ACHTO CARTA TLEN PABLO OKINMIJKUILILI CORINTIOS

1 Ne niPablo, Jesucristo onechpejpenki maniyeto apóstol porque toTajtsin Dios ijkon okinek. Ne uan tokni Sóstenes 2 tiktitlaniliaj nin carta itlanechikol toTajtsin Dios tlen kajki Corinto. Noijki akinmej nouian kineltokaj itoka toTeko Jesucristo, ye inTeko uan tejuan noijki toTeko. ToTajtsin Dios onamechpejpenki san sekan xiyetokan iuan Jesucristo, uan onamechnotski para xiyetokan nanyolchipauakej:

3 ToTajtsin Dios uan toTeko Jesucristo manamechtliokolikan tlen kuali uan manamechmakakan yolseuilistli.

4 Nochipa niktlasojkamatilia noDios porque ye namechtliokolia tlen kuali ika Cristo Jesús. 5 Namejuan yonankiselijkej nochi tlamantli porque nankatej iuan Cristo, ueli kuali nantetlapouiaj uan kuali nankixmatij iTlajtol toTajtsin Dios. 6 Namejuan yonankineltokakej ika nochi namoyolo tlen omotematilti itech Cristo. 7 Ikinon namejuan nankipiaj nochi tlen moneki ijkuak nankichiaj mamonexti toTeko Jesucristo. 8 ToTajtsin Dios nochipa namechchikauas uan ijkon amo uelis namechteluiskej ijkuak ajsis itonal toTeko Jesucristo. 9 ToTajtsin Dios nochipa kichiua tlen kijtoua. Ye onamechnotski san sekan xiyetokan iuan Jesucristo akin iKone uan toTeko.

10 Nokniuan, namechtlatlaujtia ika itoka toTeko Jesucristo nannochtin san se tlamantli xikijtokan uan amo ximoxexelokan. Noijki san se tlamantli ximokuayejyekokan* uan san se tlamantli xikpejpenakan nankichiuaskej. 11 Nokniuan, sekimej tlen chantij ichan Cloe onechiluijkej namejuan nanmokualaniaj. 12 Ijkon namechiluia porque sekimej kijtouaj: “Ne niidiscípulo Pablo”, oksekimej kijtouaj: “Ne niidiscípulo Apolos”, oksekimej kijtouaj: “Ne niidiscípulo Cefas”* uan oksekimej kijtouaj: “Ne niidiscípulo Cristo”. 13 ¿Nanmokuayejyekouaj* Cristo xexelitok? ¿Kox Pablo namopatka okimiktijkej itech kouitl? Noso ¿kox onamechapolaktijkej ika itoka Pablo? 14 Niktlasojkamatilia toTajtsin Dios porque ne amo onamechapolakti. Ne san onikinnapolakti Crispo uan Gayo. 15 Ijkon amikaj kijtos: “Ne onechapolaktijkej ika itoka Pablo”. 16 Ne noijki onikinnapolakti akinmej chantij ichan Estéfanas. Pero amo nikilnamiki kox ikaj okse onikiapolakti. 17 Cristo onechtitlanki maniktematilti kuali tlajtoli uan amo onechtitlanki maniteapolakti. Ne amo nitlajtoua ken ixtlamatkej para amo nikchiuas mayeto san nenka oixpoliuik Jesús itech se kouitl.*

18 Akinmej yiixpolitokej kitaj amitlaj ipati kimatiskej Cristo oixpoliuik itech se kouitl. Pero tejuan tlen yitechmakixtiskej tikmatij non kiteititia ichikaualis toTajtsin Dios. 19 Porque ijkuilitok: “Akinmej ixtlamatkej nikchiuas ayakmo mayetokan ixtlamatkej. Amo nikselis tlen mokuayejyekouaj* ixtlamatkej”. 20 ¿Kanin kajki ixtlamatki? ¿Kanin kajki akin tlamachtia tlanauatil? ¿Kanin kajki akin axkan kimati tlananankilis? ¿Amo toTajtsin Dios okiteititi amitlaj ipati inmixtlamatilis akinmej chantij tlaltikpak? 21 Akinmej chantij tlaltikpak amo kixmatij toTajtsin Dios porque kineltokaj yejuan ixtlamatkej, pero toTajtsin Dios okiteititi ye ixtlamatki ijkuak okinmakixti akinmej tlaneltokaj ika tlen titetlapouiaj maski sekimej kitaj amitlaj ipati.

22 Judíos kinekij kinmitaskej milagros, uan griegos kinekij yetoskej ixtlamatkej. 23 Pero tejuan titetlapouiaj Cristo okimiktijkej itech se kouitl. Non kintsakuilia judíos uan akinmej amo judíos kitaj amitlaj ipati. 24 Pero judíos uan griegos tlen yokinnotskej kimatij Cristo kiteititia ichikaualis uan ixtlamatilis toTajtsin Dios. 25 Tlakamej kitaj amitlaj ipati uan amo chikauak tlen iaxka toTajtsin Dios, pero non okachi ixtlamatki uan okachi chikauak amo ijkon ken yejuan.

26 Nokniuan, namejuan yonankitakej ijkuak toTajtsin Dios onamechnotski, miakej onamechitayaj amo namixtlamatkej, amo nanchikauakej uan okitayaj amo ueyititok namofamilia. 27 Pero toTajtsin Dios okipejpenki tlen oksekimej kitaj amitlaj ipati itech nin tlaltikpak para kinpinatis akinmej ixtlamatkej. ToTajtsin Dios okipejpenki tlen oksekimej kitaj amo chikauak itech nin tlaltikpak para kipinatis tlen chikauak. 28 Noijki toTajtsin Dios okipejpenki tlen amo ueyititok itech nin tlaltikpak uan tlen amo kipatioitaj. Ye okipejpenki tlen amitlaj ipati para kipojpolos nochi tlen ipati. 29 Ijkon amikaj uelis moueyinekis ixpan toTajtsin Dios. 30 Ye onamechpaleui san sekan xiyetokan iuan Cristo Jesús. Jesús techititia toTajtsin Dios ixtlamatki uan kichiua tlen kuali. Jesús techpaleuia matiyetokan tiyolchipauakej uan uelis techmakixtis porque okitlaxtla* totlajtlakol, 31 para mamochiua tlen ijkuilitok: “Akin moueyineki, mamoueyineki porque kixmati Jehová”.

2 Nokniuan, ijkuak onia onamechtlajpaloto, amo oui onamechmatilti tlamantli santo tlen amo omomatiaya uan iaxka toTajtsin Dios. Noijki amo onikteititi sapanoua niixtlamatki. 2 Ijkuak namouan onikatka, san onamechmatilti akin Jesucristo uan onamechmatilti ye okimiktijkej itech se kouitl. 3 Ijkuak ne onamechtlajpaloto, onikmachiliaya amo onikatka nichikauak, onimomojtiaya uan sapanoua oniuiuiokaya. 4 Ijkuak ne onamechtlapoui uan onamechmachti, amo onamechyoltilanki ika tlajtoli tlen kinejnekij* ixtlamatkej. Ne onamechtlapoui ika tlajtoli tlen kiteititia ichikaualis espíritu santo, 5 para xikneltokakan ichikaualis toTajtsin Dios uan amo xikneltokakan inmixtlamatilis tlakamej.

6 Akinmej kipiaj chikauak intlaneltokilis tikintlapouiaj itech ixtlamatilistli, pero amo tikinmiluiaj inmixtlamatilis akinmej axkan* yoltokej nion inmixtlamatilis akinmej tlanauatiaj tlaltikpak, porque yejuan ixpoliuiskej. 7 Tejuan tiktematiltiaj itlaj santo tlen amo omomatiaya, nin kijtosneki ixtlamatilis toTajtsin Dios tlen tlatitok. ToTajtsin Dios yokijtojka nin ixtlamatilistli para techueyitlalis uan yokijtojka ijkuak ayamo okatka tlen axkan onka. 8 Nin ixtlamatilistli amo okimatkej tekiuajkej tlen axkan katej, porque tla kimatiskiaj amo kimiktiskiaj toTeko Jesús. 9 Ijkon ken ijkuilitok: “Amikaj okitak, amikaj okikak nion amikaj mokuayejyekoua* tlen toTajtsin Dios yokinyektlalili akinmej kitlasojtlaj”. 10 ToTajtsin Dios ika iespíritu otechnextili nochi tlamantli, porque espíritu santo nochi kinextia, hasta kinextia tlen mokuayejyekoua* toTajtsin Dios maski amikaj kajsikamati.

11 ¿Uelis ikaj kimatis tlen mokuayejyekoua* se tlakatl? Amo. San ye kimati tlen mokuayejyekoua.* Noijki amikaj uelis kimatis tlen mokuayejyekoua* toTajtsin Dios porque san espíritu santo kimati. 12 Tejuan amo otikselijkej iespíritu nin tlaltikpak. Otikselijkej iespíritu toTajtsin Dios para matikixmatikan tlen ye techmaka porque techtlasojtla. 13 Tejuan noijki tikijtouaj nin tlamantli pero amo tiknejnekij* tlajtoli tlen tlamachtiaj ixtlamatkej. Tikijtouaj tlen otechmachti espíritu santo. Espíritu santo techpaleuia matikyekijtokan akin toTajtsin Dios.

14 Pero akin moyekana ika tlen kiyoltilana, amo kiselia tlen kinextia iespíritu toTajtsin Dios porque kita amitlaj ipati. Noijki amo uelis kajsikamatis porque moneki kipaleuis iespíritu toTajtsin Dios makajsikamati. 15 Pero akin moyekana ika iespíritu toTajtsin Dios, ye kajsikamati nochi tlamantli uan amikaj uelis kixkomakas. 16 Porque “¿akin kimati tlen mokuayejyekoua* Jehová para uelis kimachtis?”. Pero tejuan timokuayejyekouaj* ken Cristo.

3 Nokniuan, ne amo ouelik onamechtlapoui ken kintlapouiaj akinmej moyekanaj ika iespíritu toTajtsin Dios. Ne onamechtlapoui ken akinmej kichiuaj tlen kinyoltilana, nanyetoskiaj ken konemej inauak Cristo. 2 Yetoskia ken onamechmakak leche uan amo onamechmakak tlakuali porque ayamo onankipiayaj chikauak namotlaneltokilis. Hasta axkan amo nankipiaj chikauak namotlaneltokilis 3 porque ok nankichiuaj tlen namechyoltilana. ¿Amo nankichiuaj tlen namechyoltilana uan tlen kichiuaj oksekimej ijkuak nanmochauatiliaj uan nanmokualaniaj? 4 Ijkuak nankijtouaj: “Ne niidiscípulo Pablo” uan oksekimej kijtouaj: “Ne niidiscípulo Apolos”, ¿amo nankichiuaj ken oksekimej tlakamej?

5 ¿Akin Apolos? ¿Akin Pablo? Tejuan san tikchiuaj tlen otechnauati toTeko uan otimechpaleuijkej xitlaneltokakan. 6 Ne oniktokak* semilla, Apolos okateki pero toTajtsin Dios okiskalti. 7 Ikinon amitlaj ipati akin otokak nion akin otlaateki, san ye toTajtsin Dios porque ye kiskaltia. 8 Akin toka uan akin tlaatekia san sekan tekipanouaj, pero toTajtsin Dios kinteochiuas ijkon ken otekipanojkej. 9 Tejuan tikpaleuiaj toTajtsin Dios. Namejuan nankatej ken itlal toTajtsin Dios kanin tlatoka. Nankatej ken se kali tlen toTajtsin Dios okichijchi.

10 Ne onikpeualti kali ken se tlakatl tlen kimati kalchiua porque toTajtsin Dios onechtliokoli tlen kuali pero okse kichijtok kali. Nochtin makitakan ken kichijtokej nin kali. 11 Amikaj uelis kipatlas tlen ika motlakxilijtok kali porque ye Jesucristo kitlakxilijtok. 12 Kanin yokipeualtijkej kali, ikaj uelis kichiuas kali ika oro, plata uan temej* kuajkualtsitsintin, noso ika kouitl uan ika tlatlamantli sakatl. 13 Ijkuak ajsis tonal, motas ken okichijkej nochtin inteki. Non tonal, tlitl kiteititis kox kuali noso amo kuali otekipanojkej. 14 Kiteochiuaskej tlakatl tla iteki tlen okichi kanin okipeualtijkej kali kixikos tlitl. 15 Tla tlatlas tlen okichi se tlakatl, nochi kipolos pero ye uelis momakixtis ken ijkuak ikaj kicholilia tlitl.

16 ¿Amo nankimatij namejuan nankatej ken itemplo toTajtsin Dios uan nankipiaj iespíritu santo? 17 ToTajtsin Dios kixpolos akin kipojpolos itemplo, porque itemplo chipauak uan non templo ye namejuan.

18 Amikaj mamokajkayaua. Tla axkan ikaj momachilia ixtlamatki, mamochiua ken amitlaj kimati uan ijkon yetos ixtlamatki. 19 Porque toTajtsin Dios kita amitlaj ipati inmixtlamatilis akinmej chantij tlaltikpak, ijkon ken ijkuilitok: “ToTajtsin Dios kinkauilia ixtlamatkej inselti mamokajkayauakan”. 20 Noijki ijkuilitok: “Jehová kimati amitlaj ipati tlen mokuayejyekouaj* ixtlamatkej”. 21 Ikinon amo ximoueyinekikan ika tlen kichiuaj tlakamej porque nochi tlamantli namoaxka: 22 Pablo, Apolos, Cefas,* tlaltikpak, yolilistli, mikilistli, tlen axkan onka uan tlen satepan yetos, nochi namoaxka. 23 Namejuan namiaxkauan Cristo uan Cristo iaxka toTajtsin Dios.

4 Nochtin moneki matechitakan tejuan tikpaleuiaj Cristo. Tejuan titlakeualmej porque otechmatiltijkej seki tlamantli santo tlen amo omomatiaya uan iaxka toTajtsin Dios. 2 Noijki se tlakeuali moneki kuali kichiuas iteki. 3 Ne amo nechtekipachoua tla namejuan noso jueces nechixkomakaj, nion amo noneuian nimoixkomaka. 4 Ne nikpia chipauak notlalnamikilis pero non amo kijtosneki ne niyolkuali. San ye Jehová kita kox kuali tlen nikchiua noso amo. 5 Ikinon amikaj san niman xikteneuakan,* ximochiakan hasta mauiki toTeko. Ye kikixtis kanin tlanestok nochi tlen tlatitok kanin tlayoua uan kiteititis tlen tikpiaj toyolipan. ToTajtsin Dios kinueyitlalis ijkon ken otekipanojkej.

6 Nokniuan, ne onamechtlajkuilili uan onamechtlapoui tlen nikchiua uan tlen kichiua Apolos para manamechpaleui. Ijkon ijkuak nankichiuaskej tlen tejuan tikchiuaj, uelis nankichiuaskej nin tlamantli: “San xikchiuakan tlen ijkuilitok”. Ijkon amo nanmoueyinekiskej uan amo nankipaleuiskej se uan okse nankitlauelitaskej. 7 ¿Akin kichiua okachi xiueyitito? ¿Amo toTajtsin Dios omitsmakak nochi tlen tikpia? Tla ye nochi omitsmakak, ¿tleka timoueyineki ken yetoskia nochi moselti otikmotlanili?

8 ¿Yinankipiaj nochi tlen namechpoloua? ¿Yinankipiaj nochi tlamantli? ¿Yopejki nantlanauatiaj? Nipakiskia tla yipeuaskia nantlanauatiskej porque ijkon namouan titlanauatiskej. 9 Nikita toTajtsin Dios otechualikak tejuan tiapóstoles saiktlami para matechmiktikan. Porque techitaj akinmej chantij tlaltikpak uan techitaj ángeles. 10 Tejuan techitaj tixoxotin porque tikchiuaj ken Cristo, pero namejuan nanmomachiliaj namixtlamatkej porque nankichiuaj ken Cristo. Tejuan amo tichikauakej pero namejuan nanchikauakej. Namejuan namechtlakaitaj pero tejuan techtlauelitaj. 11 Hasta axkan tiapismikij uan tiamikij, techpoloua totlaken, techtlajyouiltiaj, amo tikpiaj tochan 12 uan chikauak titekipanouaj. Kuali tikinnankiliaj akinmej techuijuikaltiaj. Timochiaj uan titlaxikouaj ijkuak oksekimej techtlajyouiltiaj. 13 Amo tikualanij ijkuak oksekimej techteneuaj* para amo kuali matechitakan. Hasta axkan itech nin tlaltikpak oksekimej techitaj ken tlajsoli uan techitaj amitlaj topati.

14 Amo namechtlajkuililia para namechpijpinatis. Namechtlajkuililia para namechiluis tlen moneki nankichiuaskej porque namechita ken nokoneuan uan namechtlasojtla. 15 Namejuan uelis nankinpiaskej 10,000* akinmej namechmachtiskej xikchiuakan ken Cristo, pero amo nankinpiaj miakej namopapanuan. Ne nika san sekan iuan Cristo Jesús uan onimochi namopapa porque onamechmachti kuali tlajtoli. 16 Ikinon namechtlatlaujtia xikchiuakan ijkon ken ne nikchiua. 17 Ne namechtitlanilia Timoteo, ye yetoskia ken nokone tlen niktlasojtla uan kitekichiuilia toTeko ika nochi iyolo. Ye namechilnamiktis ken niktekichiuilia Cristo Jesús, ijkon ken ne nouian nitlamachtia itech sejse tlanechikol.

18 Sekimej tlen namouan katej moueyinekij porque mokuayejyekouaj* amo nias namechtlajpaloti. 19 Pero tla Jehová kineki, san niman nias namechtlajpaloti. Amo nimomojtia nikmatis tlen kijtouaj akinmej moueyinekij. Nikitas kox kinyekana ichikaualis toTajtsin Dios. 20 Porque iTekiuajkayo toTajtsin Dios moteititia ika ichikaualis toTajtsin Dios uan amo san ika tlajtoli. 21 ¿Tlen nankinekij? ¿Nankinekij manajsiti ika se tlakotl noso san kualyotika uan manikteititi namechtlasojtla?

5 Onechiluijkej auilnemi* se tlakatl tlen namouan kajki. Se ueyi tlajtlakoli tlen kichijtok porque amo ijkon kichiuaj nion akinmej amo tlaneltokaj. Non tlakatl okisiuakuili ipapa. 2 ¿Nanmoueyinekij por non tlajtlakoli? ¿Amo moneki nanmoyolkokoskej para makikixtikan tlakatl tlen ijkon kichiua? 3 Maski ne amo namouan nika, yinankimatij tlen nimokuayejyekoua* uan yonikixkomakak non tlakatl tlen ijkon okichi. Onikixkomakak ken yetoskia namouan nika. 4 Ximonechikokan ika itoka toTeko Jesús, xikilnamikikan tlen nimokuayejyekoua* uan ika ichikaualis toTeko Jesús, 5 non tlakatl xikmaktilikan Satanás para mapojpoliui tlen amo kuali okichi. Ijkon tlen mokuayejyekouaj* akinmej monechikouaj kuali yetos itech itonal toTeko.

6 Amo kuali ximoueyinekikan. ¿Amo nankimatij tepitsin levadura kisamaua nochi tixtli? 7 Xikkixtikan non levadura uan ijkon nanmochiuaskej yankuik tixtli porque namejuan nankatej ken tixtli tlen amo kipia levadura. Cristo okitemakak inemilis ken se tetliokolil uan omochi tochkatsin de Pascua. 8 Ikinon amo matiiluichiuakan ika levadura tlen amo yankuik nion ika levadura tlen amo kuali uan kipia tlajtlakoli. Matiiluichiuakan ika pan tlen amo kipia levadura uan kineskayotia tlen kuali uan tlen melauak.

9 Itech se carta onamechtlajkuilili ayakmo ximouikakan inuan akinmej auilnemij.* 10 Nin amo kijtosneki sepa ayakmo xiyetokan inuan akinmej katej tlaltikpak tlen auilnemij,* tlaixnekij, tlachtekij uan kinueyichiuaj dioses. Tla ijkon yetoskia, monekiskia nankisaskej itech tlaltikpak. 11 Pero axkan namechtlajkuililia ayakmo ximouikakan iuan akin kijtoua tokni pero auilnemi,* tlaixneki, kinueyichiua dioses, tlauijuikaltia, tlauana uan tlachteki. Nion amo iuan xitlakuakan. 12 ¿Tleka moneki ne nikinmixkomakas akinmej amo tokniuan? ¿Amo namejuan nankimixkomakaj tokniuan 13 uan toTajtsin Dios kinmixkomaka akinmej amo tokniuan? “Xikkixtikan akin amo yolkuali tlen namouan kajki”.

6 Ijkuak nanmokualaniaj iuan se tokni, ¿tleka nanmoteluitiuij inmixpan jueces amo yolkualmej uan amo nanyauij inmixpan tokniuan yolchipauakej? 2 ¿Amo nankimatij tokniuan yolchipauakej kinmixkomakaskej akinmej chantij tlaltikpak? Tla nankinmixkomakaskej akinmej chantij tlaltikpak, ¿tleka amo ueli nankiyektlaliaj itlaj tlen amo okachi ipati? 3 ¿Amo nankimatij tikinmixkomakaskej ángeles? Tla ijkon, ¿tleka amo ueli tikyektlaliaj tlen axkan techpanoua? 4 Tla moneki nankiyektlaliskej tlen axkan namechpanoua, ¿tleka nanyauij inmixpan jueces tlen amo pouij itech tlanechikol? 5 Ne ijkon namechiluia para xipinauakan. ¿Amo kajki namouan nion se tlakatl ixtlamatki para kiyektlalis ouijkayotl tlen kipiaj tokniuan? 6 ¡Pero se tokni kiteluiti okse tokni inmixpan jueces tlen amo tlaneltokaj!

7 San nanmopinatiaj ijkuak nanmoteluitiuij inmixpan jueces. ¿Tleka amo nankixikouaj ijkuak tokniuan itlaj namechtoktiaj? ¿Amo okachi kuali xikinkauilikan makimokauikan tlen namoaxka? 8 Pero namejuan nankintoktiaj tlen amo kuali uan nankintlachtekiaj.

9 ¿Amo nankimatij akinmej amo yolkualmej amo kiseliskej iTekiuajkayo toTajtsin Dios? Amo ximokajkayauakan. Akinmej auilnemij,* akinmej kinueyichiuaj dioses, akinmej kikajkayauaj innamik noso insiua, tlakamej tlen mosiuanekij, tlakamej tlen motekaj inuan tlakamej, 10 akinmej tlachtekij, akinmej tlaixnekij, akinmej tlauanaj, akinmej tlauijuikaltiaj uan akinmej tlakajkayauaj para tlachtekiskej amo kiseliskej iTekiuajkayo toTajtsin Dios. 11 Sekimej namejuan ijkon onankichiuayaj, pero yonamechchipajkej uan yonamechpejpenkej para xiyetokan iaxkauan toTajtsin Dios. Yinamechitaj nanyolkualmej ika itoka toTeko Jesucristo uan ika iespíritu toTajtsin Dios.

12 Uelis nikchiuas nochi tlen nikneki pero amo nochi nechpaleuia. Uelis nikchiuas nochi tlen nikneki pero amitlaj nikkauilis manechtlani. 13 Tlakuali omochi para toijtik uan toijtik omochi para tlakuali, pero toTajtsin Dios kipojpolos non ome tlamantli. Tocuerpo amo omochi para matiauilnemikan.* Tocuerpo omochi para matiktekichiuilikan toTeko uan toTeko kimaluia tocuerpo. 14 Pero toTajtsin Dios okiyoliti toTeko uan tejuan noijki techyolitis ika ichikaualis.

15 ¿Amo nankimatij namocuerpo salitok iuan icuerpo Cristo uan mochiua san se? ¿Nankineltokaj namechkixtis itech icuerpo Cristo uan namechsalos itech icuerpo se siuatl tlen monemaka? ¡Amo! 16 ¿Amo nankimatij akin moteka iuan se siuatl tlen monemaka mochiua san se cuerpo iuan non siuatl? Porque toTajtsin Dios kijtoua: “Yejuan mochiuaskej san se”. 17 Pero akin kajki iuan toTeko, mokuayejyekoua* ijkon ken toTeko mokuayejyekoua.* 18 ¡Amo xiauilnemikan!* Akin kichiua okseki tlajtlakoli amo kisokiotia icuerpo pero akin auilnemi* kisokiotia icuerpo. 19 ¿Amo nankimatij namocuerpo se templo kanin kajki iespíritu toTajtsin Dios tlen ye namechmaka? Noijki namocuerpo amo namoaxka, 20 porque sapanoua patio onamechtlaxtla toTajtsin Dios. Ikinon ika namocuerpo xikueyichiuakan toTajtsin Dios.

7 Axkan ne namechnankilis tlen onantechtlajtlanijkej ijkuak onantechtlajkuililijkej. Okachi kuali se tlakatl amo mamoteka iuan se siuatl. 2 Pero axkan miakej auilnemij* ikinon sejse tlakatl makipia isiua uan sejse siuatl makipia inamik. 3 Tlakatl moneki motekas iuan isiua. Siuatl noijki moneki motekas iuan inamik. 4 Siuatl tlen yomonamikti ayakmo kinauatia icuerpo porque inamik kinauatia. Noijki tlakatl tlen yomonamikti ayakmo kinauatia icuerpo porque isiua kinauatia. 5 Amo xikijtokan ayakmo san sekan nanmotekaskej. Pero kuali kajki tla yonanmokajkej kanaj keski tonal amo san sekan nanmotekaskej para nanmotlatlaujtiskej. Satepan oksepa san sekan ximotekakan tlamo namejuan amo uelis nanmonauatiskej uan Satanás uelis namechyejyekos. 6 Uelis nankichiuaskej tlen onikijto, pero non amo se tlanauatil tlen moneki nankitlakamatiskej.* 7 Ne niknekiskia nochtin tlakamej mayetokan ken ne. Pero toTajtsin Dios tlatlamantli kinteochiua. Sekimej monamiktiaj uan oksekimej amo monamiktiaj.

8 Ne nikinmiluia siuamej tlen yoixpoliuik innamik uan akinmej ayamo monamiktiaj, okachi kuali mayetokan ken ne. 9 Pero mamonamiktikan tla amo kimatij monauatiskej. Porque okachi kuali mamonamiktikan uan amo makinektokan ikaj iuan motekaskej.

10 Akinmej yomonamiktijkej ijkin nikinnauatia: siuatl amo makikaua inamik. ToTeko ijkon kinnauatia uan amo ne ijkon nikinnauatia. 11 Pero tla siuatl kikaua inamik, amo oksepa mamonamikti noso mamotlapojpolui iuan inamik. Noijki tlakatl amo makikaua isiua.

12 Pero oksekimej nikinmiluia: tla isiua se tokni amo tlaneltoka, amo makikaua tla siuatl kineki iuan yetos. Ne ijkon nikinmiluia uan amo toTeko ijkon kinmiluia. 13 Tla inamik se siuatl amo tlaneltoka, amo makikaua tla inamik kineki iuan yetos. 14 Porque tlakatl tlen amo tlaneltoka kiteochiuaskej por isiua. Noijki siuatl tlen amo tlaneltoka kiteochiuaskej por inamik, tlamo inkoneuan amo yetoskiaj yolchipauakej pero axkan yolchipauakej. 15 Pero mauia akin amo tlaneltoka tla kineki yas. Ijkuak ijkon panoua, akin tlaneltoka amo mamokuayejyeko* moneki chantis iuan inamik noso isiua porque toTajtsin Dios yonamechmakak yolseuilistli. 16 ¿Ken tikmati te siuatl kox uelis tikpaleuis monamik mamomakixti? Noso, ¿ken tikmati te tlakatl kox uelis tikpaleuis mosiua mamomakixti?

17 Nochtin makipiakan innemilis ijkon ken Jehová okinmakak, uan mamokauakan ijkon ken okatkaj ijkuak ye okinnotski. Ne noijki ijkon nikinnauatia nochtin akinmej monechikouaj.* 18 Tla toTajtsin Dios okinotski se tlakatl ijkuak yokimochiuili circuncisión, ijkon mamokaua. Noijki tla toTajtsin Dios okinotski se tlakatl ijkuak ayamo okimochiuiliaya circuncisión, ijkon mamokaua. 19 Amitlaj ipati tla ikaj okimochiuili circuncisión noso amo okimochiuili circuncisión. Okachi ipati tiktlakamatiskej* tlen toTajtsin Dios technauatia. 20 Nochtin mamokauakan ijkon ken okatkaj ijkuak toTajtsin Dios okinnotski. 21 Amo mamotekipacho akin okatka tlakeuali ijkuak toTajtsin Dios okinotski. Pero tla uelis makisas, ijkon makichiua. 22 Akin okatka tlakeuali ijkuak okinotskej para mayeto idiscípulo toTeko, axkan yokimakixtijkej uan kitekichiuilia toTeko. Noijki akin amo okatka tlakeuali ijkuak okinotskej, axkan itlakeual Cristo. 23 Sapanoua patio onamechko toTajtsin Dios ikinon ayakmo ximochiuakan intlakeualuan tlakamej. 24 Nokniuan, nochtin mamokauakan ixpan toTajtsin Dios ijkon ken okatkaj ijkuak okinnotskej.

25 Pero akinmej ayamo monamiktiaj nikinmiluis tlen ne nimokuayejyekoua,* porque amo nikpia nion se itlanauatil toTeko tlen nikinmiluis. Porque toTeko onechiknomatki para xikneltokakan tlen nikijtoua. 26 Ne nimokuayejyekoua* okachi kuali se tlakatl mayeto ijkon ken kajki, porque axkan onka miak ouijkayotl. 27 Tla tikpia mosiua, amo xikkaua. Tla amo tikpia mosiua, amo xiktemo. 28 Pero amo titlajtlakolchiuas tla timonamiktis. Noijki amo tlajtlakolchiuas tla se telpochtli noso se ichpochtli* monamiktis. Pero kixnamikiskej miak ouijkayotl akinmej monamiktiskej. Ne niknekiskia amo ijkon makinpano.

29 Nokniuan, ne namechiluia ayakmo tikpiaj miak tonal. Axkan, akinmej kipiaj insiua mayetokan ken amo kipiaj. 30 Akinmej chokaj mayetokan ken akinmej amo chokaj. Akinmej pakij mayetokan ken akinmej amo pakij. Akinmej miak motlakouiaj mayetokan ken akinmej amitlaj kipiaj. 31 Akinmej kinejnekij* tlen onka tlaltikpak mayetokan ken akinmej amo nochi kinejnekij.* Porque mopatlati tlen onka tlaltikpak. 32 Ne amo nikneki itlaj manamechtekipacho. Tlakatl tlen ayamo monamiktia kitekipachoua kitekichiuilis toTeko porque kineki mapaki toTeko. 33 Pero tlakatl tlen yomonamikti kitekipachoua tlen onka tlaltikpak porque kineki mapaki isiua, 34 uan ome tlamantli mokuayejyekoua.* Akin ok ichpochtli uan siuatl tlen ayamo monamiktia, kintekipachoua kitekichiuiliskej toTeko para chipauak mayeto tlen mokuayejyekouaj* uan tlen kichiuaj. Pero siuatl tlen yomonamikti kitekipachoua tlen onka tlaltikpak porque kineki mapaki inamik. 35 Nochi tlen namechiluia namechpaleuis. Amo namechiluia porque amo nikneki ijkon xikchiuakan. Ijkon namechiluia para xikchiuakan tlen moneki, uan nochipa xiktekichiuilikan toTeko uan amitlaj manamechtsakuili.

36 Pero tla ikaj tlen ayamo monamiktia yiueyi uan kimachilia kineki ikaj iuan motekas, okachi kuali mamonamikti porque amo tlajtlakoli. 37 Pero tla ikaj yokijto iyolipan amo monamiktis uan kineki ijkon kichiuas, ijkon makichiua porque amo kineki monamiktis uan uelis monauatis. Kuali tla ijkon kichiuas. 38 Kuali yetos akin monamiktis pero okachi kuali yetos akin amo monamiktis.

39 Se siuatl amo uelis monamiktis iuan okse tlakatl tla inamik ok yoltok. Pero tla inamik ixpoliuis, uelis monamiktis san akin iuan kinekis. Pero akin iuan monamiktis moneki kichiuas ken toTeko. 40 Pero ne nimokuayejyekoua* okachi pakis tla yetos ken kajki. Ne nikmati noijki nikpia iespíritu toTajtsin Dios.

8 Axkan matimotlapouikan itech tlakuali tlen kinmaniliaj imágenes. Tikmatij tinochtin tikpiaj ixtlamatilistli. Ixtlamatilistli kichiua matimoueyinekikan pero tlasojtlalistli teyolchikaua. 2 Tla ikaj kijtoua itlaj kimati kijtosneki ayamo kimati ijkon ken moneki. 3 Pero tla ikaj kitlasojtla toTajtsin Dios, toTajtsin Dios kixmati.

4 Tla ijkon, ¿uelis tikkuaskej tlakuali tlen kinmaniliaj imágenes? Tejuan tikmatij se imagen amitlaj ipati porque onka san se Dios. 5 Miakej kijtouaj katej tlatlamantli dioses ompa iluikak uan nikan tlaltikpak, ikinon katej miakej “dioses” uan katej miakej “señores”. 6 Tejuan tikmatij onka san se toTajtsin Dios. Ye iaxka nochi tlen onka uan kichiua matiyoltokan. Noijki toTeko san ye Jesucristo. Ye otlapaleui ijkuak okichijchijkej nochi tlen onka uan otlapaleui matiyoltokan.

7 Pero amo nochtin kipiaj non ixtlamatilistli. Sekimej okinueyichiuayaj imágenes, ikinon kikuaj non tlakuali ken yetoskia itlaj tlen kimaniliaj se imagen uan intlalnamikilis kinkuejsoua porque amo chikauak. 8 Pero tlakuali amo techpaleuia matimouikakan iuan toTajtsin Dios. Amitlaj techpolos tla amo titlakuaskej uan amitlaj tiktlaniskej tla titlakuaskej. 9 Pero ijkuak nankichiuaskej tlen nankinekij, ximomaluikan para amo nankinmikxitlanuiskej akinmej amo kipiaj chikauak intlalnamikilis. 10 Tla te tikpia ixtlamatilistli uan ikaj mitsitas titlakuajtok itech templo kanin katej imágenes, ¿amo moyolchikauas akin amo kipia chikauak itlalnamikilis kikuas tlakuali tlen kinmaniliaj imágenes? 11 Moixtlamatilis kichiuas mamoyolkoko akin amo kipia chikauak itlalnamikilis. Ye mokni uan Cristo ipatka oixpoliuik. 12 Nantlajtlakolchiuaj inauak Cristo tla ijkon nantlajtlakolchiuaj innauak namokniuan. Noijki nankikuejsouaj intlalnamikilis akinmej amo kipiaj chikauak intlalnamikilis. 13 Tla tlakuali tlen nikkua kikxitlanuia nokni, ayakmo keman nikkuas nakatl para amo nikikxitlanuis nokni.

9 ¿Amo uelis nikchiuas tlen nikneki? ¿Ne amo niapóstol? ¿Amo yonikitak toTeko Jesús? ¿Amo namejuan nankiteititiaj niktekichiuilia toTeko? 2 Namejuan kuali nankimatij ne niapóstol maski oksekimej amo nechitaj niapóstol. Porque namejuan nankiteititiaj ne niiapóstol toTeko.

3 Ijkin nikinnankilis akinmej nechteneuaj.* 4 ¿Amo melauak uelis titlakuaskej uan itlaj tikoniskej? 5 ¿Amo melauak uelis timonamiktiskej iuan se siuatl tlen tlaneltoka uan tikuikatinemiskej? Ijkon ken kichiuaj oksekimej apóstoles, ikniuan toTeko uan Cefas.* 6 ¿Noso san ne uan Bernabé moneki titekipanoskej para tikpiaskej tlen ika timopanoltiskej? 7 ¿Kox onka se soldado tlen kimotlaxtlauilia nochi tlen ika mopanoltis? ¿Akin kitoka uva uan amo kikua itlakilo? ¿Akin tlajpia uan amo koni tepitsin leche ijkuak tlapatska?

8 Ne amo nikijtoua san tlen mokuayejyekouaj* oksekimej. ITlanauatil Moisés noijki ijkon kijtoua. 9 Itech iTlanauatil Moisés ijkuilitok: “Amo xikkamatsakua toro ijkuak tlajtlaksa* ipan trigo”. ¿ToTajtsin Dios okitemakak nin tlanauatil para kuali mayetokan toros? 10 ¿Noso okitemakak para matechpaleui? Nin omoijkuilo para matechpaleui. Tlakatl tlen tlaxoua uan tlakatl tlen kichipaua trigo moneki tekipanoskej para kiseliskej trigo.

11 Tla tejuan otiktokakej iTlajtol toTajtsin Dios namoyolipan, ¿amo uelis nantechmakaskej seki tlamantli tlen ika timopanoltiskej? 12 Tla oksekimej kinnamiki nankinmakaskej seki tlamantli, ¿amo okachi technamiki tejuan techmakakan? Pero tejuan amo ijkon tikchiuaj. Tejuan nochi tikxikouaj para amo tiktsakuiliskej kuali tlajtoli tlen kijtoua akin Cristo. 13 ¿Amo nankimatij akinmej tekipanouaj itech templo kikuaj tlen ompa onka? ¿Amo nankimatij akinmej nochipa tekipanouaj kanin kajki altar kiseliaj seki tlamantli tlen ompa kitemakaj? 14 ToTeko noijki otlanauati akinmej tetlapouiaj kuali tlajtoli makimotlanilikan intlakual ijkuak tetlapouiaj.

15 Pero ne amitlaj onamechtlajtlanili. Ne amo namechijkuililia nin tlamantli para techpaleuikan. Ne nimoueyineki porque amitlaj niktlantok ijkuak nitetlapouia kuali tlajtoli. ¡Amikaj nikkauilis makichiua ayakmo manimoueyineki! 16 Pero amo moneki nimoueyinekis tla nitetlapouia kuali tlajtoli porque ijkon moneki nikchiuas. ¡Nimialma tla amo nitetlapouis kuali tlajtoli! 17 Nechteochiuaskej tla nikchiuas nin tekitl ika nochi noyolo. Pero tla nikchiuas maski amo nikneki, moneki nikchiuas porque onechnauati toTajtsin Dios. 18 Tla ijkon, ¿tlen tlateochiuali nikselia? Nikselia tlateochiuali ijkuak nitetlapouia kuali tlajtoli uan amitlaj niktlantok. Ijkon amitlaj niktlajtlani maski nechnamiki itlaj niktlajtlanis porque nitetlapouia kuali tlajtoli.

19 Maski ne amo niitlakeual se tlakatl, onimochi intlakeual nochtin para miakej nikinpaleuis. 20 Ne nimochiua nijudío ijkuak nika inuan judíos para uelis nikinpaleuis. Maski ne amo nika imak tlanauatil, niktlakamati* tlanauatil ijkuak nika inuan akinmej kitlakamatij* tlanauatil para uelis nikinpaleuis. 21 Ijkuak nika inuan akinmej amo kitlakamatij* tlanauatil, nimochiua ken yejuan para uelis nikinpaleuis maski ne niktlakamati* itlanauatil toTajtsin Dios uan itlanauatil Cristo. 22 Ijkuak nika inuan akinmej amo chikauakej, nimochiua amo nichikauak para uelis nikinpaleuis. Nikchiua nochi tlen moneki para nochtin nikinpaleuis. Nimochijchikaua nikinpaleuis para sekimej mamomakixtikan. 23 Nochi nikchiua ipatka kuali tlajtoli uan ijkon nikinmatiltia oksekimej.

24 ¿Amo nankimatij maski nochtin motlalouaj san se kiselia itetliokolil? Ximotlalokan uan xitlatlanikan. 25 Akinmej motlatlanij momaluiaj para amitlaj makinpano. Yejuan ijkon kichiuaj para kiseliskej se corona tlen uaki, pero tejuan ijkon tikchiuaj para tikseliskej se corona tlen amo keman uakis. 26 Ne amo nimotlaloua ken yetoskia amo nikmati kanin nio, nion amo nikmomaka ken yetoskia nikmomaka iuan ejekatl. 27 Ne niknauatia nocuerpo ken yetoskia se tlakeuali. Tla amo ijkon nikchiuas, toTajtsin Dios amo nechselis maski nikintlapouis oksekimej.

10 Nokniuan, nikneki xikmatikan nochtin touejkatatajuan onejnenkej itlampa se mixtli uan nochtin opanokej itlajko mar. 2 Nochtin omoapolaktijkej ken yetoskiaj idiscípulos Moisés ijkuak oyayaj itlampa mixtli uan ijkuak opanokej itlajko mar. 3 Nochtin okikuajkej san se tlakuali tlen toTajtsin Dios okinmakak. 4 Nochtin okonikej san se atl tlen toTajtsin Dios okinmakak. Miak uelta okonikej atl tlen omeyaya itech tetl ik kanin yejuan okatkaj. Non tetl okatka iaxka toTajtsin Dios uan okineskayotiaya Cristo. 5 Pero amo nochtin okiyolpaktijkej toTajtsin Dios uan oixpolikej kanin tlauaki.

6 Nochi tlen opanok techmachtia amo matiknekikan tlen amo kuali ken yejuan okichijkej. 7 Noijki amo matikinueyichiuakan dioses ken sekimej okichijkej. ITlajtol toTajtsin Dios kijtoua: “Akinmej opouiayaj itech non altepetl omotlalijkej, otlakuajkej uan otlakonikej. Satepan omoketskej uan omoyolpaktijkej”. 8 Noijki amo matiauilnemikan* ken sekimej oauilnenkej,* ikinon san ipan se tonal oixpolikej veintitrés mil. 9 Noijki amo matikyejyekokan Jehová ken sekimej okichijkej. Yejuan oixpolikej porque kouamej okinkuajkej. 10 Noijki amo matimotlaueltikan ken sekimej okichijkej ikinon iángel toTajtsin Dios okinmixpolo. 11 Nochi tlen okinpanok itlaj techmachtia uan omoijkuilo para technejmachtis tejuan tlen tiyoltokej ijkuak tlamis tlen axkan onka.

12 Ikinon akin mokuayejyekoua* kuali moketok, mamomalui amo uetsiti. 13 Nochi tlen namechyoltilana noijki kinyoltilana oksekimej. Pero toTajtsin Dios kichiua tlen kijtoua uan amo kitekauilis manamechyoltilana tlen amo uelis nankixikoskej. Ye namechpaleuis xitlaxikokan ijkuak itlaj namechyoltilanas.

14 Nokniuan, amo xikinueyichiuakan dioses. 15 Ne namechtlapouia ijkon ken kintlapouiaj akinmej kuali mokuayejyekouaj.* Namejuan xikitakan kox kuali noso amo kuali tlen nikijtoua. 16 Copa tlen kipia vino kineskayotia ieso Cristo uan tiktlasojkamatiliaj toTajtsin Dios. Pan tlen tikpojpostekij kineskayotia ken techpaleuia icuerpo Cristo. 17 Maski tejuan timiakej, tikatej san itech se cuerpo porque onka san se pan uan tinochtin tikkuaj non pan.

18 Xikinmilnamikikan israelitas. Ijkuak okikuayaj tlen okimanayaj ipan altar, ¿amo yetoskia ken otlakuayaj iuan toTajtsin Dios? 19 ¿Tlen kijtosneki tlen nikijtoua? ¿Kijtosneki itlaj ipati se imagen noso itlaj ipati tlen kimaniliaj? 20 Amo. Nikneki nikijtos akinmej kintlamaniliaj imágenes kijtosneki kintlamaniliaj ejekamej* uan amo kitlamaniliaj toTajtsin Dios. Ne amo nikneki ximouikakan inuan ejekamej.* 21 Amo uelis nankoniskej icopa Jehová uan nankoniskej incopa ejekamej.* Noijki amo uelis nantlakuaskej ipan “imesa Jehová” uan nantlakuaskej ipan inmesa ejekamej.* 22 ¿Noso tiknekij machauati Jehová? ¿Tejuan okachi tichikauakej noso ye okachi chikauak?

23 Uelis tikchiuaskej nochi tlen tiknekij pero amo nochi techpaleuia. Uelis tikchiuaskej nochi tlen tiknekij pero amo nochi techyolchikaua. 24 Nochipa xikchiuakan tlen kinpaleuis oksekimej uan amo san tlen namejuan namechpaleuis.

25 Xikkuakan ika chipauak namotlalnamikilis nochi nakatl tlen monemaka. Amo moneki nantlajtlaniskej kanin uits non nakatl. 26 Porque “Jehová iaxka tlaltikpak uan nochi tlen ipan onka”. 27 Tla ikaj tlen amo tlaneltoka namechyoleua uan namejuan nankinekij nanyaskej, xikkuakan nochi tlen namechmakas ika chipauak namotlalnamikilis. Amo moneki nantlajtlaniskej kanin okikuito.* 28 Pero tla ikaj namechiluis: “Nin okinmanilijkej imágenes”, amo xikkuakan para amo nankikxitlanuiskej akin ijkon onamechilui uan amikaj kikuejsos itlalnamikilis. 29 Nikijtojtok intlalnamikilis oksekimej uan amo namotlalnamikilis. Maski ne uelis nikijtos tlen nikchiuas, amo nikneki nikchiuas para amikaj manechteneua.* 30 ¿Tleka nechteneuaskej* tla niktlasojkamatilia toTajtsin Dios ijkuak nitlakua?

31 Ikinon tla nantlakuaj, tla itlaj nankonij noso nankichiuaj okseki tlamantli, nochi xikchiuakan para nankiueyichiuaskej toTajtsin Dios. 32 Amo xikinmikxitlanuikan judíos, griegos nion itlanechikol toTajtsin Dios. 33 Ne nikchiua tlen oksekimej kinpaleuis uan amo san tlen ne nechpaleuis. Nimochijchikaua nochtin nikinyolpaktis para uelis momakixtiskej.

11 Xikchiuakan ken ne porque ne nikchiua ken Cristo.

2 Nokniuan, nikneki namechiluis kuali nankichiuaj porque nochipa nantechilnamikij uan nankichiuaj nochi tlen onamechmachti. 3 Pero nikneki xikmatikan Cristo kinyekana nochtin tlakamej. Tlakatl kiyekana siuatl uan toTajtsin Dios kiyekana Cristo. 4 Tla se tlakatl mokuatlakentia ijkuak motlatlaujtia noso ijkuak kitematiltia tlen kijtoua toTajtsin Dios, kipinatia akin kiyekana. 5 Pero tla se siuatl amo mokuatlakentia ijkuak motlatlaujtia noso ijkuak kitematiltia tlen kijtoua toTajtsin Dios, kipinatia akin kiyekana porque yetoskia ken okimotekili nochi itsonkal. 6 Siuatl moneki motsonkaltekis tla amo mokuatlakentia. Pero mamokuatlakenti tla pinaua motsonkaltekis noso pinaua kimotekilis nochi itsonkal.

7 Tlakatl amo moneki mokuatlakentis, porque toTajtsin Dios okichijchi ken ye uan kiteititia iueyitilis toTajtsin Dios. Pero siuatl kichiua makitlakaitakan tlakatl. 8 Porque toTajtsin Dios okichijchi siuatl ika icuerpo tlakatl uan amo okichijchi tlakatl ika icuerpo siuatl. 9 ToTajtsin Dios okichijchi siuatl para makipaleui tlakatl uan amo okichijchi tlakatl para makipaleui siuatl. 10 Ikinon siuatl moneki mokuatlakentis para kiteititis tlakatl kiyekana uan ijkon ángeles kitaskej.

11 Pero inauak toTeko, siuatl amo yoltok tla amo onka tlakatl uan tlakatl amo yoltok tla amo onka siuatl. 12 Porque siuatl okichijchijkej ika icuerpo tlakatl, uan tlakatl nesi* itech siuatl. Pero toTajtsin Dios okichijchi nochi tlen onka. 13 Namejuan ximokuayejyekokan* kox kuali noso amo kuali tla se siuatl kitlatlaujtia toTajtsin Dios uan amo mokuatlakentia. 14 Tinochtin tikmatij tepinati tla se tlakatl tsonkalueueyak. 15 Pero amo tepinati tla se siuatl tsonkalueueyak porque itsonkal okimakakej para mamokuatlakenti. 16 Ikaj uelis mokuayejyekos* se siuatl amo moneki mokuatlakentis, pero tejuan uan itlanechikoluan toTajtsin Dios amo ijkon timokuayejyekouaj.*

17 Ne nikneki namechiluis amo nechpaktia tlen nankichiuaj, porque ijkuak nanmonechikouaj san nanmoyolkokouaj uan amo nanmoyolchikauaj. 18 Onikmatki nanmoxexelouaj ijkuak nanmonechikouaj itech tlanechikol uan seki tlamantli tlen onechiluijkej nikneltoka. 19 Sekimej tlen namouan katej moxeloskej uan ijkon motas akinmej kinselia toTajtsin Dios.

20 Ijkuak kanaj nanmonechikouaj, amo nanmonechikouaj para nankikuaskej iCena toTeko. 21 Ijkuak nankikuaj iCena toTeko, namejuan achto yonantlakuajkej ikinon sekimej apismikij uan oksekimej youintikej. 22 ¿Amo nankipiaj namochan kanin nantlakuaskej uan itlaj nankoniskej? ¿Amo nankitlakaitaj itlanechikol toTajtsin Dios uan nankinpinatiaj akinmej amitlaj kipiaj? ¿Tlen uelis namechiluis? ¿Namechiluis kuali tlen nankichiuaj? Ne amo namechiluis kuali tlen nankichiuaj.

23 Ne onamechmachti ijkon ken toTeko onechmachti: toTeko Jesús okonanki se pan youak ijkuak kitemaktiskiaj, 24 okitlasojkamatili toTajtsin Dios, okipojposteki uan okijto: “Nin kineskayotia nocuerpo tlen namopatka niktemaka uan namechpaleuis. Ijkin xikchiuakan para nantechilnamikiskej”. 25 Noijki ijkon okichi ika se copa vino ijkuak otlanki otlakuajkej uan okinmilui: “Nin copa kineskayotia yankuik acuerdo* tlen mochiua ika noeso. Ijkin xikchiuakan para nantechilnamikiskej ijkuak nankoniskej nin copa”. 26 Porque ijkuak nankikuaskej nin pan uan ijkuak nankoniskej nin copa, nankitematiltiskej imikilis toTeko hasta ijkuak ye uits.

27 Ikinon akin kikuas pan uan konis icopa toTeko maski amo kinamiki, tlajtlakolchiuas porque amo kitlakaita icuerpo uan ieso toTeko. 28 Achto makita ken kajki iyolo uan ijkon uelis kikuas pan uan konis copa. 29 San iselti motlajyouiltia tla kikua uan koni pero amo kimati tlen kineskayotia icuerpo toTeko. 30 Ikinon nanmiakej amo nanchikauakej uan nanmokokouaj. Noijki nanmiakej namixpolitokej.* 31 Pero amo techixkomakaskiaj tla toselti tikitaskiaj ken tikatej. 32 Ijkuak Jehová techixkomaka, ye techyektlalia para amo titlajyouiskej inuan oksekimej. 33 Nokniuan, xikinchiakan oksekimej ijkuak nanmonechikoskej para nankikuaskej non tlakuali. 34 Tla ikaj apismiki, matlakua ichan uan ijkon amo kixkomakaskej ijkuak nanmonechikoskej. Okseki tlamantli nikyektlalis ijkuak nias namechitati.

12 Nokniuan, ne nikneki xikmatikan toTajtsin Dios techpaleuia matikchiuakan tlatlamantli tekitl. 2 Namejuan nankimatij ijkuak ayamo onantlaneltokayaj, onamechchiualtiayaj xikinueyichiuakan imágenes tlen amo tlajtouaj. Noijki onankichiuayaj tlen yejuan okinekiayaj xikchiuakan. 3 Ne nikneki xikmatikan akin tlajtoua ika iespíritu toTajtsin Dios, amo kiuijuikaltia Jesús. Noijki amikaj uelis kijtos: “¡Jesús noTeko!”, tla amo tlajtoua ika espíritu santo.

4 Tikchiuaj tlatlamantli tekitl pero onka san se espíritu. 5 Tlatlamantli tiktekichiuiliaj toTajtsin Dios pero onka san se toTeko. 6 Espíritu santo techpaleuia matikchiuakan miak tlamantli, pero onka san se Dios tlen techpaleuia ijkon matikchiuakan. 7 Pero nochtin kiteititiaj espíritu santo tlapaleuia uan toTajtsin Dios kitemaka para nochtin kinpaleuis. 8 Espíritu santo kinpaleuia sekimej matlajtokan ika ixtlamatilistli. Non espíritu noijki kinpaleuia sekimej makijtokan tlen oksekimej amo uelis kimatiskej. 9 Non espíritu noijki kinpaleuia oksekimej matlaneltokakan uan oksekimej kinpaleuia matlapajtikan. 10 Oksekimej kinpaleuia makinchiuakan milagros. Oksekimej kinpaleuia makitematiltikan tlen kijtoua toTajtsin Dios. Oksekimej kinpaleuia makajsikamatikan tlen motematiltia kox kitematiltia toTajtsin Dios noso amo. Oksekimej kinpaleuia matlajtokan tlatlamantli tlajtoli. Oksekimej kinpaleuia matlajtolkopakan. 11 Espíritu santo techpaleuia matikchiuakan nochi nin tlamantli uan techpaleuia ken toTajtsin Dios kineki.

12 Se cuerpo sasalitok ika miak tlamantli. Pero onka san se cuerpo maski sasalitok ika miak tlamantli. Noijki ijkon kajki icuerpo Cristo. 13 Porque tinochtin maski tijudíos, tigriegos, titlakeualmej noso amo titlakeualmej, otechapolaktijkej san ika se espíritu uan ijkon tipouij san itech se cuerpo. Noijki tinochtin otikselijkej non espíritu.

14 Se cuerpo sasalitok ika miak tlamantli uan amo san ika se tlamantli. 15 Tla tokxi kijtoskia: “Ne amo niima ikinon amo nipoui itech cuerpo”, non amo kijtosneki ayakmo poui itech tocuerpo. 16 Tla tonakas kijtoskia: “Ne amo niixtololo ikinon amo nipoui itech cuerpo”, non amo kijtosneki ayakmo poui itech tocuerpo. 17 ¿Ken titlakakiskiaj tla nochi tocuerpo yetoskia toixtololo? ¿Ken titlajnekuiskiaj tla nochi tocuerpo yetoskia tonakas? 18 Pero toTajtsin Dios okisasalo tocuerpo ijkon ken ye okinek.

19 ¿Ken yetoskia tocuerpo tla nochi yetoskia san se tlamantli? 20 Pero onka san se cuerpo maski sasalitok ika miak tlamantli. 21 Toixtololo amo uelis kiluis toma: “Te amo techpaleuia”. Totsonteko noijki amo uelis kinmiluis tokxiuan: “Namejuan amo nantechpaleuiaj”. 22 Pero amo ijkon, porque seki tlamantli tlen kipia tocuerpo uan tikitaj amo chikauak non tlen okachi moneki. 23 Noijki seki tlamantli tlen kipia tocuerpo uan tikitaj amo okachi ipati, non tlen okachi tikyektlakentiaj. Ikinon okachi tikmaluiaj seki tlamantli tlen kipia tocuerpo tlen kichiua matipinauakan. 24 Pero tlen okachi kualtsin kipia tocuerpo amitlaj moneki tikchiuiliskej. ToTajtsin Dios okichijchi tocuerpo uan ijkon kichiua okachi ipati mayeto tlen amo okachi kualtsin tikpiaj. 25 Ijkon okichi para amo mamoxexelo cuerpo uan nochtin mamomaluikan. 26 Tla se tlajyouia, nochtin oksekimej tlajyouiaj. Tla se kitlakaitaj, nochtin oksekimej pakij.

27 Namejuan nanpouij itech icuerpo Cristo uan sejse nansasalitokej itech non cuerpo. 28 ToTajtsin Dios ijkin okintlali akinmej pouij itech tlanechikol: achto okintlali apóstoles, satepan profetas, satepan tlamachtijkej, satepan akinmej kinchiuaj milagros uan satepan akinmej ueli tlapajtiaj. Noijki akinmej tlapaleuiaj, akinmej kimatij tlayekanaskej uan akinmej tlajtouaj okseki tlajtoli. 29 Amo nochtin apóstoles, amo nochtin profetas, amo nochtin tlamachtiaj uan amo nochtin kinchiuaj milagros. 30 Amo nochtin ueli tlapajtiaj, amo nochtin tlajtouaj okseki tlajtoli uan amo nochtin tlajtolkopaj. 31 Ximochijchikauakan para nankiseliskej tekitl tlen okachi miak ipati. Pero ne namechititis itlaj tlen okachi kuali.

13 Tla ne nitlajtoua intlajtol oksekimej uan intlajtol ángeles pero amo nitetlasojtla, niyetoskia ken se tepostli tlen san tsilini. 2 Amitlaj nopati tla amo nitetlasojtla maski ueli niktematiltia tlen toTajtsin Dios kijtoua, maski nikajsikamati nochi tlamantli santo tlen amo omomatiaya, maski nochi nikmati, maski nitlaneltoka uan maski uelis nikinmolinis tepemej. 3 Tla nochi tlen nikpia nikinmakas oksekimej para nikinpaleuis, noso nimotemakas manechmiktikan para nimoueyinekis pero amo nitetlasojtla non amitlaj nechpaleuis.

4 Akin tetlasojtla kimati mochias uan yolkuali. Akin tetlasojtla amo chauati, amo moueyineki uan amo mosijsinia. 5 Akin tetlasojtla amo kichiua tlen tepinati, amo kichiua san tlen ye kineki, amo san niman kualani uan amo san kilnamiktok tlen kitoktiaj. 6 Akin tetlasojtla paki ijkuak panoua tlen kuali uan amo paki ijkuak panoua tlen amo kuali. 7 Akin tetlasojtla nochi kijyouia, nochi kineltoka, nochi kichia uan nochi kixikoua.

8 Tlasojtlalistli amo keman tlamis. Pero akinmej toTajtsin Dios kinpaleuia makitematiltikan tlen ye kijtoua, akinmej kinpaleuia matlajtokan okse tlajtoli, akinmej kinmaka ixtlamatilistli, ajsis tonal nochi non tlamis. 9 Porque amo ajsitok ixtlamatilistli tlen tikpiaj uan amo ajsitok tiktematiltiaj iTlajtol toTajtsin Dios. 10 Pero ijkuak uits tlen ajsitok, poliuis tlen amo ajsitok. 11 Ijkuak ne onikatka nichokotsin, onitlajtouaya ken se chokotsin, onimokuayejyekouaya* ken se chokotsin uan onitlalnamikiaya ken se chokotsin. Pero axkan ayakmo nikchiua ken se chokotsin porque yinitlakatl. 12 Axkan titlachixtokej itech se espejo kanin amo kuali mota tlen tikitaj pero satepan nochi kuali motas. Axkan amo nochi nikmati pero satepan nochi nikmatis ijkon ken ne kuali nechixmatij. 13 Pero nin eyi tlamantli amo tlamis: titlaneltokaj, tikchiaj toTajtsin Dios matechpaleui uan titetlasojtlaj. Pero okachi ipati titetlasojtlaskej.

14 Nochipa xikteititikan nantetlasojtlaj uan nochipa ximochijchikauakan para toTajtsin Dios manamechpaleui xikchiuakan tlatlamantli tekitl. Pero okachi ximochijchikauakan nankitematiltiskej tlen toTajtsin Dios kijtoua. 2 Amikaj kajsikamati akin tlajtoua okse tlajtoli porque san toTajtsin Dios kajsikamati. Amikaj kajsikamati tlen kijtoua maski espíritu santo kipaleuia makijto seki tlamantli santo tlen amo omomatiaya. 3 Pero akin kitematiltia tlen toTajtsin Dios kijtoua, kinpaleuia oksekimej okachi matlaneltokakan, kinyolchikaua uan kinyolseuia. 4 Akin kimati okse tlajtoli iselti mopaleuia okachi tlaneltokas. Pero akin kitematiltia tlen toTajtsin Dios kijtoua, kinpaleuia akinmej monechikouaj* okachi matlaneltokakan. 5 Nechpaktiskia nochtin namejuan xitlajtokan okse tlajtoli pero okachi nikneki xiktematiltikan tlen kijtoua toTajtsin Dios. Tla akin tlajtoua okse tlajtoli amo kitlajtolkopa tlen kijtoua para kinpaleuis akinmej monechikouaj* makipiakan chikauak intlaneltokilis, kijtosneki okachi kuali tlen kichiua akin kitematiltia tlen toTajtsin Dios kijtoua. 6 Nokniuan, ¿ken namechpaleuis tla axkan nias uan namechtlapouis ika okse tlajtoli? Tla nikneki namechpaleuis moneki namechiluis tlen onechmatilti toTajtsin Dios, namechtlapouis ika ixtlamatilistli, namechiluis se profecía noso itlaj namechmachtis.

7 Ijkon panoua ijkuak tlatsotsonaj ika flauta noso ika arpa. ¿Ken kimatiskej tlen kitsotsonaj tla amo kuali kitsotsonaj flauta noso arpa? 8 Noso ¿akin motlayektlalilis para yas guerra tla amo kuali kipitsaj trompeta? 9 Noijki tla namejuan nankijtouaj tlajtoli tlen amo moajsikamati, ¿ken uelis ikaj kimatis tlen nankijtouaj? Yetoskia ken nankitlapouijtokej ejekatl. 10 Ipan tlaltikpak onka tlatlamantli tlajtoli uan sejse itlaj kijtosneki. 11 Tla ikaj nechtlapouia uan ne amo nikajsikamati tlen kijtoua, ye mokuayejyekos* niuits okse altepetl. Uan ne noijki nimokuayejyekos* ye uits okse altepetl. 12 Namejuan noijki ijkon namechpanoua. Namejuan nankinekij manamechpaleui espíritu santo xikchiuakan tlatlamantli tekitl, ikinon ximochijchikauakan xikchiuakan tlatlamantli tekitl tlen kinpaleuis akinmej monechikouaj* makipiakan chikauak intlaneltokilis.

13 Akin tlajtoua okse tlajtoli, mamotlatlaujti para uelis kitlajtolkopas tlen kijtoua. 14 Tla nimotlatlaujtia ika okse tlajtoli, ijkon nikchiua porque espíritu santo nechpaleuia. Pero amo nikajsikamati tlen nikijtoua. 15 Tla ijkon, ¿tlen moneki nikchiuas? Ijkuak nimotlatlaujtis nikchiuas ijkon ken espíritu santo nechpaleuia manikchiua, pero noijki nimotlatlaujtis para mamoajsikamati tlen nikijtos. Ijkuak nitlakuikas nikchiuas ijkon ken espíritu santo nechpaleuia manikchiua, pero noijki nitlakuikas para mamoajsikamati tlen nikijtos. 16 Tla espíritu santo mitspaleuia xikueyichiua toTajtsin Dios uan mitskakis akin amo ixtlamatki tlen namouan kajki, ¿ken uelis kijtos “Amén” ijkuak tiktlasojkamatilia toTajtsin Dios tla amo kimati tlen tikijtoua? 17 Kuali kajki ken tiktlasojkamatilia toTajtsin Dios, pero amo tikpaleuia makipia chikauak itlaneltokilis akin ompa otlakakito. 18 Niktlasojkamatilia toTajtsin Dios porque okachi miak tlajtoli nitlapoua uan amo ijkon ken namejuan. 19 Itech tlanechikol okachi nechpaktia nikijtos makuili tlajtoli tlen moajsikamati para nikinmachtis oksekimej, uan amo nikijtos 10,000* tlajtoli ika okse tlajtoli.

20 Nokniuan, amo ximokuayejyekokan* ken konemej. Xiyetokan ken konemej tlen amo kimatij kichiuaskej tlen amo kuali uan ximokuayejyekokan* ijkon ken mokuayejyekouaj* akinmej yiuejueyij. 21 Itech iTlanauatil Moisés ijkuilitok: “Jehová kijtoua: ‘Akinmej amo kixmatij nin altepetl uan akinmej tlajtouaj tlatlamantli tlajtoli, nikinnauatis makintlapouikan akinmej chantij itech nin altepetl. Pero yejuan amo nechkakiskej maski ijkon nikchiuas’”. 22 Tlatlamantli tlajtoli kichiua matlaneltokakan akinmej amo tlaneltokaj uan amo ika kinmachtiaj akinmej tlaneltokaj. Pero profecías kinpaleuia akinmej tlaneltokaj uan amo kinpaleuia akinmej amo tlaneltokaj. 23 Tla kanaj monechikoua nochi tlanechikol uan nochtin tlajtouaj tlatlamantli tlajtoli, pero kalakitiuij akinmej amo ixtlamatkej noso akinmej amo tlaneltokaj, ¿amo kijtoskej nankuatlapolouaj? 24 Pero tla namejuan nankitematiltiaj tlen toTajtsin Dios kijtoua uan kalakiti akin amo ixtlamatki noso akin amo tlaneltoka, ye kitas amo kuali tlen kichiua uan kimachilis nochtin san kitaj tlen kichiua. 25 Nochi tlen kipia iyolipan momatis ikinon ye motlankuaketsas, kiueyichiuas toTajtsin Dios uan kijtos: “ToTajtsin Dios melauak namouan kajki”.

26 Nokniuan, ijkuak nanmonechikouaj sekimej tlakuikaj, oksekimej tlamachtiaj, oksekimej kijtouaj tlen toTajtsin Dios okinmatilti, oksekimej tlajtouaj okse tlajtoli uan oksekimej tlajtolkopaj. ¿Ken moneki nankichiuaskej nochi nin tlamantli? Nochi xikchiuakan para nanmopaleuiskej nankipiaskej chikauak namotlaneltokilis. 27 Tla sekimej tlajtouaj okse tlajtoli, matlajtokan san kanaj ome noso eyi pero amo nochtin san semi matlajtokan. Noijki moneki ikaj kitlajtolkopas tlen kijtouaj. 28 Pero tla amo onka akin tlajtolkopas, amo matlajtokan itech tlanechikol uan san inyolipan mamotlapouikan iuan toTajtsin Dios. 29 Matlajtokan ome noso eyi profetas uan oksekimej matlakakikan para kajsikamatiskej tlen kijtosneki. 30 Pero tla ikaj tlen ompa kajki* itlaj kimatiltia toTajtsin Dios, ayakmo itlaj makijto akin tlajtojtok. 31 Porque nochtin namejuan sejse uelis nankitematiltiskej tlen toTajtsin Dios kijtoua. Ijkon nannochtin nanmomachtiskej uan nanmoyolchikauaskej. 32 Profetas moneki kitaskej ken kinejnekij* tetliokolil tlen kitemaka espíritu santo. Non kijtosneki tetliokolil tlen kipiaj para kitematiltiskej tlen toTajtsin Dios kijtoua. 33 Porque toTajtsin Dios kineki nochi kuali mamochiua uan mayeto yolseuilistli.

Ijkon ken kichiuaj itech nochi intlanechikoluan akinmej yolchipauakej, 34 siuamej san matlakaktokan ijkuak monechikouaj* porque amo moneki tlajtoskej. Siuamej makitekauilikan makinyekanakan ijkon ken kijtoua iTlanauatil Moisés. 35 Tla itlaj kinekij kimatiskej, inchan makitlajtlanikan innamik porque tepinati se siuatl matlajto kanin monechikouaj.*

36 ¿Namonauak okiski iTlajtol toTajtsin Dios? ¿San namejuan onankiselijkej?

37 Tla ikaj mokuayejyekoua* ye se profeta noso espíritu santo kipaleuia itlaj makichiua, moneki kajsikamatis ne namechijkuililia itlanauatiluan toTeko. 38 Pero tla ikaj amo kipatioita nin tlanauatil ye noijki amo kipatioitaskej. 39 Nokniuan, nochipa ximochijchikauakan xiktematiltikan tlen toTajtsin Dios kijtoua uan xikinkauilikan oksekimej matlajtokan okse tlajtoli. 40 Pero nochi tlamantli kuali xikchiuakan uan ijkon ken moneki.

15 Nokniuan, axkan namechilnamiktia kuali tlajtoli tlen onamechmatilti. Namejuan onankiselijkej nin kuali tlajtoli uan hasta axkan amo nankikauaj. 2 Noijki kuali tlajtoli tlen onamechmatilti namechpaleuis ximomakixtikan tla amo nankikauaskej. Tlamo amitlaj ipati onantlaneltokakej.

3 Ne onamechmachti tlen okachi ipati onechmachtijkej: Cristo topatka oixpoliuik porque titlajtlakolejkej ijkon ken kijtoua iTlajtol toTajtsin Dios. 4 Ye okitokakej uan ipan eyi tonal toTajtsin Dios okiyoliti ijkon ken kijtoua iTlajtol toTajtsin Dios. 5 Ye okimonextili Cefas* uan satepan okinmonextili 12 apóstoles. 6 Satepan okinmonextili kanaj 500 tokniuan tlen san sekan okatkaj. Miakej ok touan katej maski sekimej yoixpolikej. 7 Satepan okimonextili Santiago uan satepan okinmonextili nochtin apóstoles. 8 Saiktlami ne onechmonextili ikinon ne nika ken se konetl tlen oneski* ijkuak ayamo oajsiaya tonal nesis.*

9 Porque ne amo okachi nopati innauak oksekimej apóstoles. Amo nechnamiki manechnotsakan apóstol porque oniktlajyouilti itlanechikol toTajtsin Dios. 10 Pero toTajtsin Dios onechmakak nin tekitl porque kitetliokolia tlen kuali. Ye amo san nenka onechtliokoli tlen kuali, porque ne okachi yoniktekichiuili uan amo ken oksekimej apóstoles. Pero ijkon nikchiua porque toTajtsin Dios nechtliokolia tlen kuali uan amo san noselti nikchiua. 11 Maski ne nitetlapouia noso apóstoles tetlapouiaj, tinochtin titetlapouiaj san se tlamantli uan namejuan onankineltokakej.

12 Tla tejuan titetlapouiaj Cristo okiyolitijkej, ¿tleka sekimej namejuan nankijtouaj amo kinyolitiskej akinmej yoixpolikej? 13 Tla amo kinyolitiskej akinmej yoixpolikej kijtosneki Cristo noijki amo okiyolitijkej. 14 Pero tla Cristo amo okiyolitijkej, san nenka titetlapouiaj uan namejuan noijki san nenka nantlaneltokaj. 15 Tla amo kinyolitiskej akinmej yoixpolikej kijtosneki toTajtsin Dios noijki amo okiyoliti Cristo. Nin kijtosneki titlakajkayauaj ijkuak tikijtouaj toTajtsin Dios okiyoliti Cristo. 16 Porque tla amo kinyolitiskej akinmej yoixpolikej kijtosneki Cristo noijki amo okiyolitijkej. 17 Noijki tla Cristo amo okiyolitijkej, namejuan san nenka nantlaneltokaj uan ayamo namechtlapojpoluiliaj namotlajtlakol. 18 Noijki akinmej okichiuayaj ken Cristo kijtosneki ayakmo keman kinyolitiskej. 19 Tejuan okachi timialmastin tla san axkan timochiaj inauak Cristo.

20 Pero tejuan tikmatij Cristo okiyolitijkej. Ye achto okiyolitijkej de nochtin akinmej yoixpolikej uan yetoskia ken tlakilotl tlen achto tlaki.* 21 Ijkon ken se tlakatl okichi matiixpoliuikan, se tlakatl noijki kichiuas makinyolitikan akinmej yoixpolikej. 22 Por itlajtlakol Adán nochtin ixpoliuij pero tlen okichi Cristo kinpaleuis nochtin mayoltokan. 23 Pero sejse kinyolitiskej ijkon ken yomoijto: Cristo achto okiyolitijkej uan ijkuak ye nikan yetos kinyolitiskej akinmej iaxkauan. 24 Saiktlami ye kimaktilis Tekiuajkayotl iTajtsin tlen noijki iDios. Ijkon panos ijkuak yokinmixpolo nochtin tekiuajkej uan akinmej tlanauatiaj. 25 Porque ye moneki tlanauatis hasta ijkuak toTajtsin Dios kintlalis ikxitlampa akinmej kikokoliaj. 26 Saiktlami kipojpolos mikilistli tlen kikokolia. 27 Porque toTajtsin Dios “okitlali nochi tlamantli ikxitlampa Cristo para makinauati”. Pero ijkuak ye* okijto okitlali nochi tlamantli makinauati, amo kijtosneki noijki kinauatis akin okimakak nochi makinauati. 28 Ijkuak toTajtsin Dios yokimaktili iKone nochi makinauati, teKone noijki kikauilis toTajtsin Dios makinauati porque okimaktili nochi tlamantli. Ijkon san ye toTajtsin Dios kinauatis nochi tlamantli.

29 Tla amo ijkon yetoskia, ¿tlen kichiuaskej akinmej moapolaktiaj para ixpoliuiskej? Tla amo kinyolitiskej akinmej yoixpolikej, ¿tleka moapolaktiaj para ixpoliuiskej? 30 ¿Tleka nochipa tikatej kanin uelis timikiskej? 31 Nokniuan, ne nipaki porque namejuan nanidiscípulos toTeko Cristo Jesús. Noijki namechiluia nochipa nikixnamiki mikilistli. 32 ¿Ken nechpaleuis tla yonikmomakak inuan tekuanimej ompa Éfeso ijkon ken okichijkej oksekimej? Tla amo kinyolitiskej akinmej yoixpolikej, “matitlakuakan uan itlaj matikonikan porque mostla tiixpoliuiskej”. 33 Amo xiktekauilikan manamechkajkayauakan. Tla nanmouikaskej inuan akinmej amo yolkualmej, ayakmo nankichiuaskej tlen kuali. 34 Xitlalnamikikan, xikchiuakan tlen kuali uan amo xitlajtlakolchiuakan porque sekimej amo kixmatij toTajtsin Dios. Ijkon namechiluia para xipinauakan.

35 Pero ikaj tlajtlanis: “¿Ken kinyolitiskej akinmej yoixpolikej? ¿Ken yetos incuerpo ijkuak kinyolitiskej?”. 36 ¡Tixoxo! ¿Amo tikmati tlen tiktoka moneki achto mikis uan satepan moskaltis? 37 Te amo tiktoka itlaj tlen yomoskalti, tiktoka* isemilla trigo noso okse semilla. 38 ToTajtsin Dios kiskaltia ijkon ken ye kineki, pero sejse semilla tlatlamantli moskaltia. 39 Onka tlatlamantli cuerpo: tocuerpo, incuerpo yolkamej, incuerpo totomej uan incuerpo michimej. 40 Noijki seki cuerpos katej iluikak uan okseki cuerpos katej tlaltikpak. Akinmej katej iluikak okse tlamantli motaj pero okse tlamantli motaj akinmej katej tlaltikpak. 41 Tonaltsin se tlamantli petlani, metstli okse tlamantli petlani, sitlalimej okse tlamantli petlanij uan sejse sitlali tlatlamantli petlani.

42 Ijkon kinpanos akinmej kinyolitiskej. Palani cuerpo tlen ixpoliui pero amo palanis cuerpo tlen kiyolitiskej. 43 Amo kuali kitaj ijkuak ikaj kitokaj pero kitlakaitaskej ijkuak kiyolitiskej. Se cuerpo amo chikauak ijkuak kitokaj pero yetos chikauak ijkuak kiyolitiskej. 44 Kitokaj se cuerpo tlen mota uan kiyolitiaj se cuerpo tlen amo mota. Tla onka se cuerpo tlen mota noijki onka se cuerpo tlen amo mota. 45 Ijkin ijkuilitok: “Adán, achto tlakatl, omochi se tlakatl yoltok”. Saiktlami Adán omochi se espíritu tlen kitemaka yolilistli. 46 Pero amo achto ouala cuerpo tlen amo mota. Achto ouala cuerpo tlen mota uan satepan ouala cuerpo tlen amo mota. 47 Achto tlakatl poui tlaltikpak uan okichijchijkej ika tlali, pero okse tlakatl poui iluikak. 48 Akinmej okinchijchijkej ika tlali katej ken akin okichijchijkej ika tlali, pero akinmej katej iluikak katej ken akin ouala iluikak. 49 Tejuan timotaj ken akin okichijchijkej ika tlali, pero noijki timotaskej ken akin ouala iluikak.

50 Nokniuan, ne nikneki namechiluis tocuerpo uan toeso amo uelis yetos itech iTekiuajkayo toTajtsin Dios. Noijki itlaj tlen palani amo uelis mokopas itlaj tlen amo palani. 51 Namechiluis itlaj santo tlen amo omomatiaya: amo tinochtin tiixpoliuiskej pero toTajtsin Dios tinochtin techpatlas 52 san niman ijkon ken ijkuak tikintsakuaj uan tikintlapouaj toixtololouan. Nin panos ijkuak kipitsaskej saiktlami trompeta. Ijkuak kipitsaskej trompeta uan kinyolitiskej akinmej yoixpolikej, yejuan kipiaskej incuerpo tlen amo palani uan tejuan toTajtsin Dios techpatlas. 53 Porque nin cuerpo tlen palani moneki mokopas cuerpo tlen amo palani. Noijki nin cuerpo tlen ixpoliui moneki mokopas cuerpo tlen amo uelis ixpoliuis. 54 Pero ijkuak nin cuerpo tlen palani mokopas cuerpo tlen amo palani uan ijkuak nin cuerpo tlen ixpoliui mokopas cuerpo tlen amo uelis ixpoliuis, ijkuakon mochiuas tlen ijkuilitok: “Mikilistli sepa kipojpoloskej”. 55 “Mikilistli, ¿kanin kajki mochikaualis? Mikilistli, ¿kanin kajki moveneno?”. 56 Veneno tlen kichiua matiixpoliuikan ye tlajtlakoli uan iTlanauatil Moisés kimaka ichikaualis tlajtlakoli. 57 ¡Pero tiktlasojkamatiliaj toTajtsin Dios porque ika toTeko Jesucristo techpaleuia matitlatlanikan!

58 Nokniuan tlen namechtlasojtla, ximoyekketokan uan amo ximolinikan. Nochipa xiktekichiuilikan toTeko. Namejuan nankimatij amo san nenka nankitekichiuiliaj toTeko.

16 Axkan namechiluis tlen nankichiuaskej ijkuak nankololoskej tomin para nankinpaleuiskej tokniuan yolchipauakej. Xikchiuakan ijkon ken onikinnauati tlanechikolmej tlen katej Galacia. 2 Ijkuak peua semana,* nannochtin xikxelokan seki tomin ijkon ken nankitlanij para amo nankololoskej ijkuak ne niajsiti. 3 Ijkuak ompa niajsiti, nikintitlanis mayakan Jerusalén tlakamej tlen nankijtouaj itech namocartas kuali tekipanouaj. Yejuan kiuikaskej namotlatliokolil tlen onankitemakakej ika nochi namoyolo. 4 Pero yejuan nouan yaskej tla monekis ne noijki nias.

5 Nias namechtlajpaloti ijkuak yonipanok ik Macedonia porque nipanos ik Macedonia. 6 Xamo ompa nimokauas kanaj keski tonal noso namouan nimokauas ijkuak seuas. Satepan uelis nantechkajkauatiuij kanin nias. 7 Amo nikneki san namechitikisa. Nikneki namouan nimokauas kanaj keski tonal tla Jehová nechkauilis. 8 Pero nimokauas Éfeso hasta mamochiua iluitl Pentecostés. 9 Porque nechkauiliaj okachi manitetlapoui pero miakej amo kinpaktia.

10 Tla ajsiti Timoteo, xikpaleuikan amo mamomojti ijkuak namouan yetos. Ye kitekichiuilia Jehová ijkon ken ne nikchiua. 11 Ikinon amikaj makitlauelita. Xikpaleuikan kuali mauiki uan ijkon manechajsiki, porque ne uan tokniuan tikchixtokej.

12 Oniktlatlaujti tokni Apolos manamechtlajpaloti inuan tokniuan. Axkan amo mokuayejyekoua* yas pero namechtlajpaloti ijkuak majxilis.

13 Xiijsatokan, nochipa xitlaneltokakan, xiyetokan nanyolchikauakej uan xiyetokan nanchikauakej. 14 Nochi xikchiuakan ika tlasojtlalistli.

15 Nokniuan, namejuan nankimatij Estéfanas uan akinmej chantij ikalijtik, yejuan achto otlaneltokakej ompa Acaya. Noijki yejuan okinpaleuijkej tokniuan yolchipauakej ikinon axkan ne nikneki namechtlatlaujtis: 16 xikinkauilikan manamechyekanakan akinmej kichiuaj ken yejuan, akinmej tlapaleuiaj uan akinmej chikauak tekipanouaj. 17 Ne nipaki porque oualajkej Estéfanas, Fortunato uan Acaico. Yejuan namopatka onechpaleuijkej. 18 Yejuan onechyolchikajkej uan namejuan noijki onamechyolchikajkej, ikinon xikinpatioitakan tlakamej tlen kichiuaj ken yejuan.

19 Namechontlajpalouaj akinmej monechikouaj* Asia. Áquila, Priscila uan akinmej monechikouaj* inkalijtik, namechontlajpalouaj ika itoka toTeko porque namechtlasojtlaj. 20 Namechontlajpalouaj nochtin tokniuan. Ika namoyolo chipauak ximoixpipitsokan* ijkuak nanmotlajpaloskej.

21 Ne niPablo uan namechontlajkuililia para namechontlajpalos.

22 Makixpolokan akin amo kitlasojtla toTeko. ¡Xiuiki toTeko! 23 ToTeko Jesús nochipa manamechtliokoli tlen kuali. 24 Namejuan nanidiscípulos Cristo Jesús uan nikneki xikmatikan ne namechtlasojtla.