Noamoch tlen nechtlapouia itech Biblia
NIN se amochtli tlen techtlapouia tlen melauak opanok. Omokixti itech amochtli tlen okachi kuali, itoka: Biblia. Itech ninmej tlapoualismej techiluia ken toTajtsin Dios opejki tlachijchiua uan tlen panotok axkan. Noijki kijtoa tlen kichiuas toTajtsin Dios satepan.
Nin amochtli mitspaleuis tikajsikamatis sekimej tlamantli tlen tlamachtia Biblia. Techtlapouia itech tlaltikpaktlakamej tlen Biblia kijtoa uan noijki tlen okichijkej. Noijki techiluia ken toTajtsin Dios yokijto tlaltikpaktlakamej uelis yoltoskej nochipa itech se xochitlali nikan ipan Tlaltikpak.
Nin amochtli kipia 116 tlapoualismej. Xexelitokej itech chikueyi tlaxelolmej. Itech kanin peuaj tlaxelolmej tikajsiskej se página kanin techiluia tlen ompa timomachtiskej. Tlapoualismej tekpantokej ken opanotia nochi. Nin mitspaleuis pampa tikmatis keman opanokej sekimej tlamantli uan keman oksekimej.
Nochtin tlapoualismej omoijkuilojkej ika tlajtolmej tlen amo oui moajsikamati. Miakej chokotsitsintin san yejuan uelis kintlajtoltiskej. Tetajmej kitaskej ken konemej melauak kinpaktis ma kintlajtoltilikan miakpa ninmej tlapoualismej. Noijki tikitaskej ken nin amochtli kipia miakej tlamachtilmej tlen kinpaktis telpokamej uan akinmej yiuejueyij.
Kanin tlami sejse tlapoualistli kiualika sekimej textos bíblicos. Timitsyoleuaj xikintlajtolti nochtin textos kanin kisaj sejse tlapoualistli. Noijki ijkuak tlamis tiktlajtoltis sejse tlapoualistli, xikita tlajtlanilmej tlen nesij kanin tlami tlapoualistli 116, uan ximochijchikaua xiknankili sejse tlajtlanil.