DEUTERONOMIO

1 Nin tlen Moisés okilui altepetl Israel ik kanin kajki aueyatl* Jordán, kanin tlauaki. Ompa kanin tlauaki iyekapan Suf, ik kanin kajki Parán, Tófel, Labán, Hazerot uan Dizahab. 2 Tla ikaj kineki yas de Horeb hasta Cadés-Barnea, uejkauas 11 tonalmej tla yas ik ojtli tlen kajki tepetl Seír. 3 Itech xiuitl cuarenta, metstli once,* tonal se, Moisés okinmilui israelitas nochi tlen Jehová okinauati makinmilui. 4 Non opanok satepan ijkuak ye okitlanili Sehón, intekiua amorreos tlen ochantiaya Hesbón uan noijki satepan ijkuak okitlanili Og, tekiua de Basán, ye ochantiaya Astarot ompa Edréi. 5 Ik kanin kajki aueyatl Jordán, ompa Moab, Moisés opejki kiyekijtoua Tlanauatil uan okijto:

6 “ToTajtsin Dios Jehová otechilui ompa Horeb: ‘Namejuan yonanuejkajkej ik nikan kanin tepeyo. 7 Ximoyektlalikan uan xiakan tepeyo kanin katej amorreos uan tlalmej tlen katej ik Arabá, kanin tepeyo, ik Sefelá, ik Négueb uan ik itempa mar, ik intlal cananeos uan ik Líbano hasta aueyatl Éufrates. 8 Namoixpan yoniktlali tlali, xiuiaj uan xikmoaxkatikan tlali tlen Jehová okijto* kinmakaskia namopapanuan, yejuan Abrahán, Isaac, Jacob uan inmixuiuan’”.

9 “Ijkuakon ne onamechilui: ‘Amo uelis san ne noselti namechuikas. 10 Jehová namoDios onamechmiakili uan axkan sapanoua nanmiakej ijkon ken sitlalimej tlen katej iluikak. 11 Jehová inDios namouejkatatajuan, manamechmiakili mil uelta okachi uan manamechteochiua ijkon ken yokijto. 12 ¿Uelis noselti namechxikos ijkuak itlaj namechpanoua uan ijkuak nankualanij? 13 Itech namotribus xikinpejpenakan sekimej tlakamej ixtlamatkej, tlen kuali mokuayejyekouaj* uan tlen kimatij kichiuaskej inteki uan ne nikintlalis manamechyekanakan’. 14 Uan namejuan onankijtojkej: ‘Kuali kajki tlen otikijto matikchiuakan’. 15 Ikinon onikinnotski akinmej okinyekanayaj tribus, tlakamej ixtlamatkej uan tlen okimatiayaj kichiuaskej inteki, yejuan onikintlali manamechyekanakan, sekimej okinyekankej mil, oksekimej cien, oksekimej cincuenta uan oksekimej majtlaktli, noijki onikintlali akinmej kinnauatiskiaj tribus”.

16 “Ijkuakon onikinnauati namojueces: ‘Ijkuak nankikakiskej namokniuan mokualaniaj, moneki nankinmixkomakaskej ken moneki. Ijkon nankichiuaskej tla mokualaniaj ome israelitas noso tla mokualania se israelita iuan akin oksekan ialtepe tlen namouan chanti. 17 Ijkuak nantlaixkomakaskej amo xitechikoitakan. Moneki nankikakiskej akin amo ueyititok uan noijki akin ueyititok. Amo xikkauilikan ikaj manamechmomojti porque san toTajtsin Dios tlaixkomaka. Tla itlaj nankitaj oui nankiyektlaliskej, moneki nantechiluiskej uan ne namechkakis’. 18 Ijkuakon onamechilui nochi tlen omonekiaya nankichiuaskej”.

19 “Satepan otikiskej Horeb uan otipanokej kanin tlauaki tlen ueyi uan temomojti, tlen namejuan onankitakej ijkuak otiayaj ik intepeyo amorreos. Otikchijkej ken Jehová toDios otechnauati uan satepan otiajsitoj Cadés-Barnea. 20 Satepan onamechilui: ‘Onanmajsikoj intepeyo amorreos, tlen Jehová toDios techmakas. 21 Jehová moDios yomitsmaktili tlali. Xitlejko, xikmoaxkati ijkon ken omitsilui Jehová inDios mouejkatatajuan. Amo ximomojti’”.

22 “Pero nochtin namejuan onantechitakoj uan onantechiluijkej: ‘Matikintitlanikan sekimej tlakamej achto makitatij tlali uan ijkuak mokopatiuij techiluiskej ik kanin moneki tiaskej uan ken motaj altepemej kanin tiajsitiuij’. 23 Ne kuali onikitak tlen onantechiluijkej ikinon onikinpejpenki 12 tlakamej, se tlakatl por sejse tribu. 24 Yejuan oyajkej uan otlejkokej tepeyo. Oajsitoj hasta barranca Escol uan oichtakatlachixkej. 25 Yejuan okonankej seki tlakilotl tlen ompa tlaki* uan otechualikilijkej uan okijtojkej: ‘Tlali tlen Jehová toDios techmakas kuali’. 26 Pero namejuan amo onankinekej nantlejkoskej uan onankixnamikej tlen otlanauati Jehová namoDios. 27 Namejuan san onantlatenejtokaj* ijtik namokaltsitsinuan* uan onankijtouayaj: ‘Jehová techkokolia ikinon otechkixti Egipto para techtemaktis inmak amorreos uan techpojpolos. 28 ¿Kanin tiauij? Tokniuan otechmomojtijkej ijkuak otechiluijkej: “Yejuan okachi chijchikauakej uan okachi uejkapantikej* amo ken tejuan. Inmialtepeuan uejueyij uan kuali tsajtsaktokej hasta iluikak* uan ompa otikinmitakej inkoneuan anaquim”’”.

29 “Ikinon onamechilui: ‘Amo xikinmimakasikan* akinmej namechkokoliaj. 30 Jehová namoDios yas namoixpan uan namopatka kinmixnamikis. Kichiuas ijkon ken namejuan onankitakej okichi ompa Egipto. 31 Kanin tlauaki Jehová namoDios onamechuikak itech ojtli hasta nikan onanmajsikoj, okichi ijkon ken se tepapa tlen kiuika ikoneʼ. 32 Pero maski ijkon opanok, namejuan amo onankineltokakej Jehová namoDios, 33 ye namoixpan oyaya para kitemos kanin nanmokauaskiaj. Youak ye omonextiaya ika tlitl uan ijkuak otlanestoka ye omonextiaya ika mixtli para namechititis ik kanin omonekiaya nanyaskej”.

34 “Ijkuak ijkon opanotoka, Jehová okikak tlen onankijtouayaj, okualanki uan okijto: 35 ‘Nion se tlakatl tlen axkan yoltok uan amo yolkuali, kitas kuali tlali tlen onikinmilui namopapanuan nikinmakaskia. 36 Pero Caleb ikone Jefuné kema kitas. Ye nikmakas uan noijki nikinmakas ikoneuan tlali kanin ye onejnenki, porque ye okitlakamatki* Jehová ika nochi iyolo. 37 (Namotlajtlakol Jehová noijki nouan okualanki uan okijto: “Te noijki amo tikalakis. 38 Josué ikone Nun tlen moixpan kajki ajsiti itech non tlali. Xikyolchikaua porque ye kichiuas altepetl Israel makimokaui tlali”). 39 Konemej tlen namejuan onankijtojkej kinuikaskiaj uan namokoneuan tlen axkan amo kimatij tlen kuali uan tlen amo kuali, ajsitiuij itech non tlali uan nikinmakas para mayeto inmiaxka. 40 Pero namejuan ximokopakan uan xiuiaj kanin tlauaki ik ojtli tlen yaui mar Rojoʼ”.

41 “Ijkuakon namejuan onantechiluijkej: ‘Otitlajtlakolchijkej ixpan Jehová. ¡Tejuan tiaskej guerra ijkon ken Jehová toDios otechnauati!’. Ikinon namejuan onanmoyektlalijkej uan onankijtojkej amo oui nantlejkoskiaj ipan tepetl. 42 Pero Jehová onechilui: ‘Xikinmilui amo mayakan guerra porque ne amo namouan niyetos. Tla nanyauij, akinmej namechkokoliaj namechtlaniliskej’. 43 Ne namouan onimotlapoui pero namejuan amo onantlakakej. Namejuan onankixnamikej tlen otlanauati Jehová uan onanmixeuijkej onantlejkokej ipan tepetl. 44 Amorreos tlen ochantiayaj itech non tepetl onamechnamikitoj uan onamechkuitlapantokakej ken kichiuaj ceraokuilimej* uan onamechxexelojkej ik Seír hasta Hormá. 45 Ikinon onanmokopatoj uan opejki nanchokaj ixpan Jehová, pero Jehová amo onamechkakili nion okikak tlen onankiluiayaj. 46 Ikinon uejkika onanchantikej Cadés”.

2 “Satepan otimokopkej uan otiajkej kanin tlauaki ik ojtli tlen yaui mar Rojo, ijkon ken Jehová onechnauati. Uejkika otikyaualojkej tepetl Seír. 2 Satepan Jehová onechilui: 3 ‘Yiuejkika nankiyaualojtokej nin tepetl, axkan xiuiaj ik norte. 4 Xiknauati altepetl: “Nanpanoskej ik intlatentli namokniuan, yejuan ixuiuan Esaú tlen chantij Seír. Yejuan namechimakasiskej* uan namejuan moneki kuali nankitaskej tlen nankichiuaskej. 5 Amo xikinmixnamikikan porque amo namechmakas intlal, amo namechmakas nion se pedazo intlal para ikaj ipan kitlalis ikxi. Porque onikmaktili Esaú tepetl Seír para mayeto iaxka. 6 Xikinkouilikan tlen nankikuaskej uan noijki xikintlaxtlauilikan atl tlen nankoniskej. 7 Porque Jehová moDios okiteochi nochi tlen yotikchi. Ye kimati nochi tlen omitspanotia nikan kanin tlauaki tlen sapanoua ueyi. Nin 40 xiuitl Jehová moDios amo keman omitska uan amitlaj omitspolo’”. 8 Ikinon otipanokej ik kanin okatkaj tokniuan tlen ixuiuan Esaú, yejuan chantij Seír. Pero amo otiajkej ik iojui Arabá nion Elat nion Ezión-Guéber”.

“Satepan oksekan otiajkej uan otinejnenkej ik ojtli tlen kajki kanin tlauaki ompa Moab. 9 Ijkuakon Jehová onechilui: ‘Amo ximokualanikan inuan akinmej chantij Moab nion inuan xikchiuakan guerra. Amo nimitsmakas intlal, porque yonikinmakak ixuiuan Lot tlali Ar. 10 (Achto ompa ochantiayaj emim, yejuan okatkaj miakej uan chijchikauakej. Noijki okatkaj uejkapantikej* ken akinmej kinmiluiaj anaquim. 11 Refaím noijki okinmitayaj ken okinmitayaj anaquim uan moabitas okintokayotiayaj emim. 12 Achto ijkon panoskia, horeos ochantiayaj Seír, pero ixuiuan Esaú okintlanilijkej, okinmiktijkej uan omokajkej kanin yejuan okatkaj. Okichijkej ijkon ken kichiuas altepetl Israel itech tlali tlen yetos inmiaxka uan tlen Jehová kinmakas). 13 Axkan xiakan uan xikpanouikan barranca Zeredʼ. Ikinon otikpanouijkej barranca Zered. 14 Otiuejkajkej 38 xiuitl desde Cadés-Barnea hasta otikpanouijkej barranca Zered, hasta ijkuak omikej nochtin tlakamej tlen ueli oyayaj guerra, opanok ijkon ken Jehová okinmilui* panoskia. 15 Ichikaualis* Jehová okinmixnamik uan otechinmachiuilijtiaj* hasta ijkuak nochtin omikej”.

16 “Ijkuak omikej nochtin tlakamej tlen ueli oyayaj guerra tlen okatkaj itech altepetl, san niman 17 Jehová oksepa nouan omotlapoui uan onechilui: 18 ‘Axkan tipanos ik Moab tlen noijki kiluiaj Ar. 19 Ijkuak tiajsis ik kanin katej ammonitas amitlaj xikintokti* nion xikinpepeualti. Amo nimitsmakas nion se pedazo intlal ammonitas porque yonikinmakak ixuiuan Lot. 20 Non tlali noijki okixmatiayaj ken intlal refaím. (Refaím achto ompa ochantiayaj uan ammonitas okinmiluiayaj zamzumim. 21 Yejuan okatkaj miakej uan chijchikauakej. Noijki okatkaj uejkapantikej ken akinmej kinmiluiaj anaquim pero Jehová okinpojpolo inmixpan ammonitas uan yejuan okinkixtijkej uan omokajkej kanin yejuan okatkaj. 22 Ijkon okichi para kinpaleuis ixuiuan Esaú tlen axkan chantij Seír, ye inmixpan okinpojpolo horeos ijkon yejuan uelis kinkixtiliskiaj intlal uan hasta axkan ompa chantij. 23 Avim ochantiayaj itech altepemej tlen oajsiayaj hasta Gaza. Pero akinmej okinmiluiayaj caftorim okiskej desde Caftor,* okinpojpolojkej uan omokajkej kanin yejuan okatkaj)’”.

24 “‘Ximoyektlali uan xikpanoui ibarranca Arnón. Yonimitsmaktili amorreo tlen itoka Sehón tekiua de Hesbón. Xikmoaxkatijti itlal uan iuan xikchiua guerra. 25 Desde axkan ijkuak nochi altepemej tlen katej itlampa iluikak kikakiskej tlen otikchi, nikchiuas mamomojtikan miak uan mamitsimakasikan.* Tikchiuas mamotekipachokan uan mauiuiokakan’”.

26 “Satepan desde kanin tlauaki Quedemot, onitlatitlanki makiluitij tekiua Sehón de Hesbón nin tlamantli para matimoyolseuijtokan: 27 ‘Techkauili matikpanouikan motlal. Tiaskej ipan ojtli uan amo tiaskej ik toyekma nion ik toopochma. 28 Tikkuaskej uan tikoniskej san tlen technemakiltis. San techkauili matipanokan, 29 ijkon ken otechkauilijkej ixuiuan Esaú tlen chantij Seír uan moabitas tlen chantij Ar. Techkauili matipanokan hasta matikpanouikan aueyatl* Jordán uan matiajsitij tlali tlen Jehová toDios techmakas’. 30 Pero tekiua Sehón de Hesbón amo otechkauili matipanokan, porque Jehová namoDios okitekauili mayoltlakuaua uan ayakmo matlakaki para namechmaktilis ijkon ken yonankitakej”.

31 “Satepan Jehová onechilui: ‘Yopejki nimitsmaktilia Sehón uan itlaluan, yixikmoaxkati itlal’. 32 Ijkuak Sehón okiski iuan nochi ialtepe para techixnamikis ompa Jáhaz, 33 Jehová toDios otechmaktili ikinon otiktlanilijkej ye, ikoneuan uan nochi ialtepe. 34 Ijkuakon otikinmoaxkatijkej uan otikinxixinijkej ialtepeuan, noijki otikinmiktijkej tlakamej, siuamej uan konemej. Amikaj otikkauilijkej mayolto. 35 San otikinmokauijkej yolkamej uan tlen okatka itech altepemej tlen otikinmoaxkatijkej. 36 Otikinmoaxkatijkej altepemej tlen okatkaj desde Aroer tlen kajki itempa ibarranca Arnón hasta Galaad (noijki otikmoaxkatijkej altepetl tlen kajki barranca). Jehová toDios nochtin otechinmaktili. 37 Pero amo onanyajkej intlal ammonitas, nion itempa barranca Jaboc, nion itech altepemej tlen katej kanin tepeyo, nion kanin Jehová toDios okijto amo xiakan”.

3 “Satepan otitlejkokej ik ojtli tlen ajsi Basán. Pero Og tekiua de Basán, otechixnamikito ompa Edréi inuan nochtin isoldados. 2 Ikinon Jehová onechilui: ‘Amo xikimakasi* porque nimitsmaktilis uan noijki nimitsinmaktilis nochtin isoldados uan itlal. Tiktoktis* tlen otiktokti* Sehón intekiua amorreos akin ochantiaya Hesbón’. 3 Jehová toDios otechmaktili tekiua Og de Basán uan noijki isoldados, nochtin otikinmiktijkej uan amikaj otikkajkej mayolto. 4 Otikinmoaxkatijkej nochtin inmialtepeuan. Otikinkixtilijkej nochtin 60 inmialtepeuan tlen okatkaj tlali Argob, kanin otlanauatiaya tekiua Og ompa Basán. 5 Nochi nonmej altepemej kuali otsaktokaj ika tepamitl uejkapantik, puertas uan barras. Noijki okatkaj sapanoua miakej altepetsitsintin. 6 Pero nochi otikxixinijkej, ijkon ken otikinxixinijkej ialtepeuan tekiua Sehón de Hesbón. Otikinxixinijkej nochi altepemej uan otikinmiktijkej tlakamej, siuamej uan konemej tlen ompa ochantiayaj. 7 Noijki otikinmokauijkej nochtin yolkamej uan tlen okachi kuali okipiayaj itech altepemej”.

8 “Ijkuakon otikmoaxkatijkej intlal ome intekiuajkej amorreos tlen okatkaj ik aueyatl* Jordán, desde ibarranca Arnón hasta tepetl Hermón 9 (sidonios okiluiayaj non tepetl Sirión uan amorreos okiluiayaj Senir), 10 nochi altepemej tlen okatkaj tlakpak kanin tlalmelaktik, nochi Galaad uan nochi Basán hasta Salecá uan Edréi, altepemej kanin otlanauatiaya tekiua Og ompa Basán. 11 Porque Og tekiua de Basán okatka saiktlami refaím. Caja tlen ika okitokakej okatka de tepostli uan ok kajki Rabá inmialtepe ammonitas. Caja kipia kanaj naui metros ik ueyak uan ik patlauak kanaj ome metros,* okitamachijkej ijkon ken kajki tlatamachiuali. 12 Ijkuakon otikmoaxkatijkej nin tlali: tlali tlen kajki desde Aroer, inakastlan ibarranca Arnón uan tlajko tepeyo tlen kajki Galaad uan inmialtepeuan onikinmakak rubenitas uan gaditas. 13 Uan tlali tlen ok omoka Galaad uan nochi Basán kanin otlanauatiaya Og, onikmakak tlajko itribu Manasés. Nochi tlali Argob tlen kajki Basán, okixmatiayaj ken intlal refaím”.

14 “Jaír itelpoch Manasés okimokaui nochi tlali Argob hasta kanin tlami intlal guesuritas uan maacatitas uan altepetsitsintin tlen katej Basán okintokayoti Havot-Jaír,* ijkon ken ye omotokayotiaya. Uan hasta axkan ijkon motokayotiaj. 15 Makir onikmakak Galaad. 16 Rubenitas uan gaditas onikinmakak desde Galaad hasta ibarranca Arnón (itlajkotia barranca moxelojtok tlali) uan hasta Jaboc, barranca tlen kixeloua intlal ammonitas, 17 uan noijki Arabá, aueyatl Jordán uan kanin moxelojtok tlali, desde Kinéret hasta mar tlen kajki Arabá (ye mar Salado),* inmikxitlan tlalmej tlen ixtemotokej* ompa Pisgá ik kanin kisa tonaltsin”.

18 “Ijkuakon onikinnauati: ‘Jehová namoDios onamechmakak nin tlali para xikmoaxkatikan. Nochtin tlakamej yolchikauakej kinmonanaskej inteposuan uan kinyekanaskej inmikniuan israelitas. 19 San namosiuauan, namokoneuan uan miakej namoyolkauan tlen ne nikmati nankinpiaj, chantitoskej itech altepemej tlen onamechmakak 20 hasta ijkuak Jehová kinyolseuis namokniuan ijkon ken namejuan yonamechyolseui. Hasta ijkuak yejuan noijki kimoaxkatiskej tlali tlen Jehová namoDios kinmakas okse ilado aueyatl Jordán. Satepan nanmokopaskej, sejse yas kanin yonamechmakak tlali para mayeto namoaxka’”.

21 “Ijkuakon onikilui Josué: ‘Yotikitak tlen Jehová namoDios okintokti* nonmej ome tekiuajkej. Jehová noijki ijkon kintoktis* tekiuajkej tlen nankinmixnamikiskej. 22 Amo xikinmimakasikan* porque Jehová namoDios namopatka kinmixnamikis’”.

23 “Ijkuakon oniktlatlaujti Jehová uan onikilui: 24 ‘NoTeko Jehová tejuatsin tiUeyititok, yopejki tikititia motlakeual moueyitilis uan mochikaualis. ¿Kox onka se dios iluikak noso nikan tlaltikpak tlen uelis kichiuas tlamantli tetlajtlachialti ijkon ken tejuatsin tikchiua? 25 Nimitstlatlaujtia techkauili manipano uan manikita kuali tlali tlen kajki okse lado aueyatl Jordán, nin kuali tepeyo uan Líbano’. 26 Pero namotlajtlakol Jehová ok nouan okualantoka uan amo onechkak. Uan Jehová onechilui: ‘¡Ayakmo xitlajto! Ayakmo oksepa ijkon techilui. 27 Xitlejko Pisgá uan xitlachia ik kanin motlatia tonaltsin, ik norte, ik sur uan ik kanin kisa tonaltsin uan xikita tlali porque amo tikpanouis nin aueyatl Jordán. 28 Xiktlali Josué matlayekana, xikyolchikaua uan xikchikaua, porque ye kiyekanas altepetl uan kichiuas makimokaui tlali tlen te tikitas’. 29 Nochi non opanok ijkuak otichantiayaj ixtlauak tlen kajki iyekapan Bet-Peor”.

4 “Altepetl Israel, xikinkakikan tlanauatilmej uan tlen otechiluijkej matikchiuakan, xiktlakamatikan* tlen namechmachtijtok para xiyoltokan uan xikalakikan itech tlali tlen Jehová inDios namouejkatatajuan, namechmakas para xikmoaxkatikan. 2 Amitlaj xikkixtilikan nion xikajxitilikan tlen namechnauatijtok, ijkon nankintlakamatiskej* itlanauatiluan Jehová namoDios tlen ne namechinmakatok”.

3 “Namejuan onankitakej tlen okichi Jehová ijkuak sekimej okiueyichijkej Baal de Peor. Jehová namoDios okinpojpolo de namoaltepe nochtin akinmej okiueyichijkej Baal de Peor. 4 Pero nochtin namejuan amo nankikauaj Jehová namoDios uan axkan nanyoltokej. 5 Ijkon ken Jehová noDios onechnauati, yonamechmachti tlanauatilmej uan tlen moneki nankichiuaskej para xikintlakamatikan* ijkuak nanyetoskej itech tlali tlen nankimoaxkatiskej. 6 Moneki nochi nankitlakamatiskej* porque ijkon ijkuak okseki altepemej kimatiskej katej nonmej tlanauatilmej, kijtoskej namejuan namixtlamatkej uan kuali nanmokuayejyekouaj.* Yejuan kijtoskej: ‘Nin ueyi altepetl melauak ixtlamatki uan kuali mokuayejyekoua’.* 7 Porque namejuan nankimatij Jehová toDios nochipa touan kajki ijkuak tiktlatlaujtiaj. Toaltepe amo ken okseki altepemej porque indioses okseki altepemej amo inuan katej. 8 Axkan namechmakatok nochi ninmej tlanauatilmej, ¿onka okse ueyi altepetl tlen kinpia kuali tlanauatilmej uan kinmiluiaj tlen moneki kichiuaskej?”.

9 “Kuali ximomalui uan xitlachixto para amo tikilkauas tlamantli tlen yotikitak uan para nochipa tikpixtos moyolipan* ijkuak tiyoltos. Noijki moneki tikinmachtis non tlamantli mokoneuan uan moxuiuan. 10 Ijkuak otikatka ixpan Jehová moDios ompa Horeb, Jehová onechilui: ‘Xiknechiko nochi altepetl para makikakikan tlen nikijtos, ijkon momachtiskej ken sapanoua nechtlakaitaskej* ijkuak yoltoskej ipan tlali uan ijkon noijki kinmachtiskej inkoneuan’”.

11 “Ikinon namejuan onanmotokijkej uan onanmokajkej ikxitlan tepetl. Tepetl oxotlatoka uan tlitl oajsiaya hasta iluikak. Otlayouatoka, otlamixtentoka uan omixtlayouatoka. 12 Jehová opejki namechtlapouia desde itech tlitl. Onankikakiayaj tlen okijtouaya pero amitlaj onankitayaj... San onankikakiayaj ikaj otlajtouaya. 13 Ye onamechilui iacuerdo* tlen onamechnauati xiktlakamatikan, kijtosneki Majtlaktli Tlanauatilmej. Satepan okinmijkuilo ipan ome temej* melaktikej. 14 Ijkuakon Jehová onechnauati manamechmachti tlanauatilmej uan tlen ye okijto xikchiuakan, para xikintlakamatikan ijkuak nankalakiskej itech tlali tlen nankimoaxkatiskej”.

15 “Ijkuak Jehová onamechnotski desde itech tlitl ompa Horeb, namejuan amitlaj onankitakej ikinon moneki kuali nanmomaluiskej. 16 Ijkon amo nankichiuaskej se imagen tlen motas ken itlaj tlamantli uan amo nanmoijtlakoskej. Amo xikchiuakan itlaj tlen mota ken se tlakatl noso se siuatl, 17 itlaj tlen mota ken yolkamej tlen katej tlaltikpak, tlen mota ken totomej* tlen patlanij iluikak, 18 itlaj tlen mota ken yolkamej tlen motilanaj noso tlen mota ken michimej tlen katej ijtik atl. 19 Ijkuak tiajkotlachias iluikak uan tikitas tonaltsin, metstli uan sitlalimej, kijtosneki nochi tlen onka iluikak, amo xikkaua mamitsyoltilanakan, amo inmixpan ximotlankuaketsa nion xikintekichiuili. Jehová moDios okinmakak non tlamantli nochi altepemej itlampa iluikak. 20 Pero Jehová onamechpejpenki uan onamechkixti Egipto tlen okatka ken se horno kanin kipatiltiaj tepostli, ijkon namejuan nanyetoskiaj iaxkauan ijkon ken axkan”.

21 “Namotlajtlakol Jehová nouan okualanki uan okijto* amo nikpanouiskia aueyatl* Jordán nion nikalakiskia itech tlali tlen Jehová namoDios okijto namechmakas para mayeto namoaxka. 22 Ne nimikis itech nin tlali uan amo nikpanouis aueyatl Jordán. Pero namejuan nankipanouiskej uan nankimoaxkatiskej non kuali tlali. 23 Ximomaluikan para amo nankilkauaskej acuerdo tlen Jehová namoDios namouan okichi. Amo xikinmochiuilikan imágenes tlen mamotakan ken tlamantli tlen Jehová namoDios okijto amo xikchiuakan. 24 Porque Jehová moDios yetoskia ken tlitl tlen nochi kichichinoua,* se Dios tlen tlanauatia san ye makiueyichiuakan”.

25 “Tla nankinpiaskej namokoneuan, namoxuiuan uan uejkika nanchantij ipan tlaltikpak pero nankichiuaj tlen amo kuali, nankimochiuiliaj san tlen imagen uan nankichiuaj tlen amo kuali ixpan Jehová namoDios para nankixnamikiskej, 26 akinmej katej iluikak uan tlaltikpak nechkaktokej, namejuan san niman nanpojpoliuiskej itech tlali tlen nankimoaxkatiskej ijkuak nankipanouiskej aueyatl Jordán. Amo uejkika ompa nanyetoskej porque nanpojpoliuiskej. 27 Jehová namechxexelos itech altepemej uan san sekimej nanyoltoskej itech altepemej kanin Jehová namechtitlanis. 28 Ompa nankintekichiuiliskej dioses tlen kinchiuaj ika kouitl uan tetl,* dioses tlen amo uelij tlachiaj, amo tlakakij, amo tlakuaj nion tlaijnekuij”.

29 “Tikajsis Jehová moDios tla tiktemos ompa kanin tiyetos pero moneki tiktemos ika nochi moyolo uan ika nochi moyolilis.* 30 Satepan ijkuak titlajyouijtos miak uan mitspanos nochi non tlamantli, timokopas inauak Jehová moDios uan tikkakis tlen mitsiluis. 31 Porque Jehová moDios teiknomati. Ye amo mitskauas, amo mitspojpolos uan amo kilkauas acuerdo tlen okichi inuan mouejkatatajuan”.

32 “Nimitstlatlaujtia xitlatemo tlen opanok yiuejkika, desde ijkuak toTajtsin Dios okichi tlakatl ipan tlaltikpak. Xitlatemo desde kanin peua hasta kanin tlami iluikak. ¿Yopanok itlaj tetlajtlachialti ken nin tlamantli? ¿Yomokak kanaj ijkon yopanok? 33 Te yotikkak itlajtol toTajtsin Dios desde itech tlitl uan ok tiyoltok, ¿onka okse altepetl tlen noijki ijkon yokikak uan ok yoltok? 34 ¿Keman toTajtsin Dios yokimopejpenilijka se altepetl itlajkotia okse altepetl uan itlaj okiteititi, itlaj okinexti, okinchi milagros, okichi guerra, ika ima chikauak uan ueyi uan ika tlamantli temomojti? ¿Jehová moDios yokichijka tlen te otikitak mopatka okichi ompa Egipto? 35 Te omitsititijkej non tlamantli para xikmati Jehová ye akin melauak toTajtsin Dios uan amo onka okse. 36 Para mitsyektlalis omitskakiti itlajtol desde iluikak, itech tlaltikpak okichi xikita itli tlen chikauak oxotlatoka uan desde ompa otikkak tlen omitsilui”.

37 “Ye okintlasojtlak mouejkatatajuan uan okinpejpenki mokoneuan ikinon mouan oyajki ijkuak omitskixti Egipto ika ichikaualis. 38 Te yotikitak ye okinmachi* altepemej okachi uejueyij uan chijchikauakej amo ken te, para uelis mitskalakiskia itech intlal uan mitsmakaskia para mayeto moaxka. 39 Ikinon axkan moneki tikmatis Jehová ye akin melauak toTajtsin Dios ompa iluikak uan tlaltikpak, amo onka okse. Non amo xikajauilmati. 40 Moneki tikintlakamatis* itlanauatiluan uan tlen ye okijto xikchiua, tlen axkan nimitsnauatijtok. Ijkon te uan mokoneuan kuali nanyetoskej uan uejkika tichantis itech tlali tlen Jehová moDios mitsmakatok”.

41 Kanin kajki aueyatl Jordán, ik kanin kisa tonaltsin, Moisés okinxelo eyi altepemej. 42 Tla ikaj kimiktia ikni pero amo okinekiaya ijkon kichiuas uan amo okikokoliaya, ye moneki cholos itech nonmej altepemej para amo makimiktikan. 43 Achto altepetl itoka Bézer, non para rubenitas uan kajki kanin tlauaki tlakpak kanin tlalmelaktik. Okse altepetl itoka Ramot, non para gaditas uan kajki Galaad. Saiktlami altepetl itoka Golán, non para manasitas uan kajki Basán.

44 Moisés okimakak altepetl Israel nonmej tlanauatilmej. 45 Satepan ijkuak okiskej Egipto, Moisés okinmilnamikti israelitas non tlamantli, noijki okinmilui tlanauatilmej uan tlen toTajtsin Dios okinnauati makichiuakan. 46 Ijkon okinmilui ik kanin kajki aueyatl Jordán, kanin kajki ixtlauak* tlen mokaua iyekapan Bet-Peor, ompa itlal tekiua Sehón akin okinnauatiaya amorreos tlen ochantiaya Hesbón. Moisés uan israelitas okitlanilijkej satepan ijkuak okiskej Egipto. 47 Yejuan okimoaxkatijkej itlal uan noijki itlal tekiua Og de Basán, ome tekiuajkej okinnauatiayaj amorreos uan okatkaj ik aueyatl Jordán, ik kanin kisa tonaltsin, 48 desde Aroer, tlen kajki itempa ibarranca Arnón hasta tepetl Siyón, kijtosneki Hermón, 49 uan nochi Arabá, tlen kajki ik aueyatl Jordán ik kanin kisa tonaltsin hasta mar tlen kajki Arabá,* inmikxitlan tlalmej tlen ixtemotokej* ompa Pisgá.

5 Ijkuakon Moisés okinechiko nochi altepetl Israel uan okinmilui: “Altepetl Israel xikinkakikan tlanauatilmej uan tlen moneki nankichiuaskej tlen axkan namechiluijtok. Moneki nankimomachtiskej uan nankintlakamatiskej* nochi tlanauatilmej. 2 Jehová toDios touan okichi se acuerdo ompa Horeb. 3 Jehová touan okichi non acuerdo uan amo okichi inuan touejkatatajuan, okichi touan akinmej axkan nikan tikatej. 4 Itech tepetl, Jehová namouan omotlapoui desde itech tlitl. 5 Ijkuakon ne onimoka itlajkotia Jehová uan namejuan para namechiluiskia tlen Jehová okijtouaya, porque namejuan onankimakasiayaj* tlitl uan amo onantlejkokej itech tepetl. Ye okijto:

6 ‘Ne niJehová moDios, ne onimitskixti tlali Egipto kanin otikatka tlakeuali. 7 Amo keman xikinpia oksekimej dioses para techixnamikisʼ”.

8 “‘Amo xikmochiuili nion se imagen, nion se tlamantli tlen mota ken itlaj tlen kajki iluikak, ipan tlaltikpak noso tlen kajki ijtik atl. 9 Amo ximotlankuaketsa inmixpan nonmej tlamantli nion amo xikintekichiuili maski oksekimej mitsiluiskej ijkon xikchiua. Porque ne Jehová moDios, nitlanauatia san ne manechueyichiuakan. Ijkuak tepapanuan tlen nechkokoliaj kichiuaj tlen amo kuali, ne niktekauilia matlajyouikan inkoneuan, inmixuiuan uan inkoneuan inmixuiuan* por tlen yejuan okichijkej. 10 Pero sapanoua miak xiuitl nikinmititia nikintlasojtla uan amo nikinkaua inmixuiuan akinmej nechtlasojtlaj uan kintlakamatij* notlanauatiluanʼ”.

11 “‘Amo xikajauilmati itoka Jehová moDios, porque Jehová kitlajyouiltis akin kajauilmatis itoka’”.

12 “‘Ximoseui sábado para nochipa mayeto santo, ijkon ken Jehová moDios omitsnauati. 13 Tikinpia chikuase tonalmej para titekipanos uan tikchiuas nochi moteki. 14 Porque tonal chikome se sábado para Jehová moDios. Amitlaj tekitl xikchiuakan, nion te, nion motelpoch, nion mochpoch, nion motlakeual, nion siuatl tlen mitspaleuia, nion motoro, moburro nion moyolkauan mansojtsitsintin, nion akin chanti moaltepe pero oksekan ialtepe. Ijkon motlakeual uan siuatl tlen mitspaleuia uelis mouan moseuiskej. 15 Xikilnamiki te otikatka titlakeuali ompa Egipto, pero Jehová moDios omitskixti ika ichikaualis tlen tetlajtlachialti. Ikinon Jehová moDios omitsnauati ximoseui tonal sábado’”.

16 “‘Xiktlakaita mopapa uan momama, ijkon ken Jehová omitsnauati. Tla ijkon tikchiuas, uejkika tiyoltos uan kuali tiyetos ipan tlali tlen Jehová moDios mitsmakas’”.

17 “‘Amo xitemikti’”.

18 “‘Amo xiauilnemi’”.*

19 “‘Amo xitlachteki’”.

20 “‘Amo xitlakajkayaua para tiktlajyouiltis mokni’”.

21 “‘Amo xikixneki isiua mokni. Noijki amo xikixneki ikalijtik, nion itlal, nion itlakeual, nion siuatl tlen kipaleuia, nion itoro, nion iburro, nion itlaj tlen iaxka mokni’”.

22 “Itech tepetl Jehová ika chikauak itlajtol onamechmakak nonmej tlanauatilmej akinmej ompa onanmonechikojkaj, okichi desde itech tlitl, itech mixtli uan ijkuak omixtlayouatoka, uan amo ok itlaj okijto. Satepan ye okinmijkuilo ipan ome temej* melaktikej uan onechinmakak”.

23 “Pero ijkuak namejuan onankikakej onamechtlapouijtoka desde kanin otlayouatoka ijkuak tepetl oxotlatoka, nochtin akinmej okinyekanayaj tribus uan tlayekankej nonauak omotokijkej. 24 Namejuan onankijtojkej: ‘Jehová toDios toixpan omoueyitlali uan yotechititi iueyitilis, noijki yotikkakej itlajtol desde itech tlitl. Axkan yotikmatkej toTajtsin Dios ueli motlapouia iuan tlakatl uan tlakatl uelis ok yoltos. 25 Pero ok timomojtiaj timikiskej porque nin tlitl tlen chikauak xotlatok uelis techchichinos.* Timikiskej tla ok tikkaktoskej itlajtol toDios Jehová. 26 Tejuan yotikkakej desde itech tlitl itlajtol toTajtsin Dios tlen yoltok, ¿akin itech nochi tlaltikpak noijki ijkon yokikak uan axkan ok yoltok? 27 Ximotoki para tikkakis nochi tlen Jehová toDios kijtos, satepan te techiluis nochi tlen Jehová toDios mitsiluis. Tejuan titlakakiskej uan titetlakamatiskej’”.*

28 “Jehová okikak tlen namejuan onantechiluijkej uan Jehová onechilui: ‘Yonikak tlen nin altepetl omitsilui. Kuali kajki nochi tlen okijtojkej. 29 ¡Niknekiskia nochipa manechtlakaitakan* ika nochi inyolo uan makintlakamatikan* nochi notlanauatiluan! ¡Ijkon yejuan uan inkoneuan nochipa kuali yetoskej! 30 Xikinmiluiti: “Ximokopakan kanin katej namokaltsitsinuan”. 31 Pero te nouan ximokaua uan nimitsinmakas notlanauatiluan, tlen onikijto mamochiua uan tlanauatilmej tlen ne onikintlali, nochi non moneki tikinmachtis. Yejuan moneki kintlakamatiskej* ijkuak yetoskej itech tlali tlen nikinmakas para makimoaxkatikanʼ. 32 Namejuan kuali ximotlachilikan para nankichiuaskej nochi ijkon ken Jehová namoDios yonamechnauati. Amo xiuiaj ik namoyekma nion ik namoopochma. 33 Moneki nanyaskej itech nochtin ojmej tlen Jehová namoDios onamechnauati. Tla ijkon nankichiuaj, nanyoltoskej, kuali nanyetoskej uan nanuejkauaskej ipan tlali tlen nankimoaxkatiskej”.

6 “Jehová namoDios onechnauati manamechmachti nonmej tlanauatilmej, tlen okijto xikchiuakan uan tlanauatilmej tlen ye okintlali, para nankintlakamatiskej* ijkuak nanpanoskej itech tlali tlen nankimoaxkatiskej. 2 Ijkon nochipa ijkuak namejuan nanyoltoskej, namokoneuan uan namoxuiuan, sapanoua nankitlakaitaskej* namoDios Jehová uan nankintlakamatiskej itlanauatiluan uan tlen okijto xikchiuakan tlen ne namechnauatijtok, ijkon uejkika nanyoltoskej. 3 Altepetl Israel xitlakakikan uan xikintlakamatikan* nochi tlen kijtouaj tlanauatilmej. Para kuali nanyetoskej uan sapanoua nanmomiakiliskej itech tlali kanin onka miak leche uan neujtli,* ijkon ken yonamechilui Jehová inDios namouejkatatajuan”.

4 “Altepetl Israel xitlakaki, Jehová toDios ye san se Jehová. 5 Xiktlasojtla Jehová moDios ika nochi moyolo, ika nochi moyolilis* uan ika nochi mochikaualis. 6 Moneki tikinpixtos moyolipan* tlanauatilmej tlen axkan nimitsinmakatok 7 uan non moneki tikinmachtis mokoneuan, uan tikintlapouis ijkuak timotlalis mocha, ijkuak tinemis ipan ojtli, ijkuak timotekas uan ijkuak timeuas. 8 Xikinmilpi itech moma para mamitstlailnamiktikan, moneki tikinpixtos ken yetoskia ijkuilitokej moixkuak. 9 Xikinmijkuilo itech tlaketsalmej kanin mokitskijtokej ipuertas mokalijtik uan itech ipuertas moaltepe”.

10 “Ijkuak Jehová moDios mitsajxititi itech tlali tlen okinmilui* mouejkatatajuan Abrahán, Isaac uan Jacob mitsmakaskia, tlali kanin katej kuali uan uejueyij altepemej tlen te amo otikinchi, 11 kanin katej kalmej tlen kipiaj miak tlamantli kuali tlen te amo otikinmotlanili, kanin katej atekochmej tlen te amo otikinmichkuak, kanin katej uvajkojmej uan olivoskojmej tlen te amo otikintokak uan ijkuak titlakuas hasta tiixuis,* 12 ximomalui para amo tikilkauas Jehová, ye omitskixti Egipto kanin otikatka tlakeuali. 13 Moneki sapanoua tiktlakaitas* Jehová moDios, moneki tiktekichiuilis uan ijkuak tikijtos* itlaj tikchiuas, moneki tiknejnekis* itoka. 14 Amo xikinueyichiuakan oksekimej dioses, amo xikinueyichiuakan indioses altepemej tlen katej namonauak, 15 porque Jehová namoDios tlen kajki namouan, se Dios tlen tlanauatia san ye makiueyichiuakan. Tla okse nankiueyichiuaj, sapanoua nankikualaniskej Jehová namoDios uan namechpojpolos itech nochi tlaltikpak”.

16 “Amo xikyejyekokan Jehová namoDios ijkon ken onankiyejyekojkej ompa Masá. 17 Moneki nankintlakamatiskej nochi itlanauatiluan Jehová namoDios, tlen kineki xikilnamiktokan uan tlen ye namechnauatia xikchiuakan. 18 Xikchiua tlen kuali uan tlen ijtok ixpan Jehová, ijkon kuali tiyetos. Noijki tikalakis uan tikmoaxkatis kuali tlali tlen Jehová okinmilui mouejkatatajuan kinmakaskia, 19 kanin kinkixtijtias moixpan akinmej mitskokoliaj, ijkon ken Jehová yokijto”.

20 “Satepan ijkuak mokone mitstlajtlanis: ‘¿Tlen kijtosneki tlen Jehová toDios kineki xikilnamiktokan, tlen kineki xikchiuakan uan tlanauatilmej tlen ye okintlali?’, 21 te tikiluis mokone: ‘Ompa Egipto otikatkaj itlakeualuan faraón pero Jehová otechkixti ika ichikaualis. 22 Ikinon Jehová toixpan okinexti seki tlamantli, okinchi uejueyij milagros tlen okitlajyouiltijkej Egipto, faraón uan akinmej okatkaj ikalijtik. 23 Otechkixti uan nikan otechualikak para techmakas tlali tlen okinmilui touejkatatajuan kinmakaskia. 24 Ijkuakon Jehová otechnauati matikintlakamatikan* nochi itlanauatiluan uan noijki sapanoua matiktlakaitakan* toDios Jehová para nochipa kuali matiyetokan uan para matiyoltokan ijkon ken axkan. 25 Techitaskej tiyolkualmej tla tikintlakamatij nochi nonmej tlanauatilmej ixpan Jehová toDios, ijkon ken ye otechnauatiʼ”.

7 “Ijkuak Jehová moDios mitsajxititi itech tlali kanin yitikalakis para tikmoaxkatis, ye mitsinmachiuilijtias* altepemej okachi uejueyij, kinmachiuas* hititas, guirgaseos, amorreos, cananeos, perizitas, heveos uan jebuseos, nonmej chikome altepemej okachi uejueyij uan okachi chijchikauakej amo ken te. 2 Jehová moDios mitsinmaktilis uan te tikintlanilis. Moneki nochtin tikinpojpolos, amo inuan ximokaua itlaj tikchiuas nion xikinmiknomati. 3 Amo ximonamiktikan inuan akinmej ompa chantij, amo xikinnamikti mochpochuan inuan intelpochuan nion motelpochuan inuan inmichpochuan. 4 Porque yejuan kichiuaskej mokoneuan ayakmo makitekichiuilikan toTajtsin Dios uan kintekichiuiliskej oksekimej dioses. Nankikualaniskej Jehová tla ijkon nankichiuaj uan ye san niman namechpojpolos”.

5 “Amo ijkon xikchiuakan, okachi kuali xikinxixinilikan inmialtares, xikinpojpostekikan intlaketsaluan tlen kinueyichiuaj, xikintlamotlakan kojmej tlen kinueyichiuaj* uan xikinchichinilikan* imágenes tlen kinchiuaj. 6 Porque namejuan se altepetl santo para Jehová namoDios uan de nochtin altepemej tlen katej tlaltikpak, Jehová namoDios onamechpejpenki para xiyetokan ialtepe tlen kipatioita”.

7 “Jehová onamechititi namechtlasojtla uan onamechpejpenki, amo porque onankatkaj okachi nanmiakej itech okseki altepemej, namejuan amo nanmiakej amo ken okseki altepemej. 8 Onamechpejpenki porque Jehová onamechititi namechtlasojtla uan para kichiuas tlen omoka inuan namouejkatatajuan. Ikinon Jehová onamechkixti ika ichikaualis itech tlali kanin onankatkaj nantlakeualmej, onamechmakixti imak faraón akin otlanauatiaya Egipto. 9 Te kuali tikmati Jehová moDios ye akin melauak toTajtsin Dios, ye amo tekaua, maski panoua sapanoua miak xiuitl ye amo kilkaua iacuerdo tlen kichiua inuan akinmej kitlasojtlaj uan kintlakamatij* itlanauatiluan, ye nochipa kinmititia kintlasojtla uan amo kinkaua. 10 Pero akinmej kikokoliaj kinpojpolos uan ijkon kintlaxtlaualtis. San niman ye kichiuas akinmej kikokoliaj makitlaxtlauakan intlajtlakol. 11 Xikintlakamati* nochi tlanauatilmej, tlen omoijto xikchiua uan tlanauatilmej tlen okintlalijkej tlen axkan nimitsmakatok, moneki tikintlakamatis”.*

12 “Jehová namoDios amo kilkauas iacuerdo uan namechtlasojtlas uan amo namechkauas tla nankinkakij, nankintlakamatij* uan nankichiuaj tlen kijtouaj itlanauatiluan tlen okintlali, kichiuas ijkon ken okinmilui* namouejkatatajuan. 13 Ye mitstlasojtlas, mitsteochiuas uan mitsmiakilis. Mitsteochiuas itech tlali kanin okinmilui mouejkatatajuan mitsmakaskia, kichiuas xikinpia miakej mokoneuan, tlamochiuas ipan motlal, tikpias semilla, vino yankuik, aceite, movacas piluaskej uan mochkauan piluaskej. 14 Te okachi mitsteochiuaskej amo ken okseki altepemej. Nochtin akinmej yetoskej moaltepe kinpiaskej inkoneuan uan nochtin namoyolkauan piluaskej. 15 Jehová mitsachiuilis* kokolistli uan kichiuas amo ximokoko ika kokolistli temomojti tlen otikitak ompa Egipto. Ye kintitlanilis non kokolistli nochtin akinmej mitskokoliaj. 16 Moneki tikinpojpolos nochi altepemej tlen Jehová moDios mitsinmakas. Amo moneki tikinmiknomatis nion tikintekichiuilis indioses, porque non yetos se trampa para te”.

17 “Tla moyolipan* tikijtoua: ‘Ninmej altepemej okachi miakej amo ken tejuan. ¿Ken uelis nikinmachiuas?’,* 18 amo xikinmimakasi,* xikmoilnamikti tlen Jehová moDios okitokti* faraón uan nochtin akinmej ochantiayaj Egipto. 19 Xikmoilnamikti te otikitak ken okintlajyouiltijkej, tlen omoteititi, milagros uan ueyi ichikaualis Jehová moDios tlen ika omitskixti. Jehová moDios noijki ijkon kintoktis* nochi altepemej tlen tikinmimakasi.* 20 Jehová moDios kichiuas mamosotlauakan. Nochtin akinmej ok mokauaskej mikiskej, noijki akinmej mitsmotlatiliaj. 21 Amo ximomojti intlajtlakol, porque Jehová moDios mouan kajki uan ye ueyititok uan kichiua tlen tetlajtlachialti”.

22 “Jehová moDios yolik kinmachijtias* moixpan nonmej altepemej. Amo mitskauiliskej san niman xikinpojpolo, ijkon yolkamej amo mansojtsitsintin tlen katej tlala amo momiakiliskej nion itlaj mitstoktiskej.* 23 Jehová moDios mitsinmaktilis uan nochtin kintlanilis hasta tlamis kinpojpolos. 24 Ye mitsinmaktilis akinmej kinnauatiaj uan te tikpojpolos intoka itlampa iluikak. Amikaj mitsixnamikis hasta ijkuak tikinpojpolos. 25 Moneki tikinchichinilis* imágenes tlen kinchiuaj de indioses. Amo xikixneki nion xikmokaui plata nion oro tlen kintlaliliaj, para amo tiuetsis ijtik se trampa, porque Jehová moDios kitlajyaltia non tlamantli. 26 Amo xikuika mokalijtik itlaj tetlajyalti para amo tipojpoliuis ijkon ken non tlamantli. Moneki mitstlajyaltis uan tikkokolis porque kipojpoloskej”.

8 “Namejuan moneki nankintlakamatiskej* nochi tlanauatilmej tlen axkan namechinmakatok, ijkon nanyoltoskej uan nanmomiakiliskej. Noijki nankalakiskej uan nankimoaxkatiskej tlali tlen Jehová okinmilui* namouejkatatajuan kinmakaskia. 2 Xikilnamikikan Jehová namoDios okichi xinejnemikan 40 xiuitl kanin tlauaki, okichi para ximoyolyamanikan uan namechyejyekos. Ijkon kimatiskia tlen onankipiayaj namoyolipan* uan kox nankintlakamatiskiaj* itlanauatiluan. 3 Onamechyolyamani, okika xiapismikikan uan onamechtlamakak ika maná tlen namejuan uan namopapanuan amo onankixmatiayaj. Ijkon onankimatkej moneki tikchiuaskej nochi tlen kijtoua Jehová uan amo san moneki titlakuaskej para tiyoltoskej. 4 Nin 40 xiuitl namotlaken amo otlajtlanki nion onamikxipojposajkej. 5 Namoyolipan kuali onankimatiayaj Jehová namoDios onamechyektlalijtoka ijkon ken se tepapa kiyektlalia ikone”.

6 “Xiuiaj itech iojuiuan Jehová namoDios uan sapanoua xiktlakaitakan* ijkon motas nankintlakamatij* itlanauatiluan. 7 Porque Jehová namoDios namechuikatok itech se kuali tlali, barrancas kanin panoua atl, kanin katej ameyalmej, kanin meya atl itech tepeyo uan kanin tlamaniktli, 8 kanin onka trigo, cebada, uvajkojmej, higoskojmej, granadas, aceite de oliva uan neujtli,* 9 ompa nankipiaskej tlen nankikuaskej uan amitlaj namechpolos, itech non tlali katej temej* tlen kipiaj tepostli uan itech tepeyo nankikixtiskej cobre”.

10 “Ijkuak nantlakuaskej uan namixuiskej* moneki nankiueyichiuaskej Jehová namoDios porque onamechmakak se kuali tlali. 11 Nochipa xikintlakamatikan* itlanauatiluan, tlen okijto xikchiuakan uan tlanauatilmej tlen okinpejpenki tlen axkan namechinmakatok, tla amo nanmomaluiaj nankilkauaskej Jehová namoDios. 12 Ijkuak nantlakuaskej uan namixuiskej, ijkuak nankichiuaskej kuajkualtin kalmej kanin nanchantiskej, 13 ijkuak nankinpiaskej miakej toros, vacas uan ichkamej,* ijkuak nankipiaskej miak plata uan oro uan ijkuak miak nantlapiaskej, 14 amo xikkauilikan namoyolo mamoueyineki uan manamechchiualti xikilkauakan Jehová namoDios, akin onamechkixti Egipto kanin onankatkaj nantlakeualmej, 15 ye okichi xinejnemikan kanin tlauaki uan temomojti, kanin katej kouamej tlen kipiaj veneno, kolomej* uan ipan tlali uaki kanin amo okatka atl. Ye okichi makisa atl itech tetl tlakuauak,* 16 noijki kanin tlauaki onamechtlamakak ika maná tlen amo okixmatkej namopapanuan, ijkon okichi para namechyolyamanis uan namechyejyekos uan para kuali nanyetoskiaj satepan. 17 Tla namoyolipan nankijtouaj: ‘Nichikauak uan onitekipano ika nomauan ikinon nikpia miak tlamantli’, 18 xikilnamikikan Jehová namoDios namechchikaua para uelis nankipiaskej miak tlamantli, ijkon kichiua acuerdo tlen omoka inuan namouejkatatajuan, ijkon ken axkan nankitaj”.

19 “Desde axkan namechiluia nanmikiskej tla nankilkauaj Jehová namoDios, nankintokaj oksekimej dioses, nankintekichiuiliaj uan inmixpan nanmotlankuaketsaj. 20 Tla amo nankikakij itlajtol Jehová namoDios, nanmikiskej ijkon ken okseki altepemej tlen Jehová namoDios kinpojpolojtok namoixpan”.

9 “Xikkaki altepetl Israel, axkan tikpanouis aueyatl* Jordán uan tikalakis itech tlali. Tikinmoaxkatis altepemej okachi uejueyij uan okachi chikauakej amo ken te, altepemej uejueyij tlen kuali tsaktokej hasta iluikak.* 2 Itech non altepetl chantij inkoneuan anaquim, yejuan chijchikauakej uan uejkapantikej.* Te tikinmixmati uan yotikkak ijkin kijtouaj: ‘¿Akin mixeuis kinmixnamikis ikoneuan Anac?’. 3 Pero axkan moneki tikmatis Jehová moDios moixpan kipanouis aueyatl. Ye ken se tlitl tlen nochi kichichinoua* uan kinpojpolos. Moixpan kinnauatis, ijkon san niman tikinmoaxkatis uan tikinpojpolos ken Jehová omitsilui”.

4 “Ijkuak Jehová moDios moixpan kinkixtis nonmej altepemej amo xikijto moyolipan:* ‘Jehová okichi manikalaki itech nin tlali uan manikmoaxkati porque niyolkuali’. Jehová moixpan kinkixtijtok porque yejuan amo yolkualmej. 5 Amo tikalakis itech tlali uan tikmoaxkatis porque tiyolkuali nion porque tiyolmelauak. Jehová moDios moixpan kinkixtis nonmej altepemej porque amo yolkualmej uan ijkon Jehová kichiuas tlen okinmilui* mouejkatatajuan Abrahán, Isaac uan Jacob. 6 Ikinon xikajsikamati* Jehová moDios amo mitsmakas nin kuali tlali uan tikmoaxkatis porque tiyolkuali, porque te se altepetl yoltlakuauak”.

7 “Xikilnamiki uan amo keman xikilkaua, kanin tlauaki otikkualani Jehová moDios. Otikixnamik Jehová desde ijkuak otikiski Egipto hasta ijkuak nikan otiajsiko. 8 Namejuan onankikualanijkej Jehová hasta Horeb uan Jehová yinamechpojpoloskia porque sapanoua onankikualanijkej. 9 Ijkuak onitlejkok ipan tepetl para nikinseliskia temej* melaktikej kanin oijkuilitoka acuerdo tlen Jehová namouan okichi, ompa onimoka 40 tonal uan 40 youak, amitlaj onikkua nion oniatlik. 10 Ijkuakon Jehová onechinmakak ome temej melaktikej, kanin toTajtsin Dios otlajkuilo ika imajpil. Ompa oijkuilitoka nochi tlen Jehová onamechilui desde itlajkotia tlitl ipan tepetl, non tonal ijkuak altepetl omonechiko. 11 Ijkuak otlanki cuarenta tonal uan cuarenta youak, Jehová onechinmakak ome temej melaktikej kanin oijkuilitoka acuerdo 12 uan Jehová onechilui: ‘San niman xitemo, moaltepe tlen otikkixti Egipto okichi se ueyi tlajtlakoli. San niman okikajkej ojtli tlen onikinnauati makitokakan uan okimochiuilijkej se imagen ika tepostli’. 13 Satepan Jehová noijki onechilui: ‘Yonikitak nin altepetl sapanoua yoltlakuauak. 14 Techkauili manikinpojpolo uan manikpojpolo intoka itlampa iluikak. Nikchiuas xiyeto se altepetl okachi chikauak uan nikchiuas okachi ximomiakili amo ken yejuan’”.

15 “Ijkuak tepetl ok oxotlatoka onimokopki, onitemok uan onikinkitskijtiaya ome temej kanin oijkuilitoka acuerdo. 16 Ijkuak onitlachixki, ¡onamechitak onantlajtlakolchijkej ixpan Jehová namoDios! Onankimochiuilijkaj se torojkonetl ika tepostli. San niman onankikajkej ojtli tlen Jehová onamechnauati xiktokakan. 17 Ikinon onikinkitski ome temej melaktikej onikintlamotlak uan namoixpan onikintlajtlapanki. 18 Ijkuakon onimoixtlapacho ixpan Jehová ijkon ken onikchijka 40 tonal uan 40 youak. Amitlaj onikkua nion oniatlik porque onantlajtlakolchijkej ijkuak onankichijkej tlen amo kuali ixpan Jehová uan onankikualanijkej. 19 Ijkuakon onimomojti porque sapanoua onankikualanijkej Jehová uan yinamechpojpoloskia. Pero non tonal Jehová noijki onechkak”.

20 “Aarón noijki sapanoua okikualani Jehová ikinon yikimiktiskia. Pero ijkuakon noijki onimotlatlaujti ipatka Aarón. 21 Torojkonetl tlen onankichijkej uan tlen ika onantlajtlakolchijkej, onikitski uan onikchichino.* Onikkuecho hasta omochi ken tlalpinoli.* Satepan oniktlamotlak ijtik atl tlen otemouaya itech tepetl”.

22 “Noijki sapanoua onankikualanijkej Jehová ompa Taberá, Masá uan Quibrot-Hataavá. 23 Ijkuak Jehová okichi xikisakan Cadés-Barnea, ye onamechilui: ‘Xitlejkokan uan xikmoaxkatikan tlali tlen ne melauak namechmakas’, namejuan oksepa onankixnamikej tlen Jehová namoDios onamechnauati uan onankiteititijkej amo onankineltokayaj nion onankitlakamatkej.* 24 Desde ijkuak onamechixmatki namejuan nankixnamikij Jehová”.

25 “Onimoixtlapacho ixpan Jehová 40 tonal uan 40 youak, ijkon onikchi porque Jehová okijto namechpojpoloskia. 26 Opejki niktlatlaujtia Jehová: ‘NoTeko Jehová tejuatsin tiUeyititok, amo xikpojpolo moaltepe, yejuan moaxkauan otikinmakixti ika moueyitilis uan noijki ika moma chikauak otikinkixti Egipto. 27 Xikinmilnamiki motekipanojkauan Abrahán, Isaac uan Jacob, amo xikilnamiki ijkuak akinmej pouij itech nin altepetl okiteititijkej yoltlakuauakej, otlajtlakolchijkej uan okichijkej tlen amo kuali. 28 Tlamo akinmej chantij kanin otechkixti kijtoskej: “Jehová amo ueli okinuikak itech tlali tlen okinmiluijka kinmakaskia, okinkixti para kinmiktis kanin tlauaki porque okinkokoliaya”. 29 Yejuan moaxkauan uan moaltepe, otikinkixti ika miak mochikaualis uan ika moma chikauak’”.

10 “Ijkuakon Jehová onechilui: ‘Xikinchiua ome temej* melaktikej ijkon ken achto okatkaj uan xitlejko itech tepetl kanin nika. Noijki xikchiua se arca ika kouitl. 2 Itech nonmej temej nikijkuilos tlen onikijkuilojka itech achto temej tlen otikintlajtlapanki uan satepan tikinkalakis ijtik Arca’. 3 Ikinon onikchi se arca ika acaciakouitl uan ome temej melaktikej ken achto okatkaj. Satepan onitlejkok itech tepetl uan onikinkitskijtiaj ome temej. 4 Ijkuakon Jehová okijkuilo itech nonmej temej tlen achto okijkuilojka. Majtlaktli Tlanauatilmej tlen Jehová onamechmakak desde itlajkotia tlitl ipan tepetl. Onechinmakak ijkuak altepetl omonechikojka. 5 Satepan onimokopki, onitemok de non tepetl uan onikinkalaki temej ijtik Arca tlen onikchi uan ok ompa katej. Onikchi ijkon ken Jehová onechnauati”.

6 “Satepan israelitas okiskej ompa Beerot Bene-Jaacán uan oyajkej Moserá. Ompa Aarón omiki uan okitokakej, ikone tlen omotokayotiaya Eleazar ipatka opejki tlapaleuia ken teopixki. 7 Satepan oyajkej ik Gudgoda uan de ompa oyajkej Jotbatá, ompa okatkaj miakej barrancas kanin opanouaya atl”.

8 “Non tonal Jehová okipejpenki itribu Leví para makimamakan iarca Jehová tlen ika omochi acuerdo, yejuan yetoskiaj ixpan Jehová para kitekichiuiliskiaj uan para ipatka kiteochiuaskiaj altepetl ijkon ken hasta axkan kichijtokej. 9 Ikinon levitas amitlaj okimoaxkatijkej nion okiselijkej tlen inmikniuan okinmakakej. Jehová kinmaka tlen kinpoloua,* ijkon ken Jehová namoDios okinmiluijka. 10 Ne onimoka 40 tonalmej uan 40 youak ipan tepetl ijkon ken achto onikchijka, ijkuakon Jehová noijki onechkak. Jehová amo okinek namechpojpolos. 11 Satepan Jehová onechilui: ‘Xio ixpan altepetl uan ximoyektlali para tikisas uan ijkon yejuan kalakiskej uan kimoaxkatiskej tlali tlen onikinmilui* nikinmakaskia namouejkatatajuan’”.

12 “Altepetl Israel, ¿tlen mitsiluia Jehová moDios xikchiua? San mitsiluia sapanoua xiktlakaita* Jehová moDios, xinemi itech nochi iojuiuan, xiktlasojtla, xiktekichiuili Jehová moDios ika nochi moyolo uan ika nochi moyolilis.* 13 Noijki xiktlakamati* tlen okijto Jehová moDios uan tlanauatilmej tlen okintlali, tlen axkan nimitsnauatijtok para kuali tiyetos. 14 Jehová moDios iaxka iluikak, noijki iluikak tlen okachi tlakpak kajki, tlaltikpak uan nochi tlen kipia. 15 Pero Jehová san omotoki innauak mouejkatatajuan uan okinmititi kintlasojtla, te ompa tipoui uan de nochi altepemej te omitspejpenki, ijkon ken axkan tikita. 16 Axkan moneki namejuan nankichipauaskej namoyolo uan ayakmo nanyetoskej nanyoltlakuauakej. 17 Porque Jehová namoDios ye okachi ueyititok uan amo ken oksekimej dioses, ye inTeko akinmej tlanauatiaj, ye Dios tlen ueyititok uan kipia chikaualis, akin moneki kitlakaitaskej. Ye amikaj kichikoita uan amo kichiua ken jueces tlen monemakaj. 18 Ye kita mamochiua tlen moneki para kipaleuis iknotl uan noijki siuatl tlen omiki inamik. Ye kitlasojtla akin uits itech okse altepetl, kimaka tlen kikuas uan itlaken. 19 Namejuan noijki moneki nankitlasojtlaskej akin uits itech okse altepetl porque namejuan noijki ijkon onankatkaj Egipto”.

20 “Moneki sapanoua tiktlakaitas* Jehová moDios, tiktekichiuilis uan moneki nochipa inauak tiyetos, noijki tikijtos* itlaj tikchiuas ika itoka. 21 San ye moneki tikueyichiuas, ye moDios uan yotikitak por te yokichi nin tlamantli ueyititok uan tetlajtlachialti. 22 Mouejkatatajuan otemokej Egipto san inuan 70 uan axkan Jehová moDios yokichi ximomiakili ken sitlalimej tlen katej iluikak”.

11 “Xiktlasojtla Jehová moDios uan xikteititi tikmatok moneki nochipa tikintlakamatis* tlanauatilmej tlen okinpejpenki, tlen okijto xikchiua uan itlanauatiluan. 2 Axkan tikmati mouan nimotlapouijtok uan amo inuan mokoneuan, yejuan ayamo kitaj ken Jehová moDios teyektlalia uan ayamo kitaj iueyitilis nion ichikaualis. 3 Yejuan amo okitakej imilagros nion nochi tlamantli tlen okitokti* faraón akin otlanauatiaya ompa Egipto, nion tlen okitokti nochi non tlali. 4 Noijki amo okitakej tlen okintokti* soldados egipcios, icaballos faraón uan icarretas tlen ika otemiktiayaj ijkuak mar Rojo okintolo ijkuak onamechkuitlapantokayaj uan Jehová sepa okinmikti. 5 Yejuan amo okitakej ken ye onamechmalui kanin tlauaki hasta nikan kanin onanualajsikej. 6 Noijki amo okitakej tlen okintokti Datán uan Abiram ikoneuan Eliab itelpoch Rubén, ijkuak omotlapo tlali ixpan nochi altepetl Israel, okintolo Datán uan Abiram, noijki akinmej inuan ochantiayaj, inkaltsitsinuan uan nochtin akinmej okintokayaj. 7 Pero namejuan onankitakej nochi tlamantli ueyititok tlen Jehová okichi”.

8 “Xikintlakamatikan* nochi tlanauatilmej tlen axkan namechinmakatok para nanyetoskej nanchijchikauakej uan nanpanoskej itech tlali tlen nankimoaxkatiskej, 9 para uejkika nanchantiskej itech tlali tlen Jehová okinmilui* kinmakaskia namouejkatatajuan uan inmixuiuan, tlali kanin onka miak leche uan neujtli”.*

10 “Tlali tlen tikmoaxkatis amo ken tlali Egipto, kanin otikiski, ompa otiktokaya semilla uan otikatekiaya ika mokxi,* ijkon ken kichiuaj kanin tlatokaj. 11 Tlali kanin nanpanoskej para nankimoaxkatiskej kinpia tepemej uan tlamaniktli. Non tlali kichichina kiauitl tlen uits iluikak, 12 non tlali Jehová moDios kimaluijtok. Jehová moDios nochipa kitok non tlali desde ijkuak peua hasta ijkuak tlami xiuitl”.

13 “Tla namejuan nankintlakamatij* nochi tlanauatilmej tlen axkan namechinmakatok, tla nankitlasojtlaj Jehová namoDios, nankitekichiuiliaj ika nochi namoyolo uan ika nochi namoyolilis,* 14 ye* namechmakas kiauitl para namotlal ijkuak monekis, kiauis ijkuak moneki uan ijkuak tlaxochikisa. Namejuan nankololoskej namosemilla uan nankipiaskej vino yankuik uan aceite. 15 Kichiuas namotlala matlaselia para namoyolkauan uan namejuan nantlakuaskej hasta namixuiskej.* 16 Ximomaluikan para amo namechkajkayauaskej uan amo manamechyoltilana nankinueyichiuaskej oksekimej dioses uan inmixpan nanmotlankuaketsaskej. 17 Tlamo namejuan sapanoua nankikualaniskej Jehová uan ye kitsakuas iluikak para ayakmo makiaui, ayakmo tlamochiuas ipan tlali uan namejuan san niman nanmikiskej itech kuali tlali tlen Jehová namechmakas”.

18 “Tlen axkan namechiluijtok moneki nankitlaliskej namoyolipan* uan nankichiuaskej itech namonemilis, moneki nankilpiskej itech namoma para nankilnamiktoskej uan non yetoskia ken ijkuilitos namoixkuak. 19 Non moneki nankinmachtiskej namokoneuan, uan nankintlapouiskej ijkuak nanmotlaliskej namochan, ijkuak nannemiskej ojtli, ijkuak nanmotekaskej uan ijkuak nanmeuaskej. 20 Xikinmijkuilokan itech tlaketsalmej kanin mokitskijtokej ipuertas namokalijtik uan itech ipuertas namoaltepe. 21 Ijkon namejuan uan namokoneuan uejkika nanchantiskej itech tlali tlen Jehová okinmilui namouejkatatajuan kinmakaskia. Ompa nanchantiskej hasta ijkuak iluikak ok yetos itech tlaltikpak”.

22 “Tla nochipa nankichiuaj uan nankitlakamatij* nochi tlen axkan namechnauatijtok, tla nankitlasojtlaj Jehová namoDios, nannemij itech nochi iojuiuan uan nochipa inauak nankatej, 23 namoixpan Jehová kinmachiuas* nochi ninmej altepemej uan namejuan nankinmoaxkatiskej altepemej okachi uejueyij uan okachi miakej. 24 Maski san kanin nanmoketsaskej yetos namoaxka. Nikchiuas namotlal mapeua desde kanin tlauaki hasta Líbano, desde Aueyatl,* aueyatl Éufrates hasta mar* tlen kajki ik kanin motlatia tonaltsin. 25 Amikaj uelis namechixnamikis, Jehová namoDios kichiuas sapanoua manamechimakasikan* itech tlali kanin nannejnemiskej, ijkon ken ye onamechilui”.

26 “Axkan namoixpan niktlalia tlateochiualis uan tlajyouilis: 27 tla nankitlakamatij itlanauatiluan Jehová namoDios tlen axkan namechinmakatok, nankipiaskej tlateochiualis, 28 pero nantlajyouiskej tla amo nankitlakamatij itlanauatiluan Jehová namoDios, tla nankikauaj ojtli tlen axkan namechnauatijtok xiktokakan uan tla nankinueyichiuaj oksekimej dioses tlen amo nankinmixmatij”.

29 “Ijkuak Jehová moDios kichiuas xikalaki itech tlali tlen tikselis para yetos moaxka, moneki tikteochiuas altepetl itech tepetl Guerizim uan itech tepetl Ebal tikijtos ken altepetl tlajyouis. 30 Nonmej tepemej katej ik kanin motlatia tonaltsin ik okse lado aueyatl Jordán. Itech intlal cananeos tlen chantij Arabá tlen kajki iyekapan Guilgal, innakastlan uejueyij kojmej de Moré. 31 Namejuan nankipanouiskej aueyatl Jordán para nankalakiskej uan nankimoaxkatiskej tlali tlen Jehová namoDios namechmakas. Ijkuak nankimoaxkatiskej uan ompa nanchantiskej, 32 moneki nankintlakamatiskej* nochi tlanauatilmej uan tlen otechiluijkej matikchiuakan tlen axkan namechinmakatok”.

12 “Ninmej tlanauatilmej uan tlen omoijto moneki nankichiuaskej, nochipa moneki nankitlakamatiskej* ijkuak nanyetoskej itech tlali tlen Jehová inDios namouejkatatajuan namechaxkatilis. 2 Moneki nochi nankipojpoloskej kanin okinueyichijkej indioses altepemej tlen nankinmoaxkatiskej. Moneki nankipojpoloskej, maski yetos ipan uejueyij tepemej, tepetsitsintin noso itlampa se ueyi kouitl tlen kipia miak imamayo. 3 Moneki nankinpojpoloskej inmialtares, nankinxixiniskej intlaketsaluan tlen kinueyichiuaj, nankinchichinoskej* inkojuan tlen kinueyichiuaj uan nankintlamotlaskej imágenes tlen kinchiuaj de indioses, ijkon ompa nankipojpoloskej intoka indioses”.

4 “Amo xikueyichiuakan Jehová namoDios ijkon ken yejuan kinueyichiuaj indioses. 5 Okachi kuali xiktemokan Jehová namoDios, kanin ye kipejpenas kitlalis itoka uan kanin ye yetos, intlajkotia namotribus uan ompa xiuiaj. 6 Ompa nankinuikaskej namotetliokoliluan tlen mochichinouaj,* tlen nankinmiktiliskej toTajtsin Dios, se majtlaktli parte tlen nankitemakaskej, namotetliokoliluan tlen nankitemakaskej ijkuak nankijtoskej itlaj nankichiuaskej, namotetliokoliluan tlen nankitemakaj ika nochi namoyolo, inkoneuan namotoros uan namovacas tlen achto nesij,* inkoneuan namochkauan* uan namotentsonuan tlen achto nesij uan okseki tlamantli tlen nankinekiskej nankitemakaskej. 7 Namejuan uan akinmej yetoskej namokalijtik ompa nantlakuaskej ixpan Jehová namoDios uan nanpakiskej ika nochi tlen onankichijkej porque Jehová namoDios onamechteochi”.

8 “Amo xikchiuakan tlen axkan nikan tikchijtokej, sejse kichiua san tlen kineki. 9 Porque ayamo nankalakij kanin nanmoseuiskej nion kanin Jehová namoDios namechmakas para mayeto namoaxka. 10 Ijkuak nankipanouiskej aueyatl* Jordán uan nanchantiskej itech tlali tlen Jehová namoDios namechaxkatilis, ye namechmaluis uan akinmej namechkokoliaj amitlaj namechtoktiskej* uan kuali nanyetoskej. 11 Nochi tlen axkan namechnauatijtok nankiuikaskej kanin Jehová namoDios kipejpenas para ompa mayeto itoka. Ompa nankinuikaskej namotetliokoliluan tlen mochichinouaj, tlen nankinmiktiliskej toTajtsin Dios, se majtlaktli parte tlen nankitemakaskej, namotetliokoliluan tlen nankitemakaskej ijkuak nankiluiskej Jehová itlaj nankichiuaskej uan okseki tlamantli tlen nankinekiskej nankitemakaskej. 12 Namejuan nanpakiskej ixpan Jehová namoDios, noijki namotelpochuan, namochpochuan, namotlakeualuan, siuamej tlen namechpaleuiaj uan levitas tlen yetoskej namoaltepeuan porque yejuan amo okimoaxkatijkej nion okiselijkej tlen namejuan onamechmakakej. 13 Ximomalui para amo tikintemakas tetliokolilmej tlen mochichinouaj san kanin te mitspaktis. 14 Tikintemakas tetliokolilmej tlen mochichinouaj san kanin Jehová kipejpenas, itech tlali tlen iaxka se motribu, ompa moneki tikchiuas nochi tlen nimitsnauatijtok”.

15 “Itech nochi moaltepeuan ijkuak te tiknekis uelis tikmiktis se yolkatl uan tikkuas inakayo, uelis tikkuas nochi nakatl tlen Jehová moDios mitsmakas. Akin sokio noso akin chipauak noijki uelis kikuas, kikuas ijkon ken tikkua se gacela noso se masatl. 16 Pero amo xikkua estli, moneki tiknokis* ipan tlali ijkon ken atl. 17 Itech moaltepeuan amo uelis tikkuas se majtlaktli parte mosemilla, movino yankuik nion moaceite. Nion inkoneuan motoros uan movacas tlen achto nesiskej,* nion inkoneuan mochkauan* uan motentsonuan tlen achto nesiskej, nion motetliokoliluan tlen tikintemakas ijkuak tikijtos itlaj tikchiuas, nion motetliokoliluan tlen tikintemakas ika nochi moyolo uan nion okseki tlamantli tlen tiknekis tiktemakas. 18 Te, motelpoch, mochpoch, motlakeual, siuatl tlen mitspaleuia uan levitas tlen yetoskej moaltepeuan, nankikuaskej nochi non ixpan Jehová moDios, kanin Jehová moDios kipejpenas uan te tipakis ixpan Jehová moDios ika nochi tlen yotikchi. 19 Ijkuak tichantis itech non tlali ximomalui para amo tikinmilkauas levitas”.

20 “Ijkuak Jehová moDios kiueyilis motlal ijkon ken yomitsilui uan te tikijtos: ‘Nikneki nikkuas nakatl’, porque tikuelilia nakatl, uelis tikkuas nochipa ijkuak tiknekis. 21 Tla uejka mokauas kanin Jehová moDios kipejpenas kitlalis itoka, moneki tikmiktis se yolkatl mansojtsin, ijkon ken ne onimitsnauati, tlen Jehová omitsmakak uan moneki tikkuas itech moaltepeuan nochipa ijkuak tiknekis. 22 Uelis tikkuas ijkon ken tikkua se gacela noso se masatl. Akin sokio noso akin chipauak uelis kikuaskej. 23 Mayeto moyolipan* amo keman tikkuas estli, porque estli yolilis uan amo moneki tikkuas yolilis tlen kipia nakatl. 24 Amo xikkua estli. Moneki tiknokis ipan tlali ken yetoskia atl. 25 Amo xikkua, para te uan mokoneuan kuali nanyetoskej porque tikchijtos tlen kuali ixpan Jehová. 26 Ijkuak tias kanin Jehová kipejpenas, xikuika san tlamantli santo tlen moaxka uan tetliokolilmej tlen tikintemakas ijkuak tikijtos itlaj tikchiuas. 27 Ompa ipan ialtar Jehová moDios tikintemakas tetliokolilmej tlen mochichinouaj, nakatl uan estli. Inmieso yolkamej tlen tikintemakas tiknokis inakastlan ialtar Jehová moDios uan nakatl uelis tikkuas”.

28 “Xikchiua uan xiktlakamati* nochi tlen axkan nimitsnauatijtok, ijkon te uan mokoneuan nochipa kuali nanyetoskej, porque tikchijtos tlen kuali uan tlen ijtok ixpan Jehová moDios”.

29 “Ijkuak Jehová moDios kinpojpolos altepemej tlen tikinmoaxkatis uan ijkuak tichantitos intlal, 30 ximomalui para amo tiuetsis itech se trampa satepan ijkuak moixpan kinpojpoloskej nonmej altepemej. Nion amo xikyejyeko titlajtlanis ken okinueyichiuayaj indioses nonmej altepemej para te noijki ijkon tikchiuas. 31 Amo ijkon xiktokti* Jehová moDios porque yejuan kichiuaj nochi tlen tetlajyalti tlen Jehová kikokolia para kinueyichiuaskej indioses. Hasta kinchichinouaj* inkoneuan para indioses. 32 Xikchiuakan nochi tlen namechnauatijtok. Amo moneki nankajxitiliskej nion itlaj nankikixtiliskej”.

13 “Tla kanin nankatej ualkisa se profeta noso ikaj tlen kijtoua tlen panos satepan porque okitemik, uan itlaj namechnextilis noso kijtos panos itlaj tetlajtlachialti, 2 uan mochiua tlen onamechnextili noso mochiua itlaj tetlajtlachialti ijkon ken okijto uan namechiluis: ‘Matikintokakan oksekimej dioses, dioses tlen ayamo nankinmixmatij uan matikintekichiuilikan’, 3 amo xikkakikan tlen kijtos non profeta nion akin temiki, porque Jehová namoDios namechyejyekojtok para kitas tla nankitlasojtlaj Jehová namoDios ika nochi namoyolo uan ika nochi namoyolilis.* 4 Moneki nankitokaskej Jehová namoDios uan sapanoua nankitlakaitaskej,* moneki nankintlakamatiskej* itlanauatiluan, nankikakiskej itlajtol, nankitekichiuiliskej uan nochipa inauak nanyetoskej. 5 Pero moneki mikis non profeta noso akin temiki, porque okinek namechxelos itech ojtli tlen Jehová namoDios okijto xiuiaj, ikinon kichiua oksekimej makixnamikikan Jehová namoDios, akin onamechkixti tlali Egipto uan onamechmakixti kanin onankatkaj nantlakeualmej. Moneki nankachiuaskej* itech namoaltepe tlen amo kuali”.

6 “Tla namokni tlen ikone namomama, namotelpoch, namochpoch, namosiua tlen nankitlasojtlaj noso namotlasoikni kineki namechtlaneltokitis uan ichtaka namechiluia: ‘Matikintekichiuilitij oksekimej dioses’, dioses tlen namouejkatatajuan amo okinmixmatkej nion namejuan nankinmixmatij, 7 indioses altepemej tlen katej kanin namejuan nankatej, maski uejka katej noso amo, maski katej kanin peua noso kanin tlami altepetl, 8 amo xikkauilikan manamechtlaneltokiti nion xikkakikan. Amo xikmialmajmatikan, amo xikiknomatikan nion xikpaleuikan. 9 Okachi kuali moneki nankimiktiskej. Namejuan moneki achto nankajkouiskej namoma para nankimiktiskej uan satepan noijki kajkokuiskej inma nochtin akinmej pouij namoaltepe. 10 Moneki nankimojmotlaskej ika tetl* hasta mamiki, porque okinekiaya namechxelos inauak Jehová namoDios, akin onamechkixti Egipto kanin onankatkaj nantlakeualmej. 11 Ijkuakon nochi altepetl Israel kimatis tlen opanok uan momojtiskej uan amikaj de namejuan oksepa kichiuas itlaj sapanoua amo kuali”.

12 “Tla itech se altepetl tlen Jehová namoDios onamechmakak para ompa xichantikan, nankikakij kijtouaj: 13 ‘Kanin nankatej oualkiskej sekimej tlakamej tlen amitlaj inpati para kintlapololtiskej akinmej chantij namoaltepe uan kijtojtinemij: “Matikintekichiuilitij oksekimej dioses”, dioses tlen namejuan amo nankinmixmatijʼ, 14 moneki kuali nantlatemoskej uan nantetlajtlaniskej ijkon nankiyekmatiskej tlen opanok. Tla momati melauak opanok non tlamantli tetlajyalti itech namoaltepe, 15 moneki nankinmiktiskej ika espada akinmej chantij itech non altepetl. Xikpojpolokan ika espada altepetl, noijki nochi tlen ompa kajki uan yolkamej. 16 Satepan ompa centro nankololoskej nochi tlen okachi kuali uan nankichichinoskej* altepetl. Nochi tlen okachi kuali yetos se tetliokolil ajsitok para Jehová namoDios. Altepetl nochipa xixintos uan amo keman kiyektlaliskej. 17 Amo moneki nankitilanaskej itlaj tlen yomoxelo para kipojpoloskej, ijkon Jehová ayakmo kualantos, namechiknomatis uan namechmiakilis ijkon ken okinmilui* namouejkatatajuan. 18 Para nankitlakamatiskej* Jehová namoDios moneki nankintlakamatiskej nochi itlanauatiluan tlen axkan namechinmakatok, ijkon nankichiuaskej tlen kuali ixpan Jehová namoDios”.

14 “Namejuan nanikoneuan Jehová namoDios. Amo ximotejtekikan nion xikximakan namoixkuak por ikaj tlen yomiki. 2 Porque namejuan se altepetl santo para Jehová namoDios uan de nochtin altepemej tlen katej tlaltikpak Jehová onamechpejpenki para xiyetokan ialtepe tlen kipatioita”.

3 “Amo xikkuakan itlaj tetlajyalti. 4 Ninmej yolkamej uelis nankinkuaskej: toro, ichka,* tentso, 5 masatl, gacela, corzo,* tentso tlen kajki tepeyo, antílope, ichka tlen amo mansojtsin uan ichka tlen kajki tepeyo. 6 Uelis nankinkuaskej yolkamej tlen nochi tlajkoxelitok inmiste uan ome uelta kikuechouaj intlakual. 7 Pero amo xikinkuakan ninmej yolkamej tlen ome uelta kikuechouaj intlakual noso tlajkoxelitok inmiste: camello, conejo uan damán,* porque ome uelta kikuechouaj intlakual pero amo tlajkoxelitok inmiste, nonmej yolkamej sokiojkej para namejuan. 8 Noijki amo xikkuakan pitsotl* porque tlajkoxelitok iste pero amo kikuechoua itlakual ome uelta, non yolkatl sokio para namejuan. Amo xikinkuakan nonmej yolkamej nion xikinkitskikan ijkuak yomikej”.

9 “De nochtin yolkamej tlen katej ijtik atl, uelis nankinkuaskej nochtin yolkamej tlen kipiaj aletas uan escamas. 10 Pero amo xikkuakan se yolkatl tlen amo kipia aletas nion escamas, non sokio para namejuan”.

11 “Uelis nankikuaskej san tlen tototl* chipauak. 12 Pero amo xikinkuakan ninmej yolkamej: águila, águila tlen michkitskia, tsojpilotl tliliuik, 13 kuixi* chichiltik, kuixi tliliuik nion tlatlamantli kuixi, 14 nion tlatlamantli kakalotl,* 15 avestruz,* tekolotl,* gaviota,* nion tlatlamantli halcón,* 16 tekolotl tsikitsin, tekolotl tlen kinpia uejueyij inakasuan, cisne,* 17 pelícano, tsojpilotl, kakalotl* tlen michkitskia, 18 cigüeña,* nion tlatlamantli garza, tototl abubilla,* nion tsinaka.* 19 Noijki nochtin okuilimej tlen kinpiaj inmiajasuan* sokiojkej para namejuan, amo xikinkuakan. 20 Uelis nankinkuaskej nochtin yolkamej chipauakej tlen patlanij”.

21 “Amo xikkuakan tla nankajsiskej se yolkatl tlen yomiki. Uelis nankimakaskej akin oksekan uits tlen chanti namoaltepe uan ye uelis kikuas. Noso uelis nankinemakiltiskej akin uits itech okse altepetl porque para Jehová namoDios namejuan se altepetl santo”.

“Amo xikposonikan se tentsojkonetl ijtik ileche imama”.

22 “Sejse xiuitl nankitemakaskej se majtlaktli parte tlen kitemakas semilla tlen nankitokaskej tlala. 23 Ixpan Jehová namoDios kanin ye kipejpenas para mayeto itoka, nankikuaskej se majtlaktli parte namosemilla, namovino yankuik, namoaceite. Noijki ikone namotoro uan namovaca tlen achto nesis,* ikone namochka* uan namotentso tlen achto nesis. Ijkon nanmomachtiskej nochipa sapanoua nankitlakaitaskej* Jehová namoDios”.

24 “Tla uejka moneki nanyaskej uan amo uelis nankiuikaskej nochi non tlamantli, kanin Jehová namoDios kipejpenas mayeto itoka porque uejka mokaua (porque Jehová namoDios namechteochiuas), 25 non tlamantli uelis nankipatlaskej ika tomin uan non tomin nankiuikaskej ijkuak nanyaskej kanin Jehová namoDios kipejpenas. 26 Ompa uelis nankikouaskej tlen nankinekiskej: vacas, ichkamej,* tentsomej, vino, okseki tlamantli tlen teuintia uan tlen nankinekiskej. Ompa nantlakuaskej ixpan Jehová namoDios uan namejuan uan akinmej chantij namokalijtik nanpakiskej. 27 Amo xikkauakan iselti levita tlen kajki itech namoaltepeuan, porque ye amo okiseli nion okimakakej tlen namejuan onamechmakakej”.

28 “Ejeyi xiuitl moneki nankitemakaskej se majtlaktli parte tlen tlakis* itech tlali non xiuitl uan nankiuikaskej itech namoaltepeuan. 29 Ijkon levita tlen amo okiseli nion okimakakej tlen namejuan onamechmakakej, akin uits itech okse altepetl, iknotl uan siuatl tlen omiki inamik, nochtin yejuan tlen chantij itech namoaltepeuan uelis ompa yaskej uan tlakuaskej hasta ixuiskej,* ijkon Jehová namoDios kiteochiuas nochi tlen nankichiuaskej”.

15 “Chichikometika xiuitl amo nankitlajtlaniskej tlen namechuikiliaj.* 2 Non moneki ijkin mochiuas, akin okitetlaneti amo kitlajtlanilis ikni makikopili tlen kiuikilia. Amo kinchiualtis oksekimej nion ikni makitlaxtlauikan porque Jehová yokijto amo moneki nankitlajtlaniskej tlen namechuikiliaj. 3 Akin uits itech okse altepetl uelis nankitlajtlaniliskej tlen namechuikilia, pero namokni amo moneki nankitlajtlaniliskej tla itlaj namechuikilia. 4 Namejuan nochipa nankipiaskej tlen moneki, porque Jehová nochipa namechteochiuas itech tlali tlen Jehová namoDios namechmakas para mayeto namoaxka. 5 Pero moneki nankitlakamatiskej* itlajtol Jehová namoDios uan nankichiuaskej nochi tlen kijtouaj tlanauatilmej tlen axkan namechinmakatok. 6 Porque ijkon ken Jehová namoDios yonamechilui ye namechteochiuas. Namejuan nankintlanetiskej miakej altepemej pero namejuan amo monekis itlaj nankitlaneuiskej. Namejuan nankinnauatiskej miakej altepemej pero yejuan amo namechnauatiskej”.

7 “Tla se namokni tlen namouan chanti itech altepemej tlen yetoskej itech tlali tlen Jehová namoDios namechmakas, ayakmo kipias tlen ika mopanoltis, amo xiyoltlakuauakan nion xiyetokan nantsotsokamej. 8 Moneki nankitlanetiskej ika nochi namoyolo tlen kipolos noso tlen amo kipias. 9 Ximomaluikan para amo ijkin nankijtoskej namoyolipan:* “Yiajsis xiuitl chikome ijkuak amo tiktlajtlanij tlen techuikiliaj”, tla ijkon nankijtoskej, xamo ayakmo nankipaleuiskej ika nochi namoyolo namokni tlen amo kipia tlen ika mopanoltis uan amitlaj nankimakaskej. Nanmotlajtlakolmamaltiskej tla ye namechteluis ixpan Jehová. 10 Moneki nankimakaskej ika nochi namoyolo uan amo san nankualantoskej ijkuak nankimakaskej, porque ijkon Jehová namoDios kiteochiuas nochi namoteki uan tlen nankichiuaskej. 11 Itech tlali nochipa yetos akin amitlaj kipia. Ikinon ijkin namechnauatijtok: ‘Xikpaleuikan ika nochi namoyolo namokni tlen kajki namotlal tlen tlajyouijtok uan amitlaj kipia’”.

12 “Tla onamechnemakiltijkej se namokni hebreo noso hebrea uan yonamechtekichiuili chikuase xiuitl, moneki nankikauiliskej mauia ijkuak ajsis xiuitl chikome. 13 Ijkuak nankikauiliskej mauia amo san ijkon xiktitlanikan. 14 Ika nochi namoyolo moneki nankimakaskej seki namochkauan* uan namotentsonuan, tlen kisa kanin nantlaejekaniaj* uan aceite uan vino tlen kisa kanin nantlapatskaj. Moneki nankimakaskej namokni ijkon ken Jehová namoDios namechteochiua. 15 Xikilnamikikan namejuan onankatkaj nantlakeualmej ompa Egipto uan Jehová namoDios onamechmakixti. Ikinon axkan namechnauatijtok ijkin xikchiuakan”.

16 “Pero tla namokni paki namouan uan namechtlasojtla, kintlasojtla akinmej chantij namokalijtik uan tla namechiluia: ‘¡Amo nias!’, 17 xikonanakan itlaj yakauitstik, xiktlalikan inakas itech puerta uan xiknakaskoyonikan, ijkon ye nochipa yetos namotlakeual. Noijki ijkon xikchiuilikan siuatl tlen namechpaleuia. 18 Ijkuak nankikauiliskej namotlakeual mauia uan ye yas, amo ximokuayejyekokan* itlaj onankipolojkej, porque ika tekitl tlen okichi chikuase xiuitl onankitlankej ojpa uelta amo ken tla ikaj nankitlakeuaskiaj uan nankitlaxtlauiskiaj, Jehová namoDios okiteochi nochi tlen onankichijkej”.

19 “Moneki nankinxeloskej para Jehová namoDios, achto ikone okichtli namotoro uan achto ikone okichtli namotentso uan namochka.* Amo xiktekipanoltikan ikone toro tlen achto nesis* nion xikximakan achto ikone namochka. 20 Sejse xiuitl namejuan uan akinmej katej namokalijtik, nankikuaskej ixpan Jehová namoDios kanin Jehová kijtos. 21 Pero tla yolkatl kokoxki, koxo, amo tlachia noso kipia okse tlamantli fiero, amo moneki nankimiktiliskej Jehová namoDios. 22 Moneki nankikuaskej itech namoaltepeuan. Akin chipauak noso akin sokio uelis kikuas yolkatl ken yetoskia se gacela noso se masatl. 23 Pero amo xikkuakan estli, moneki nankinokiskej* ipan tlali ken yetoskia atl”.

16 “Xikitakan keman ajsis metstli abib* uan ijkuakon xikchiuakan iPascua Jehová namoDios, porque Jehová namoDios youak onamechkixti Egipto itech metstli abib. 2 De namochkauan,* namotentsonuan, namovacas uan namotoros,* nankipejpenaskej yolkatl tlen nankimiktiskej itech iPascua Jehová namoDios. Nankimiktiskej kanin Jehová kipejpenas para mayeto itoka. 3 Amo xikkuakan iuan itlaj tlen kipia levadura. Chikome tonal nankikuaskej pan tlen amo kipia levadura, pan tlen namechilnamiktia onantlajyouijkej, porque onanualkisteuakej Egipto. Ijkon xikchiuakan ijkuak nanyoltoskej para nankilnamiktoskej tonal ijkuak onankiskej Egipto. 4 Chikome tonal itech namotlal amo moneki nankipiaskej tixtli tlen osamauak. Amo moneki nankikauaskej matlanexili seki inakayo yolkatl tlen nankimiktiskej achto tonal ijkuak tiotlakis. 5 De nochtin altepemej tlen Jehová namoDios namechinmakas, amo san kanin uelis nankimiktiskej yolkatl tlen nankitemakaskej itech Pascua. 6 Moneki nankimiktiskej kanin Jehová namoDios kipejpenas mayeto itoka. Tiotlak ijkuak motlatis tonaltsin san niman moneki nankimiktiskej yolkatl tlen nankitemakaskej Pascua, moneki ijkon nankichiuaskej tonal ijkuak onankiskej Egipto. 7 Xikikxitikan yolkatl tlen nankitemakaskej uan xikkuakan kanin Jehová namoDios kijtos uan mostlatika uelis nanmokopaskej kanin katej namokaltsitsinuan. 8 Chikuase tonal moneki nankikuaskej pan tlen amo kipia levadura uan tonal chikome nanmonechikoskej para nankilnamikiskej Jehová namoDios. Non tonal amo moneki nantekipanoskej”.

9 “Moneki nankinpouaskej chikome semanas. Nankinpouaskej chikome semanas ijkuak peuas nankololoskej namosemilla itech namotlala. 10 Ijkuakon moneki nankichiuaskej iluitl Semanas para Jehová namoDios uan ika nochi namoyolo moneki nankitemakaskej se tetliokolil ijkon ken Jehová namoDios onamechteochi. 11 Namejuan, namotelpochuan, namochpochuan, namotlakeualuan, siuamej tlen namechpaleuiaj, levitas tlen yetoskej namoaltepeuan, akinmej uitsej itech okse altepetl, iknomej uan siuamej tlen omiki innamik, nochtin yejuan tlen chantij namouan moneki nanpakiskej ixpan Jehová namoDios, kanin Jehová namoDios kipejpenas mayeto itoka. 12 Xikilnamikikan namejuan onankatkaj nantlakeualmej ompa Egipto, ikinon xiktlakamatikan* uan xikchiuakan tlen kijtouaj ninmej tlanauatilmej”.

13 “Ijkuak nankololoskej tlen kisas kanin nantlaejekaniaj* uan vino uan aceite tlen kisa kanin nantlapatskaj, chikome tonal nankichiuaskej iluitl ijkuak nankinchiuaskej kaltsitsintin.* 14 Xipakikan ijkuak nanmiluichiuaskej, noijki mapakikan namotelpochuan, namochpochuan, namotlakeualuan, siuamej tlen namechpaleuiaj, levitas, akinmej uitsej itech okse altepetl, iknomej uan siuamej tlen omiki innamik, nochtin yejuan tlen katej namoaltepeuan. 15 Chikome tonal nankichiuaskej non iluitl para Jehová namoDios kanin Jehová kijtos. Porque Jehová namoDios namechteochiuas ijkuak nankololoskej nochi tlen nankitokaskej uan nochi tlen nankichiuaskej uan namejuan nanpakiskej miak”.

16 “Eyi uelta sejse xiuitl nochtin tlakamej tlen namouan katej yaskej ixpan Jehová namoDios kanin ye kijtos. Yaskej ijkuak nankichiuaskej iluitl ijkuak nankikuaskej pan tlen amo kipia levadura, iluitl Semanas uan iluitl ijkuak nankinchiuaskej kaltsitsintin. Amikaj san mapijpilkatias* ijkuak yas ixpan Jehová. 17 Tetliokolil tlen yejuan kiuikaskej moneki yetos ijkon ken Jehová namoDios onamechteochi”.

18 “Itech altepemej tlen Jehová namoDios namechinmakas, moneki nankintlaliskej jueces uan akinmej tlanauatiskej itech sejse tribu. Yejuan moneki kinmixkomakaskej ijkon ken moneki akinmej pouij altepetl. 19 Ijkuak itlaj nankipejpenaskej, amo xikpatlakan tlen kuali ika tlen amo kuali nion amo xitechikoitakan. Amo xiktekauilikan manamechkouakan porque non tlamantli kinmixtsakua ixtlamatkej uan kichiua akinmej yolkualmej makipatlakan tlen yokijtojkaj. 20 Moneki nankitemoskej san tlen kuali, ijkon nanyoltoskej uan nankimoaxkatiskej tlali tlen Jehová namoDios namechmakas”.

21 “Ik kanin nankichiuaskej se altar para Jehová namoDios, amo xiktokakan se kouitl para nankiueyichiuaskej”.

22 “Amo xikmochiuilikan se tlaketsali tlen kiueyichiuaj, Jehová namoDios kikokolia non tlamantli”.

17 “Amo xikmiktilikan Jehová namoDios se toro noso se ichka* tlen kokoxki noso tlen kipia itlaj fiero, porque Jehová namoDios kitlajyaltia non tlamantli”.

2 “Matikijtokan itech altepemej tlen Jehová namoDios namechinmakas, namouan kajki se tlakatl noso se siuatl tlen kichijtok tlen amo kuali ixpan Jehová namoDios uan amo kichijtok iacuerdo, 3 uan kichiua tlen ne amo onitlanauati, moxeloua para kinueyichiuas uan motlankuaketsas inmixpan oksekimej dioses noso ixpan tonaltsin, metstli noso nochi tlen onka iluikak. 4 Ijkuak namechiluiskej noso nankimatiskej tlen panotok, moneki kuali nantlatemoskej. Tla momati melauak opanok non tlamantli tetlajyalti itech altepetl Israel, 5 moneki nankiuikaskej tlakatl noso siuatl tlen okichi tlen amo kuali, kanin yetoskej ipuertas altepetl uan ompa nankimojmotlaskej ika tetl* non tlakatl noso siuatl hasta mamiki. 6 Uelis nankimiktiskej tla ome noso eyi testigos kijtouaj tlen opanok, pero amo uelis nankimiktiskej tla san se testigo kijtoua tlen opanok. 7 Testigos achto kajkokuiskej inma para kimiktiskej akin otlajtlakolchi uan satepan nochi altepetl kajkokuis ima. Moneki nankachiuaskej* itech namoaltepe tlen amo kuali”.

8 “Tla itech namoaltepe panoua itlaj tlen nankitaj oui nankiyektlaliskej, xamo porque ikaj okimiktijkej, ikaj okiteluijkej, okitetoktijkej* tlen amo kuali noso okse tlamantli opanok, moneki nanyaskej kanin Jehová namoDios kipejpenas. 9 Xikinmitatij teopixkej levitas uan juez tlen ijkuakon tlapaleuijtos, xikinmiluikan tlen opanok uan yejuan namechiluiskej tlen kipejpenaskej mamochiua. 10 Kanin Jehová kipejpenas yejuan namechiluiskej tlen okipejpenkej uan namejuan moneki ijkon nankichiuaskej. Kuali xikitakan uan xikchiuakan nochi tlen namechiluiskej. 11 Namejuan moneki nankichiuaskej ijkon ken kijtoua tlanauatil tlen namechnextiliskej uan ijkon ken yejuan kipejpenaskej mamochiua. Ijkuak namechiluiskej tlen okipejpenkej, amo xiuiaj itech se ojtli tlen amo kuali.* 12 Moneki mikis akin moueyinekis uan amo kikakis juez nion teopixki tlen kitekichiuilijtos Jehová namoDios. Moneki nankachiuaskej itech altepetl Israel tlen amo kuali. 13 Ijkuak nochi altepetl kimatis tlen opanok, momojtiskej uan amo oksepa moueyinekiskej”.

14 “Tla ijkuak nankalakiskej, nankimoaxkatiskej uan nanchantiskej itech tlali tlen Jehová namoDios namechmakas, nankijtouaj manamechkauilikan nankitlaliskej se tekiua para manamechnauati, ijkon ken kichiuaj altepemej tlen katej namonauak, 15 moneki nankitlaliskej mayeto tekiua akin Jehová namoDios kipejpenas. Moneki nankitlaliskej se namokni manamechnauati, amo moneki nankitlaliskej mayeto tekiua akin uits itech okse altepetl, akin amo namokni. 16 Ye amo moneki kinpias miakej caballos nion kichiuas altepetl mamokopa Egipto para kinkuitiuij* oksekimej caballos, porque Jehová onamechilui: ‘Amo ximokopakan itech nin ojtli’. 17 Noijki amo moneki kinpias miakej isiuauan para amo mamoyolxelo. Nion amo moneki kipias sapanoua miak plata uan oro. 18 Ijkuak motlalis ipan itrono para tlanauatis ye moneki kimoijkuililis itech se libro tlen kijtoua nin Tlanauatil, tlen kijkuilos kikixtis itech copia tlen kipixtoskej teopixkej levitas”.

19 “Ye kimokauis uan ijkuak yoltos moneki mojmostla kitlajtoltis,* ijkon momachtis ken sapanoua kitlakaitas* Jehová iDios uan kitlakamatis* Tlanauatil uan nochi tlen ompa kijtoua. 20 Ijkon iyolipan* amo kijtos okachi ueyititok amo ken ikniuan, noijki kitlakamatis tlanauatil uan amo yas itech se ojtli tlen amo kuali. Ijkon ye uan ikoneuan uejkika tlanauatiskej itech altepetl Israel”.

18 “Teopixkej levitas, kijtosneki nochi itribu Leví, amo kiseliskej tlen kimakaskej altepetl Israel. Yejuan kinkuaskej tetliokolilmej tlen kinchiuiliskej Jehová ika tlitl, non yetos inmiaxka. 2 Yejuan amo kiseliskej tlen inmikniuan kinmakaskej, Jehová kinmakas tlen kinpolos* ijkon ken yokinmilui”.

3 “Ijkuak altepetl itlaj kitemakas nin tlen kinnamiki kiseliskej teopixkej. Ijkuak ikaj kimiktis se toro noso se ichka,* moneki kimakas teopixki iajkol yolkatl, itenkamachal uan ijti. 4 Moneki nankinmakaskej semilla tlen achto tlakis* uan vino yankuik uan aceite tlen achto kisas. Noijki nankinmakaskej ichkatsojmitl* tlen achto kisas ijkuak nankinximaskej namochkauan.* 5 De nochtin namotribus Jehová namoDios okipejpenki ye uan ikoneuan para nochipa matlapaleuikan ika itoka Jehová”.

6 “Pero tla se levita kikaua altepetl Israel kanin chantitok uan kineki yas kanin Jehová kipejpenas,* 7 ye uelis ompa tlapaleuis ika itoka Jehová iDios, ijkon ken kichiuaskej nochtin ikniuan levitas tlen ompa yetoskej ixpan Jehová. 8 Ijkon ken yejuan, ye noijki kiselis seki tlakuali. Noijki kiselis tlen kitlanis ijkuak kimonemakis tlen okatka inmiaxka iuejkatatajuan”.

9 “Ijkuak nankalakiskej itech tlali tlen Jehová namoDios namechmakas, amo xiknekikan nankichiuaskej tlen tetlajyalti kichiuaj nonmej altepemej. 10 Namouan amo moneki yetos akin kichichinoua* ichokotsin noso itakotsin, se tlachixki, akin kichiua naualotl, akin kitemoua tlen panos satepan, akin tetlajchiuia, 11 akin kintlajchiuia oksekimej, akin kitlajtlania ikaj tlen motlapouia inuan mikamej noso se tlachixki, nion akin kintlajtlania mikamej. 12 Porque Jehová kitlajyaltia akin kichiua non tlamantli, ikinon Jehová namoDios kinmachiuas* namoixpan altepemej tlen kichiuaj non tlamantli tetlajyalti. 13 Moneki nanyetoskej nanyolchipauakej ixpan Jehová namoDios”.

14 “Porque ninmej altepemej tlen nankinmoaxkatiskej, okinkakiayaj akinmej kichiuaj naualotl uan tlachixkej, pero Jehová namoDios amo namechkauilia ijkon xikchiuakan. 15 Jehová namoDios kitlalis se namokni para mayeto namoprofeta ijkon ken ne, moneki nankikakiskej. 16 Ijkon onankiluijkej Jehová namoDios ijkuak altepetl omonechiko ompa Horeb. Namejuan onankijtojkej: ‘Amo techkauili matikkakikan itlajtol Jehová toDios, nion techkauili oksepa matikitakan tlitl tlen chikauak xotlatok para amo timikiskej’. 17 Ijkuakon Jehová onechilui: ‘Kuali kajki tlen okijtojkej. 18 Niktlalis se inmikni para mayeto inprofeta ijkon ken te, nikiluis tlen kijtos uan ye namechiluis nochi tlen ne niknauatis. 19 Niktlaxtlaualtis akin amo kinekis kikakis tlen ye kijtos ika notoka’”.

20 “‘Tla se profeta mixeuis kijtos itlaj ika notoka tlen ne amo onitlanauati makijto noso tlajtoua ika intoka oksekimej dioses, non profeta moneki mikis. 21 Pero xamo namoyolipan* nankijtoskej: “¿Ken tikmatiskej Jehová amo ijkon okijto?”. 22 Tla profeta tlajtoua ika itoka Jehová pero tlen okijto amo panoua nion mochiua, kijtosneki Jehová amo ijkon okijto. Profeta ijkon okijto porque moueyineki uan amo moneki nankimakasiskej’”.*

19 “Ijkuak Jehová namoDios kinpojpolos altepemej tlen katej itech tlali tlen Jehová namoDios namechmakas uan ijkuak namejuan nankinkixtiliskej intlal uan nanchantiskej itech inmialtepeuan uan inkaluan, 2 moneki nankinxeloskej eyi altepemej itech tlali tlen Jehová namoDios namechmakas para mayeto namoaxka. 3 Tlali tlen Jehová namoDios namechmakas para mayeto namoaxka moneki nankixeloskej eyi partes uan nankinyektlaliskej ojmej, ijkon akin otemikti uelis cholos itech nonmej altepemej”.

4 “Ijkin moneki mochiuas ijkuak akin otemikti ompa cholos para momakixtis: tla kimiktia ikni pero amo okinekiaya ijkon kichiuas uan amo okikokoliaya, 5 akin otemikti moneki cholos itech nonmej altepemej para momakixtis. Matikijtokan ye okojkouito iuan ikni uan okajkokuik ihacha para kitekis se kouitl, pero okopinki itsonteko hacha uan okiuitek ikni uan okimikti. 6 Tla amo cholos, xamo ifamiliar akin okimikti kualantos, kikuitlapantokas uan ijkuak kajsiti kimiktis porque altepetl kanin momakixtiskia sapanoua uejka okatka. Pero akin otemikti amo okinamikiaya makimiktikan porque amo okikokoliaya ikni. 7 Ikinon namechnauatia xikinxelokan eyi altepemej”.

8 “Tla Jehová namoDios namechmaka okachi tlali ijkon ken okinmilui* namouejkatatajuan uan namechmaka nochi tlali tlen okinmilui kinmakaskia namouejkatatajuan, 9 moneki nankinxeloskej ok eyi altepemej. Ijkon kichiuas tla nochipa nankitlakamatij* tlanauatil tlen axkan namechmakatok, moneki nankitlasojtlaskej Jehová namoDios uan nochipa nanyetoskej itech iojuiuan. 10 Ijkon ipan tlali tlen Jehová namoDios namechmakas para yetos namoaxka, amo kimiktiskej akin amitlaj itlajtlakol uan amo kijtoskej onantemiktijkej”.

11 “Pero tla ikaj kikokolia ikni ikinon mochia para itlaj kitoktis,* chikauak kikojkoua uan miki uan satepan akin otemikti choloua itech nonmej altepemej, 12 tlayekankej tlen yetoskej itech ialtepe moneki ikaj kititlaniskej ompa makitemoti uan kimaktiliskej ifamiliar akin okimikti uan akin otemikti moneki mikis. 13 Amo xikiknomatikan akin otemikti, ijkon altepetl Israel ayakmo yetos itlajtlakol okimiktijkej akin amitlaj okichi uan kuali nanyetoskej”.

14 “Ijkuak nanmechtlalmakaskej itech tlali tlen Jehová namoDios namechmakas, amo xiktokikan* ilindero akin namonauak kipias itlal tlen namouejkatatajuan kitlaliskej”.

15 “Tla ikaj otlajtlakolchi noso okichi tlen amo kuali, amo uelis kitlajtlakoltis san se testigo. Ome noso eyi testigos moneki kijtoskej kox neli ijkon opanok. 16 Tla se testigo tlen kineki tetlajyouiltis kijtoua ikaj okichi tlen amo kuali porque amo okitlakamatki* se tlanauatil, 17 ome akinmej mokualaniaj yaskej ixpan Jehová, inmixpan teopixkej uan inmixpan jueces tlen ijkuakon tlapaleuijtoskej. 18 Jueces moneki kuali kitaskej tlen opanok uan tla kitaj testigo san otlakajkaya uan ikni amo melauak okichi tlen okijtoto, 19 moneki nankitoktiskej* tlen ye okinekiaya kitoktis ikni uan moneki nankachiuaskej* namotlajkotia tlen amo kuali. 20 Oksekimej kimatiskej tlen opanok, momojtiskej uan ayakmo oksepa kichiuaskej tlen sapanoua amo kuali itech namoaltepe. 21 Amo moneki nankiknomatiskej, motlaxtlauas se yolilis ika okse yolilis. Tla ikaj teixtololokopina noijki makixtololokopinakan. Tla ikaj tetlantepeua* noijki makitlantepeuakan.* Tla ikaj temakojkoua noijki makimakojkokan. Tla ikaj teikxikojkoua noijki makikxikojkokan”.

20 “Tla nanyaskej guerra para nankinmijmiktiskej akinmej namechkokoliaj uan nankitaj yejuan kinpiaj okachi miakej incaballos, incarretas uan okachi miakej insoldados amo ken namejuan, amo moneki nankinmimakasiskej,* porque namouan kajki Jehová namoDios akin onamechkixti Egipto. 2 Ijkuak namejuan yinankinmijmiktiskej, teopixki namonauak motokis uan motlapouis inuan nochtin. 3 Ye moneki kijtos: ‘Techkakikan akinmej nanpouij altepetl Israel. Namejuan yinankinmijmiktiskej akinmej namechkokoliaj, amo ximoyolkokokan. Amo xikinmimakasikan,* amo manamechmomojtikan nion amo makichiuakan xiuiuiokakan, 4 porque Jehová namoDios namouan yaui para namopatka kinmijmiktis akinmej namechkokoliaj uan ijkon namechmakixtisʼ”.

5 “Soldados tlen tlanauatiaj noijki moneki namechiluiskej: ‘¿Ikaj yikin okichi ikal uan ayamo ompa chanti? Mamokopa ikalijtik porque tla nikan mikis, okse kiyankuilis ikal. 6 ¿Ikaj okitokak uvas uan ayamo kikua itlakilo? Mauia uan mamokopa ichan porque tla nikan mikis, okse kikuas itlakilo. 7 ¿Ikaj okijto monamiktis iuan se ichpochtli pero ayamo iuan monamiktia? Mauia uan mamokopa ichan porque tla nikan mikis, okse monamiktis iuan non ichpochtliʼ. 8 Soldados tlen tlanauatiaj noijki moneki namechtlajtlaniskej: ‘¿Ikaj momojtia uan moyolkokoua? Mamokopa ichan para amo kichiuas ikniuan noijki mamoyolkokokan ken ye’. 9 Ijkuak soldados tlen tlanauatiaj tlamis namechtlapouiskej, moneki kintlaliskej soldados tlen kiyekanaskej altepetl ijkuak mochijtos guerra”.

10 “Ijkuak nanmajsitiuij itech se altepetl para nankixnamikiskej, achto moneki nankinmiluiskej akinmej ompa yetoskej nankinekij inuan nanmoyolseuijtoskej. 11 Tla kinekij namouan moyolseuijtoskej uan namechtlatlapoliaj, chikauak nankintekipanoltiskej nochtin akinmej ompa yetoskej uan namechtekichiuiliskej. 12 Pero tla amo kinekij namouan moyolseuijtoskej uan kijtouaj namechixnamikiskej, moneki nankitsajtsakuaskej altepetl, 13 Jehová namoDios namechinmaktilis uan namejuan moneki nankinmiktiskej ika espada nochtin tlakamej tlen ompa yetoskej. 14 Pero uelis nankinmokauiskej siuamej, konemej, yolkamej uan nochi tlen kipias altepetl, nankimokauiskej nochi tlen nankimotlaniliskej. Nankikuaskej tlen nankinkixtiliskej akinmej namechkokoliaj, tlen Jehová namoDios namechmaktilis”.

15 “Ijkon tikintoktis* altepemej tlen sapanoua uejka mokauaj, tlen amo pouij inuan altepemej tlen ik nikan katej. 16 Pero itech altepemej tlen katej itech tlali tlen Jehová namoDios namechmakas para mayeto namoaxka, moneki nochtin nankinmiktiskej.* 17 Ijkon ken Jehová namoDios onamechnauati, moneki nankinmiktiskej nochtin hititas, amorreos, cananeos, perizitas, heveos uan jebuseos. 18 Ijkon yejuan amo namechmachtiskej tlamantli tetlajyalti tlen kichiuaj para indioses uan amo kichiuaskej xitlajtlakolchiuakan para nankixnamikiskej Jehová namoDios”.

19 “Ijkuak nankitsajtsakuaskej se altepetl uan nankimoaxkatiskej porque yimiak tonal onankichijkej guerra, amo moneki nankintekiskej ika se hacha kojmej tlen ompa kinpiaskej. Uelis nankikuaskej intlakilo pero amo moneki nankintekiskej kojmej. ¿Nankitoktiskej* se kouitl tlen kajki tlala ijkon ken nankitoktiskiaj* se tlakatl? 20 San uelis nankintekiskej kojmej tlen nankimatij amo kitemakaj intlakilo. Nonmej kojmej uelis nankintekiskej uan nankinnejnekiskej* para nankitsajtsakuaskej altepetl tlen kijtos namechixnamikis, ijkon nankichiuaskej hasta nankitlaniliskej”.

21 “Tla itech namotlala tlen yetos itech tlali tlen Jehová namoDios namechmakas para mayeto namoaxka, nankajsij ikaj tlen okimiktijkej pero amo momati akin okimikti, 2 akinmej namechyekanaj uan jueces, moneki yaskej uan tlatamachiuaskej desde kanin kajki akin omiki hasta kanin katej altepemej tlen ik ompa yetoskej. 3 Tlayekankej tlen yetoskej itech altepetl tlen amo uejka yetos ik kanin kajki akin omiki, moneki kipejpenaskej se vaca tlen moskaltijtos tlen ayamo kitekipanoltiaj tlala uan ayamo kichiua okse tlamantli. 4 Tlayekankej tlen yetoskej altepetl, kitemouiskej vaca tlen moskaltijtos, itech se barranca kanin panotos miak atl, kanin ayamo keman tlaxouaj nion tlatokaj. Uan moneki kikechpostekiskej vaca itech non barranca”.

5 “Satepan teopixkej levitas motokiskej porque Jehová namoDios okinpejpenki para makitekichiuilikan uan para matlateochiuakan ika itoka Jehová. Yejuan kijtoskej ken moyektlaliskej oksekimej ijkuak mokualaniskej uan mokitskiskej.* 6 Satepan nochtin tlayekankej tlen yetoskej itech altepetl tlen amo uejka yetos ik kanin yetos akin omiki, momajtekiskej ipan vaca tlen kikechpostekiskej barranca. 7 Yejuan moneki kijtoskej: ‘Tejuan amo otitemiktijkej nion amo otikitakej tlen opanok. 8 Jehová, amo xiktlajtlakolti moaltepe Israel tlen otikmakixti uan amo xiktekauili makitlajtlakolmamaltikan moaltepe Israel porque okimiktijkej akin amitlaj itlajtlakol’. Ijkon amo kijtoskej otemiktijkej. 9 Ijkuak ijkon nankichiuaskej nankipojpoloskej itech namoaltepe tlajtlakoli, porque okimiktijkej akin amitlaj itlajtlakol uan nankichiuaskej tlen kuali ixpan Jehová”.

10 “Tla nanyaskej guerra para nankinmixnamikiskej akinmej namechkokoliaj uan Jehová namoDios namopatka kintlanilia uan namejuan nankinuikaj, 11 uan tla se tlakatl kita inuan akinmej nankinuikaj kajki se ichpochtli kuajkualtsin tlen kipaktia uan kineki mayeto isiua, 12 uelis kiuikas ikalijtik. Ichpochtli moneki mokuaximas, kinyektlalis isteuan, 13 moneki kimokixtilis itlaken tlen okitlalijtoka ijkuak okiuikakej uan chantis ikalijtik tlakatl. Ichpochtli se metstli kichokilis ipapa uan imama. Satepan tlakatl uelis iuan motekas, ye yetos inamik uan ichpochtli yetos isiua. 14 Pero tla tlakatl ayakmo okipakti ichpochtli, moneki kikauilis mauia san kanin ye kinekis. Amo moneki kinemakas nion kitlajyouiltis porque yokipinati”.

15 “Tla se tlakatl kinpia ome isiuauan pero se okachi kitlasojtla uan ome siuamej kinpiaj inkoneuan pero ikone tlen achto oneski* okipixki akin amo okachi kitlasojtla, 16 ijkuak tlakatl kintlaxelilis ikoneuan, amo uelis kimakas itelpoch siuatl tlen okachi kitlasojtla, tlen kinamiki achto ikone tlen okipixki iuan siuatl akin amo okachi kitlasojtla. 17 Tlakatl moneki kiselis ken achto ikone, itelpoch tlen okipixki iuan siuatl tlen amo okachi kitlasojtla, ijkon kiteititis ijkuak kimakas ojpa uelta okachi de nochi tlen kipia. Porque ye achto semilla tlen okitlali ika ichikaualis, non ikone kinamiki kiselis tlen kimakaj achto tekone”.

18 “Tla ikaj kipia se ikone tlen amo tlakaki nion tetlakamati,* tlen amo kitlakamati* ipapa nion imama uan maski yejuan yokiyektlalijkej, ye amo kineki kinkakis, 19 ipapa uan imama moneki kikitskiskej uan kiuikaskej inmixpan tlayekankej, kanin kajki ipuerta inmialtepe 20 uan kinmiluiskej tlayekankej tlen yetoskej inmialtepe: ‘Tokone amo tlakaki nion tetlakamati uan amo kineki kikakis tlen tikiluiaj. San tlakua uan tlauana’. 21 Satepan nochtin tlakamej tlen yetoskej altepetl kimojmotlaskej telpochtli ika tetl* hasta mamiki, ijkon nankachiuaskej* namotlajkotia tlen amo kuali. Nochi altepetl Israel kimatis tlen opanok uan momojtis”.

22 “Tla se tlakatl moneki mikis porque otlajtlakolchi ikinon kimiktiaj uan namejuan nankipilouaj itech se kouitl, 23 icuerpo amo moneki pilkatos itech kouitl nochi se youak. Moneki nankitaskej makitokakan non tonal, porque akin kipilouaj kitlajyaltia toTajtsin Dios. Amo moneki nankisokiotiskej tlali tlen Jehová namoDios namechmakas para mayeto namoaxka”.

22 “Tla nankitaj itoro noso ichka* namokni omopolo, amo xikchiuakan ken amitlaj onankitakej. Moneki nankiuikiliskej namokni. 2 Pero tla namokni uejka chanti noso amo nankixmatij, moneki nankiuikaskej yolkatl namochan uan ompa nankipixtoskej hasta namokni makitemoti, ijkuakon moneki nankikopiliskej. 3 Noijki ijkon moneki nankichiuaskej tla nankajsij iburro, itlaken noso itlaj tlen okipolo namokni. Amo xikchiuakan ken amitlaj onankitakej”.

4 “Tla nankitaj iburro noso itoro namokni ouetski ipan ojtli, amo xikchiuakan ken amitlaj onankitakej, moneki nankipaleuiskej makiketsalti”.

5 “Siuatl amo mamotlakenti ken tlakatl uan tlakatl amo mamotlakenti ken siuatl, porque Jehová kitlajyaltia akin ijkon kichiua”.

6 “Tla ijkuak nanyauij ipan ojtli nankajsij itepajsol se tototl* itech se kouitl noso tlalpan uan kinpia tototsitsintin* noso totoltemej* uan inmama kinpachojtok tototsitsintin noso totoltemej, amo xikinuikakan tototsitsintin uan inmama. 7 Uelis nankinmokauiskej tototsitsintin pero xikajkauakan inmama. Tla ijkon nankichiuaskej, kuali nanyetoskej uan uejkika nanyoltoskej”.

8 “Tla nankichiuaskej se kali, xikyaualokan ikpak* ika se tepamitl tsikitsin. Ijkon akinmej ompa chantiskej amo yetos intlajtlakol* tla ikaj uetsis uan mikis”.

9 “Ijkuak nankitokaskej uvas amo xitlatokakan ika ome tlatlamantli semillas. Tla ijkon nankichiuaskej, nochi tlen nankitokaskej uan tlen kitemakaskej uvajkojmej nankiuikaskej kanin santo”.

10 “Amo san sekan xikintlaxoualtikan se toro uan se burro”.

11 “Amo xikonakikan* namotlaken tlen okichijkej ika ichkatsojmitl* uan lino”.

12 “Itech naui ipuntas namotlaken moneki nankitlaliliskej hilos ilakatstikej”.

13 “Tla se tlakatl monamiktia iuan se siuatl uan iuan moteka pero satepan peua kikokolia, 14 uan kijtoua kichiua tlen amo kuali uan kichiua oksekimej amo kuali makitakan porque kijtoua: ‘Ne onimonamikti iuan nin siuatl pero ijkuak iuan onimotekak amo onikitak itlaj tlen makiteititi ye ayamo omotekaya iuan se tlakatl’, 15 ijkuakon ipapa uan imama ichpochtli yaskej inmixpan tlayekankej, kanin kajki ipuerta altepetl uan moneki kiuikaskej tlen kiteititia inmichpoch ayamo omotekaya iuan se tlakatl. 16 Ipapa ichpochtli moneki kinmiluis tlayekankej: ‘Ne onikmakak nochpoch nin tlakatl para mayeto isiua pero ye kikokolia 17 uan kijtoua kichiua tlen amo kuali porque kijtoua: “Amo nikpia itlaj tlen makiteititi mochpoch ayamo omotekaya iuan se tlakatl”. Nikan kajki tlen kiteititia nochpoch ayamo omotekaya iuan se tlakatl’. Satepan yejuan kipatlauaskej tsotsoli* inmixpan tlayekankej tlen yetoskej itech altepetl. 18 Satepan tlayekankej tlen yetoskej itech altepetl kikitskiskej tlakatl uan kiyektlaliskej. 19 Yejuan kitlaxtlaualtiskej tlakatl, moneki kitemakas panotok se kilo* plata uan non kimakaskej ipapa ichpochtli, porque non tlakatl okisokioti itoka se ichpochtli de Israel. Ichpochtli ok yetos isiua tlakatl uan ye amo keman uelis kikauas ichpochtli”.

20 “Pero tla melauak tlen kijtoua tlakatl uan amo onka itlaj tlen makiteititi ichpochtli ayamo ikaj iuan omotekaya, 21 moneki kiuikaskej ichpochtli ikaltempa ikalijtik ipapa uan tlakamej tlen yetoskej itech altepetl kimojmotlaskej ika tetl* hasta mamiki, porque itech altepetl Israel okichi tlen tepinati porque ijkuak ok ochantiaya ikalijtik ipapa oauilnenki.* Ijkon moneki nankachiuaskej* namotlajkotia tlen amo kuali”.

22 “Tla nankajsiskej se tlakatl uetok iuan isiua okse tlakatl, yejuan ome moneki mikiskej, mikis tlakatl tlen omotekak iuan siuatl uan noijki siuatl. Ijkon nankachiuaskej itech altepetl Israel tlen amo kuali”.

23 “Tla se ichpochtli yimonamiktis iuan se tlakatl pero itech altepetl monamiki iuan okse tlakatl uan iuan moteka, 24 namejuan moneki nankinkixtiskej kanin kajki ipuerta altepetl uan nankinmojmotlaskej ika tetl hasta mamikikan, ijkon nankitoktiskej* ichpochtli porque amo chikauak otsajtsik itech altepetl uan tlakatl porque okipinati isiua ikni. Ijkon moneki nankachiuaskej namotlajkotia tlen amo kuali”.

25 “Pero tla ompa tlala tlakatl okajsik ichpochtli tlen yimonamiktiskia uan okichiualti iuan mamoteka, san moneki mikis tlakatl tlen omotekak iuan ichpochtli. 26 Ichpochtli amitlaj xiktoktikan,* ye amo moneki mikis porque amo otlajtlakolchi. Tlen okipanok ijkon ken ijkuak ikaj kiuiteki* ikni uan kimiktia. 27 Porque tlakatl ompa tlala okajsik ichpochtli tlen yimonamiktiskia uan ichpochtli chikauak otsajtsik pero amikaj ompa okatka para kipaleuis”.

28 “Tla se tlakatl kajsi se ichpochtli tlen ayamo kijtlanij, kikitskia uan iuan moteka uan satepan momati, 29 tlakatl tlen omotekak iuan ichpochtli moneki kimakas ipapa ichpochtli kanaj tlajko kilo* plata uan ichpochtli mochiuas isiua tlakatl. Tlakatl okipinati ichpochtli ikinon amo keman uelis kikauas”.

30 “Nion se tlakatl amo moneki motekas iuan isiua ipapa, para amo kipinatis ipapa”.

23 “Nion se tlakatl tlen okikaparojkej porque okinpatlachilijkej itestículos* noso okitekilijkej itlakayo, amo uelis pouis iuan inechikol Jehová”.

2 “Nion se konetl tlen oneski* porque ikaj oauilnenki,* amo uelis pouis iuan inechikol Jehová. Nion ixuiuan amo uelis pouiskej iuan inechikol Jehová maski panos majtlaktli yolilis”.

3 “Nion se ammonita nion moabita amo uelis pouis iuan inechikol Jehová. Nion inmixuiuan amo keman uelis pouiskej iuan inechikol Jehová maski panos majtlaktli yolilis. 4 Porque yejuan amo onamechtlamakatoj nion onamechmakatoj atl ijkuak onankiskej Egipto. Noijki porque okitlaxtlauijkej Balaam ikone Beor, tlen ochantiaya Petor ompa Mesopotamia, para namechuijuikaltis.* 5 Pero Jehová namoDios amo okinek kikakis Balaam. Jehová namoDios onamechtlasojtlaya ikinon ijkuak Balaam namechuijuikaltiskia Jehová namoDios okichi manamechteochiua. 6 Amo keman moneki itlaj nankichiuaskej para makipiakan yolseuilis uan kuali mayetokan”.

7 “Amo xikinkokolikan edomitas porque yejuan namokniuan”.

“Amo xikinkokolikan egipcios porque namejuan onanchantiayaj itech inmialtepe. 8 Desde expan inmixuiuan tlen satepan yoltoskej yiuelis pouiskej iuan inechikol Jehová”.

9 “Ijkuak kanaj nanmokajtoskej para nankinmixnamikiskej akinmej namechkokoliaj, amo xikchiuakan itlaj tlen uelis namechsokiotis. 10 Tla se tlakatl mosokiotia porque youak kisa semen* itech itlakayo, moneki kisas kanin mokajtokej uan ayakmo ompa kalakis. 11 Ijkuak tiotlakis moneki maltis* uan ijkuak tlapoyauis uelis mokopas kanin mokajtoskej. 12 Kanin amikaj mokajtos nankipejpenaskej kanin amikaj namechitas uan ompa uelis nanyaskej baño. 13 Noijki nankiuikaskej se estaca iuan tlamantli tlen nankiuikaskej. Ika non estaca moneki nantlachkuaskej ijkuak nanmotlaliskej para nanyaskej baño uan satepan nankitlalpachoskej namokuitl. 14 Porque Jehová namoDios kajki kanin nanmokauaj para namechmakixtis uan namechinmaktilis akinmej namechkokoliaj. Kanin nanmokauaj moneki yetos santo, ijkon toTajtsin Dios amo namechajxilis itlaj tepinati uan amo namechkauas”.

15 “Tla se tlakeuali kicholilis iteko uan namouan yas, amo moneki nankikopaskej iuan iteko. 16 Tlakeuali uelis chantis namouan, itech namoaltepeuan ye uelis kipejpenas kanin kinekis mokauas. Amo moneki nankitlajyouiltiskej”.

17 “Nion se siuatl israelita uelis monemakas* uan nion se tlakatl israelita uelis monemakas. 18 Tomin tlen ika kitlaxtlauiskej se siuatl tlen monemaka noso se tlakatl tlen monemaka, amo moneki nankiuikaskej itech ikalijtik Jehová namoDios para ikaj kichiuas tlen omoka, porque yejuan ome kitlajyaltiaj Jehová namoDios”.

19 “Ijkuak itlaj nankitlanetiskej namokni, amo xiktlajtlanilikan itlanil tomin, tlakuali noso okse tlamantli tlen ika uelis itlaj nankitlaniskej. 20 Uelis nankitlajtlaniliskej namotlanil akin uits itech okse altepetl, pero amo uelis nankitlajtlaniliskej namokni. Ijkon Jehová namoDios kiteochiuas nochi tlen nankichiuaskej itech tlali tlen nankimoaxkatiskej”.

21 “Tla nankiluiaj Jehová namoDios itlaj nankichiuaskej, san niman xikchiuakan. Porque Jehová namoDios namechtlajtlanilis xikchiuakan uan tla amo nankichiuaj nanmotlajtlakolmamaltiskej. 22 Pero tla amitlaj nanmokauaj nankichiuaskej, amo nanmotlajtlakolmamaltiskej. 23 Moneki nankichiuaskej tlen nankijtoskej. Tlen nanmokauaj nankichiuaskej yetoskia ken se tetliokolil tlen nankitemakaj ikaj nochi namoyolo. Moneki nankichiuaskej tlen onanmokajkej iuan Jehová namoDios”.

24 “Tla nankalakij kanin namokni okitokak uvas, uelis nankikuaskej uvas para nanmixuiskej,* pero amo uelis nankitlatiskej nion se ijtik namobolsa”.

25 “Tla nankalakij kanin namokni okitokak isemillas, uelis nankiuiuitlaskej miauatl tlen yochikauak ika namoma. Pero amo uelis nankitekiskej miauatl tlen iaxka namokni ika tepostli tlen ika nantlatekij”.

24 “Tla se tlakatl monamiktia iuan se siuatl pero satepan ayakmo kineki iuan yetos porque okitili itlaj tepinati, moneki kijkuililis se amatl kanin kijtoua kikaua. Satepan kimakas uan kiluis ayakmo mayeto ikalijtik. 2 Siuatl uelis oksepa monamiktis ijkuak ayakmo yetos ikalijtik tlakatl. 3 Pero tla ijkuak oksepa monamiktia, inamik kikokolia uan kijkuililia se amatl kanin kijtoua kikaua, satepan kimaka uan kiluia ayakmo mayeto ikalijtik noso tla non inamik miki, 4 achto inamik tlen okilui mauia, amo uelis oksepa iuan monamiktis porque siuatl yomosokioti, non kitlajyaltia Jehová. Amo xikkalakikan nion se tlajtlakoli itech tlali tlen Jehová namoDios namechmakas para mayeto namoaxka”.

5 “Tla se tlakatl yikin omonamikti, amo uelis yetos soldado nion kinauatiskej makichiua okse tlamantli. Se xiuitl ye amo ompa mokajkalakis, mokauas ikalijtik uan kichiuas isiua mapaki”.

6 “Amikaj makimokaui metlatl nion metlapili para makikopilikan tlen okitetlaneti, porque tlamo kimokauis tlen ika mopanoltis akin itlaj okitlaneti para makikopili tlen okimakak”.

7 “Tla momati ikaj okichteki se ikni israelita, okitlajyouilti uan okinemakak, akin oteichteki moneki mikis. Moneki nankachiuaskej* namotlajkotia tlen amo kuali”.

8 “Ijkuak momatis onka lepra,* xikchiuakan nochi tlen namechiluiskej teopixkej levitas. Xikchiuakan nochi ken ne onikinnauati. 9 Xikilnamikikan tlen Jehová namoDios okitokti* Míriam itech ojtli ijkuak onankistokaj Egipto”.

10 “Tla itlaj nankitlanetiaj namokni, amo xikalakikan ikalijtik para nankiuikaskej tlen okijto namechmakas, para kiteititis namechkopilis tlen onankitlanetijkej. 11 Moneki kiauak nanmokauaskej uan akin itlaj onankitlanetijkej, kikixtis tlen namechmakas para kiteititis namechkopilis tlen onankitlanetijkej. 12 Tla itlaj nankitlanetiaj akin amitlaj kipia, amo ximotekakan tla nankipixtokej tlen onamechmakak para kiteititis namechkopilis tlen onankitlanetijkej. 13 Ijkuak motlatis tonaltsin, san niman xikkopilikan tlen onamechmakak para kiteititis namechkopilis tlen onankitlanetijkej. Ijkuak motekas ye kipixtos itlaken uan namechteochiuas uan Jehová namoDios kitas onankichijkej tlen kuali”.

14 “Tla itech namoaltepeuan nankitlakeuaj namokni noso akin uits itech okse altepetl tlen namouan chanti uan amitlaj kipia noso itlaj kipoloua, amo xikkajkayauakan. 15 Non tonal achto motlatis tonaltsin, moneki nankimakaskej itlaxtlauil, porque ye amo kipia tlen ika mopanoltis uan itlaxtlauil kipaleuis mayolto. Tla amo ijkon nankichiuaj, namechteluis ixpan Jehová uan namejuan nanmotlajtlakolmamaltiskej”.

16 “Tepapanuan amo moneki mikiskej intlajtlakol inkoneuan nion tekoneuan amo moneki mikiskej intlajtlakol inpapanuan. Sejse moneki mikis por tlajtlakoli tlen kichiua”.

17 “Amo xikijtokan amo nankichiuiliskej tlen kinamiki akin uits itech okse altepetl noso akin iknotl. Noijki amo xikmokauikan ipayo se siuatl tlen omiki inamik, para nankimatoskej namechkopilis tlen onankitlanetijkej. 18 Xikilnamikikan onankatkaj nantlakeualmej altepetl Egipto uan Jehová namoDios onamechmakixti. Ikinon non namechnauatijtok”.

19 “Tla nankilkauaj se tlailpili* ijkuak nankololoskej tlen onankitokakej namotlala, amo xiktemotij. Moneki nankikauiliskej akin uits itech okse altepetl tlen namouan chanti, iknotl uan siuatl tlen omiki inamik. Ijkon Jehová namoDios kiteochiuas nochi tlen nankichiuaskej”.

20 “Ijkuak nankitsetseloskej imamayo namoolivo, amo ome uelta ijkon xikchiuakan. Tlen amo uetsis kimokauis akin uits itech okse altepetl tlen namouan chanti, iknotl uan siuatl tlen omiki inamik”.

21 “Ijkuak nankololoskej uvas kanin onankitokakej, amo xikololotij tlen ok mokauas. Non yetos iaxka akin uits itech okse altepetl tlen namouan chanti, iknotl uan siuatl tlen omiki inamik. 22 Xikilnamikikan onankatkaj nantlakeualmej ompa Egipto. Ikinon non namechnauatijtok”.

25 “Ijkuak ome tlakamej mokualaniskej, uelis yaskej inmixpan jueces uan yejuan kinmixkomakaskej. Jueces kijtoskej amitlaj itlajtlakol akin yolkuali uan kitlajtlakoltiskej akin amo yolkuali. 2 Tla moneki kiuitekiskej* akin amo yolkuali, juez tlanauatis makixtlapachtekakan uan ixpan makiuitekikan.* Kitaskej kox sapanoua fiero tlen okichi uan ijkon kimatiskej keski uelta kiuitekiskej. 3 Uelis nankiuitekiskej* hasta 40 uelta pero amo okachi. Porque tla okachi nankiuitekij,* namokni namoixpan mopinatis”.

4 “Amo xikbozaltikan toro ijkuak tlajtlaksas* ipan semilla”.

5 “Tla sekimej iknimej san sekan chantij uan se miki pero amo okipixki se ikone, isiua akin omiki amo uelis monamiktis iuan akin amo ifamiliar inamik. Icuñado siuatl iuan monamiktis, ijkon ye kichiuas tlen moneki uan monamiktis iuan isiua ikni tlen yomiki. 6 Ijkuak siuatl kipias achto ikone, non konetl kitaskej ken ikone achto inamik tlen omiki, ijkon itoka amo poliuis itech altepetl Israel”.

7 “Pero tla tlakatl amo kineki monamiktis iuan isiua ikni tlen omiki, siuatl moneki yas kanin yetos ipuerta altepetl, inmixpan tlayekankej uan kinmiluis: ‘Ikni nonamik amo kineki itoka ikni mayeto itech altepetl Israel. Ye amo kineki nouan monamiktis para kichiuas tlen moneki’. 8 Tlayekankej tlen yetoskej itech ialtepe, moneki kinotsaskej tlakatl uan iuan motlapouiskej. Pero tla ye ok kijtoua amo kineki monamiktis iuan siuatl, 9 siuatl tlen omiki inamik moneki motokis inauak tlakatl inmixpan tlayekankej, kikixtilis ikak,* kixchijchas uan kiluis: ‘Ijkin moneki kitoktiskej* tlakatl tlen amo kineki kichiuas ikni makinpia ikoneuan’. 10 Desde ijkuakon itech altepetl Israel ifamilia non tlakatl ijkin kitokayotiskej: iKal akin Okikixtilijkej iKak”.

11 “Tla ome tlakamej mokitskiaj* uan se isiua de nonmej tlakamej mokalakia uan ika ima kikitskia itlakayo okse tlakatl para kipaleuis inamik, 12 moneki nankitekiliskej ima. Amo xikiknomatikan”.

13 “Ijtik namobolsa amo xikinpiakan ome tlatlamantli temej* tlen ika nantlatamachiuaskej, se tsikitsin uan se ueyi. 14 Amo xikpiakan namokalijtik ome tlatlamantli chikiuitl para ika nantlatamachiuaskej, se tsikitsin uan se ueyi. 15 Tetl* tlen ika nantlatamachiuaskej nochipa ajsitok uan kuali matlatamachiua. Uan chikiuitl tlen ika nantlatamachiuaskej noijki nochipa ajsitok uan kuali matlatamachiua, ijkon uejkika nanyoltoskej itech tlali tlen Jehová namoDios namechmakas. 16 Porque Jehová namoDios kitlajyaltia akin tlakajkayaua tlen kichiua non tlamantli”.

17 “Xikilnamikikan tlen onamechtokti* Amalec itech ojtli ijkuak onankiskej Egipto. 18 Ijkuak namejuan onansotlajtokaj uan amo onanchikajtokaj, ye onamechnamikito ojtli uan okinmijmikti nochtin akinmej omokajtiayaj tlakuitlapan. Amo okimakaski* toTajtsin Dios. 19 Ijkuak Jehová namoDios kichiuas ximoseuikan porque namechmakixtis inmak akinmej namechkokoliaj, tlen yetoskej itech tlali tlen Jehová namoDios namechmakas para mayeto namoaxka, moneki nankinmiktiskej nochtin amalequitas itlampa iluikak uan amikaj kinmilnamikis. Amo xikilkauakan”.

26 “Ijkuak nankalakiskej itech tlali tlen Jehová namoDios namechmakas para yetos namoaxka, ijkuak yinankimoaxkatiskej uan ompa yinanchantitoskej, 2 moneki nankonanaskej uan nankololoskej nochi tlen achto tlakis* ipan namotlal, itech tlali tlen Jehová namoDios namechmakas. Non nankikalakiskej ijtik chikiuitl uan nanyaskej kanin Jehová namoDios kipejpenas mayeto itoka. 3 Moneki nanyaskej ixpan teopixki tlen ijkuakon tlapaleuijtos uan nankiluiskej: ‘Axkan nikijtoua ixpan Jehová moDios, yonikalak itech tlali tlen Jehová okinmilui* touejkatatajuan techmakaskia’”.

4 “Satepan teopixki konanas chikiuitl tlen nankikitskijtoskej uan kitlalis ixpan ialtar Jehová namoDios. 5 Satepan namejuan moneki nankijtoskej ixpan Jehová namoDios: ‘Topapa okatka arameo uan san kanin oyajtinemiaya, ye ochantito Egipto kanin amo okatka ialtepe uan ifamilia amo ueyi okatka. Ompa omochi se ueyi altepetl, tlen okatka chikauak uan omomiakilijkej. 6 Pero egipcios fiero otechtoktijkej,* otechtlajyouiltijkej uan otechchiualtijkej chikauak matitekipanokan. 7 Ikinon otiktlatlaujtijkej Jehová inDios touejkatatajuan matechpaleui uan Jehová otechkak uan okitak otitlajyouijtokaj uan otechpanotoka tlen amo kuali. 8 Saiktlami Jehová otechkixti Egipto ika ima chikauak uan ueyi, ika tlamantli temomojti, itlaj okinexti uan okinchi milagros. 9 Satepan nikan otechualikak uan otechmakak nin tlali kanin onka miak leche uan neujtli.* 10 Axkan onikualikak tlen achto otlaki* ipan nin tlali tlen Jehová onechmakak’”.

“Moneki nankitlaliskej ixpan Jehová namoDios uan nanmotlankuaketsaskej ixpan Jehová namoDios. 11 Namejuan, akinmej yetoskej namokalijtik, levitas uan akinmej uitsej itech okse altepetl uan chantij namouan nanpakiskej, porque Jehová namoDios onamechmakak kuali tlamantli”.

12 “Ijkuak ajsis xiuitl eyi ijkuak yonankololojkej se majtlaktli parte tlen tlakis, moneki nankinmakaskej levitas, akinmej uitsej itech okse altepetl, iknomej uan siuamej tlen omiki innamik, itech namoaltepeuan yejuan tlakuaskej hasta ixuiskej.* 13 Ijkuakon nankijtoskej ixpan Jehová namoDios: ‘Yonikkixti nokalijtik tlamantli santo uan ijkon ken otechnauati yonikinmakak levitas, akinmej uitsej itech okse altepetl, iknomej uan siuamej tlen omiki innamik. Onikchi tlen kijtouaj motlanauatiluan uan onikintlakamatki.* 14 Amo onikkua itlaj santo ijkuak onimoyolkokouaya porque omiki akin oniktlasojtlaya. Nion onikitski ijkuak onikatka nisokio, nion onikinmaktili akinmej yomikej. Onikkak itlajtol Jehová noDios uan onikchi nochi tlen otechnauati. 15 Ikinon xitlachia desde iluikak kanin tika, kanin santo. Xikteochiua moaltepe Israel uan tlali tlen otechmakak, ijkon ken otikinmilui touejkatatajuan, tlali kanin onka miak leche uan neujtli’”.

16 “Jehová namoDios axkan namechnauatijtok xikintlakamatikan* nonmej tlanauatilmej uan tlen ye okijto xikchiuakan. Moneki nankintlakamatiskej* uan nankichiuaskej ika nochi namoyolo uan ika nochi namoyolilis.* 17 Axkan onankichijkej Jehová makijto yetos namoDios, tla nanyetoskej itech iojuiuan, ijkuak nankintlakamatiskej itlanauatiluan, tlen okijto mamochiua, tlanauatilmej tlen ye okintlali uan ijkuak nankikakiskej itlajtol. 18 Axkan Jehová okichi namejuan xikijtokan nanyetoskej ialtepe tlen kipatioita uan nankintlakamatiskej nochi itlanauatiluan ijkon ken yokijtojka. 19 Ijkon ken yokijtojka, ye namechiluia kichiuas xikpiakan okachi namopati amo ken okseki altepemej tlen ye okintlali, kichiuas manamechueyitlalikan, miakej manamechixmatikan uan nanueyititoskej. Ijkon kichiuas tla nankiteititiskej nanyetoskej se altepetl santo para Jehová namoDios”.

27 Tlayekankej tlen okatkaj itech altepetl Israel okatkaj iuan Moisés ijkuak ye okinnauati israelitas: “Xikintlakamatikan* nochi tlanauatilmej tlen axkan namechinmakatok. 2 Ijkuak nankipanouiskej aueyatl* Jordán para nanpanoskej itech tlali tlen Jehová namoDios namechmakas, xikinmajkokuikan uejueyij temej* uan xikintenexuikan. 3 Ijkuak yonankipanouijkej aueyatl xikijkuilokan inpan nochi temej tlen kijtoua Tlanauatil. Ijkon nankalakiskej itech tlali tlen Jehová namoDios namechmakas kanin onka miak leche uan neujtli,* ijkon ken onamechilui Jehová inDios namouejkatatajuan. 4 Ijkuak yonankipanouijkej aueyatl Jordán moneki nankimajkokuiskej nonmej temej itech tepetl Ebal uan nankintenexuiskej, ijkon ken axkan namechnauatijtok. 5 Noijki ompa moneki nankichiuiliskej se ialtar Jehová namoDios, moneki nankichiuaskej ika temej. Amo xikinnejnekikan* teposmej para nankintlapanaskej temej. 6 Moneki nankichiuiliskej ialtar Jehová namoDios ika temej tlen amo onankintlapankej uan ipan nankinchichiniliskej* tetliokolilmej Jehová namoDios. 7 Moneki nankintemakaskej tetliokolilmej tlen tesetiliaj, ompa nankikuaskej uan namejuan nanpakiskej ixpan Jehová namoDios. 8 Kuali xikijkuilo ipan temej nochi tlen kijtoua Tlanauatil”.

9 Ijkuakon Moisés uan teopixkej levitas okinmiluijkej akinmej opouiayaj itech altepetl Israel: “Amo xitlajtokan uan xitlakakikan akinmej nanpouij itech altepetl Israel, axkan onanmochijkej ialtepe Jehová namoDios. 10 Moneki nankikakiskej itlajtol Jehová namoDios uan nankitlakamatiskej* tlen okijto xikchiuakan uan itlanauatiluan tlen axkan namechnauatijtok”.

11 Non tonal Moisés okinnauati akinmej opouiayaj itech altepetl: 12 “Ijkuak nankipanouiskej aueyatl Jordán uan kiteochiuaskej altepetl, itribu Simeón, Leví, Judá, Isacar, José uan Benjamín yaskej itech tepetl Guerizim. 13 Uan ijkuak kiluiskej altepetl tlen amo kuali kipanos, itribu Rubén, Gad, Aser, Zabulón, Dan uan Neftalí yaskej itech tepetl Ebal. 14 Uan levitas chikauak kinmiluiskej nochtin tlakamej tlen pouij Israel:

15 ‘Makiuijuikaltikan* akin kichiuas se imagen noso se estatua ika tepostli uan kitlatis. Jehová kitlajyaltia non tlamantli tlen kichiua ika ima akin tekipanoua ika kouitl uan tepostli’. (Uan nochi altepetl kijtos: ‘¡Amén!’)”.

16 “‘Makiuijuikaltikan akin kitlauelitas ipapa noso imama’. (Uan nochi altepetl kijtos: ‘¡Amén!’)”.

17 “‘Makiuijuikaltikan akin kitokis* ilindero akin inauak kipias itlal’. (Uan nochi altepetl kijtos: ‘¡Amén!’)”.

18 “‘Makiuijuikaltikan akin kichiuas mamopolo ipan ojtli akin amo tlachia’. (Uan nochi altepetl kijtos: ‘¡Amén!’)”.

19 “Makiuijuikaltikan akin amo kinekis kichiuilis tlen kinamiki akin uits itech okse altepetl, iknotl uan siuatl tlen omiki inamik’. (Uan nochi altepetl kijtos: ‘¡Amén!’)”.

20 “‘Makiuijuikaltikan akin motekas iuan isiua ipapa porque kipinatis ipapa’. (Uan nochi altepetl kijtos: ‘¡Amén!’)”.

21 “‘Makiuijuikaltikan akin motekas iuan se yolkatl’. (Uan nochi altepetl kijtos: ‘¡Amén!’)”.

22 “‘Makiuijuikaltikan akin motekas iuan ikni siuatl, maski mayeto ichpoch ipapa noso ichpoch imama’. (Uan nochi altepetl kijtos: ‘¡Amén!’)”.

23 “‘Makiuijuikaltikan akin motekas iuan imonna’. (Uan nochi altepetl kijtos: ‘¡Amén!’)”.

24 “‘Makiuijuikaltikan akin mochia san ichtaka para itlaj kitoktis* ikni uan kimiktis’. (Uan nochi altepetl kijtos: ‘¡Amén!’)”.

25 “‘Makiuijuikaltikan akin kiselis makitlaxtlauikan para kimiktis akin amitlaj itlajtlakol’. (Uan nochi altepetl kijtos: ‘¡Amén!’)”.

26 “‘Makiuijuikaltikan akin amo kitlakaitas tlen kijtoua Tlanauatil uan amo kitlakamatis’.* (Uan nochi altepetl kijtos: ‘¡Amén!’)”.

28 “Tla melauak nankikakij itlajtol Jehová namoDios uan nankitlakamatij* nochi tlen ye namechiluia tlen axkan namechnauatijtok, Jehová namoDios namechueyitlalis amo ken okseki altepemej tlen katej tlaltikpak. 2 Tla nochipa nankikakij itlajtol Jehová namoDios, ye namopan kinokis* nochi nin itlateochiualis:

3 Namechteochiuaskej itech altepetl uan itech tlala”.

4 “Kinteochiuaskej namokoneuan, tlen tlakis* namotlal uan inkoneuan namovacas uan namochkauan”.*

5 “Kiteochiuaskej namochiki uan kanin nankineloskej tixtli”.

6 “Kiteochiuaskej nochi tlen nankichiuaskej”.

7 “Jehová kichiuas namoixpan makintlanilikan akinmej namechkokoliaj tlen namechixnamikiskej. San sekan namechixnamikiskej pero moxixiniskej ijkuak namechcholiliskej. 8 Jehová tlanauatis manamechteochiuakan kanin nankinechikouaj namotlakual uan noijki makiteochiuakan tlen nankichiuaj uan namechteochiuas itech tlali tlen Jehová namoDios namechmakas. 9 Jehová kichiuas xiyetokan ialtepe santo ijkon ken onamechilui,* tla nankitlakamatij itlanauatiluan Jehová namoDios uan nannemij itech iojuiuan. 10 Nochtin oksekimej altepemej kitaskej namejuan nankipiaj itoka Jehová uan namechimakasiskej”.*

11 “Jehová kichiuas xikinpiakan miakej namokoneuan, namoyolkauan uan tlamochiuas ipan tlali tlen Jehová okinmilui namouejkatatajuan namechmakaskia. 12 Jehová namechtlatlapolis ompa iluikak kanin kipixtok miak tlamantli, para kichiuas makiaui ipan tlali ijkuak moneki uan para kiteochiuas nochi tlen nankichiuaskej. Namejuan nankintlanetiskej miakej altepemej pero namejuan amitlaj nankintlaneuiliskej. 13 Tla nankitlakamatij uan nankichiuaj tlen kijtouaj itlanauatiluan Jehová namoDios tlen axkan namechnauatijtok, Jehová namechueyitlalis uan amo kitekauilis manamechnauatikan. Namejuan nanyetoskej tlakpak uan amo tlakxitlan. 14 Amo xiuiaj itech se ojtli tlen amo kuali, nion ik namoyekma nion ik namoopochma para nankintokaskej uan nankintekichiuiliskej oksekimej dioses”.

15 “Pero tla amo nankikakij itlajtol Jehová namoDios uan amo nankintlakamatij* itlanauatiluan uan tlen ye namechiluia xikchiuakan, tlen axkan ne namechiluijtok, namechuijuikaltiskej* uan namechpanos nin tlamantli amo kuali:

16 Namechuijuikaltiskej itech altepetl uan noijki itech tlala”.

17 “Namochiki uan kanin nankinelouaj namotix amitlaj kipias porque namechuijuikaltiskej”.

18 “Ye amo namechteochiuas ika miakej namokoneuan, namotlala amo miak tlamochiuas uan noijki amo nankinpiaskej miakej torojkonemej nion ichkakonemej”.*

19 “Namechuijuikaltiskej ijkuak nankalakiskej uan ijkuak nankisaskej”.

20 “Jehová kichiuas amo kuali makisa nochi tlen nankichiuaskej porque onankichijkej tlen amo kuali uan onankikajkej. Noijki kichiuas ximomojtikan uan namechtlajyouiltis hasta nanpojpoliuiskej uan san niman nanmikiskej. 21 Jehová kichiuas kokolistli namotech mamopepecho hasta ijkuak namechpojpolos itech tlali tlen nankimoaxkatiskej. 22 Jehová namechtlajyouiltis ika tuberculosis, sapanoua nankipiaskej totonik, nanposauiskej, nantotonkamikiskej, nantlajyouiskej ika espada, chikauak totonkaejekas uan namoplantas uakiskej. Nochi non namechpanos hasta nanmikiskej. 23 Iluikak tlen kajki ikpak* namotsonteko yetos de cobre uan tlali tlen kajki itlampa namokxiuan yetos de tepostli. 24 Jehová kichiuas kiauitl tlen uetsis namotlal, mamokopa tlalpinoli* uan xali, desde iluikak namopan uetsis hasta namechpojpolos. 25 Jehová kichiuas manamechtlanilikan inmixpan akinmej namechkokoliaj. San sekan nankinmixnamikiskej pero nanmoxixiniskej ijkuak nankincholiliskej. Uan nochtin tekiuajkayomej tlen katej tlaltikpak momojtiskej miak ijkuak namechitaskej. 26 Ijkuak nanmikiskej, namechkuaskej nochtin totomej* tlen katej iluikak uan nochtin yolkamej tlen katej ipan tlali uan amikaj kinmomojtis”.

27 “Jehová namechtlajyouiltis uan nantemalkisaskej ijkon ken opanok Egipto, nantsinsauayokisaskej, nansauatiskej uan namechajsis okseki kokolistli ipan namonakayo. Ijkuak namechajsis non kokolistli amo uelis nanpajtiskej. 28 Ijkuak Jehová namechtlajyouiltis kichiuas xikuatlapolokan, amo xitlachiakan uan amo nankimatiskej tlen nankichiuaskej. 29 Tlajkotonal amo nankimatiskej kanin nanyaskej ijkon ken kipanoua akin amo tlachia porque ipan tlayouatok, nochi tlen nankichiuaskej amo kuali kisas, namechkajkayauaskej uan san namechtlachtekilijtoskej pero amikaj namechpaleuis. 30 Nankijtlaniskej se siuatl pero okse tlakatl kichiualtis iuan mamoteka. Nankichiuaskej se kali pero amo ompa nanchantiskej. Nankitokaskej uvas pero amo nankikuaskej ijkuak tlakis. 31 Namoixpan kimiktiskej namotoro pero amo nankikuaskej inakayo, namoixpan kichtekiskej namoburro pero amo oksepa nankajsiskej. Kinmakaskej namochkauan akinmej namechkokoliaj uan namejuan amikaj namechpaleuis. 32 Nankitaskej ijkuak kintemaktiskej namokoneuan okse altepetl, namejuan nochipa nankinmilnamikiskej pero amitlaj uelis nankichiuaskej. 33 Se altepetl tlen ayamo nankixmatij kikuas tlen tlakis namotlala uan nochi tlen ompa motemakas. Nochipa namechkajkayauaskej uan namechpatlachoskej. 34 Tlen nankitaskej kichiuas xikuatlapolokan”.

35 “Jehová namechtlajyouiltis ijkuak kichiuas xitemalkisakan itech namotlankuauan uan namometsuan,* desde namokxitlampa hasta ipan namotsonteko, fiero namechkokos uan amo nanpajtiskej. 36 Jehová namechuikas uan noijki kiuikas tekiua tlen nankitlaliskej manamechnauati, itech okse altepetl tlen amo nankixmatij nion namouejkatatajuan okixmatkej. Ompa nankintekichiuiliskej oksekimej dioses de kouitl uan de tetl.* 37 Itech nochi altepemej kanin Jehová namechuikas momojtiskej porque kimatiskej tlen onamechpanok, namechuetskiliskej uan namechpinauiskej”.

38 “Nankiuikaskej namotlala miak semilla pero amo miak nantlaololoskej porque chapulimej kikuaskej. 39 Nankitokaskej uvas uan nankimaluiskej, pero amo nankoniskej vino nion itlaj nankololoskej porque okuili nochi kikuas. 40 Itech nochi namotlal nankipiaskej olivos pero amo nankimotlaliliskej aceite porque namoaceitunas uetsiskej. 41 Nankinpiaskej namokoneuan pero ayakmo yetoskej namoaxkauan porque kinuikaskej. 42 Miakej okuilimej kintlamiskej nochi namokojuan uan tlen motemakas itech namotlal. 43 Akinmej uitsej itech okseki altepemej tlen namouan chantij okachi mochikajtiaskej uan namejuan nankipolojtiaskej namochikaualis. 44 Yejuan namechtlanetiskej pero namejuan amo nankintlanetiskej. Yejuan ueyititoskej uan namechnauatiskej”.

45 “Namechuijuikaltiskej uan namechpanos nin tlamantli amo kuali hasta nanpojpoliuiskej, porque amo onankikakej itlajtol Jehová namoDios, amo onankintlakamatkej* itlanauatiluan uan tlen ye onamechilui xikchiuakan. 46 Namejuan uan namoxuiuan nochipa ijkon namechpanos, non itlaj kinextis uan tlanejmachtis. 47 Porque ijkuak amitlaj onamechpolo uan miak onankipixkej, amo onankitekichiuilijkej Jehová namoDios ika pakilis uan amo onanyolpakej. 48 Jehová kintitlanis akinmej namechkokoliaj manamechixnamikikan, ijkuak nankintekichiuiliskej nanapismikiskej, nanamikiskej, amo nankipiaskej miak namotlaken uan nochi namechpolos. Ye namechkechtlalilis se tepostli hasta namechpojpolos”.

49 “Jehová kititlanis se altepetl tlen uejka yetos manamechixnamiki, non altepetl kajki hasta okse ilado tlaltikpak. Itlajtol amo nankajsikamatiskej* uan namopan yas ken se águila. 50 Non altepetl kualankamiktos uan amo kintlakaitas akinmej yokokoxkatikej* nion kinmiknomatis telpochmej. 51 Yejuan kinkuaskej inkoneuan namoyolkauan uan tlen mochiuas ipan namotlal hasta namechpojpoloskej. Amo namechkauiliskej semillas, nion vino yankuik, nion aceite, nion torojkonemej, nion ichkakonemej hasta namechpojpoloskej. 52 Tlatsakuaskej itech nochi namoaltepeuan tlen yetoskej itech namotlal uan amo uelis nankisaskej, ijkon panos hasta mauetsi tepamitl uejkapantik uan chikauak tlen ika nanmopaleuiaj. Namechtsajtsakuaskej itech nochi altepemej tlen katej itech tlali tlen Jehová namoDios onamechmakak. 53 Ijkuakon monekis nankinkuaskej namokoneuan, nankikuaskej innakayo namokoneuan tlen Jehová namoDios okichi xikinpiakan. Ijkon panos porque namechtsajtsakuaskej uan akinmej namechkokoliaj kichiuaskej san ximotekipachojtokan”.

54 “Tlakatl tlen namouan kajki, akin okachi yolyamanki uan amitlaj kipoloua noijki amo kiknomatis ikni, nion isiua tlen kitlasojtla, nion ikoneuan tlen ok iuan yetoskej 55 uan amitlaj kinyekoltis ijkuak kinkuas ikoneuan. Ye ayakmo itlaj kipias porque akinmej namechkokoliaj kintsajtsakuaskej namoaltepeuan uan kichiuaskej san ximotekipachojtokan. 56 Uan siuatl tlen namouan kajki, tlen yolkuali uan amitlaj kipoloua, tlen amo keman okijto moketsas ipan tlali porque amo keman itlaj okipolo, amo kiknomatis inamik tlen kitlasojtla nion ikoneuan. 57 Noijki amo kiknomatis placenta tlen kisas itsala imetsuan* nion ikoneuan tlen kinpias. Ye ichtaka kinkuas porque akinmej namechkokoliaj kintsajtsakuaskej namoaltepeuan uan kichiuaskej ximotekipachokan miak”.

58 “Tla amo nankitlakamatij nochi tlen kijtoua nin Tlanauatil, tlen ijkuilitok itech nin libro uan amo sapanoua nankitlakaitaj* nin tokayotl ueyititok uan tetlajtlachialti, kijtosneki itoka Jehová namoDios, 59 Jehová kichiuas namejuan uan namoxuiuan xikpiakan chauistli temomojti, ueyi chauistli tlen uejkauas uan kokolistli tekoko tlen uejkauas. 60 Ye kichiuas oksepa xitlajyouikan ika kokolistli tlen opanok Egipto, tlen namejuan onankimakasiayaj* uan amo nanpajtiskej. 61 Jehová noijki kichiuas xitlajyouikan ika kokolistli noso chauistli tlen amo kajki itech libro kanin ijkuilitok Tlanauatil, ijkon namechpanos hasta ijkuak nanpojpoliuiskej. 62 Maski onankatkaj sapanoua nanmiakej ijkon ken sitlalimej tlen katej iluikak, amo miakej nanmokauaskej porque amo onankikakej itlajtol Jehová namoDios”.

63 “Ijkon ken Jehová kuali okitak namechteochiuas uan namechmiakilis, Jehová noijki kuali kitas namechpojpolos uan namechtlajtlamis. Namechkixtiskej itech tlali tlen yinamechmakaskej para mayeto namoaxka”.

64 “Jehová namechxexelos itech nochi altepemej, desde kanin peua tlali hasta kanin tlami, ompa monekis nankintekichiuiliskej dioses de kouitl uan de tetl, tlen nion namejuan nion namouejkatatajuan okinmixmatkej. 65 Ijkuak nanyetoskej itech nonmej altepemej amo nankipiaskej yolseuilis nion nankipiaskej kanin nankiseuiskej namokxi. Jehová kichiuas namoyolo mamotekipacho, namoixtololouan masotlauakan uan amo nankimatiskej tlen nankichiuaskej. 66 Nankixnamikiskej mikilis, tlajka uan youak nanmomojtiskej uan amo nankimatiskej kox ok nanyoltoskej. 67 Namoyolo fiero momojtis uan tlen nankitaskej kichiuas kualkan* xikijtokan: ‘¡Niknekiskia yimatiotlaki!’ uan tiotlak nankijtoskej: ‘¡Niknekiskia yimatlanesi!’. 68 Jehová kichiuas ximokopakan Egipto itech barco, nanyaskej ik ojtli tlen onamechilui ayakmo keman nankitaskiaj. Ompa monekis nanmonemakaskej innauak akinmej namechkokoliaj para nanyetoskej intlakeualuan pero amikaj namechkouas”.

29 Ijkin omoijto ijkuak omochi acuerdo tlen Jehová okinauati Moisés makichiua iuan altepetl Israel ompa Moab, ijkuakon inuan yokichijka se acuerdo ompa Horeb.

2 Ijkuakon Moisés okinechiko nochi altepetl Israel uan okinmilui: “Namejuan onankitakej nochi tlen Jehová okichi namoixpan ompa Egipto, onankitakej tlen okitokti* faraón, nochtin itlakeualuan uan nochi itlal, 3 namejuan onankitakej ika namoixtololouan fiero okintlajyouiltijkej, omonexti uejueyij tlamantli uan milagros. 4 Pero hasta axkan Jehová amo namechmaka se namoyolo mateajsikamati,* noijki namoixtololouan amo tlachiaj nion namonakasuan amo tlakakij. 5 ‘Ne 40 xiuitl onamechyekanki kanin tlauaki uan amo otlajtlanki namotlaken tlen onankiuikayaj nion namokakuan* tlen onankintlalijtokaj. 6 Amo onankikuajkej pan nion onankonikej vino nion okseki tlamantli tlen teuintia para nankimatiskiaj ne niJehová namoDios’. 7 Satepan nikan otiajsikoj uan Sehón tekiua de Hesbón uan Og tekiua de Basán, otechixnamikej pero tejuan otikintlanilijkej. 8 Otikmokauijkej intlal uan otikinmakakej rubenitas, gaditas uan tlajko intribu manasitas para mayeto inmiaxka. 9 Xikchiuakan uan xiktlakamatikan* nochi tlen kijtoua nin acuerdo, ijkon nochi tlen nankichiuaskej kuali kisas”.

10 “Axkan nochtin namejuan nikan nankatej ixpan Jehová namoDios: akinmej kinyekanaj tribus, tlayekankej, akinmej tlanauatiaj, nochtin tlakamej de Israel, 11 konemej, siuamej tlen yomonamiktijkej uan akinmej uitsej itech okse altepetl tlen nikan namouan katej, desde akin kojkoui hasta akin kikixtia atl. 12 Nikan nankatej para nanmoyekkauaskej uan ijkon nankichiuaskej se acuerdo iuan Jehová namoDios, tlen Jehová namoDios axkan namouan kichijtok 13 para axkan nanmochiuaskej ialtepe uan ye yetos namoDios. Ijkon ken okinmilui* uan omoka inuan namouejkatatajuan Abrahán, Isaac uan Jacob”.

14 “Amo san namouan nikchijtok nin acuerdo uan timoyekkajtokej. 15 Nikchijtok inuan akinmej axkan nikan touan katej ixpan Jehová toDios uan noijki inuan akinmej axkan amo touan nikan katej. 16 (Namejuan nankimatij ken otichantiayaj ompa Egipto uan noijki nankimatij ken otikinpanouijtiajkej altepemej ijkuak otiualayaj. 17 Namejuan onankitakej tlamantli pitsotik uan imágenes tetlajyaltijkej* de kouitl, tetl,* plata uan oro tlen yejuan okinpiayaj). 18 Kuali xikitakan nion se tlakatl, siuatl, familia noso se tribu tlen axkan nikan kajki, amo makachiua* iyolo inauak Jehová toDios para kintekichiuilis indioses okseki altepemej. Akin ijkon kichiuas yetoskia ken ineluayo se planta kanin kisa veneno uan itlaj chichik”.

19 “Pero tla ikaj kikaki tlen nikan timoyekkajtokej pero moueyineki uan iyolipan* kijtoua: ‘Nikpias yolseuilis maski nimochijchikauas nias itech ojtli tlen niknekis’ uan non kinmijtlakoua nochtin akinmej inauak yetoskej, 20 Jehová amo kinekis kitlapojpoluis. Jehová fiero kualanis iuan akin ijkon kichiuas uan nochi tlamantli amo kuali tlen ijkuilitok itech nin libro ipan yas, noijki Jehová kipojpolos itlampa iluikak itoka akin ijkon kichiuas. 21 De nochtin itribus Israel, Jehová kixelos para kitlajyouiltis ika tlamantli amo kuali tlen kijtoua acuerdo tlen kajki itech libro kanin ijkuilitok Tlanauatil”.

22 “Ijkuak inkoneuan namokoneuan tlen nestiaskej* uan akinmej uejka uitsej itech okseki altepemej, kitaskej chauistli tlen yetos itech nin tlali uan tlamantli temojti tlen Jehová kititlanilis, 23 azufre, istatl uan tlitl, non kichiuas amo matlatokakan itech nochi nin tlali uan amitlaj ixuas nion selias itlaj planta, ijkon ken opanok ijkuak okipojpolojkej Sodoma, Gomorra, Admá uan Zeboyim tlen Jehová okinpojpolo ijkuak fiero okualantoka, 24 ijkuak ijkon kitaskej, yejuan uan nochtin altepemej motlajtlaniskej: ‘¿Tleka Jehová ijkon okitokti nin tlali? ¿Tlen okichi fiero makualani?’. 25 Uan yejuan kijtoskej: ‘Ijkon okinpanok porque amo okichijkej iacuerdo Jehová inDios inuejkatatajuan, acuerdo tlen inuan okichi ijkuak okinkixti Egipto. 26 Yejuan opejki kintekichiuiliaj oksekimej dioses uan inmixpan omotlankuaketskej, nonmej dioses amo okinmixmatiayaj uan ye okinmiluijka amo makinueyichiuakan. 27 Ikinon Jehová fiero okualanki uan okititlanili nin tlali nochi tlamantli amo kuali tlen ijkuilitok itech nin libro. 28 Uan Jehová fiero okualanki ikinon okinkixti itech itlal uan okintitlanki itech okse tlali uan ompa katej hasta axkanʼ”.

29 “Tlamantli tlen tlatitok iaxka Jehová toDios. Pero nochipa yetos toaxka tlamantli tlen yotechmatiltijkej uan noijki yetos inmiaxka tokoneuan, para tikchiuaskej nochi tlen kijtoua nin Tlanauatil”.

30 “Ijkuak namechpanos nochi ninmej tlajtolmej tlen namoixpan onikintlali, kijtosneki ijkuak namechteochiuaskej uan ijkuak namechuijuikaltiskej* uan nankinmilnamikiskej ijkuak nanyetoskej itech altepemej kanin Jehová namoDios namechxexelos, 2 uan ijkuak namejuan uan namokoneuan nanmokopaskej inauak Jehová namoDios uan nankikakiskej itlajtol ika nochi namoyolo uan ika nochi namoyolilis* ijkon ken axkan namechnauatijtok, 3 Jehová namoDios namechnotsatij kanin namechuikaskej, ye namechiknomatis uan namechololojtias ijkuak nanyetoskej itech nochi altepemej kanin Jehová namoDios namechxexelos. 4 Jehová namoDios namechololos uan kichiuas ximokopakan maski namoaltepe xexelitos hasta kanin tlami iluikak. 5 Jehová namoDios namechuikas itech tlali tlen namopapanuan okimoaxkatijkej uan ompa nanchantiskej, ye namechteochiuas uan okachi namechmiakilis amo ken namopapanuan. 6 Jehová namoDios kichipauas namoyolo uan noijki inyolo namoxuiuan. Ijkon nankitlasojtlaskej Jehová namoDios ika nochi namoyolo, ika nochi namoyolilis uan nanyoltoskej. 7 Jehová namoDios kintitlanilis nochi nin tlamantli amo kuali akinmej namechkokoliaj, akinmej onamechtlauelitakej uan onamechkuitlapantokakej”.

8 “Satepan namejuan nanmokopaskej, nankikakiskej itlajtol Jehová uan nankintlakamatiskej* nochi itlanauatiluan tlen axkan ne namechnauatijtok. 9 Jehová namoDios kiteochiuas miak nochi tlen nankichiuaskej, kinmiakilis namokoneuan, namoyolkauan uan tlen motemakas namotlal. Porque Jehová oksepa kuali kitas namechteochiuas ijkon ken kuali okitak kinteochiuas namouejkatatajuan. 10 Porque ijkuakon nankikakiskej itlajtol Jehová namoDios uan nankintlakamatiskej itlanauatiluan uan tlen okijto xikchiuakan, tlen katej itech libro kanin ijkuilitok Tlanauatil. Nanmokopaskej inauak Jehová namoDios ika nochi namoyolo uan ika nochi namoyolilis”.

11 “Ninmej tlanauatilmej tlen axkan namechnauatijtok, amo oui nankintlakamatiskej nion uejka katej. 12 Amo katej ompa iluikak para ikaj kijtos: ‘¿Akin tlejkos iluikak para kinualikas uan ijkon tejuan uelis tikinkakiskej uan tikintlakamatiskej?’.* 13 Noijki amo katej itech okse ilado mar para ikaj kijtos: ‘¿Akin kipanouis mar para kinualikas uan ijkon tejuan uelis tikinkakiskej uan tikintlakamatiskej?’. 14 Porque itlajtol toTajtsin Dios kajki namonauak, itech namokamak uan namoyolipan* para nankitlakamatiskej”.*

15 “Techkakikan, axkan namoixpan niktlalia yolilis uan tlen kuali. Noijki namoixpan niktlalia mikilis uan tlen amo kuali. 16 Nanyoltoskej uan nanmomiakiliskej tla nankinkakij itlanauatiluan Jehová namoDios tlen axkan ne namechnauatijtok, tla nankitlasojtlaj Jehová namoDios, nannemij itech iojuiuan, nankintlakamatij* itlanauatiluan, tlen okijto xikchiuakan uan tlanauatilmej tlen okintlali. Ijkon Jehová namoDios noijki namechteochiuas itech tlali tlen nankimoaxkatiskej”.

17 “Pero tla namoyolo moxeloua, amo nantlakakij, nankimokauiliaj manamechyoltilanakan, nanmotlankuaketsaj inmixpan oksekimej dioses uan nankintekichiuiliaj, 18 axkan ne namechiluia nanmikiskej. Amo uejkika nanyoltoskej itech tlali tlen nankimoaxkatiskej ijkuak nankipanouiskej aueyatl* Jordán. 19 Namoixpan yoniktlali yolilis uan mikilis, tlateochiuali uan tlamantli amo kuali. Iluikak uan tlaltikpak namotestigos. Namejuan uan namoxuiuan moneki nankipejpenaskej yolilis para nanyoltoskej. 20 Xiktlasojtlakan Jehová namoDios, xikkakikan itlajtol uan amo xikkauakan. Porque ye namoyolilis uan ye kichiuas xiuejkauakan itech tlali tlen Jehová okinmilui* kinmakaskia namouejkatatajuan Abrahán, Isaac uan Jacob”.

31 Ijkuakon Moisés ijkin okinmiluito nochtin israelitas: 2 “Yinikpia 120 xiuitl uan ayakmo uelis namechyekanas, porque Jehová onechilui: ‘Amo tikpanouis aueyatl* Jordán’. 3 Jehová namoDios yas namoixpan uan ye namoixpan kinpojpolos altepemej uan namejuan nankimoaxkatiskej intlal. Ijkon ken Jehová okijto, Josué namechyekanas para nanpanoskej okse lado aueyatl Jordán. 4 Jehová kintoktis* nonmej altepemej tlen okintokti* tekiuajkej tlen okinnauatiayaj amorreos, Sehón uan Og uan noijki tlen okintokti intlaluan ijkuak okinpojpolo. 5 Jehová kichiuas xikintlanilikan uan namejuan nankintoktiskej* nochi tlen onamechnauati. 6 Ximochikauakan uan ximoyolchikauakan, amo ximomojtikan nion xikinmimakasikan* porque Jehová namoDios namouan kajki. Ye amo keman namechkauas uan nochipa namechpaleuis”.

7 Ijkuakon Moisés okinotski Josué uan inmixpan nochtin israelitas okilui: “Ximochikaua uan ximoyolchikaua, porque te tikuikas nin altepetl itech tlali tlen Jehová okinmilui* inuejkatatajuan kinmakaskia uan te tikinmakas para mayeto inmiaxka. 8 Jehová moixpan yaui uan mouan yetos. Amo keman mitskauas uan nochipa mitspaleuis, ikinon amo ximomojti”.

9 Satepan Moisés okijkuilo Tlanauatil uan okinmakak teopixkej levitas akinmej okiuikayaj iarca Jehová tlen ika omochi acuerdo. Noijki okinmakak akinmej otlayekanayaj Israel. 10 Moisés okinnauati: “Chichikometika xiuitl, ijkuak omoijto amo nankitlajtlaniskej tlen namechuikiliaj, ijkuak nanmiluichiuaskej ijkuak nankinchiuaskej kaltsitsintin* 11 uan ijkuak nochtin israelitas yaskej ixpan Jehová namoDios kanin ye kijtos, moneki nankintlajtoltiliskej nochtin israelitas non Tlanauatil para makikakikan. 12 Xiknechikokan altepetl, xikinnechikokan tlakamej, siuamej, konemej uan akinmej uitsej itech okseki altepemej tlen chantij itech namoaltepeuan, para matlakakikan, mamomachtikan uan para sapanoua makitlakaitakan* Jehová namoDios uan kuali makitakan makichiuakan nochi tlen kijtoua Tlanauatil. 13 Ijkuakon inkoneuan tlen ayamo kimatij tlen kijtoua Tlanauatil, kikakiskej uan momachtiskej ken sapanoua kitlakaitaskej* Jehová namoDios ijkuak nanchantitoskej itech tlali tlen nankimoaxkatiskej ijkuak nankipanouiskej aueyatl Jordán”.

14 Satepan Jehová okilui Moisés: “Techkaki, yiajsis tonal ijkuak timikis. Xiknotsa Josué uan xiuiaj kalnechikol para niktlalis matlayekana”. Ikinon Moisés uan Josué oyajkej kalnechikol. 15 Ijkuakon Jehová omonexti itech kalnechikol itech mixtli* uan mixtli omotlali ikaltempa kalnechikol.

16 Satepan Jehová okilui Moisés: “Techkaki, te yitimikis uan nin altepetl peuas auilnemis inuan dioses* tlen oksekan kinueyichiuaj tlen katej ik tlali kanin ajsitiuij. Yejuan nechkauaskej uan ayakmo kichiuaskej acuerdo tlen inuan onikchi. 17 Ijkuakon inuan nikualanis, nikinkauas uan ayakmo inuan niyetos* hasta mapojpoliuikan. Ijkuak kinpanos miak tlamantli amo kuali uan tlajyouiskej, yejuan kijtoskej: ‘Ijkon techpanotok porque Dios amo touan kajki’. 18 Pero ne amo inuan niyetos porque okichijkej tlen amo kuali ijkuak okintokakej oksekimej dioses”.

19 “Xikijkuilokan nin tlakuikali uan xikinmachtikan israelitas. Xikchiuakan makimomachtikan, ijkon nin tlakuikali kilnamiktis altepetl Israel tlen panoua ijkuak amo nechtlakamati.* 20 Ijkuak nikinuikas itech tlali tlen onikinmilui inuejkatatajuan nikinmakaskia, kanin onka miak leche uan neujtli,* ijkuak tlakuaskej hasta ixuiskej* uan kuali yetoskej, yejuan kintokaskej oksekimej dioses para kintekichiuiliskej, amo nechtlakaitaskej uan amo kichiuaskej tlen otimokajkej. 21 Ijkuak kinpanos miak tlamantli amo kuali uan tlajyouiskej, nin tlakuikali kinmilnamiktis tlen panoua ijkuak amo nechtlakamatij* (porque inmixuiuan amo moneki kilkauaskej), porque ne yinikmati tlen kinekij kichiuaskej uan ijkon yonikmatiaya achto nikinualikaskia itech tlali tlen onikinmilui nikinmakas”.

22 Non tonal Moisés okijkuilo tlakuikali uan okinmititi israelitas.

23 Ijkuakon ye* okitlali Josué ikone Nun matlayekana uan okijto: “Ximochikaua uan ximoyolchikaua, porque te tikinuikas israelitas itech tlali tlen onikinmilui nikinmakaskia uan ne ok mouan niyetos”.

24 Ijkuak Moisés otlanki okijkuilo itech se libro nochi tlen kijtoua nin Tlanauatil, 25 Moisés ijkin okinnauati levitas tlen okiuikayaj iarca Jehová tlen ika omochi acuerdo: 26 “Xikuikakan nin libro kanin ijkuilitok Tlanauatil uan xiktlalikan inakastlan iarca Jehová namoDios tlen ika omochi acuerdo, non yetos ken itestigo toTajtsin Dios tlen namechteluis. 27 Ne nikmatok namejuan nanteixnamikij uan nanyoltlakuauakej. Axkan ok niyoltok uan namejuan sapanoua nankixnamikij Jehová ¡ijkuak nimikis okachi nankixnamikiskej! 28 Xikinnechikokan noixpan akinmej kinyekanaj tribus uan akinmej tlanauatiaj para nikinmiluis ninmej tlajtolmej, niktlalia iluikak uan tlaltikpak ken notestigos para kinteluiskej. 29 Porque ne nikmatok ijkuak yonimiki namejuan nankichiuaskej tlen amo kuali uan ayakmo nankitokaskej ojtli tlen onamechnauati xiktokakan. Satepan namechpanos tlen amo kuali, porque namejuan nankichiuaskej tlen amo kuali ixpan Jehová uan nankikualaniskej ika tlen nankichiuaskej”.

30 Moisés inmixpan nochtin israelitas okinmijto nochi ninmej tlajtolmej tlen kipia nin tlakuikali:

 3 Porque niktematiltis itoka Jehová.

¡Xiktematiltikan iueyitilis toTajtsin Dios!

 5 Namejuan onanmoijtlakojkej.

Amo nanikoneuan toTajtsin Dios uan non namejuan namotlajtlakol.

Namejuan amo nanyolkualmej uan nankichiuaj tlen amo kuali.

15 Ijkuak Jesurún* omotoma, oteixnamik uan opejki tlatejteliksa.

Te otimotoma, otietiak uan otixuik.*

29 ¡Tla yejuan yetoskia ixtlamatkej, itech nochi non mokuayejyekoskiaj!*

Mokuayejyekoskiaj tlen panoskia tla ijkon kichiuaskiaj.

Yejuan mameuakan uan manamechpaleuikan

uan intech ximopaleuikan.

Ne nitemiktia uan niteyolitia.

44 Moisés okinmijtoto nonmej tlajtolmej tlen kipia non tlakuikali inmixpan akinmej pouij itech altepetl. Ye oyajki iuan Hosea* ikone Nun. 45 Ijkuak Moisés otlanki ijkon okinmilui nochtin israelitas, 46 okijto: “Xikneltokakan tlen axkan namechnejmachtijtok uan xikinnauatikan namokoneuan makichiuakan nochi tlen ijkuilitok itech Tlanauatil. 47 Porque miak ipati tlen namechiluijtok uan non uelis kichiuas xiyoltokan. Ika tlen namechiluijtok, uelis nanyoltoskej miak xiuitl itech tlali tlen nankimoaxkatiskej ijkuak nankipanouiskej aueyatl* Jordán”.

48 Non tonal Jehová omotlapoui iuan Moisés uan okilui: 49 “Xitlejko itech tepetl Nebo tlen kajki Abarim, tlen kajki itech itlal Moab kanin mota Jericó, para tikitas tlali tlen kajki Canaán tlen nikinmaxkatilis israelitas. 50 Itech tepetl kanin titlejkos ompa timikis uan mitstokaskej inuan mouejkatatajuan,* ijkon ken mokni Aarón omiki itech tepetl Hor uan okitokakej inuan iuejkatatajuan. 51 Porque nanmomej onankatkaj intlajkotia israelitas kanin okiski atl, ompa Meribá tlen kajki Cadés ompa Zin kanin tlauaki, ompa namejuan amo onantechtlakamatkej* uan amo onankiteititijkej nisanto inmixpan nochtin israelitas. 52 San uejka tikitas non tlali pero amo tikalakis itech tlali tlen ne nikinmakas israelitas”.

33 Moisés itekipanojka akin melauak toTajtsin Dios, ijkin okinteochi israelitas achto mikiskia. 2 Ye okijto:

 7 Moisés ijkin okiteochi Judá:

 8 Ijkin okijto de Leví:

12 Ijkin okijto de Benjamín:

13 Ijkin okijto de José:

18 Ijkin okijto de Zabulón:

19 Yejuan kinnotsaskej altepemej mayakan itech tepetl.

Ompa kitemakaskej tetliokolil akinmej kichiuaj tlen kuali

20 Ijkin okijto de Gad:

“Kiteochiuaskej akin kiueyitilis kanin tlamij itlaluan Gad.

Akinmej kiyekanaj altepetl monechikoskej.

22 Ijkin okijto de Dan:

“Dan se león konetl

uan ualtsikuinis* desde Basán”.

23 Ijkin okijto de Neftalí:

Kimoaxkatia tlali tlen kajki ik kanin kisa tonaltsin uan ik sur”.

24 Ijkin okijto de Aser:

“Aser okiteochijkej porque okinpixki ikoneuan.

29 ¡Xipaki Israel!

34 Satepan Moisés okiski Moab kanin tlauaki uan otlejkok tepetl Nebo, ikpak* Pisgá desde kanin mota Jericó. Ijkuakon Jehová okititi nochi tlali, desde Galaad hasta Dan. 2 Okititi nochi itlal Neftalí, Efraín, Manasés uan Judá, hasta mar tlen kajki ik kanin motlatia tonaltsin.* 3 Noijki okititi Négueb, Distrito uan tlamaniktli Jericó kanin katej soyakojmej hasta Zóar.

4 Satepan Jehová okilui: “Nin tlali onikijto* nikmakas Abrahán, Isaac uan Jacob ijkuak onikinmilui nikinmakaskia ixuiuan. Onimitskauili xikita pero amo tipanos”.

5 Ijkuakon Moisés itekipanojka Jehová omiki ompa Moab, ijkon ken Jehová okijtojka. 6 Ye okitokak ompa ixtlauak* tlen kajki Moab iyekapan Bet-Peor. Hasta axkan amikaj kimati kanin toktok. 7 Ijkuak Moisés omiki okipiaya 120 xiuitl, ok oyektlachiaya uan ok chikauak okatka. 8 Israelitas okichokilijkej Moisés 30 tonal ompa Moab kanin tlauaki. Satepan ayakmo okichokilijkej Moisés nion omoyolkokojkej.

9 Moisés okintlali imauan ipan Josué ikone Nun, ikinon okatka sapanoua ixtlamatki.* Ijkuakon israelitas opejki kikakij uan okichijkej tlen Jehová okinauati Moisés. 10 Itech altepetl Israel amo okiski okse profeta ijkon ken Moisés, akin Jehová kuali okixmatki. 11 Ye okinchi milagros uan nochi tlamantli tlen Jehová okinauati makichiua ompa Egipto para kixnamikis faraón, nochtin itlakeualuan uan nochi itlal. 12 Moisés okiteititi okatka machikauak uan okipiaya se chikaualis tetlajtlachialti ixpan nochtin israelitas.