikkua te Aarón uan mokoneuan ijkon ken onechnauatijkej. 32 Uan nankichichinoskej* pan uan nakatl tlen amo nankitlamiskej. 33 Uejkauas chikome tonal namechtlaliskej nanteopixkej ikinon chikome tonal xiyetokan ik ikaltempa kalnechikol, hasta ijkuak tlamis namechtlaliskej nanteopixkej. 34 Jehová otlanauati ijkon matikchiuakan nin tonal para ye manamechtlapojpolui. 35 Namejuan nanmokauaskej ikaltempa kalnechikol chikome tonal, nanmokauaskej tlajka uan youak, ximochijchikauakan xikchiuakan tlen Jehová onamechnauati para amo nanmikiskej. Porque ijkon onechnauatijkej”.

36 Aarón uan ikoneuan okichijkej nochi tlen Jehová okinauati Moisés makichiuakan.

9 Tonal chikueyi, Moisés okinotski Aarón, ikoneuan Aarón uan akinmej okinyekanayaj israelitas. 2 Moisés okilui Aarón: “Xikuika ixpan Jehová se torojkonetl tlen amo mokokoua para mamitstlapojpoluikan uan se ichka* tlen amo mokokoua para makichichinokan.* 3 Pero israelitas tikinmiluis makiuikakan se tentso okichtli ken tetliokolil para makintlapojpoluikan. Noijki kiuikaskej se torojkonetl uan se ichka tlen moskaltijtok ken tetliokolil tlen mochichinoua.* Nonmej yolkamej moneki kipiaskej se xiuitl uan amo mokokoskej. 4 Noijki makiuikakan se toro uan se ichka para makitemakakan ken tetliokolil para motlasojkamatiskej. Nonmej yolkamej kinmiktiskej ixpan Jehová. Noijki makiuikakan tetliokolil tlen mochiua ika semilla tlen nelitos iuan aceite porque axkan namechmonextilis Jehová”.

5 Yejuan okiuikakej iyekapan kalnechikol nochi tlen Moisés otlanauati makiuikakan. Satepan nochtin israelitas omotokijkej uan omoketskej ixpan Jehová. 6 Moisés okijto: “Jehová okijto nin xikchiuakan para manamechmonextili iueyitilis Jehová”. 7 Satepan Moisés okilui Aarón: “Ijkon ken Jehová otlanauati, ximotoki kanin kajki altar uan xiktemaka motetliokolil para mamitstlapojpoluikan. Noijki xiktemaka tetliokolil tlen mochichinos* uan xikchiua mamitstlapojpoluikan te uan mofamilia. Noijki xiktemaka intetliokolil israelitas uan xikchiua makintlapojpoluikan”.

8 Aarón san niman omotoki kanin okatka altar uan okimikti torojkonetl para makitlapojpoluikan itlajtlakoluan. 9 Ikoneuan okimakakej estli uan Aarón okisia* imajpil ijtik estli uan non estli okintlalili ikuakonuan altar, tlen ok omoka okinoki* ikxitlan altar. 10 Satepan okichichino* para mapopoka ipan altar ichiauak yolkatl tlen okitemakak para makitlapojpoluikan. Noijki okipopokalti iriñones yolkatl uan ichiauak tlen okatka ipan iyel. Omochi ijkon ken Jehová okinauati Moisés. 11 Inakayo yolkatl uan ieuayo okichichino uejka kanin amikaj chanti.

12 Satepan Aarón okimikti yolkatl tlen okitemakak para mamochichino.* Ikoneuan okimakakej estli uan Aarón okitsitsikuitski* nochi ilados altar ika non estli. 13 Yejuan noijki okimakakej yolkatl tlen yotejtektoka uan itsonteko, uan Aarón okichichino para mapopoka ipan altar. 14 Noijki okipaki ikuetlaxkol* uan ikxiuan yolkatl, uan okinchichino* para mapopokakan ipan altar kanin otlatlatoka tetliokolil.

15 Satepan okitemakak intetliokolil israelitas. Ye okonanki tentso okichtli tlen israelitas okitemakakej para makintlapojpoluikan, okimikti uan okitemakak para makintlapojpoluikan israelitas. Okitemakak non yolkatl ijkon ken okitemakak torojkonetl. 16 Noijki okitemakak tetliokolil tlen mochichinoua uan okitemakak ijkon ken kijtoua tlanauatil.

17 Satepan okitemakak tetliokolil tlen mochiua ika semilla, ika ima okonanki seki harina uan okichichino para mapopoka ipan altar iuan tetliokolil tlen otlatlatoka kualkan.*

18 Satepan Aarón okimikti toro tlen altepetl okitemakak ken tetliokolil tlen tesetilia uan ikoneuan okimakakej estli. Uan Aarón okitsitsikuitski nochi ilados altar ika non estli. 19 Pero ichiauak toro, ikuitlapil tomauak ichka, chiauak tlen okikimilojtoka inkuetlaxkol, inriñones uan chiauak tlen okipiayaj ipan inyel, 20 yejuan okitlalijkej nochi non chiauak ipan inmielpan yolkamej uan Aarón okichichino chiauak para mapopoka ipan altar. 21 Pero inmielpan uan inmikxiuan yolkamej tlen okinpiayaj ik inyekma, Aarón okinuiuioni ken tetliokolil tlen mouiuionia ixpan Jehová, ijkon ken Moisés otlanauati.

22 Ijkuak Aarón otlanki okitemakak tetliokolil para makintlapojpoluikan, tetliokolil tlen mochichinoua uan tetliokolilmej tlen tesetiliaj, okinmajkokuik imauan ik kanin okatka altepetl, okinteochi uan satepan otemok. 23 Saiktlami Moisés uan Aarón okalakej ijtik kalnechikol, satepan okiskej uan okiteochijkej altepetl.

Ijkuakon iueyitilis Jehová okimonextili nochi altepetl. 24 Jehová okiualtitlanki tlitl uan otlanki okichichino tetliokolil tlen mochichinoua uan chiauak tlen okatka ipan altar. Ijkuak nochtin israelitas okitakej non tlamantli omotlajtlachialtijkej uan opejki chikauak tsajtsij uan omoixtlapachojkej tlalpan.

10 Satepan Nadab uan Abihú ikoneuan Aarón, okonankej inkopalkaxuan, inmijtik okitlalijkej tlixochtli,* ipan okitlalijkej kopali uan opejki kitemakaj ixpan Jehová tlixochtli tlen amo omonekiaya kitemakaskej, tlen ye amo otlanauati makitemakakan. 2 Ijkuakon ixpan Jehová okiski se tlitl uan okinchichino,* ikinon omikej ixpan Jehová. 3 Satepan Moisés okilui Aarón: “Ijkin okijto Jehová: ‘Akinmej katej nonauak moneki kilnamikiskej ne nisanto uan nechueyitlaliskej ixpan nochi altepetl’”. Uan Aarón amitlaj okijto.

4 Ijkuakon Moisés okinotski Misael uan Elzafán, ikoneuan Uziel itío Aarón uan okinmilui: “Nikan xiualakan. Namokniuan katej ixpan kanin santo, xikinkixtikan uan xikinuikakan uejka kanin amikaj chanti”. 5 Ikinon yejuan oyajkej uan okinuikakej mikamej tlen ok otlakentitokaj. Okinuikakej uejka kanin amikaj chanti ijkon ken Moisés okinmilui.

6 Satepan Moisés okilui Aarón uan oksekimej ikoneuan tlen omotokayotiayaj Eleazar uan Itamar: “Amo xikuapajsoliuikan nion xiktsayanakan namotlaken. Ijkon amo nanmikiskej uan toTajtsin Dios amo kualanis iuan nochi altepetl. Nochtin namokniuan tlen pouij altepetl Israel kinchokiliskej akinmej Jehová okinmikti ika tlitl. 7 Xiyetokan ikaltempa kalnechikol, nanmikiskej tla amo ijkon nankichiuaj, porque onamechkuatlalilijkej iaceite santo Jehová”. Yejuan okichijkej tlen Moisés okinmilui.

8 Satepan Jehová okilui Aarón: 9 “Para amo timikis te nion mokoneuan, amo uelis nankoniskej vino nion okseki tlamantli tlen teuintia ijkuak nankalakiskej kalnechikol. Nin tlanauatil moneki nochipa kitlakamatiskej* namokoneuan tlen nestiaskej.* 10 Ijkon nankimatiskej tlen santo uan tlen sokio, tlen chipauak uan tlen amo chipauak, 11 uan nankinmachtiskej israelitas nochi tlen Jehová okinauati Moisés makichiuakan”.

12 Ijkuakon Moisés okilui Aarón uan ikoneuan tlen ok oyoltokaj, Eleazar uan Itamar: “Ijkuak kinchichiniliskej* tetliokolilmej Jehová, xikonanakan tetliokolil tlen mochiua ika semilla tlen ok mokauas uan ik kanin kajki altar xikkuakan ken pan tlen amo kipia levadura porque non sapanoua santo. 13 Moneki nankikuaskej kanin santo porque non omitsxelilijkej uan okinxelilijkej mokoneuan ijkuak kinchichiniliaj* tetliokolilmej Jehová. Ijkon onechnauatijkej mamochiua. 14 Noijki kanin tlachipauak nankikuaskej ielpan yolkatl tlen mouiuionis uan ikxi tlen poui itech tetliokolil santo. Tikkuas te, motelpochuan uan mochpochuan porque ijkuak israelitas kintemakaj tetliokolilmej tlen tesetiliaj, non omitsxelilijkej te uan mokoneuan. 15 Nankiuikaskej ikxi yolkatl tlen poui itech tetliokolil santo, ielpan tetliokolil tlen mouiuionia iuan inchiauak yolkamej tlen kinchichinouaj,* para kiuiuioniskej ixpan Jehová tetliokolil tlen mouiuionia. Non nochipa yetos moaxka te uan mokoneuan, ijkon ken Jehová otlanauati”.

16 Uan Moisés okitemojtinemiaya tentso okichtli tlen omotemakak para makintlapojpoluikan uan okimatki okichichinojkej.* Ikinon Moisés okualanki iuan Eleazar uan Itamar, ikoneuan Aarón tlen ok oyoltokaj uan okinmilui: 17 “Sapanoua santo tetliokolil tlen motemaka para makintlapojpoluikan, ¿tleka amo onankikuajkej kanin santo? ¿Amo onamechmakak toTajtsin Dios para xikinuikakan intlajtlakoluan israelitas uan ijkon Jehová makintlapojpolui? 18 Amo okiuikakej ieso tetliokolil tlaijtik kanin santo ikinon omonekiaya nankikuaskej non tetliokolil kanin santo, ijkon ken onechnauatijkej”. 19 Aarón okilui Moisés: “Axkan yejuan okitemakakej ixpan Jehová intetliokolil para makintlapojpoluikan uan tetliokolil tlen mochichinoua,* pero axkan onechpanok nochi nin tlamantli, ¿kipaktiskia Jehová tla ne nikkuaskia tetliokolil tlen okitemakakej para makintlapojpoluikan?”. 20 Moisés kuali okitak ijkuak Aarón ijkon okilui.

11 Jehová okinmilui Moisés uan Aarón: 2 “Xikinmiluikan israelitas uelis kinkuaskej ninmej yolkamej tlen katej ipan tlaltikpak: 3 uelis kikuaskej se yolkatl tla tlajkoxelitok iste, tlapotok iste uan ome uelta kikuechoua itlakual”.

4 “Pero ninmej yolkamej tlen tlajkoxelitok inmiste noso tlen ome uelta kikuechouaj intlakual, amo moneki kinkuaskej. Camello ome uelta kikuechoua itlakual pero amo tlajkoxelitok iste ikinon amo xikkuakan. Non sokio para namejuan. 5 Noijki amo moneki kikuaskej damán* porque ome uelta kikuechoua itlakual pero amo tlajkoxelitok iste. Non sokio para namejuan. 6 Noijki amo moneki kikuaskej conejo porque ome uelta kikuechoua itlakual pero amo tlajkoxelitok iste. Non sokio para namejuan. 7 Noijki amo moneki kikuaskej pitsotl* porque tlajkoxelitok iste uan tlapotok iste pero amo kikuechoua itlakual ome uelta. Non sokio para namejuan. 8 Amo kikuaskej nion tepitsin innakayo nion kinkitskiskej ijkuak yomikej. Nonmej yolkamej sokiojkej para namejuan”.

9 “Nin uelis kikuaskej tlen kajki ijtik atl: uelis kikuaskej nochi tlen kajki ijtik atl tlen kipia aletas uan escamas, tlen kajki ijtik mar noso aueyatl.* 10 Pero tetlajyalti para namejuan nochi tlen kajki ijtik mar uan ijtik aueyatl tlen amo kipia aletas nion escamas, maski mayetokan yolkamej tlen san sekan yajtinemij ijtik atl noso oksekimej yolkamej tlen katej ijtik atl. 11 Moneki namechtlajyaltiskej nonmej yolkamej. Amo moneki nankikuaskej nion tepitsin innakayo uan moneki namechtlajyaltiskej ijkuak yomikej. 12 Nochtin yolkamej tlen katej ijtik atl tlen amo kipiaj aletas nion escamas, tetlajyalti para namejuan”.

13 “Moneki namechtlajyaltis ninmej yolkamej tlen patlanij. Amo xikinkuakan ninmej yolkamej porque tetlajyaltijkej: águila, águila tlen michkitskia, tsojpilotl tliliuik, 14 kuixi* chichiltik, nion tlatlamantli kuixi tliliuik, 15 nion tlatlamantli kakalomej,* 16 avestruz,* tekolotl,* gaviota,* nion tlatlamantli halcón,* 17 kakalotl* tlen michkitskia, tekolotl tsikitsin, tekolotl tlen kinpia uejueyij inakasuan, 18 cisne,* pelícano, tsojpilotl, 19 cigüeña,* nion tlatlamantli garza, tototl* abubilla* nion tsinaka.* 20 Nochtin okuilimej tlen kinpiaj inmiajasuan* uan tlen nejnemij ika naui inmikxiuan tetlajyaltijkej para namejuan”.

21 “De nochtin okuilimej tlen kinpiaj inmiajasuan uan tlen nejnemij ika naui inmikxiuan, san uelis nankinkuaskej tlen kinpiaj ome inmikxiuan ueueyakej tlen ika tsikuinij* ipan tlali. 22 Ninmej okuilimej uelis nankinkuaskej: tlatlamantli chapulimej, grillos uan chapulimej tlen amo kinpiaj inmiajasuan. 23 Nochtin oksekimej okuilimej tlen kinpiaj inmiajasuan uan tlen kinpiaj naui inmikxiuan tetlajyaltijkej para namejuan. 24 Nonmej okuilimej uelis namechsokiotiskej. Akin kinkitskis okuilimej tlen yomikej, yetos sokio hasta tiotlakis. 25 Tla ikaj kinkitskis nonmej yolkamej ijkuak yomikej, moneki motlapakis uan ye yetos sokio hasta tiotlakis”.

26 “Yolkamej tlen tlajkoxelitok inmiste pero amo tlapotok inmiste nion amo kikuechouaj itlakual ome uelta, sokiojkej para namejuan. Akin kinkitskis mosokiotis. 27 De nochtin yolkamej tlen nejnemij ika naui inmikxiuan, tlen kinpiaj ueueyak inmisteuan sokiojkej para namejuan. Akin kinkitskis nonmej yolkamej tla yomikej, yetos sokio hasta tiotlakis. 28 Akin kinmamas nonmej yolkamej tlen yomikej, moneki motlapakis uan ye yetos sokio hasta tiotlakis. Nonmej yolkamej sokiojkej para namejuan”.

29 “De nochtin yolkamej tlen san sekan yajtinemij itech tlali, ninmej sokiojkej para namejuan: kimichi tlen tlachkua,* kimichi, tlatlamantli lagartos, 30 geco,* ueyi lagarto, salamandra* tlen kajki ijtik atl, ketso* uan camaleón. 31 Ninmej yolkamej tlen san sekan yajtinemij itech tlali sokiojkej para namejuan. Akin kinkitskis nonmej yolkamej tla yomikej, yetos sokio hasta tiotlakis”.

32 “Tla nonmej yolkamej mikij uan uetsij ipan se tlamantli, non tlamantli mosokiotis maski yetos itlaj de kouitl, se tlakemitl, inmieuayo yolkamej noso se pedazo tlakemitl tetsojtsopiti.* Tla uetsij ipan se tlamantli tlen nochipa kinejnekij,* non tlamantli moneki kikalakiskej ijtik atl uan yetos sokio hasta tiotlakis. Satepan non tlamantli chipauis. 33 Tla nonmej yolkamej uetsij ijtik se komitl, moneki kitlapanaskej uan sokiouas tla itlaj ijtik yetos. 34 Sokiouas tlakuali tla kajsi atl tlen okatka ijtik non komitl noso tla ijtik yetos itlaj tlen koniskiaj noijki sokiouas. 35 Sokiouas nochi tlamantli tlen ipan uetsiskej nonmej yolkamej tlen yomikej. Tla uetsij itech se horno noso tlikuili moneki nankixixiniskej. Non sokio uan amo oksepa nankinejnekiskej.* 36 San ameyalmej uan kanin kinechikouaj atl yetoskej chipauakej maski uetsiskej nonmej yolkamej tlen yomikej pero sokiouas akin kinkitskis nonmej yolkamej. 37 Tla uetsi se de nonmej yolkamej tlen yomikej ipan semilla tlen kitokaskej, non semilla amo sokiouas. 38 Pero tla kisiauaj* semilla uan ipan uetsi se ipedazo yolkatl tlen yomiki, non semilla sokio para namejuan”.

39 “Pero tla miki se yolkatl tlen uelis nankikuaskej, akin kikitskis non yolkatl sokiouas hasta tiotlakis. 40 Tla ikaj kikua se pedazo yolkatl tlen yomiki, moneki motlapakis uan ye yetos sokio hasta tiotlakis. Akin kiuikas yolkatl tlen yomiki moneki motlapakis uan ye yetos sokio hasta tiotlakis. 41 Tetlajyaltijkej nochtin yolkamej tlen san sekan yajtinemij ipan tlaltikpak. Amo moneki kinkuaskej. 42 Amo moneki kinkuaskej yolkamej tlen motilanaj, yolkamej tlen nejnemij ika naui inmikxiuan nion yolkamej tlen san sekan yajtinemij ipan tlaltikpak uan kinpiaj miakej inmikxiuan, porque nonmej yolkamej tetlajyaltijkej. 43 Amo ximosokiotikan ika yolkamej tlen san sekan yajtinemij itech tlaltikpak, amo ximochiuakan nansokiojkej nion ximosokiotikan ika nonmej yolkamej. 44 Porque ne niJehová namoDios uan namejuan moneki nanmochipauaskej uan nanyetoskej santos porque ne nisanto. Ikinon amo moneki nanmosokiotiskej ika yolkamej tlen san sekan yajtinemij itech tlaltikpak uan ipan moliniaj. 45 Porque ne niJehová akin onamechkixti Egipto para niyetos namoDios. Moneki nanyetoskej nansantos porque ne nisanto”.

46 “Non moneki mochiuas ika yolkamej, yolkamej tlen patlanij, nochtin yolkamej tlen katej ijtik atl uan nochtin yolkamej tlen san sekan yajtinemij itech tlaltikpak. 47 Ijkon momatis tlen chipauak uan tlen sokio, tlen yolkamej uelis kinkuaskej uan tlen yolkamej amo”.

12 Jehová noijki okilui Moisés: 2 “Xikinmilui israelitas tla ijtik se siuatl peua moskaltia ikonetsin uan nesi* se chokotsin, siuatl yetos sokio chikome tonal, yetos sokio ijkon ken ijkuak kipia irregla. 3 Ijkuak chokotsin kajxitis chikueyi tonal, kikuaximiliskej itlakayo.* 4 Ok 33 tonalmej siuatl yetos sokio ixpan Dios porque oeskistoka. Siuatl amo moneki kikitskis itlaj santo nion kalakis kanin santo hasta ijkuak tlamis mochipauas”.

5 “Tla siuatl kipias se itakotsin, siuatl yetos sokio 14 tonalmej ijkon ken ijkuak kipia irregla. Ok 66 tonalmej siuatl yetos sokio ixpan Dios porque oeskistoka. 6 Ijkuak tlamis mochipauas porque okipixki ichokotsin noso itakotsin, siuatl kiuikilis teopixki se ichka* tlen ayamo xiujti ken tetliokolil tlen mochichinoua* uan se palomajkonetl noso se paloma por itlajtlakol, non kiuikas ikaltempa kalnechikol. 7 Teopixki nochi kiuikas ixpan Jehová uan kintemakas tetliokolilmej para makitlapojpoluikan siuatl uan siuatl ayakmo yetos sokio ixpan Dios porque oeskistoka. Non moneki kichiuas siuatl ijkuak kipias se ichokotsin noso se itakotsin. 8 Pero tla non siuatl amo kajxilia para kitemakas se ichka uelis kintemakas ome palomas noso ome palomaskonemej. Se kitemakas ken tetliokolil tlen mochichinoua uan okse por itlajtlakol. Teopixki kintemakas tetliokolilmej para makitlapojpoluikan siuatl uan siuatl mochipauas”.

13 Jehová ok okintlapoui Moisés uan Aarón uan okinmilui: 2 “Tla ikaj posaui itech inakayo, kakapaxiui* noso sauayoua xamo kijtosneki kipia lepra,* ikinon moneki kiuikaskej ixpan Aarón noso ixpan ikoneuan tlen teopixkej. 3 Teopixki kiyekitas inakayo akin mokokoua. Tla oistayak itsojmio kanin mokokoua uan kokolistli okalak ijtik inakayo, kijtosneki kipia lepra. Teopixki kiyekitas uan kijtos sokio akin mokokoua. 4 Pero tla sauatl istak, amo okalak ijtik inakayo nion oistayak itsojmio, teopixki kikaltsakuas akin mokokoua chikome tonal. 5 Ijkuak kajxitis chikome tonal, teopixki kiyekitas. Tla mota kokolistli san ijkon omoka uan ayakmo omomiakili ipan inakayo, teopixki kikaltsakuas akin mokokoua ok chikome tonal”.

6 “Ijkuak kajxitis chikome tonal, teopixki oksepa kiyekitas. Tla yopajtik uan kokolistli ayakmo omomiakili ipan inakayo, teopixki kijtos yichipauak porque san okakapaxiuik.* Akin omokoko mochipauas ijkuak motlapakis. 7 Pero tla teopixki yokijtojka ye chipauak ijkuak okitato pero satepan momiakilia kokolistli ipan inakayo, moneki oksepa kitati teopixki. 8 Teopixki kuali kiyekitas. Tla kokolistli omomiakili ipan inakayo, teopixki kijtos sokio akin mokokoua porque kipia lepra”.

9 “Tla ikaj okachi mokokoua ika lepra, moneki kiuikaskej ixpan teopixki. 10 Teopixki kuali kiyekitas, tla istak kanin oposauik ikinon itsojmio oistayak uan omotlapo inakayo kanin oposauik, 11 kijtosneki uejkika kipias lepra itech inakayo uan teopixki kijtos sokio. Amo moneki kikaltsakuaskej akin mokokoua porque sokio. 12 Pero tla hasta kanin ueli kita teopixki, mota akin mokokoua kipia lepra itech nochi inakayo desde itsonteko hasta ikxiuan, 13 uan yokiyekitak lepra kajki itech nochi inakayo, teopixki kijtos akin mokokoua chipauak.* Nochi inakayo oistayak uan ye chipauak. 14 Pero yetos sokio tla motlapoua inakayo. 15 Ijkuak teopixki kitas akin mokokoua omotlapo inakayo, kijtos sokio. Inakayo tlen omotlapo sokio, non lepra. 16 Pero tla inakayo tlen omotlapo oksepa istaya, ye moneki kitati teopixki, 17 uan teopixki kuali kiyekitas. Teopixki kijtos akin mokokoua chipauak tla oistayak kanin kipia kokolistli. Ye chipauak”.

18 “Tla ikaj peua temalkisa itech inakayo uan satepan pajti 19 pero tla posaui kanin temalkisa uan istaya noso tla kisa se sauatl istak uan chichiltik, moneki kitati teopixki. 20 Teopixki kuali kiyekitas. Tla kokolistli okalak ijtik inakayo uan oistayak itsojmio, teopixki kijtos sokio akin mokokoua. Okajsik lepra kanin temalkisa. 21 Pero tla teopixki kuali kiyekita kanin temalkisa uan kita itsojmio amo istak, amo okalak kokolistli ijtik inakayo uan mota yipajtitok, teopixki kikaltsakuas akin mokokoua chikome tonal. 22 Tla mota okachi otemalkiski, teopixki kijtos akin mokokoua sokio. Okajsik non kokolistli. 23 Pero tla sauatl san ijkon mokaua uan amo okachi momiakilia, kijtosneki san oposauik kanin temalkisa uan teopixki kijtos akin mokokoua chipauak”.

24 “Tla ikaj mochichinoua* uan kanin omochichino* kisa se sauatl istak noso istak uan chichiltik, 25 teopixki moneki kuali kiyekitas. Tla kanin kajki sauatl oistayak itsojmio uan mota kokolistli okalak ijtik inakayo, kijtosneki kanin omochichino okiski lepra. Ijkuakon teopixki kijtos akin mokokoua sokio porque okajsik lepra. 26 Pero tla teopixki kuali kiyekita kanin kajki sauatl uan kita itsojmio amo istak, amo okalak kokolistli ijtik inakayo uan opejki poliui, teopixki kikaltsakuas akin mokokoua chikome tonal. 27 Ijkuak kajxitis chikome tonal, teopixki oksepa kuali kiyekitas. Tla sauatl okachi omomiakili ipan inakayo, teopixki kijtos akin mokokoua sokio, kipia lepra. 28 Pero tla sauatl san ijkon mokaua, amo okachi momiakilia ipan inakayo uan peua poliui, kijtosneki san oposauik kanin omochichino. Teopixki kijtos chipauak akin ijkon kipanotok porque san oposauik kanin omochichino”.

29 “Tla se tlakatl noso se siuatl kipia se kokolistli itech ikuanakayo noso itech itenkamachal, 30 teopixki kuali kiyekitas kokolistli tlen kipia. Tla mota kokolistli okalak ijtik inakayo uan itsonkal noso itentsojmio omochi kostik uan ayakmo miak kipia, teopixki kijtos sokio akin mokokoua. Kipia se kokolistli itech ikuanakayo noso itech itenkamachal. Kijtosneki kipia lepra itech ikuanakayo noso itech itenkamachal. 31 Pero tla teopixki kita kokolistli amo okalak ijtik inakayo uan ompa amo kipia itsonkal noso itentsojmio tliliuik, teopixki moneki kikaltsakuas chikome tonal akin mokokoua. 32 Ijkuak kajxitis chikome tonal, teopixki kuali kiyekitas kokolistli. Tla kokolistli amo omomiakili, uan ompa amo kipia itsonkal noso itentsojmio kostik uan kokolistli amo okalak ijtik inakayo, 33 akin mokokoua mokuaximas noso motenximas pero amo moximas kanin kipia kokolistli. Satepan teopixki kikaltsakuas chikome tonal”.

34 “Ijkuak kajxitis chikome tonal, teopixki oksepa kuali kiyekitas kokolistli. Tla kokolistli tlen kipia itech ikuanakayo noso itech itentsojmio amo okachi omomiakili, uan amo mota okalak ijtik inakayo, teopixki moneki kijtos chipauak. Akin mokokoua moneki motlapakis uan ye chipauis. 35 Tla akin mokokoua yomochipajka pero oksepa momiakilia kokolistli ipan inakayo, 36 teopixki kuali kiyekitas. Tla kokolistli omomiakili ipan inakayo, akin ijkon kipanos sokio uan teopixki ayakmo moneki kitas kox itsonkal noso itentsojmio kostik. 37 Pero tla ijkuak teopixki kiyekita kokolistli, mota ayakmo omomiakili uan ompa yikipia itsonkal noso itentsojmio tliliuik, kijtosneki yopajtik. Akin ijkon kipanos ayakmo sokio uan teopixki kijtos chipauak”.

38 “Tla se tlakatl noso se siuatl sauayoua uan sauamej istakej, 39 teopixki kuali kinyekitas, tla sauamej tlen kinpia motaj istakej, kijtosneki san osauayouak ipan inakayo. Ye chipauak”.

40 “Tla se tlakatl kuatepeui* uan kuaxipetsiui, non tlakatl amo sokio. 41 Tla ixkuatepeui* uan ixkuaxipetsiui, non tlakatl amo sokio. 42 Pero tla istaya uan chichileua kanin kuaxipetstik noso kanin ixkuaxipetstik, kijtosneki kistok lepra itech ikuanakayo noso itech ixkuak. 43 Teopixki kuali kiyekitas kanin kuaxipetstik noso kanin ixkuaxipetstik. Tla kanin kipia kokolistli posatok, mota chichiltik uan istak, uan mota kipia lepra, 44 kijtosneki tlakatl kipia lepra. Ye amo chipauak uan teopixki moneki kijtos sokio porque kipia non kokolistli ipan ikuanakayo. 45 Akin kipias lepra moneki kiuikatinemis itlaken tsayanki uan kuapajsolitinemis. Noijki moneki motenpachos* uan chikauak kijtos: ‘¡Sokio, sokio!’. 46 Ijkuak mokokojtos ye yetos sokio. Ye sokio ikinon moneki moxelos uan chantis uejka kanin amikaj chanti”.

47 “Tla kokolistli lepra kisa itech se tlakemitl de ichkatsojmitl* noso de lino, 48 ipan hilos de lino noso de ichkatsojmitl tlen yokinmijilpijkej noso inpan inmieuayo yolkamej noso itech itlaj tlen okichijkej ika inmieuayo yolkamej, 49 uan kokolistli mota ken itlaj xoxouik uan kostik noso chichiltik, kisa itech se tlakemitl, itech inmieuayo yolkamej, itech hilos tlen yokinmijilpijkej noso itech itlaj tlen okichijkej ika inmieuayo yolkamej, kijtosneki okajsik lepra uan moneki kiuikiliskej teopixki makita. 50 Teopixki kiyekitas kokolistli uan tlen okajsik kokolistli, kitlalis kanin amikaj kajki chikome tonal. 51 Ijkuak ajsis chikome tonal, teopixki moneki kuali kiyekitas kokolistli. Tla kokolistli yomomiakili itech tlakemitl, itech hilos tlen yokinmijilpijkej noso itech inmieuayo yolkamej (maski san ika tlen tlamantli monejneki),* non kokolistli ye lepra tlen teijtlakoua. Tlen okajsik non kokolistli sokio. 52 Teopixki moneki kichichinos* tlakemitl, hilos de lino noso de ichkatsojmitl tlen yokinmijilpijkej noso inmieuayo yolkamej tlen ika okichijkej san tlen tlamantli uan kanin okiski kokolistli porque non lepra tlen teijtlakoua. Moneki mochichinos”.*

53 “Tla teopixki kiyekita uan kita tlakemitl, hilos tlen yokinmijilpijkej noso itlaj tlen okichijkej ika inmieuayo yolkamej, amo ipan okachi omomiakili kokolistli, 54 teopixki moneki tlanauatis makipakakan non tlamantli tlen kipia kokolistli uan kiuikas ok chikome tonal kanin amikaj kajki. 55 Teopixki moneki kiyekitas non tlamantli tlen kipia kokolistli ijkuak yokiyekpakej. Tla kokolistli amo omomiakili pero ok mota kipia kokolistli, non tlamantli sokio. Moneki mochichinos porque omoijtlako tlaijtik noso ik kiauak”.

56 “Pero tla teopixki kiyekita kokolistli uan mota yopejki pojpoliui ijkuak yokiyekpakakej, ye kikotonas kanin kajki kokolistli itech tlakemitl, itech inmieuayo yolkamej noso itech hilos tlen yokinmijilpijkej. 57 Pero tla kokolistli ualkisa okse lado ipan tlakemitl, itech hilos tlen yokinmijilpijkej noso itech okseki tlamantli tlen okinchijkej ika inmieuayo yolkamej, kijtosneki kokolistli momiakilijtok. Moneki mochichinos nochi tlamantli tlen kipia kokolistli. 58 Pero tla kokolistli yopojpoliuik itech tlakemitl, itech hilos tlen yokinmijilpijkej noso itech okseki tlamantli tlen okinchijkej ika inmieuayo yolkamej, moneki oksepa kipakaskej maski achto yokipakej uan ijkon yetos chipauak”.

59 “Ijkon moneki mochiuas ijkuak kajsis lepra: tlakemitl de ichkatsojmitl noso de lino, hilos tlen yokinmijilpijkej noso itech okseki tlamantli tlen okinchijkej ika inmieuayo yolkamej, para ijkon motas kox chipauakej noso amo chipauakej”.

14 Jehová ok okilui Moisés: 2 “Ijkin moneki mochiuas ijkuak moijtos ayakmo sokio akin kipia lepra, ijkuak kiuikaskej ixpan teopixki. 3 Teopixki kiyekitati akin kipia lepra uejka kanin amikaj chanti. Tla yopajtik uan ayakmo kipia lepra, 4 teopixki kinauatis makiuika seki tlamantli para mochipauas. Kinuikas ome totomej* chipauakej tlen yoltokej, cedrokouitl, hilo chichiltik tlen petlani uan hisopo.* 5 Teopixki tlanauatis makimiktikan se de nonmej totomej ijtik se komitl, tlen kipias atl tlen kikixtiskej ijtik se ameyali. 6 Pero tototl* tlen ok yoltos, cedrokouitl, hilo chichiltik tlen petlani uan hisopo, san sekan kinsiauas* ika ieso tototl tlen kimiktiskej ipan atl tlen kikixtiskej ijtik se ameyali. 7 Satepan teopixki kitsitsikuitsas* ika estli akin ayakmo kipia lepra, kitsitsikuitsas chikome uelta uan kijtos yichipauak. Satepan kikajkauas tototl tlen ok yoltok”.

8 “Akin mochipajtok moneki motlapakis, moneki kiximas nochi icuerpo, maltis* uan ijkon chipauis. Satepan uelis yas kanin nochtin mokajtokej pero chikome tonal amo uelis kalakis ichan. 9 Ijkuak kajxitis chikome tonal moneki nochi mokuaximas, motenximas uan kinximas ixtsonuan.* Satepan ijkuak nochi yomoxinki, motlapakis, maltis uan ijkon chipauis”.

10 “Ijkuak kajxitis chikueyi tonal kinpejpenas ome ichkamej* tlen moskaltijtokej tlen amo mokokouaj, se borregakonetl tlen amo mokokoua tlen ayamo xiujti, kanaj eyi kilo uan tlajko* harina tlen okachi kuechtik tlen nelitos iuan aceite, para kitemakas tetliokolil tlen mochiua ika semilla uan noijki kiuikas se taza* aceite. 11 Teopixki tlen kijtos ye yichipauak kiuikas akin mochipajtok ixpan Jehová, ikaltempa kalnechikol uan noijki kinuikas itetliokoliluan. 12 Teopixki kiuikas se ichka* tlen moskaltijtok uan kitemakas ken tetliokolil tlen motemaka ijkuak ikaj tlajtlakolchiua. Kitemakas iuan se taza aceite uan kinuiuionis ken tetliokolil tlen mouiuionia ixpan Jehová. 13 Satepan kimiktis non ichka tlen moskaltijtok kanin kimiktiaj yolkatl tlen motemaka ijkuak ikaj motlapololtia, uan yolkatl tlen mochichinoua* kimiktis kanin santo. Porque tetliokolil tlen motemaka ijkuak ikaj tlajtlakolchiua uan tlen motemaka ijkuak ikaj motlapololtia iaxkauan teopixki. Non sapanoua santo”.

14 “Satepan teopixki kitlalilis akin mochipajtok, tepitsin ieso yolkatl tlen motemaka ijkuak ikaj tlajtlakolchiua. Estli kitlalilis itech inakas tlen kajki iyekma, itech imajpil tomauak tlen kajki iyekma uan itech ikxipil tomauak tlen kajki iyekma. 15 Teopixki kinokis* tepitsin aceite tlen yetos ijtik taza ipan iopochma. 16 Satepan kisiauas* imajpil tlen kipia iyekma ijtik aceite tlen kipixtos iopochma. Uan ika imajpil kitsitsikuitsas chikome uelta tepitsin aceite ixpan Jehová. 17 Teopixki kitlalilis akin mochipajtok tepitsin aceite tlen ok mokauas ipan ima. Kitlalilis itech inakas tlen kajki iyekma, itech imajpil tomauak tlen kajki iyekma uan itech ikxipil tomauak tlen kajki iyekma. Aceite kitlalilis kanin yokitlalilijka ieso yolkatl tlen motemaka ijkuak ikaj tlajtlakolchiua. 18 Teopixki kikuatlalilis akin mochipajtok, aceite tlen ok kipixtos ipan ima uan ixpan Jehová kichiuas makitlapojpoluikan”.

19 “Teopixki kimiktis yolkatl tlen motemaka ijkuak ikaj motlapololtia uan kichiuas makitlapojpoluikan akin mochipajtok. Satepan noijki kimiktis yolkatl tlen motemakas para mochichinos.* 20 Teopixki kitemakas ipan altar tetliokolil tlen mochichinoua uan tetliokolil tlen mochiua ika semilla. Ijkon akin mochipajtok kitlapojpoluiskej uan chipauis”.

21 “Pero tla amo kipia miak tlamantli uan amo kajxilia, uelis kiuikas se ichka tlen moskaltijtok ken tetliokolil ijkuak ikaj tlajtlakolchiua. Non yetos tetliokolil tlen mouiuionia uan ijkon kitlapojpoluiskej akin mochipajtos. Noijki kiuikas kanaj se kilo* harina tlen okachi kuechtik tlen nelitos iuan aceite ken tetliokolil tlen mochiua ika semilla, se taza aceite, 22 ome palomas noso ome palomaskonemej, kitemakas tlen ye kajxilis. Se tototl kitemakas ken tetliokolil tlen motemaka ijkuak ikaj tlajtlakolchiua uan okse kitemakas para makichichinokan.* 23 Ijkuak ye kajxitis chikueyi tonal nochi non kiuikilis teopixki, kiuikilis ikaltempa kalnechikol ixpan Jehová. Ijkon moijtos ye chipauak”.

24 “Teopixki kiuiuionis ichka tlen moskaltijtok tlen motemaka ijkuak ikaj tlajtlakolchiua uan taza tlen kipia aceite. Kinuiuionis ken tetliokolil tlen mouiuionia ixpan Jehová. 25 Satepan teopixki kimiktis ichka tlen moskaltijtok tlen motemaka ijkuak ikaj tlajtlakolchiua. Ye kitlalilis akin mochipajtok tepitsin ieso non yolkatl, kitlalilis itech inakas tlen kajki iyekma, itech imajpil tomauak tlen kajki iyekma uan itech ikxipil tomauak tlen kajki iyekma. 26 Teopixki kinokis tepitsin aceite ipan iopochma, 27 uan ika imajpil tlen kipia iyekma, kitsitsikuitsas chikome uelta ixpan Jehová tepitsin aceite tlen kipixtos ipan iopochma. 28 Teopixki kitlalilis akin mochipajtok tepitsin aceite tlen kipixtos ipan ima. Kitlalilis itech inakas tlen kajki iyekma, itech imajpil tomauak tlen kajki iyekma uan itech ikxipil tomauak tlen kajki iyekma. Kitlalilis kanin okitlalili ieso yolkatl tlen motemaka ijkuak ikaj tlajtlakolchiua. 29 Satepan teopixki kikuatlalilis akin mochipajtok aceite tlen ok kipixtos ipan ima, ijkon ixpan Jehová kichiuas makitlapojpoluikan”.

30 “Teopixki kitemakas se paloma noso se palomajkonetl, kitemakas tlen kajxilis akin mochipajtok. 31 Tototl tlen ye uelis kitemakas, motemakas ken tetliokolil tlen motemaka ijkuak ikaj motlapololtia. Okse tototl kitemakas ken tetliokolil tlen mochichinoua uan kitemakas iuan tetliokolil tlen mochiua ika semilla. Teopixki kintemakas nonmej tetliokolilmej ixpan Jehová para makitlapojpoluikan akin mochipajtok”.

32 “Ijkon moneki mochiuas para uelis moijtos yichipauak akin achto okipiaya lepra pero amo kipia miak tlamantli”.

33 Satepan Jehová okinmilui Moisés uan Aarón: 34 “Ijkuak nankalakiskej tlali Canaán tlen ne namechmakas para mayeto namoaxka uan ijkuak ne niktekauilis se namokal tlen yetos ipan namotlal makajsi kokolistli lepra, 35 akin iaxka kali kiluiti teopixki: ‘Nokalijtik okiski itlaj ken se mancha’. 36 Achto kitati mancha, teopixki tlanauatis makikixtikan nochi tlen kajki tlaijtik, ijkon amo monekis kijtos sokio tlen kajki tlaijtik. Satepan teopixki kalakis uan kiyekitas kali. 37 Kitas kanin kipia non mancha, tla tepamitl tlen kipia kali okojkoyonki uan mota xoxouik uan kostik noso mota chichiltik uan mota yokalak ijtik tepamitl, 38 teopixki kisas ikaltempa kali uan kitsakuas chikome tonal”.

39 “Ijkuak ajsis chikome tonal, teopixki oksepa kiyekitati kali. Tla mancha omomiakili ipan tepamitl, 40 teopixki tlanauatis makinkopinakan temej* tlen kipiaj mancha uan makintlamotlatij kanin amikaj chanti, kanin kitlamotlaj tlen sokio. 41 Satepan tlanauatis kuali makichichikikan tepamitl tlen kajki tlaijtik uan tlen kisas makitlamotlatij kanin amikaj chanti, kanin kitlamotlaj tlen sokio. 42 Kanin okinkopinkej temej kintlaliskej okseki temej uan teopixki tlanauatis makitlalilikan yankuik sokitl* tepamitl tlen kipia kali”.

43 “Pero tla yokinkopinkej temej, yokichichikej tepamitl uan okitlalilijkej yankuik sokitl pero itech kali oksepa kisa mancha, 44 teopixki kalakis uan kiyekitas. Tla mancha omomiakili itech kali, kijtosneki ompa onka lepra tlen teijtlakoua, non kali sokio. 45 Ye tlanauatis makixixinikan kali, temej, kouitl uan sokitl tlen kipias kali uan makiuikakan kanin amikaj chantis, kanin kitlamotlaskej tlen sokio. 46 Pero tla ikaj kalakis ijkuak tsaktos kali, yetos sokio hasta ijkuak tiotlakis. 47 Akin kochis noso tlakuas ijtik kali, moneki motlapakis”.

48 “Pero tla tepamitl yokitlalilijkej sokitl uan teopixki yaui uan kita mancha amo omomiakili itech kali, teopixki kijtos kali yichipauak porque mancha yopojpoliuik. 49 Para kichipauas kali, teopixki konanas ome totomej, cedrokouitl, hilo chichiltik tlen petlani uan hisopo. 50 Kimiktis se de nonmej totomej ipan se komitl tlen kipias atl tlen kikixtiskej ijtik se ameyali. 51 Satepan konanas cedrokouitl, hisopo, hilo chichiltik tlen petlani uan tototl tlen ok yoltok uan kinsiauas ijtik ieso tototl tlen okimikti ipan atl tlen kikixtiskej ijtik se ameyali uan kitsitsikuitsas estli chikome uelta itech kali. 52 Teopixki kichipauas kali ika ieso tototl, ika atl tlen kikixtiskej ijtik se ameyali, ika tototl tlen ok yoltos, ika cedrokouitl, ika hisopo uan ika hilo chichiltik tlen petlani. 53 Satepan kikajkauas tototl tlen ok yoltok kanin amikaj chanti uan kichiuas kali ayakmo mayeto sokio uan ijkon chipauis”.

54 “Ijkon moneki mochiuas ijkuak kisas tlatlamantli kokolistli lepra, ijkuak ikaj mokokos itech ikuanakayo noso itech itentsojmio, 55 ijkuak kisas lepra itech tlakemitl noso itech kali, 56 noijki para ijkuak ikaj pojposauis, kakapaxiuis* noso sauayouas. 57 Ijkon uelis moijtos tla itlaj chipauak noso sokio. Ijkon moneki mochiuas ijkuak kisas lepra”.

15 Jehová ok okintlapoui Moisés uan Aarón uan okinmilui: 2 “Ximotlapouikan inuan israelitas uan xikinmiluikan: ‘Tla peua kisa itlaj fiero itech itlakayo* se tlakatl, tlen kisas kichiuas mayeto sokio. 3 Non tlakatl yetos sokio tla kistos non tlamantli fiero itech itlakayo uan noijki tla non tlamantli kitsakua itlakayo’”.

4 “‘Kanin motekas noso kanin motlalis tlakatl tlen mokokoua yetos sokio. 5 Akin kikitskis kanin omotekak tlakatl tlen mokokoua, moneki motlapakis uan maltis.* Ye yetos sokio hasta ijkuak tiotlakis. 6 Akin motlalis kanin omotlali tlakatl tlen mokokoua, moneki motlapakis uan maltis. Ye yetos sokio hasta ijkuak tiotlakis. 7 Maski san akin kikitskis akin mokokoua, moneki motlapakis uan maltis. Ye yetos sokio hasta ijkuak tiotlakis. 8 Tla tlakatl tlen mokokoua kichijcha akin chipauak, akin okichijchakej moneki motlapakis uan maltis. Ye yetos sokio hasta ijkuak tiotlakis. 9 Tla tlakatl tlen mokokoua motlalis ipan se silla tlen ika kipejpechtiaj se yolkatl, non silla yetos sokio. 10 Akin kikitskis itlaj tlen ipan omotlali tlakatl tlen mokokoua, yetos sokio hasta ijkuak tiotlakis. Uan akin kinuikas nonmej tlamantli moneki motlapakis uan maltis. Ye yetos sokio hasta ijkuak tiotlakis. 11 Tla tlakatl tlen mokokoua amo omomajteki uan ikaj kikitskia, akin okikitskijkej moneki motlapakis uan maltis. Ye yetos sokio hasta ijkuak tiotlakis. 12 Tla tlakatl tlen mokokoua kikitskis se kaxitl,* non tlamantli moneki kitlapanaskej. Uan tla kikitskis itlaj de kouitl, moneki kipajpakaskej’”.

13 “‘Ijkuak tlakatl pajtis uan ayakmo kisas itlaj fiero itech itlakayo, kinpouas chikome tonalmej para mochipauas. Ye moneki motlapakis uan maltis ika atl tlen kikixtiskej ijtik se ameyali uan ijkon chipauis. 14 Ijkuak kajxitis chikueyi tonal, ye kinuikas ome palomas noso ome palomaskonemej. Yas ixpan Jehová ikaltempa kalnechikol uan kimakas teopixki nonmej totomej.* 15 Teopixki kintemakas nonmej totomej. Se kitemakas ken tetliokolil tlen motemaka ijkuak ikaj motlapololtia uan okse kitemakas ken tetliokolil tlen mochichinoua.* Teopixki kintemakas nonmej yolkamej ixpan Jehová para makitlapojpoluikan tlakatl tlen okisaya itlaj fiero itech itlakayo’”.

16 “‘Tla itech itlakayo se tlakatl kisa semen,* moneki maltis uan yetos sokio hasta ijkuak tiotlakis. 17 Tla se tlakemitl noso se tlamantli tlen okichijkej ika inmieuayo yolkamej kajsi semen, moneki kipakaskej uan non tlamantli yetos sokio hasta ijkuak tiotlakis’”.

18 “‘Ijkuak se tlakatl moteka iuan se siuatl uan tlakatl kikixtia semen, yejuan moneki maltiskej* uan yetoskej sokiojkej hasta ijkuak tiotlakis’”.

19 “‘Tla se siuatl eskisa porque kipia irregla, yetos sokio chikome tonal. Akin kikitskis non siuatl yetos sokio hasta ijkuak tiotlakis. 20 Ijkuak siuatl yetos sokio porque kipia irregla, kanin motekas noso kanin motlalis noijki yetos sokio. 21 Akin kikitskis kanin motekas siuatl, moneki motlapakis uan maltis. Ye yetos sokio hasta ijkuak tiotlakis. 22 Akin kikitskis kanin siuatl motlalis, moneki motlapakis uan maltis. Ye yetos sokio hasta ijkuak tiotlakis. 23 Tla ikaj kikitskis kanin motekas noso kanin motlalis siuatl, akin ijkon kichiuas yetos sokio hasta ijkuak tiotlakis. 24 Tla se tlakatl moteka iuan siuatl uan mosokiotia ika irregla siuatl, non tlakatl yetos sokio chikome tonal uan kanin motekas noijki yetos sokio’”.

25 “‘Tla siuatl eskisa miak tonal uan amo irregla tlen kipanoua sejse metstli noso tla irregla okachi uejkaua, siuatl yetos sokio ijkuak eskistos ijkon ken sokio ijkuak kipia irregla. 26 Yetos sokio kanin motekas siuatl ijkuak eskistos ijkon ken sokio kanin moteka ijkuak kipia irregla. Noijki kanin motlalis yetos sokio ijkon ken panoua ijkuak kipia irregla. 27 Akin kinkitskis nonmej tlamantli yetos sokio, ikinon moneki motlapakis uan maltis uan yetos sokio hasta ijkuak tiotlakis’”.

28 “‘Ijkuak siuatl ayakmo eskisas, kipouas chikome tonal uan satepan yetos chipauak. 29 Siuatl kajxitis chikueyi tonal uan kiuikilis teopixki ome palomas noso ome palomaskonemej ikaltempa kalnechikol. 30 Teopixki kitemakas se tototl* ken tetliokolil tlen motemaka ijkuak ikaj motlapololtia uan okse tototl motemakas ken tetliokolil tlen mochichinoua. Teopixki kintemakas nonmej yolkamej ixpan Jehová para makitlapojpoluikan siuatl porque ijkuak oeskistoka okatka sokio’”.

31 “‘Moneki nankinpaleuiskej israelitas mayetokan chipauakej para noijki mayeto chipauak noTabernáculo. Tla yejuan mosokiotiaj, noTabernáculo tlen kajki intlajkotia noijki sokiouas ikinon yejuan mikiskej’”.

32 “‘Non moneki mochiuas ijkuak kisas itlaj fiero itech itlakayo se tlakatl, ijkuak se tlakatl yetos sokio porque kisas semen itech itlakayo, 33 noijki ijkuak siuatl yetos sokio porque kipia irregla, ijkuak kisas itlaj itech icuerpo se tlakatl noso se siuatl uan ijkuak se tlakatl motekas iuan se siuatl tlen amo chipauak’”.

16 Jehová omotlapoui iuan Moisés ijkuak yomikej ome ikoneuan Aarón porque omotokijkaj inauak Jehová. 2 Jehová okilui Moisés: “Xikilui mokni Aarón para amo mikis, amo moneki kalakis ijkuak ye kinekis kanin santo, ikuitlapan tsotsoli* tilauak, iyekapan itentsaka Arca. Porque ne nimonextis itech se mixtli ipan itentsaka Arca”.

3 “Ijkuak Aarón kalakis kanin santo, kiuikas se toro tlen moskaltijtok para motemakas ken tetliokolil tlen motemaka ijkuak ikaj motlapololtia. Noijki kiuikas se ichka* para motemakas ken tetliokolil tlen mochichinoua.* 4 Moneki konakis* itlaken santo de lino. Para amo maxipetsito noijki konakis icalzón de lino, motlajkoilpis ika tlajkoilpikatl de lino uan mokuakimilos ika tlakemitl de lino. Nonmej tlakenmej santos, Aarón maltis* achto kinmotlalilis”.

5 “Israelitas moneki kimakaskej Aarón ome tentsojkonemej ken tetliokolil tlen motemaka ijkuak ikaj motlapololtia uan se ichka ken tetliokolil tlen mochichinoua”.

6 “Aarón kitemakas toro para makitlapojpoluikan itlajtlakoluan uan ijkon kitlapojpoluiskej ye uan ifamilia”.

7 “Satepan kinuikas ome tentsojkonemej uan kintlalis ixpan Jehová, ikaltempa kalnechikol. 8 Aarón kinnejnekis* temej* para momatis tlen tentsojkonetl yetos iaxka Jehová uan tlen tentsojkonetl kinuikas itlajtlakoluan altepetl.* 9 Aarón kitemakas tentsojkonetl tlen okiski para mayeto iaxka Jehová uan kitemakas ken tetliokolil tlen motemaka ijkuak ikaj motlapololtia. 10 Okse tentsojkonetl moneki kiuikaskej ok yoltok ixpan Jehová, ijkon uelis kititlaniskej kanin tlauaki uan tentsojkonetl kiuikas itlajtlakol altepetl para kitlapojpoluiskej”.

11 “Aarón kitemakas toro para makitlapojpoluikan itlajtlakoluan uan ijkon kitlapojpoluiskej ye uan ifamilia. Satepan kimiktis toro tlen okiuikak para makitlapojpoluikan itlajtlakoluan”.

12 “Satepan konanas kopalkaxitl tlen kitemitis ika tlixochtli* tlen yetos ijtik altar ixpan Jehová. Noijki konanas ome puño kopali ajuiak tlen kuechtik uan kinuikas ikuitlapan tsotsoli tilauak. 13 Ixpan Jehová kikopas kopali ijtik tlixochtli uan ipokyo kopali mosouas ipan itentsaka arca tlen ika omochi acuerdo. Aarón moneki ijkon kichiuas para amo mamiki”.

14 “Konanas tepitsin ieso toro uan ika imajpil kitsitsikuitsas* estli chikome uelta iyekapan itentsaka Arca ik kanin kisa tonaltsin”.

15 “Satepan kimiktis tentsojkonetl tlen kitemakas para makitlapojpoluikan itlajtlakoluan altepetl. Kiuikas ieso tentsojkonetl ikuitlapan tsotsoli tilauak uan kitsitsikuitsas ixpan itentsaka Arca, kichiuas ijkon ken okichi ika ieso toro”.

16 “Aarón moneki kichipauas Santísimo porque israelitas kisokiotiaj ijkuak kichiuaj tlen amo chipauak, ijkuak tlajtlakolchiuaj uan ijkuak kichiuaj tlen amo kuali. Makichipaua kalnechikol tlen kajki intlajkotia, tlen kajki intlajkotia akinmej kichiuaj tlen amo kuali”.

17 “Ijkuak Aarón kalakis kanin santo uan kintemakas tetliokolilmej para makintlapojpoluikan, desde ijkuak kalakis hasta ijkuak kisas, amo moneki yetos okse tlakatl ijtik kalnechikol. Kintemakas tetliokolilmej para ye makitlapojpoluikan, noijki para makitlapojpoluikan ifamilia uan nochi altepetl Israel”.

18 “Ye yas ik kanin kajki altar tlen kajki ixpan Jehová uan kitemakas tetliokolil para makitlapojpoluikan. Nochtin ikuakonuan altar kintlalilis tepitsin ieso toro uan tepitsin ieso tentsojkonetl. 19 Ika imajpil kitsitsikuitsas tepitsin estli chikome uelta ipan altar uan kichipauas para ayakmo makinpia intlajtlakoluan israelitas uan kichiuas mayeto santo”.

20 “Ijkuak tlamis kichipauas kalnechikol, altar uan Santísimo, noijki kitemakas tentsojkonetl tlen ok yoltos. 21 Aarón kintlalis imauan ipan itsonteko tentsojkonetl tlen ok yoltok uan kijtos ken motlapololtiaj israelitas, tlen amo kuali kichiuaj uan intlajtlakoluan. Non kitlalis ipan itsonteko tentsojkonetl uan kinauatis se tlakatl tlen okipejpenkej makiuika tentsojkonetl kanin tlauaki. 22 Tentsojkonetl kinmamas intlajtlakoluan israelitas uan kinuikas kanin tlauaki. Ye kititlanis tentsojkonetl kanin tlauaki”.

23 “Aarón kalakis ijtik kalnechikol uan kimokixtilis itlaken de lino tlen okonaki* ijkuak okalak kanin santo uan ompa kikauas. 24 Aarón moneki maltiti* kanin tlachipauak uan oksepa konakis itlaken. Satepan kisas uan kitemakas itetliokolil tlen mochichinoua uan itetliokolil altepetl tlen mochichinoua. Kintemakas tetliokolilmej para makintlapojpoluikan ye uan altepetl. 25 Aarón kichichinos* inchiauak yolkamej tlen omotemakakej por intlajtlakoluan para mapopoka ipan altar”.

26 “Tlakatl tlen kikauati tentsojkonetl tlen kinuikas intlajtlakoluan israelitas, moneki motlapakis uan maltis. Satepan uelis kalakis kanin nochtin mokajtokej”.

27 “Toro uan tentsojkonetl tlen okintemakakej por intlajtlakoluan, kinuikaskej uejka kanin amikaj chanti uan kichichinoskej* inmieuayo, innakayo uan inkuitl porque inmieso okikalakijkej kanin santo para makintlapojpoluikan. 28 Tlakatl tlen kinchichinos* moneki motlapakis uan maltis, satepan uelis kalakis kanin nochtin mokauaj”.

29 “Nin tlanauatil moneki nochipa nankitlakamatiskej:* Metstli chikome, tonal majtlaktli moneki nankiteititiskej nanmoyolkokouaj porque nantlajtlakolchiuaj* uan amo moneki tekipanoskej nion israelitas nion akinmej uitsej itech okse altepetl tlen chantij namouan. 30 Non tonal motemakaskej tetliokolilmej para namechtlapojpoluis uan ijkon uelis moijtos nanchipauakej. Namechintlapojpoluiliskej namotlajtlakoluan uan nanyetoskej nanchipauakej ixpan Jehová. 31 Non tonal moneki nankitaskej ken yetoskia se sábado, amo moneki nantekipanoskej uan moneki nankiteititiskej nanmoyolkokouaj porque nantlajtlakolchiuaj. Nin tlanauatil moneki nochipa nankitlakamatiskej”.

32 “Teopixki tlen kipejpenaskej uan kitlaliskej ken tlayekanteopixki para makipatkayoti ipapa, kintemakas tetliokolilmej para makitlapojpoluikan uan kimotlalilis itlaken de lino, tlakenmej santos. 33 Kichipauas kalnechikol, altar uan kanin Santísimo. Noijki kintemakas tetliokolilmej para makintlapojpoluikan teopixkej uan nochtin akinmej chantij altepetl. 34 Namejuan moneki nochipa nankitlakamatiskej nin tlanauatil. Se uelta sejse xiuitl motemakaskej tetliokolilmej para makintlapojpoluikan israelitas”.

Aarón okichi ijkon ken Jehová okinauati Moisés.

17 Jehová ok okilui Moisés: 2 “Ximotlapoui iuan Aarón, ikoneuan uan nochtin israelitas uan xikinmilui: ‘Ijkin otlanauati Jehová:

3 Tla se israelita kimiktia se toro, se ichka* tlen moskaltijtok noso se tentso uejka kanin amikaj chanti noso kanin nochtin mokajtokej, 4 pero amo kiuika ikaltempa kalnechikol para kitliokolis Jehová, iyekapan itabernáculo Jehová, akin ijkon kichiuas tlajtlakolchiuas. Ye amo okimikti yolkatl ijkon ken moneki ikinon moneki kimiktiskej.* 5 Ijkon israelitas kinuikaskej ixpan Jehová yolkamej tlen axkan kintemakatokej san tlala, kinuikiliskej teopixki ikaltempa kalnechikol. Yejuan kinmakaskej Jehová ken tetliokolilmej tlen tesetiliaj. 6 Teopixki kitsitsikuitsas* estli itech ialtar Jehová tlen kajki ikaltempa kalnechikol uan kichichinos* inchiauak yolkamej para mapopoka ken se tetliokolil tlen Jehová sapanoua kajuiakmatis. 7 Ikinon yejuan ayakmo moneki kinmakaskej tetliokolilmej ejekamej* tlen motaj ken tentsomej, tlen kinueyichiuaj ken yetoskia inuan auilnemij. Nin tlanauatil nochipa moneki nankitlakamatiskej* uan noijki kitlakamatiskej* akinmej nestiaskej’”.*

8 “Noijki xikinmilui: ‘Tla se israelita noso akin uits itech okse altepetl tlen namouan chanti, kitemakas se tetliokolil tlen mochichinoua* noso kimiktis se yolkatl, 9 pero amo kiuikas ikaltempa kalnechikol para kitliokolis Jehová, akin ijkon kichiuas moneki kimiktiskej’”.

10 “‘Tla se israelita noso akin uits itech okse altepetl tlen namouan chanti kikua san tlen estli, nikixtopeuas akin ijkon kichiuas uan nikmiktis.* 11 Porque tlen yoltok, iyolilis kajki itech estli. Ne onamechmakak estli para nankitemakaskej ipan altar uan ijkon namechtlapojpoluis. Porque yolilis kajki itech estli uan ika estli namechtlapojpoluis namotlajtlakoluan. 12 Ikinon onikinmilui israelitas: “Namejuan amo moneki nankikuaskej estli uan akin uits itech okse altepetl tlen namouan chanti noijki amo moneki kikuas estli”.

13 “‘Tla se israelita noso akin uits itech okse altepetl tlen namouan chanti, yaui kinkitskiti yolkamej uan kikitskia se yolkatl amo mansojtsin noso se tototl* tlen mokua, ye moneki kieskixtis uan kitlalpachos estli. 14 Nochi tlen yoltok, iyolilis kajki itech estli, porque itech estli kajki yolilis. Ikinon onikinmilui israelitas: “Amo xikkuakan ieso nochi tlen yoltok, porque nochi tlen yoltok, iyolilis kajki itech estli. Akin kikuas estli moneki mikis. 15 Tla se israelita noso akin uits itech okse altepetl, kikua se yolkatl tlen okajsikej yomiki noso tla kikua se yolkatl tlen okitsatsayatski se tekuani, moneki motlapakis uan maltis.* Ye yetos sokio hasta ijkuak tiotlakis. Satepan chipauis. 16 Pero kitlaxtlauas itlajtlakol tla amo motlapakis uan amo maltis’”.

18 Jehová ok omotlapoui iuan Moisés uan okilui: 2 “Xikinmilui israelitas ne Jehová namoDios. 3 Amo xikchiuakan tlen kichiuaj akinmej chantij Egipto, kanin namejuan onankatkaj. Noijki amo xikchiuakan tlen kichiuaj akinmej chantij Canaán, kanin namechuika. Amo xikchiuakan tlen yejuan kichiuaj. 4 Xikchiuakan tlen onikijto mamochiua uan xikintlakamatikan* tlanauatilmej tlen onikintlali. Ne Jehová namoDios. 5 Xikintlakamatikan tlanauatilmej tlen onikintlali uan tlen onikijto mamochiua. Yoltos akin ijkon kichiuas, ne niJehová”.

6 “Amikaj mamotoki inauak se ifamiliar para iuan motekas. Ne niJehová. 7 Amo ximoteka iuan mopapa nion amo ximoteka iuan momama, ye momama ikinon amo iuan ximoteka”.

8 “Amo ximoteka iuan isiua mopapa, tikpinatis mopapa tla ijkon tikchiuas”.

9 “Amo ximoteka iuan mokni siuatl maski ichpoch mopapa noso ichpoch momama. Maski oneski* mokalijtik noso amo”.

10 “Amo ximoteka iuan ichpoch motelpoch nion iuan ichpoch mochpoch, porque timopinatis tla ijkon tikchiuas”.

11 “Amo ximoteka iuan ichpoch isiua mopapa, ye ichpoch mopapa uan noijki mokni”.

12 “Amo ximoteka iuan ikni mopapa, non siuatl ifamiliar mopapa”.

13 “Amo ximoteka iuan ikni momama, porque non siuatl ifamiliar momama”.

14 “Amo ximoteka iuan isiua ikni mopapa para amo tikpinatis, non siuatl motía”.

15 “Amo ximoteka iuan mosiuamo, non siuatl isiua motelpoch. Amo ximoteka iuan non siuatl”.

16 “Amo ximoteka iuan isiua mokni porque tikpinatis mokni tla ijkon tikchiuas”.

17 “Amo ximoteka iuan se siuatl uan noijki iuan ichpoch noso iuan ixui.* Porque yejuan familiares uan non tlamantli tetlajyalti”.

18 “Amo ximonamikti iuan ikni mosiua porque mokokoliskej, nion amo iuan ximoteka tla mosiua ok yoltok”.

19 “Amo xio iuan se siuatl para iuan timotekas ijkuak ye yetos sokio porque kipia irregla”.

20 “Amo ximoteka iuan isiua okse tlakatl,* porque tiyetos tisokio tla ijkon tikchiuas”.

21 “Amo xiktekauili se mokone makimiktilikan Mólek. Amo ijkon xikchiua para amo tiksokiotis itoka moDios. Ne niJehová”.

22 “Se tlakatl amo moneki motekas iuan okse tlakatl* porque non tetlajyalti”.

23 “Nion se tlakatl amo mamoteka iuan se yolkatl porque non kisokiotis. Nion se siuatl amo mamoketsa ixpan se yolkatl para iuan motekas. Non pitsotik”.

24 “Amo ximosokiotikan ika nochi non tlamantli, porque ika nochi non tlamantli omosokiotijkej altepemej tlen ne nikinmachiuas* namoixpan. 25 Tlali sokio uan nikchiuas makitlaxtlaua tlen amo kuali okichi uan tlali kinmijsotlas akinmej ipan chantij. 26 Pero namejuan moneki nankintlakamatiskej* tlanauatilmej tlen onikintlali uan tlen onikijto mamochiua. Nion namejuan nion akin uits itech okse altepetl tlen namouan chanti, amo xikchiuakan nochi non tlamantli tetlajyalti. 27 Porque nochi non tlamantli tetlajyalti, okichijkej akinmej ochantikej ipan non tlali ijkuak namejuan ayamo onankatkaj uan axkan tlali sokio. 28 Namejuan amo nankisokiotiskej tlali, ikinon amo namechijsotlas ijkon ken kinmijsotlas altepemej tlen yokatkaj ijkuak namejuan ayamo onankatkaj. 29 Tla ikaj kichiua non tlamantli tetlajyalti, akinmej ijkon kichiuaskej kinmiktiskej.* 30 Namejuan moneki nantechtlakamatiskej* uan amo nankichiuaskej tlamantli tetlajyalti tlen omochiuaya ijkuak ayamo onankatkaj, ijkon amo nanmosokiotiskej ken yejuan omosokiotijkej. Ne niJehová namoDios”.

19 Jehová oksepa omotlapoui iuan Moisés uan okilui: 2 “Ximotlapoui inuan nochtin israelitas uan xikinmilui: ‘Moneki nanyetoskej nansantos porque ne Jehová namoDios nisanto’”.

3 “‘Sejse namejuan moneki nankitlakaitaskej namomama uan namopapa uan noijki nankitlakaitaskej nosábados. Ne niJehová namoDios. 4 Amo xikintemokan dioses tlen amitlaj inpati nion xikinmochiuilikan dioses ika tepostli tlen kipatiltiaj. Ne niJehová namoDios’”.

5 “‘Tla nankimakaj Jehová se tetliokolil tlen tesetilia, xikmiktikan yolkatl ijkon ken moneki para manamechseli. 6 Yolkatl moneki kikuaskej ijkuak kimiktiskej uan noijki mostlatika, pero uiptlatika moneki kichichinoskej* tlen ok mokauas. 7 Pero tetlajyalti tla uiptlatika kikuaj seki inakayo yolkatl. Amo kiseliskej. 8 Akin kikuas kitlaxtlauas tlen amo kuali kichiuas porque kisokiotis tlamantli santo tlen iaxka Jehová, akin ijkon kichiuas kimiktiskej’”.*

9 “‘Ijkuak titlaololos tlala, amo xikololo nochi tlen kajki tlatentli, nion xikololo tlen ok mokauas ijkuak titlaololos. 10 Noijki amo xikololo tlen ok mokauas kanin tiktokas uvas nion uvas tlen ompa xixintoskej. Moneki tikinkauilis akinmej amitlaj kipiaj uan akinmej uitsej okse altepetl. Ne niJehová namoDios’”.

11 “‘Amo ximotlachtekikan, amo ximokajkayauakan nion amo xikmochiuilikan tlen amo kuali. 12 Amo xiknejnekikan* notoka para nankijtoskej* itlaj tlen amo melauak porque tla ijkon nankichiuaj, nankisokiotiskej itoka namoDios. Ne niJehová. 13 Amo xikkajkayaua mokni nion xitlachteki. Amo xikmokaui desde youak hasta mostlatika itlaxtlauil motlakeual’”.

14 “‘Amo xikuijuikalti akin amo tlakaki nion itlaj xiktlali para makitsakuili akin amo tlachia uan sapanoua xiktlakaita* moDios. Ne niJehová’”.

15 “‘Amo xikchiuakan tlen amo kuali ijkuak nantlaixkomakaskej. Amo xikiknomatikan akin amitlaj kipia san porque amitlaj kipia, nion san xikpaleuikan akin kipia tomin. Xikixkomakakan namokni ijkon ken moneki’”.

16 “‘Itech moaltepe amo xikinteneua* oksekimej para amo kuali makinmitakan. Amo xikchiua itlaj tlen kichiuas mamiki mokni.* Ne niJehová’”.

17 “‘Amo xikkokoli mokni moyolipan.* Xikyektlali mokni, ijkon amo yetos motlajtlakol tla tlajtlakolchiuas’”.

18 “‘Amo ximomakopa nion amo xikinkokoli mokniuan. Xikintlasojtla oksekimej ijkon ken te timotlasojtla. Ne niJehová’”.

19 “‘Xikchiuakan tlen onikijto mamochiua: amo xikchiuakan mamokonetikan ome tlatlamantli yolkamej mansojtsitsintin. Amo xiktokakan namotlala ome tlatlamantli semillas nion xikonakikan* se tlakemitl tlen okichijkej ika ome tlatlamantli hilosʼ”.

20 “‘Tla se tlakatl moteka iuan se siuatl uan iteko non siuatl okijto siuatl monamiktis iuan okse tlakatl, pero ayamo kikajkauaj uan ayamo kikouaj, yejuan ome moneki kintlajyouiltiskej. Pero amo moneki kinmiktiskej porque siuatl ayamo okikajkauayaj. 21 Ye moneki kiuikilis Jehová, ikaltempa kalnechikol, tetliokolil porque otlajtlakolchi. Ye moneki kiuikas se ichka* ken tetliokolil porque otlajtlakolchi. 22 Teopixki kitemakas ixpan Jehová ichka tlen kiuikas akin otlajtlakolchi uan ijkon kitlapojpoluiskej tlen amo kuali okichiʼ”.

23 “‘Ijkuak nankalakiskej kanin kajki tlali uan nankitokaskej se kouitl tlen tlatlakiltia, moneki nankitaskej sokio non tlakilotl uan amo moneki nanmotokiskej kanin yetos. Eyi xiuitl amo moneki nanmotokiskej kanin yetos, amo xikkuakanʼ”. 24 Pero nochi itlakilo yetos santo ijkuak kajxitis naui xiuitl uan nanpakiskej ixpan Jehová. 25 Ijkuak kajxitis makuili xiuitl uelis nankikuaskej itlakilo. Nankololoskej miak ijkuak nankitekiskej itlakilo. Ne niJehová namoDios’”.

26 “‘Amo xikkuakan itlaj tlen kipia estliʼ”.

“‘Amo xiktemokan nankimatiskej tlen panos satepan nion xikchiuakan naualotl”.

27 “‘Amo xikmotekilikan namotsonkal tlen nankipiaj inajnakastlan namotsonteko nion xikijtlakokan iyakyo* namotentsojmio’”.

28 “‘Amo xiktejtekikan namocuerpo porque ikaj omiki nion amo xikinmochiuilikan tatuajes. Ne niJehová’”.

29 “‘Amo xikchiualti mochpoch mamonemaka para amo tikpinatis. Tlamo tlali sokiouas porque auilnemiskej uan temis ika tlen pitsotik’”.

30 “‘Xikintlakaitakan nosábados uan sapanoua xiktlakaitakan kanin nechueyichiuaj. Ne niJehová’”.

31 “‘Amo xikintlakeuakan akinmej motlapouiaj inuan akinmej yomikej nion xikintlajtlanikan tlachixkej porque intlajtlakol nanmosokiotiskej. Ne niJehová namoDios’”.

32 “‘Moneki timoketsas para tikteititis tiktlakaita akin yokuaistayak uan moneki tikinueyitlalis akinmej yokokoxkatikej* uan sapanoua tiktlakaitas* moDios. Ne niJehová’”.

33 “‘Tla akin oksekan ialtepe namouan chanti itech namoaltepe, amo xiktlajyouiltikan. 34 Xikitakan akin uits itech okse altepetl tlen namouan chanti ken yetoskia se israelita. Xiktlasojtlakan ken namejuan nanmotlasojtlaj porque namejuan onanchantikej Egipto maski amo okatka namoaltepe. Ne niJehová namoDiosʼ”.

35 “‘Amo xitlakajkayauakan ijkuak nantlatamachiuaskej.* 36 Ijkuak nankinejnekiskej* se tlatamachiuali, pesas noso tlen ika motamachiua tlen uaki, tlen nankinejnekiskej moneki kuali tlatamachiuas. Noijki ijkuak nankitamachiuaskej itlaj atik, tlen nankinejnekiskej moneki kuali tlatamachiuas. Ne niJehová namoDios akin onamechkixti Egipto. 37 Xikintlakamatikan* nochi notlanauatiluan tlen onikintlali uan nochi tlen onikijto mamochiua, ika ximoyekanakan. Ne niJehováʼ”.

20 Jehová ok okilui Moisés: 2 “Moneki tikinmiluis israelitas: ‘Tla se israelita noso akin uits itech okse altepetl uan chanti altepetl Israel kimaktilia Mólek se ikone, moneki mikis. Akinmej pouij itech altepetl moneki kimojmotlaskej ika tetl* hasta mamiki. 3 Ne nikualanis iuan akin ijkon kichiuas uan nikmiktis.* Porque okimaktili Mólek se ikone, okisokioti kanin nechueyichiuaj uan okisokioti notoka tlen santo. 4 Tla akinmej chantij itech altepetl, mochiuaj amo kitaj akin kimaktilia Mólek se ikone uan amo kimiktiaj, 5 ne nikualanis iuan akin ijkon kichiuas uan noijki iuan ifamilia. Nikmiktis akin ijkon kichiuas uan noijki nikinmiktis akinmej iuan kiueyichiuaj Mólekʼ”.*

6 “‘Akin nechkajkayauas* uan kintlakeuas tlachixkej noso akinmej motlapouiaj inuan akinmej yomikej, ne iuan nikualanis uan nikmiktisʼ”.

7 “‘Namejuan moneki nanmochipauaskej uan nanyetoskej nansantos porque ne niJehová namoDios. 8 Moneki nankitlakamatiskej* uan nankichiuaskej tlen yonikijto mamochiua. Ne niJehová akin namechchipajtokʼ”.

9 “‘Moneki mikis akin kiuijuikaltis* ipapa noso imama. Ye itlajtlakol makimiktikan porque okiuijuikalti ipapa noso imama’”.

10 “‘Tla se tlakatl auilnemi* iuan isiua okse tlakatl, non tlakatl tlen auilnemi iuan isiua ikni, moneki mikis. Moneki mikiskej tlakatl uan siuatl tlen oauilnenkej.* 11 Tlakatl tlen moteka iuan isiua ipapa, kipinatia ipapa. Tlakatl uan siuatl moneki mikiskej, yejuan intlajtlakol makinmiktikan. 12 Tla se tlakatl moteka iuan isiuamo, yejuan ome moneki mikiskej. Okichijkej itlaj pitsotik uan intlajtlakol makinmiktikan’”.

13 “‘Tla se tlakatl moteka iuan okse tlakatl ijkon ken moteka iuan se siuatl, yejuan ome okichijkej itlaj tetlajyalti. Moneki mikiskej, yejuan intlajtlakol makinmiktikan’”.

14 “‘Tla se tlakatl moteka iuan se siuatl uan noijki moteka iuan imama siuatl, pitsotik tlen kichiuaj. Moneki kinchichinoskej* tlakatl uan siuamej para ayakmo makichijtokan tlen pitsotik kanin nankatej’”.

15 “‘Tla se tlakatl moteka iuan se yolkatl, non tlakatl moneki mikis uan moneki nankimiktiskej yolkatl. 16 Tla se siuatl motokia inauak se yolkatl para iuan motekas, moneki tikmiktis siuatl uan yolkatl. Yejuan moneki mikiskej. Intlajtlakol makinmiktikan’”.

17 “‘Tla se tlakatl moteka iuan ikni, maski mayeto ichpoch ipapa noso ichpoch imama uan yejuan ome motaj xipetstikej, non tepinati. Moneki kinmiktiskej inmixpan akinmej chantij altepetl. Tlakatl okipinati ikni uan moneki kitlaxtlauas tlen amo kuali okichi’”.

18 “‘Tla se tlakatl moteka iuan se siuatl tlen temotok irregla, yejuan ome kiteititiaj amo kitlakaitaj ieso siuatl. Yejuan ome moneki kinmiktiskej’”.*

19 “‘Amo ximoteka iuan ikni siuatl momama nion iuan ikni siuatl mopapa porque non kipinatis infamiliar. Nanmomej moneki nankitlaxtlauaskej tlen amo kuali onankichijkej. 20 Tlakatl tlen moteka iuan isiua itío, kipinatia itío. Yejuan kitlaxtlauaskej intlajtlakol, mikiskej uan amo kinpiaskej inkoneuan. 21 Tetlajyalti tla se tlakatl monamiktia iuan isiua ikni.* Ye okipinati ikni uan amo kinpiaskej inkoneuan’”.

22 “‘Xiktlakamatikan* uan xikchiuakan nochi tlen yonikijto mamochiua uan nochi notlanauatiluan tlen yonikintlali. Ijkon amo namechijsotlas tlali kanin namechuikatok para ompa xichantikan. 23 Amo ximoyekanakan ijkon ken moyekanaj altepemej tlen nikinmachiuas* namoixpan, porque yejuan kichiuaj nochi non tlamantli uan nechtlajyaltiaj. 24 Ikinon onamechilui: “Namejuan nankimokauiskej intlal nonmej altepemej uan ne namechmakas para mayeto namoaxka, ompa onka miak leche uan neujtli.* Ne niJehová namoDios, akin onamechxelo itech okseki altepemej”. 25 Namejuan moneki nankitaskej tlen yolkatl chipauak uan tlen yolkatl sokio, tlen tototl* chipauak uan tlen tototl sokio. Amo ximosokiotikan ika se yolkatl, se tototl noso itlaj tlen motilana, tlamantli tlen ne yonikxelo para xikinmitakan sokiojkej. 26 Namejuan moneki nanyetoskej santos, porque ne Jehová nisanto. Ne namechxelojtok itech okseki altepemej para xiyetokan noaxkauan’”.

27 “‘Moneki mikis tlakatl noso siuatl tlen motlapouia inuan akinmej yomikej noso tlen tlachixki. Akinmej pouij itech altepetl moneki kinmojmotlaskej ika tetl hasta mamikikan. Yejuan intlajtlakol makinmiktikan’”.

21 Jehová noijki okilui Moisés: “Xikinmilui ikoneuan Aarón tlen teopixkej: ‘Nion se teopixki mamotoki inauak akin yomiki de ialtepe para amo mosokiotis. 2 Pero uelis ijkon kichiuas tla ifamiliar, uelis yetos imama, ipapa, itelpoch, ichpoch noso ikni. 3 Noijki uelis mosokiotis por ikni tlen kajki inauak, tla ayamo moteka iuan se tlakatl uan ayamo monamiktia. 4 Amo moneki mosokiotis por isiua se tlakatl de ialtepe. 5 Yejuan amo moneki nochi mokuaximaskej nion kiyekatekiskej intentsojmio nion kitejtekiskej incuerpo. 6 Yejuan moneki yetoskej santos para inDios uan amo moneki kisokiotiskej itoka inDios, porque yejuan kintemakaj tetliokolilmej tlen kinchichiniliaj* Jehová, non itlakual* inDios. Moneki yetoskej santos. 7 Amo moneki monamiktiskej iuan se siuatl tlen monemaka, iuan se siuatl tlen yomotekak iuan se tlakatl nion iuan se siuatl tlen okika inamik, porque teopixki santo para iDios. 8 Moneki tikchipauas porque ye kitemaka itlakual moDios. Moneki tikitas santo porque ne Jehová akin namechchipajtok nisanto’”.

9 “‘Tla ichpoch se teopixki mosokiotia porque monemaka, ye noijki kisokiotia ipapa. Ichpochtli moneki kichichinoskej’”.*

10 “‘Teopixki tlen yetos tlayekanteopixki, akin kinokiliaj* ipan itsonteko aceite santo uan akin kipejpenaj para makonaki* itlaken teopixki, amo moneki kuapajsoliuis nion kitsayanas itlaken. 11 Amo moneki motokis inauak akin yomiki. Amo moneki mosokiotis nion por ipapa nion por imama. 12 Amo moneki kisas kanin nechueyichiuaj nion kisokiotis kanin kiueyichiuaj iDios, porque ipan kajki iaceite santo iDios tlen kiteititia yomotemakak. Ne niJehová’”.

13 “‘Ye moneki monamiktis iuan se siuatl tlen ayamo moteka iuan se tlakatl. 14 Amo uelis monamiktis iuan se siuatl tlen omiki inamik, se siuatl tlen okika inamik, se siuatl tlen yomotekak iuan se tlakatl nion iuan se siuatl tlen monemaka. Moneki monamiktis iuan se ichpochtli de ialtepe. 15 Amo moneki kinsokiotis ixuiuan de ialtepe, porque ne niJehová akin kichipajtok’”.

16 Jehová ok omotlapoui iuan Moisés uan okilui: 17 “Xikilui Aarón: ‘Tla kokoxki se moxui tlen satepan nesis, amo uelis motokis uan kitemakas itlakual iDios. 18 Amo uelis motokis nion se tlakatl tlen kokoxki: se tlakatl tlen amo tlachia, tlen koxo, tlen amo kuali kipia ixko noso tlen chikoueyak, 19 se tlakatl tlen opostek ikxi noso ima, 20 se tlakatl tlen kuitlapantolontik, tlen amo omoskalti, se tlakatl tlen amo kuali ixtololouan, tlen sauayo, tlen kipia kokolistli ipan inakayo noso tlen amo kuali kinpia itestículos.* 21 Nion se ixui teopixki Aarón tlen kokoxki uelis motokis para kintemakas tetliokolilmej tlen kinchichiniliaj Jehová. Ye kokoxki ikinon amo uelis motokis para kitemakas itlakual iDios. 22 Uelis kikuas tlatlamantli tlakuali tlen okixelilijkej iDios. 23 Pero amo uelis motokis ik kanin kajki tsotsoli* tilauak nion ik kanin kajki altar, porque ye kokoxki. Amo moneki kisokiotis kanin nechueyichiuaj porque ne niJehová akin namechchipajtok’”.

24 Ijkuakon Moisés omotlapoui iuan Aarón, ikoneuan Aarón uan nochtin israelitas.

22 Jehová oksepa omotlapoui iuan Moisés uan okilui: 2 “Xikinmilui Aarón uan ikoneuan makimaluikan tlamantli santo tlen israelitas kichipajtokej uan nechmaktilijtokej. Noijki amo makisokiotikan notoka tlen santo. Ne niJehová. 3 Xikinmilui: ‘Tla se moxui tlen satepan nesis, mosokiotia uan motokia inauak tlamantli santo tlen israelitas kichipauaj ijkuak kimaktiliaj Jehová, akin ijkon kichiuas mikis uan ayakmo yetos noixpan. Ne niJehová. 4 Nion se ixui Aarón tlen kipias lepra noso tlen kisas itlaj fiero itech itlakayo,* amo uelis kikuas tlamantli santo hasta machipaui. Noijki amo uelis kikuas tlakatl tlen kikitskis akin omosokioti porque okikitski akin yomiki nion akin itech itlakayo kisas semen.* 5 Noijki amo uelis kikuas akin kikitskis se yolkatl sokio tlen san sekan yajtinemi ipan tlali nion akin kikitskis akin sokio tlen uelis kisokiotis. 6 Akin kikitskis non tlamantli, yetos sokio hasta ijkuak tiotlakis uan amo uelis kikuas tlamantli santo hasta ijkuak maltis.* 7 Chipauis hasta ijkuak motlatis tonaltsin uan satepan uelis kikuas tlamantli santo porque non itlakual. 8 Noijki amo moneki kikuas se yolkatl tlen okajsikej yomiki nion se yolkatl tlen okitsatsayatskej tekuanimej, porque non kichiuas mayeto sokio. Ne niJehová’”.

9 “‘Yejuan moneki nechtlakamatiskej,* tla ijkon kichiuaj amo tlajtlakolchiuaskej uan amo mikiskej porque amo kisokiotiskej tlamantli santo. Ne niJehová akin namechchipajtok’”.

10 “‘Akin amo kinamiki* amo uelis kikuas itlaj santo. Akin uits itech okse altepetl tlen mokalotijtok ikalijtik teopixki uan akin kitlakeuaj, amo uelis kikuaskej tlamantli santo. 11 Pero tla se teopixki ika itomin kikoua se itlakeual, tlakeuali tlen okikojkej uelis kikuas tlen santo. Tlakeualmej tlen nesiskej* ikalijtik teopixki noijki uelis iuan tlakuaskej. 12 Tla ichpoch se teopixki monamiktia iuan akin amo teopixki, non ichpochtli amo uelis kikuas tlamantli santo tlen omotemakak. 13 Pero tla ichpoch se teopixki miki inamik noso kikaua, amo kinpia ikoneuan uan mokopa ikalijtik ipapa ijkon ken ijkuak okatka ichpochtli, uelis kikuas itlakual ipapa. Pero akin amo kinamiki amo uelis kikuas non tlakuali’”.

14 “‘Tla ikaj motlapololtia uan kikua itlaj santo, moneki kikopilis teopixki tetliokolil santo uan noijki kitemakas se makuili parte tlen ipati. 15 Ikinon teopixkej amo moneki kisokiotiskej tlamantli santo tlen israelitas kimakaj Jehová, 16 uan amo moneki kinkauiliskej makikuakan tlamantli tlen santo para amo makintlajtlakolmamaltikan. Porque ne niJehová akin namechchipajtok’”.

17 Jehová ok omotlapoui iuan Moisés uan okilui: 18 “Ximotlapoui iuan Aarón, ikoneuan uan nochtin israelitas, xikinmilui: ‘Tla se tlakatl israelita noso akin uits itech okse altepetl tlen chanti Israel, kineki kitemakas se tetliokolil tlen kichichiniliaj* Jehová para kichiuas tlen yokijto noso porque kineki kitemakas tetliokolil ika nochi iyolo, 19 ye moneki kitemakas se toro, se ichka* tlen moskaltijtok noso se tentso okichtli tlen amo mokokoua para makiselikan. 20 Amo xiktemakakan itlaj tlen amo kuali porque amo namechpaleuis para manamechselikan’”.

21 “‘Tla se tlakatl kiuikilia Jehová se tetliokolil tlen tesetilia para kichiuas tlen yokijto noso para kitemakas ika nochi iyolo, moneki kitemakas se toro noso se vaca, se ichka noso se tentso tlen amo mokokoua tla kineki makiselikan. Yolkatl amo moneki yetos kokoxki. 22 Amo moneki motemakas se yolkatl tlen amo tlachia, tlen opostek iomio, tlen omoteki, tlen kipia verruga, tlen kakapaxiui* noso tlen kipia se kokolistli ipan inakayo. Amo moneki kimakaskej Jehová se yolkatl tlen kipia non tlamantli uan amo moneki kimakaskej Jehová non tetliokolil ipan altar. 23 Uelis kitemakaskej ika nochi inyolo se toro noso se ichka tlen chikoueyi pero amo uelis kintemakaskej nonmej yolkamej para kichiuaskej tlen yokijtojkej. 24 Amo xikuikilikan Jehová se yolkatl tlen amo kuali kinpia itestículos,* tlen patlachitokej, tlen okinuiuichilijkej noso okintekilijkej. Itech namotlal amo moneki nankintemakaskej nonmej yolkamej. 25 Amo xikselilikan akin uits itech okse altepetl se de nonmej yolkamej para nankitemakaskej ken itlakual* namoDios, porque nonmej yolkamej amo kuali katej uan amo kuajkualtin. Amo namechseliliskej’”.

26 Jehová oksepa omotlapoui iuan Moisés uan okilui: 27 “Ijkuak nesis* se torojkonetl, se ichkakonetl noso se tentsojkonetl mokauas iuan imama chikome tonal, pero ijkuak kajxitis chikueyi tonal yiuelis motemakas ken tetliokolil, se tetliokolil tlen kichichiniliaj Jehová. 28 Amo xikmiktikan san itech se tonal se toro iuan ikone noso se ichka iuan ikone”.

29 “Ijkuak nankimakaskej Jehová se yolkatl para nanmotlasojkamatiskej, moneki nankitemakaskej ijkon ken moneki para manamechselikan. 30 Moneki nankikuaskej non tonal uan amo moneki itlaj nankikauaskej para mostlatika. Ne niJehová”.

31 “Moneki nankichiuaskej uan nankitlakamatiskej* notlanauatiluan. Ne niJehová. 32 Amo xiksokiotikan notoka tlen santo, ijkon israelitas kitaskej ne nisanto. Ne niJehová akin namechchipajtok. 33 Ne onamechkixti Egipto para niyetos namoDios. Ne niJehová”.

23 Jehová ok omotlapoui iuan Moisés uan okilui: 2 “Ximotlapoui inuan israelitas uan xikinmilui: ‘Iluimej tlen mochijtiaskej para Jehová ijkuak moneki nantenotsaskej, yetoskej nechikolmej santos. Ninmej noiluiuan tlen mochijtiaskej:

3 Uelis nantekipanoskej chikuase tonal pero tonal chikome nanmoseuiskej, non tonal sábado uan nankiueyichiuaskej Dios. Amo uelis nankichiuaskej itlaj tekitl. Maski san kanin nanchantiskej, tonal sábado yetos iaxka Jehová’”.

4 “‘Ninmej iluiuan Jehová tlen moneki mochijtiaskej, nechikolmej santos ijkuak moneki nantenotsaskej para nanmiluichiuaskej itech tonal tlen yomoijto. 5 Itech metstli se,* tonal catorce, ijkuak yitlapoyatos, mochiuas iPascua Jehová’”.

6 “‘Non metstli tonal quince, kichiuiliskej Jehová iluitl ijkuak kikuaskej pan tlen amo kipia levadura. Chikome tonal moneki kikuaskej pan tlen amo kipia levadura. 7 Itech achto tonal nanmonechikoskej para nankiueyichiuaskej Dios. Ijkuakon amo moneki chikauak nantekipanoskej. 8 Chikome tonal nankitemakaskej tetliokolil tlen kichichiniliaj* Jehová. Ijkuak moajxitiskej chikome tonalmej, nanmonechikoskej para nankiueyichiuaskej Dios. Ijkuakon amo moneki chikauak nantekipanoskej’”.

9 Jehová noijki okilui Moisés: 10 “Ximotlapoui inuan israelitas uan xikinmilui: ‘Ijkuak nankalakiskej itech tlali tlen namechmakas uan nankololoskej tlen nankitokaskej, moneki nankiuikiliskej teopixki se tlailpili* tlen achto nankololoskej. 11 Ye kiuiuionis tlailpili ixpan Jehová para manamechselikan. Teopixki kiuiuionis se tonal satepan ijkuak yopanok sábado. 12 Tonal ijkuak kiuiuioniskej tlailpili, namejuan nankitemakaskej se ichka* tlen moskaltijtok, tlen amo mokokoua uan tlen yoxiujtik. Nankitemakaskej ken se tetliokolil tlen kichichiniliaj Jehová. 13 Ken tetliokolil tlen mochiua ika semilla, nankitemakaskej kanaj ome kilo* harina tlen okachi kuechtik tlen nelitos iuan aceite, non se tetliokolil tlen kichichiniliaj Jehová uan tlen kualtsin ajuiak. Uan noijki nankitetliokoliskej kanaj se litro* vino. 14 Amo xikkuakan pan, semilla tliuaki nion semilla yankuik hasta non tonal, hasta ijkuak yonankiuikilijkej itetliokolil namoDios. Nin tlanauatil nochipa moneki kitlakamatiskej* namokoneuan tlen nestiaskej* maski san kanin chantiskej’”.

15 “‘Ijkuak yopanok tonal sábado, moneki nankinpouaskej chikome sábados, nankinpouaskej desde ijkuak nankiuikaskej tlailpili para makiuiuionikan. Moneki ajsitok nankinpouaskej semanas. 16 Nankinpouaskej cincuenta tonalmej hasta se tonal satepan ijkuak yomoajxitijkej chikome sábados, ijkuakon nankimakaskej Jehová tetliokolil ika yankuik semilla. 17 Desde kanin nanchantiskej nankinuikaskej ome panes ken tetliokolil tlen mouiuionia. Moneki nankichiuaskej ika kanaj ome kilo harina tlen okachi kuechtik uan nankikxitiskej iuan levadura. Ijkon nankimakaskej Jehová tlen achto chikauas. 18 Iuan pan noijki nankintemakaskej chikome ichkakonemej* tlen amo mokokouaj uan tlen yoxiujtikej, se toro tlen moskaltijtok uan ome ichkamej. Nochi non kitemakaskej ken tetliokolil tlen kichichiniliaj Jehová uan sejse kitemakaskej iuan tetliokolil tlen mochiua ika semilla uan noijki iuan vino. Non yetos se tetliokolil tlen mochichinoua* uan Jehová sapanoua kajuiakmatis. 19 Noijki moneki kitemakaskej se tentsojkonetl por intlajtlakol uan ome ichkakonemej tlen yoxiujtikej ken tetliokolil tlen tesetilia. 20 Teopixki kiuiuionis ken tetliokolil tlen mouiuionia ixpan Jehová, ome ichkakonemej uan noijki panes tlen kinchiuaskej ika tlen achto chikauas. Non moneki yetos santo para Jehová, tlen iaxka teopixki. 21 Non tonal noijki nantenotsaskej para kiueyichiuaskej Dios. Ijkuakon amo uelis chikauak nantekipanoskej. Nin tlanauatil nochipa moneki kitlakamatiskej namokoneuan tlen nestiaskej maski san kanin chantiskej’”.

22 “‘Ijkuak nankololoskej tlen nankitokaskej amo xikololokan nochi tlen yetos tlatentli nion xikololokan tlen ok mokauas ijkuak nantlaololoskej. Moneki nankinkauiliskej akinmej amitlaj kipiaj uan akinmej oksekan inmialtepe. Ne niJehová namoDios’”.

23 Jehová ok okilui Moisés: 24 “Xikinmilui israelitas: ‘Metstli chikome* itech achto tonal, moneki nanmoseuiskej. Momatis yopejki non tonal ijkuak kipitsaskej trompeta, ijkon nankilnamikiskej nanmonechikoskej para nankiueyichiuaskej Dios. 25 Ijkuakon amo moneki chikauak nantekipanoskej uan moneki nankimakaskej Jehová tetliokolil tlen mochichinouaʼ”.

26 Jehová noijki okilui Moisés: 27 “Pero metstli chikome tonal majtlaktli, nankintemakaskej yolkamej para manamechtlapojpoluikan. Moneki nanmonechikoskej para nankiueyichiuaskej Dios, noijki nankiteititiskej nanmoyolkokouaj porque nantlajtlakolchiuaj uan nankimakaskej Jehová tetliokolil tlen mochichinoua. 28 Non tonal amo moneki nantekipanoskej porque non tonal kintemakaskej yolkamej para manamechtlapojpoluikan ixpan Jehová namoDios. 29 Non tonal mikis* akin amo kiteititis moyolkokoua porque tlajtlakole. 30 Akinmej tekipanoskej non tonal, ne nikinmiktis.* 31 Non tonal amo xitekipanokan. Nin tlanauatil nochipa moneki kitlakamatiskej namokoneuan tlen nestiaskej maski san kanin chantiskej. 32 Se sábado ijkuak moneki nanmoseuiskej, tonal chiknaui ijkuak yotiotlakik peuas nankiteititiskej nanmoyolkokouaj porque nantlajtlakolejkej. Non sábado nankipeualtiskej non tonal tiotlak uan tlamis mostlatika tiotlak”.

33 Jehová ok omotlapoui iuan Moisés uan okilui: 34 “Xikinmilui israelitas: ‘Tonal quince, metstli chikome, peuas iluitl para Jehová ijkuak nankinchiuaskej kaltsitsintin* uan iluitl uejkauas chikome tonal. 35 Achto tonal moneki nanmonechikoskej para nankiueyichiuaskej Dios uan ijkuakon amo moneki chikauak nantekipanoskej. 36 Chikome tonal moneki nankimakaskej Jehová tetliokolil tlen mochichinoua. Ijkuak moajxitis chikueyi tonal, nanmonechikoskej para nankiueyichiuaskej uan noijki nankimakaskej Jehová tetliokolil tlen mochichinoua. Nanmonechikoskej para nankilnamikiskej Dios. Ijkuakon amo moneki chikauak nantekipanoskejʼ”.

37 “‘Nonmej iluiuan Jehová tlen moneki mochijtiaskej, ijkuak moneki nantenotsaskej para nanmonechikoskej uan nankiueyichiuaskej Dios. Uan nankimakaskej Jehová tetliokolilmej tlen kinchiuiliaj ika tlitl: tetliokolil tlen mochichinoua, tetliokolil tlen mochiua ika semilla uan noijki motemakas vino, motemakas ijkon ken yomoijto sejse tonal. 38 Nonmej tetliokolilmej moneki nankintemakaskej, pero noijki motemakaskej tetliokolilmej tlen motemakaj itech isábados Jehová, namotetliokoliluan, tetliokolilmej tlen nankitemakaj ijkuak nankijtouaj itlaj nankichiuaskej uan tetliokolil tlen nankitemakaj ika nochi namoyolo. Nochi non moneki nankimakaskej Jehová. 39 Pero metstli chikome tonal quince, ijkuak tlamis nankololoskej tlen nankitokaskej, moneki nankiluichiuiliskej Jehová chikome tonal. Achto tonal nanmoseuiskej uan noijki nanmoseuiskej ijkuak moajxitis chikueyi tonal. 40 Achto tonal nankololoskej intlakilo uejueyij kojmej, noijki nankitekiskej imamayo soyakouitl, inmamayo kojmej tlen kipiaj miak inmamayo uan inmamayo xikalkojmej* tlen katej barranca uan chikome tonal nanpakiskej ixpan Jehová namoDios. 41 Sejse xiuitl, chikome tonal nankichiuaskej nin iluitl para Jehová, moneki nankichiuaskej itech metstli chikome. Nin tlanauatil nochipa moneki kitlakamatiskej namokoneuan tlen nestiaskej. 42 Namejuan moneki nanchantiskej ijtik kaltsitsintin chikome tonal, nochtin israelitas moneki chantiskej ijtik kaltsitsintin. 43 Ijkon akinmej nestiaskej kimatiskej ne onikchi israelitas machantikan ijtik kaltsitsintin ijkuak onikinkixti Egipto. Ne niJehová namoDios’”.

44 Satepan Moisés okinmilui israelitas tlen iluimej mochijtiaskiaj para Jehová.

24 Jehová oksepa omotlapoui iuan Moisés uan okilui: 2 “Xikinnauati israelitas mamitsuikilikan aceite de oliva tlen amitlaj iuan nelitok para tlauili, ijkon tlauili nochipa xotlatos. 3 Ijtik kalnechikol, ik okse ilado tsotsoli* tilauak kanin amo kajki arca tlen ika omochi acuerdo, Aarón moneki kitas tlauiltin nochipa maxotlatokan ixpan Jehová, desde tiotlak hasta kualkan.* Nin tlanauatil nochipa moneki kitlakamatiskej* akinmej nestiaskej.* 4 Ye nochipa moneki yikinpixtos tlauiltin ipan candelabro de oro chipauak ixpan Jehová”.

5 “Tikonanas harina tlen okachi kuechtik uan ika tikinmikxitis doce panes yaualtikej,* sejse pan mochiuas ika kanaj ome kilo* harina. 6 Ojka tikinnenepanos panes yaualtikej, se lado tikintlalis chikuase uan okse lado tikintlalis ok chikuase. Tikintlalis ipan mesa tlen omochi san ika oro ixpan Jehová. 7 Ipan sejse tlanepantli, tiktlalis kopali istak tlen amitlaj iuan nelitok uan non kineskayotis pan, se tetliokolil tlen kichiuiliaj Jehová ika tlitl. 8 Nochi sábados, ye nochipa kintlalis panes ixpan Jehová. Nin acuerdo inuan israelitas nochipa yetos. 9 Yetos inmiaxka Aarón uan ikoneuan uan kikuaskej kanin santo, de tetliokolilmej tlen kinchiuiliaj Jehová ika tlitl non sapanoua santo para teopixki. Nin tlanauatil nochipa yetos”.

10 Inuan israelitas okatka ikone se siuatl israelita tlen okipixki iuan se egipcio. Non tlakatl iuan okse israelita opejki mokitskiaj* ompa kanin nochtin omokajtokaj. 11 Ikone siuatl israelita amo okitlakaitak Tokayotl* uan opejki kiuijuikaltia.* Ikinon okiuikakej kanin okatka Moisés. Imama non tlakatl omotokayotiaya Selomit, ichpoch Dibrí, tlen opouiaya itech itribu Dan. 12 Okimaluijtokaj tlakatl hasta momatiskia tlen kijtoskia Jehová mamochiua.

13 Ijkuakon Jehová okilui Moisés: 14 “Xikkixti tlakatl tlen okiuijuikalti notoka kanin amikaj chanti uan nochtin akinmej okikakej tlen okijto moneki kintlaliskej inmauan ipan itsonteko, satepan nochtin akinmej pouij itech altepetl moneki kimojmotlaskej ika tetl.* 15 Uan moneki tikinmiluis israelitas: ‘Tla ikaj kiuijuikaltia iDios, kitlaxtlauas itlajtlakol. 16 Moneki mikis akin kiuijuikaltis itoka Jehová. Nochtin akinmej pouij itech altepetl moneki kimojmotlaskej ika tetl. Maski oksekan ialtepe noso israelita, moneki mikis porque okiuijuikalti Tokayotlʼ”.

17 “Tla ikaj kimiktia se persona, noijki moneki mikis. 18 Tla ikaj kikojkoua uan kimiktia se yolkatl mansojtsin, moneki kitekopilis. Ijkon mopatkayotis yolkatl tlen omiki. 19 Tla se tlakatl kikojkoua ikni, noijki moneki nankitoktiskej* tlen ye okitetokti.* 20 Tla ikaj kiposteki ikaj iomio noijki makipostekilikan iomio. Tla ikaj teixtololokopina noijki makixtololokopinakan. Tla ikaj tetlantepeua* noijki makitlantepeuakan.* Moneki nankitoktiskej ijkon ken ye okitetokti. 21 Akin kikojkos uan kimiktis se yolkatl, moneki kitekopilis. Pero akin kikojkos uan kimiktis se persona, moneki mikisʼ”.

22 “San se tlanauatil para israelitas uan para akinmej uitsej itech okse altepetl, porque ne niJehová namoDiosʼ”.

23 Ijkuakon Moisés omotlapoui inuan israelitas uan yejuan okikixtijkej akin okiuijuikalti itoka toTajtsin Dios uan okimojmotlakej ika tetl. Israelitas okichijkej ijkon ken Jehová okinauati Moisés.

25 Jehová oksepa omotlapoui iuan Moisés itech tepetl Sinaí uan okilui: 2 “Xikinmilui israelitas: ‘Ijkuak nanmajsitiuij tlali tlen ne namechmakas, nankiseuiskej tlali porque yetos sábado para Jehová. 3 Chikuase xiuitl titlatokas ipan motlal, tikinmaximas uvajkojmej tlen tikinpias uan tikololos tlen tlakis.* 4 Pero ijkuak ajsis xiuitl chikome, moneki yetos se sábado para nankiseuiskej tlali, se sábado para Jehová. Amo moneki titlatokas ipan motlal nion tikinmaximas uvajkojmej tlen tikinpias. 5 Ijkuak titlaololos uan ipan tlali uetsis semilla, amo moneki tikololos tlen iselti moskaltis nion tiktekis uvas tlen tlakis itech uvajkouitl tlen amo tikmaximas. Tlali moneki moseuis se xiuitl. 6 Pero itech non sábado, namejuan uelis nankikuaskej tlen tlakis ipan tlali. Uelis te tikkuas uan noijki kikuaskej motlakeualuan, siuamej tlen mitspaleuiaj, akin otiktlakej uan tiktlaxtlauia uan akin uits itech okse altepetl tlen mouan chanti. 7 Yolkamej mansojtsitsintin uan yolkamej amo mansojtsitsintin tlen katej itech motlal noijki uelis kikuaskej. Nochi tlen tlakis ipan tlali uelis nankikuaskej’”.

8 “‘Tikinpouas chikome xiuitl tlen yetoskej sábados, chikome uelta chikome xiuitl uan ik nochi tikinpouas cuarenta y nueve xiuitl. 9 Chikauak tikpitsas kuakouitl itech metstli chikome, tonal majtlaktli. Ijkuak kintemakaj yolkamej para makintlapojpoluikan, namejuan moneki nankitaskej kuakouitl mamokaki itech nochi altepetl. 10 Moneki nankichiuaskej mayeto santo xiuitl 50 uan moijtos momakixtiaj nochtin akinmej chantiskej itech non tlali. Yetos se Jubileo para namejuan, ijkuakon oksepa namechkopiliskej tlen namoaxka uan nanmokopaskej iuan namofamilia. 11 Xiuitl 50 yetos se Jubileo para namejuan. Amo nantlatokaskej nion nankololoskej tlen iselti moskaltis ijkuak uetsis semilla. Noijki amo nankitekiskej uvas itech uvajkojmej tlen amo nankinmaximaskej. 12 Porque se Jubileo. Namejuan moneki nankitaskej santo. San uelis nankikuaskej tlen san iselti moskaltis ipan tlali’”.

13 “‘Itech non xiuitl tlen mochiuas Jubileo, moneki oksepa nankiseliskej tlen namoaxka. 14 Tla itlaj nankinemakiltiaj noso nankikouiliaj namokni, amo ximotlachtekikan. 15 Tla ikaj kikouilis ikni itlal, moneki kitas keski xiuitl yopanok desde ijkuak omochi Jubileo. Uan akin tlanemakas moneki kitas ok keski xiuitl tlaololoskej. 16 Tla ok miak xiuitl tlaololoskej, ye uelis okachi patio kinemakas tlali. Pero tla ayakmo miak xiuitl tlaololoskej, ye moneki kitemouis ipati, porque ye kinemakatok ok keski uelta tlaololoskej. 17 Namejuan amo moneki nankitlachtekiliskej namokni uan moneki sapanoua nankitlakaitaskej* namoDios, porque ne niJehová namoDios. 18 Namejuan kuali nanchantiskej itech tlali tla nankintlakamatij* notlanauatiluan tlen onikintlali uan tlen onikijto mamochiua. 19 Tlamochiuas ipan tlali uan namejuan nantlakuaskej hasta nanmixuiskej* uan kuali ipan nanchantiskej’”.

20 “‘Pero tla namejuan nankijtoskej: “Tla amo uelis titlatokaskej nion tikololoskej tlen tiktokaskej, ¿tlen tikkuaskej xiuitl chikome?”, 21 xikilnamikikan ne namechteochiuas itech xiuitl chikuase uan ipan tlali kuali tlamochiuas uan namechajxilis eyi xiuitl. 22 Itech xiuitl chikueyi nantlatokaskej uan hasta xiuitl chiknaui nankikuaskej tlen nankololoskej. Hasta ijkuak oksepa nantlaololoskej, namejuan nankikuaskej tlen achto nankololoskej’”.

23 “‘Tlali amo moneki monemakas para ikaj makimoaxkati, porque tlali noaxka. Ne namechita ken oksekan namoaltepe uan san nikan onanchantikoj. 24 Namejuan moneki nankitekauiliskej oksepa makikouakan tlali tlen namoaxka’”.

25 “‘Tla mokni ayakmo itlaj kipia uan moneki kinemakas seki itlal, se ifamiliar moneki yas uan oksepa kikouas tlen ye okinemakak. 26 Tla ikaj amo kipia se ifamiliar akin uelis oksepa kikouas itlal, pero satepan kipia miak tomin uan yikipia tlen ika uelis kikouas tlali tlen okinemakak, 27 moneki kitas keski xiuitl yopanok desde ijkuak okinemakak tlali, ijkon kimatis kech ok kimakas tlakatl akin okinemakilti tlali. Uan ye uelis oksepa kipias itlalʼ”.

28 “‘Pero tla amo kipia tlen ika oksepa kikouas itlal, akin okikouili kimokauis itlal hasta maajsi xiuitl ijkuak mochiuas Jubileo. Ijkuak mochiuas Jubileo oksepa kimakaskej tlen okinemakak’”.

29 “‘Tla se tlakatl kinemakas ikal tlen yetos itech se altepetl tlen kiyaualojtos tepamitl, desde ijkuak ye kinemakas kipias nochi se xiuitl para uelis oksepa kikokuas. Kipias se xiuitl para uelis oksepa kikouas ikal. 30 Pero tla kali tlen yetos itech se altepetl tlen kiyaualojtos tepamitl, amo kikouaj ijkuak yomoajxiti se xiuitl, akin okiko kali kimokauis uan yetos iaxka hasta ijkuak nestiaskej* ikoneuan. Amo moneki kitekopilis kali ijkuak mochiuas Jubileo. 31 Pero kalmej tlen katej kanin amo tlayaualoua tepamitl, pouij iuan tlali. Ikinon uelis oksepa kinkouaskej uan moneki kintekopiliskej ijkuak ajsis Jubileo’”.

32 “‘Pero levitas tlen kinpia inkaluan itech altepemej, uelis oksepa kinkouaskej inkaluan ijkuak yejuan kinekiskej. 33 Pero tla se levita amo oksepa kikoua ikal, ijkuak ajsis Jubileo oksepa kikopiliskej ikal tlen okinemakak itech namoaltepeuan. Porque inkaluan levitas tlen yetoskej itech namoaltepeuan, yejuan inmiaxkauan. 34 Tlalmej kanin tlasakayo* tlen kiyaualouaj namoaltepeuan, amo moneki nankinnemakaskej porque nochipa yetoskej namoaxkauan’”.

35 “‘Tla se mokni tlen kajki monauak ayakmo kipia tomin uan ayakmo kipia tlen ika mopanoltis, xikmaka tlen ika mopanoltis ijkon ken tikpaleuiskia akin uits itech okse altepetl noso akin ochantiko moaltepe, ijkon mokni ok mouan yoltos. 36 Amo xikilui mokni okachi miak mamitstlaxtlaui nion amo xikpaleui san para itlaj tiktlanis. Sapanoua xiktlakaita* moDios, uan mokni ok mouan yoltos. 37 Amo xiktlaneti tomin para okachi tiktlajtlanilis mamitskopili nion xiktlamaka san para itlaj tiktlanis. 38 Ne niJehová namoDios, akin onamechkixti Egipto para namechmaktilis tlali Canaán uan niyetos namoDiosʼ”.

39 “‘Tla se mokni tlen monauak chanti ayakmo kipia tomin uan mitsmonemakiltia, amo moneki tikchiualtis matekipano ken se tlakeuali. 40 Moneki tikitas ken se tlakeuali tlen kitlaxtlauiaj, ken ikaj tlen ochantiko moaltepe. Moneki mitspaleuijtos hasta xiuitl ijkuak mochiuas Jubileo. 41 Ijkuakon ayakmo mitspaleuis. Ye uan ikoneuan mokopaskej iuan infamilia uan oksepa kikopiliskej intlal iuejkatatajuan. 42 Yejuan notlakeualuan tlen onikinkixti Egipto. Ikinon amo moneki monemakaskej ijkon ken monemaka se tlakeuali. 43 Amo xiktlajyouilti uan sapanoua xiktlakaita moDios. 44 Motlakeualuan uan siuamej tlen mitspaleuiskej ualaskej de altepemej tlen ik ompa yetoskej. Itech nonmej altepemej uelis tikinkouas tlakeualmej uan siuamej tlen mitspaleuiskej. 45 Uelis nankinkouaskej inkoneuan akinmej namouan chantikiuij para mayetokan namotlakeualuan. Noijki uelis nankinkouaskej tlakeualmej tlen pouiskej itech infamilias tlen nestiaskej namotlal, uan ijkon yejuan yetoskej namoaxkauan. 46 Ijkuak nanmikiskej uelis nankinkajteuiliskej namokoneuan, yejuan yetoskej intlakeualuan namokoneuan uan uelis kintekipanoltiskej. Pero amo xikintlajyouiltikan namokniuan israelitasʼ”.

47 “‘Tla akin uits itech okse altepetl noso akin ochantiko moaltepe kimiakilia itomin, uan mokni tlen kajki inauak ayakmo kipia tomin uan kimonemakiltia noso monemaka inauak se ifamiliar, 48 maski omonemakak uelis oksepa kikouaskej. Se ikni uelis oksepa kikouas. 49 Noijki uelis kikouas itío, itelpoch itío noso se ifamiliar, se akin poui itech ifamilia uelis kikouas’”.

“‘Ye noijki uelis oksepa mokouas tla satepan kipia miak tomin. 50 Ye uan akin okiko kitaskej keski xiuitl yopanok desde ijkuak omonemakak hasta ijkuak ajsis xiuitl ijkuak mochiuas Jubileo uan noijki kitaskej kech ik omonemakak, ijkon kitaskej kech moneki kitlaxtlauas. Kitaskej kech kitlani akin kitlakeuaj uan ijkon kitaskej kech ipati iteki nochi non xiuitl. 51 Tla ok poliui miak xiuitl, ye moneki kitlaxtlauas nochi xiuitl tlen ok poliui para mokouas. 52 Pero tla ayakmo miak poliui para ajsis xiuitl ijkuak mochiuas Jubileo, moneki kitas keski xiuitl poliui uan ijkon kimatis kech kitlaxtlauas para mokouas. 53 Ye moneki sejse xiuitl kitekichiuilis akin okiko ken se tlakeuali tlen kitlaxtlauiaj uan te moneki tikitas amo makitlajyouiltikan. 54 Pero tla ye amo uelis mokouas porque amo uelis kichiuas tlen yomoijto, ye uan ikoneuan kinkauiliskej mayakan ijkuak ajsis xiuitl ijkuak mochiuas Jubileo’”.

55 “‘Porque israelitas notlakeualuan. Yejuan notlakeualuan tlen onikinkixti Egipto. Ne niJehová namoDios’”.

26 “‘Amo xikinmochiuilikan dioses tlen amitlaj inpati, amo xikketsaltikan se imagen para namejuan, nion se tlaketsali para nankiueyichiuaskej. Noijki amo xiktlalikan itech namotlal se imagen de tetl* para ixpan nanmotlankuaketsaskej, porque ne niJehová namoDios. 2 Moneki nankitlakaitaskej nosábados uan sapanoua nankitlakaitaskej kanin nechueyichiuaj. Ne niJehová’”.

3 “‘Tla nanmoyekanaj ika tlanauatilmej tlen onikintlali uan tla nankichiuaj uan nankitlakamatij* notlanauatiluan, 4 ne nikchiuas makiaui ijkuak monekis, ipan tlali tlamochiuas uan kojmej tlen yetoskej tlala kitemakaskej intlakilo. 5 Nankichipajtoskej semilla hasta ijkuak nankitekiskej uvas, uan nankitektoskej uvas hasta ijkuak nantlatokaskej. Nankikuaskej pan hasta nanmixuiskej* uan kuali nanyetoskej itech namotlal. 6 Nikchiuas altepetl makipia yolseuilis, nankochiskej uan amikaj namechmomojtis. Nikchiuas itech altepetl ayakmo mayetokan tekuanimej uan amikaj namechixnamikitij ika espada. 7 Namejuan nankintemojtinemiskej akinmej namechkokoliaj uan namoixpan mikiskej ika espada. 8 Nanmakuiltin nankintemojtinemiskej cien uan cien de namejuan kintemojtinemiskej diez mil uan namoixpan mikiskej ika espada akinmej namechkokoliaj’”.

9 “‘Ne namechititis namechselia, nikchiuas xikinpiakan miakej namokoneuan uan ximomiakilikan. Ne nikchiuas tlen namouan yonimoka. 10 Ijkuak ok nankikuajtoskej tlen nankololoskej se xiuitl achto, monekis nankikixtiskej para nankikalakiskej tlen yankuik nankololoskej. 11 Ne niktlalis tabernáculo namotlajkotia uan amo namechixtopeuas. 12 Ne namouan ninemis uan niyetos namoDios uan namejuan nanyetoskej noaltepe. 13 Ne niJehová namoDios, ne onamechkixti tlali Egipto para ayakmo xiyetokan intlakeualuan. Noijki onikpostek namoko* uan onikchi ximoixketsakanʼ”.

14 “‘Pero tla namejuan amo nantechkakij uan amo nankintlakamatij* nochi notlanauatiluan tlen yonikinmijto, 15 tla namejuan nankinmixtopeuaj tlanauatilmej tlen onikintlali, amo nankitlakamatij nochi notlanauatiluan porque amo nankipatioitaj tlen yonikijto mamochiua uan amo nankichiuaj tlen yotimokajkej, 16 ne namechtlajyouiltis ika nin tlamantli: nikchiuas san ximotekipachojtokan, namechajsis tuberculosis uan nankipiaskej miak totonik, non kichiuas ayakmo kuali xitlachiakan uan xisotlauakan. San nenka nantlatokaskej porque akinmej namechkokoliaj kikuaskej tlen tlakis.* 17 Ne namouan nikualanis uan akinmej namechkokoliaj namechtlaniliskej. Akinmej namechtlauelitaj namopan tlajtlaksaskej* uan namejuan nancholoskej maski amikaj namechtemojtosʼ”.

18 “‘Pero tla maski ijkon namechpanoua namejuan amo nantechkakij, chikome uelta okachi namechtlajyouiltis por namotlajtlakol. 19 Ne nikchiuas ayakmo ximoueyinekikan, nikchiuas iluikak mayeto ken tepostli uan tlaltikpak mayeto ken cobre. 20 San nenka nanmochijchikauaskej porque ipan tlali amo tlamochiuas uan kojmej tlen yetoskej tlala amo kitemakaskej intlakiloʼ”.

21 “‘Pero tla ok nantechixnamikij uan amo nankinekij nantechkakiskej, ne namechtlajyouiltis chikome uelta okachi por namotlajtlakol. 22 Namechintitlanilis yolkamej amo mansojtsitsintin tlen katej tlala para makintlamikan namokoneuan, namoyolkauan mansojtsitsintin uan kichiuaskej ayakmo miakej xiyetokan, uan ik kanin nanpanouaj ayakmo ikaj panosʼ”.

23 “‘Pero tla maski ijkon namechpanos namejuan amo nankinekiskej manamechyektlali uan ok nantechixnamikiskej, 24 ne namouan nikualanis uan namechtlajyouiltis chikome uelta okachi por namotlajtlakol. 25 Nikchiuas akinmej namechkokoliaj mamomakopakan ika espada, ijkon namechtlajyouiltis porque amo onankichijkej tlen otimokajkej. Nikchiuas ximokokokan tla nanmotlatiaj itech namoaltepeuan uan namechtemaktiskej inmak akinmej namechkokoliaj. 26 Ijkuak ne nikchiuas matlami pan tlen nankitlatijtoskej, majtlaktli siuamej uelis kikxitiskej namopan san ijtik se horno uan kitamachiuaskej para kixexeloskej. Namejuan nantlakuaskej pero amo nanmixuiskejʼ”.

27 “‘Pero tla maski ijkon namechpanos namejuan amo nantechkakij uan ok nantechixnamikij, 28 ne okachi namouan nikualanis uan monekis namechtlajyouiltis chikome uelta okachi por namotlajtlakol. 29 Uan monekis nankinkuaskej namokoneuan. 30 Nikxixinis kanin nantlaueyichiuaj,* nikintlamotlas altares kanin nankitemakaj kopali uan ijkuak nanmikiskej namechtlamotlas inpan namoimágenes tetlajyaltijkej.* Uan ayakmo namouan niyetos porque nantechtlajyaltiskej. 31 Nikinpojpolos namoaltepeuan uan kanin nantlaueyichiuaj uan amo nikinajuiakmatis namotetliokoliluan. 32 Nikchiuas ayakmo itlaj mamokaua itech namoaltepe uan akinmej namechkokoliaj tlen ompa chantiskej motlajtlachialtiskej. 33 Ne nikchiuas xiakan itech okseki altepemej uan nikchiuas akinmej namechkokoliaj manamechixnamikikan ika espada, ayakmo itlaj mokauas ipan namotlal uan kinxixiniskej namoaltepeuanʼ”.

34 “‘Tlali moseuis sábados ijkuak amikaj ompa chantis, ijkuak namejuan nanyetoskej itech intlal akinmej namechkokoliaj. Ijkuakon tlali moseuis porque moneki kitlaxtlauas sábados. 35 Tlali moseuis ijkuak amikaj ompa chantis porque amo omoseui itech namosábados ijkuak ompa onanchantiayajʼ”.

36 “‘Akinmej momakixtiskej nikchiuas san mamotekipachojtokan itech intlal akinmej kinkokoliaj. Choloskej ijkuak kikakiskej ejekatl kolinia xiuitl. Choloskej ijkon ken akin kinekij kimiktiskej ika espada uan uetsiskej maski amikaj kintemoua. 37 San yejuan mokxitlanuiskej* ken akinmej cholouaj porque kinekij kinmiktiskej ika espada, ijkon kichiuaskej maski amikaj kintemojtinemis. Amo uelis kintlaniliskej akinmej kinkokoliaj. 38 Nanmikiskej itech okseki altepemej uan namechtlajtlamis intlal akinmej namechkokoliaj. 39 Akinmej ok nanmokauaskej, nanpalaniskej itech intlal akinmej namechkokoliaj, ijkon namechpanos por namotlajtlakol. Nanpalaniskej porque namopapanuan otlajtlakolchijkej. 40 Ijkuakon kimokuitiskej tlen amo kuali okichijkej. Noijki kimokuitiskej inpapanuan otlakajkayajkej uan okichijkej tlen amo kuali. Uan kijtoskej onechkajkej porque onechixnamikej. 41 Ijkuakon inuan nikualanis uan nikinuikas itech intlal akinmej kinkokoliajʼ”.

“‘Xamo yamanias inyolo tlakuauak uan kitlaxtlauaskej tlen amo kuali okichijkej. 42 Ne nikilnamikis tlen onimoka nikchiuas iuan Jacob, Isaac uan Abrahán. Noijki nikilnamikis tlali. 43 Ijkuak yejuan amo yetoskej ipan tlali, motlaxtlajtoskej sábados uan yetos iselti porque yejuan amo ompa yetoskej. Yejuan kitlaxtlajtoskej tlen amo kuali okichijkej porque okinmixtopejkej tlanauatilmej tlen onikintlali uan amo okipatioitakej tlen onikijto mamochiua. 44 Pero maski ijkon panos uan yetoskej itech intlal akinmej kinkokoliaj, amo nochipa nikinmixtopejtos nion inuan nikualantos hasta nikinpojpolos. Porque tla ijkon nikchiuas ayakmo mochiuas tlen inuan onimoka, porque ne niJehová inDios. 45 Para yejuan kuali mayetokan, nikilnamikis tlen onimoka inuan inuejkatatajuan, inmixpan okseki altepemej ne onikinkixtij Egipto para niyetos inDios. Ne niJehováʼ”.

46 Ompa itech tepetl Sinaí, Jehová okimakak Moisés nonmej itlanauatiluan uan tlen okinekiaya makichiuakan israelitas.

27 Jehová oksepa omotlapoui iuan Moisés uan okilui: 2 “Ximotlapoui inuan israelitas uan xikinmilui: ‘Tla se israelita kijtos kitlaxtlauilis Jehová ipati ikaj para ijkon kichiuas tlen yomoka, nin moneki kitlaxtlauas: 3 Tla motlaxtlauas se tlakatl tlen kipias kanaj 20 a 60 xiuitl, motemakas kanaj tlajko kilo* plata tlen motamachiuas ika tetl* tlen ika tlatamachiuaj kanin santo. 4 Pero tla motlaxtlauas se siuatl, motemakas kanaj 300 gramos* plata. 5 Tla ikaj kipia kanaj makuili hasta veinte xiuitl, tla tlakatl motlaxtlauas kanaj doscientos gramos* plata pero tla siuatl, motlaxtlauas kanaj cien gramos* plata. 6 Tla kipia kanaj se metstli hasta makuili xiuitl, motlaxtlauas kanaj cincuenta gramos* plata tla chokotsin, uan tla takotsin motlaxtlauas kanaj treinta gramos* plata’”.

7 “‘Tla kipia 60 xiuitl noso okachi, motemakas kanaj 170 gramos* plata para motlaxtlauas tlakatl uan tla siuatl, motlaxtlauas kanaj 100 gramos plata. 8 Pero tla akin yomoka itlaj kichiuas amo kipia para kitlaxtlauas tlen moneki, ye kitati teopixki uan teopixki kijtos kech moneki kitlaxtlauas. Teopixki moneki kitas kech uelis kitlaxtlauas akin omoka itlaj kichiuas uan ijkon kiluis kech motlaxtlauas’”.

9 “‘Tla ikaj mokaua kimakas Jehová se yolkatl chipauak, nochi tlen kimakaskej Jehová mochiuas santo. 10 Amo uelis kipatkayotiskej, noijki amo uelis kipatkayotiskej se yolkatl tlen kuali, ika se yolkatl tlen amo kuali nion kipatkayotiskej se yolkatl tlen amo kuali, ika se yolkatl tlen kuali. Pero tla ikaj kinekis kipatkayotis yolkatl, yolkatl tlen achto okitemakak uan yolkatl tlen ika okinekiaya kipatkayotis, yetoskej iaxkauan Dios. 11 Tla yolkatl amo chipauak uan amo uelis kitliokoliskej Jehová, kiuikiliskej teopixki. 12 Teopixki kitas kox kuali yolkatl noso amo uan ijkon kijtos kech ipati. Ipati yolkatl yetos tlen kijtos teopixki. 13 Pero tla akin omoka kitemakas yolkatl, kineki oksepa kikouas, moneki kitlaxtlauas ipati uan kajxitilis ok makuili parte’”.

14 “‘Tla ikaj kichiua ikal mayeto santo uan kitemaka ken itlaj santo para Jehová, teopixki kitas kox kuali kajki noso amo uan ijkon kijtos kech ipati. Ipati kali yetos tlen kijtos teopixki. 15 Pero tla akin okitemakak ikal, kineki oksepa kikouas, moneki kitlaxtlauas ipati uan kajxitilis ok makuili parte uan ijkon kali oksepa yetos iaxka’”.

16 “‘Tla ikaj kimaka Jehová seki itlal ken itlaj santo, moneki kitaskej tlen tanto semilla uelis kitokaskej ipan non tlali uan ijkon kimatiskej kech ipati tlali. Sejse tlatamachiuali tlen kipias 220 litros* cebada ipati kanaj tlajko kilo plata. 17 Tla kitemakaj tlali ken itlaj santo itech xiuitl ijkuak mochiua Jubileo, ipati tlali amo mopatla. 18 Pero tla motemaka tlali ken itlaj santo ijkuak yopanok Jubileo, teopixki kitas keski xiuitl poliui para oksepa mochiuas Jubileo, ijkon kitlalilis ipati tlali uan ayakmo patio yetos. 19 Tla se tonal akin okitemakak tlali ken itlaj santo, kineki oksepa kikouas, moneki kitlaxtlauas ipati uan kajxitilis ok makuili parte tlen ipati uan ijkon tlali oksepa yetos iaxka. 20 Pero tla ye amo oksepa kikoua tlali uan tlali monemaka, ye ayakmo uelis oksepa kikouas. 21 Ijkuak ajsis Jubileo uan kitekopiliskej tlali, mochiuas itlaj santo para Jehová uan moxelos para itlaj santo. Non yetos inmiaxka teopixkej’”.

22 “‘Tla ikaj kimaka Jehová ken itlaj santo se tlali tlen okiko, tlen amo ye okikajteuilijkej, 23 teopixki kitas keski xiuitl poliui para mochiuas Jubileo, ijkon kitas kech ipati tlali uan non tonal ye kitlaxtlauas tlen kiluiskej. Non itlaj santo para Jehová. 24 Ijkuak ajsis xiuitl ijkuak mochiuas Jubileo, kikopiliskej tlali akin ye okikouili, akin iaxka tlali’”.

25 “‘Nochi moneki motamachiuas ika tetl tlen ika tlatamachiuaj kanin santo. Tetl tlen ika tlatamachiuaj moneki kipias kanaj 11 gramos uan tlajko’”.*

26 “‘Pero amikaj moneki kitemakas ken itlaj santo yolkatl tlen achto nesis,* porque ijkuak nesi* yiiaxka Jehová. Iaxka Jehová maski nesis se toro noso se ichka.* 27 Pero tla motemaka se yolkatl tlen amo chipauak uan akin okitemakak kitlaxtlaua tlen ipati yolkatl, ye moneki kajxitis ok makuili parte tlen ipati. Pero tla amo oksepa kikoua yolkatl, kinemakaskej ijkon ken ipati’”.

28 “‘Amo uelis monemakas nion oksepa mokouas tlen omoxelo para itlaj santo, tlen ikaj okipiaya uan okichi mayeto santo para Jehová, uelis yetos se persona, se yolkatl noso itlal. Nochi tlen moxelos yetos sapanoua santo para Jehová. 29 Amo uelis kimakixtiskej akin yokijtojkej mamiki uan yokixelojkej para ijkon makipano. Moneki mikisʼ”.

30 “‘Tlen mochiuas ipan tlali uan intlakilo kojmej, se majtlaktli parte iaxka Jehová. Non santo para Jehová. 31 Tla ikaj kinekis kikouas se majtlaktli parte tlen yokitemakak, moneki kajxitilis ok makuili parte. 32 Ijkuak motemakaskej toros, vacas, ichkamej uan tentsomej ken se majtlaktli parte, yolkatl majtlaktli tlen panos ik itlampa itlako tlajpixki, yetos itlaj santo para Jehová. 33 Amo moneki kitaskej kox yolkatl kuali noso amo kuali uan amo moneki kipatlaskej. Pero tla ikaj kinekis kipatkayotis yolkatl, yolkatl tlen achto okitemakak uan yolkatl tlen ika okinekiaya kipatkayotis, yetoskej iaxkauan Dios. Amo uelis oksepa kikouaskej’”.

34 Jehová okimakak Moisés nonmej tlanauatilmej para israelitas itech tepetl Sinaí.