Pampa tikinpiaskej toyolikniuan, moneki timochiuaskej tiiyolikniuan

Tla titetlasojtla uelis tikpias moyolikniuan. Tla okachi tikixmati Jehová, okachi tiktlasojtlas uan okachi tiknekis tiktekichiuilis. Nin mitspaleuis timochiuas imachtijka Jesucristo (Mateo 28:19). Tejuatsin uelis timochiuas iyolikni toTajtsin Dios tla nochipa timonechikoa innauak itlaixpantijkauan Jehová akinmej yolpakij miak. ¿Tlen moneki tikchiuas tla tikneki tinemis innauak?

Xikteititi ke tiktlasojtla toTajtsin Dios ijkuak tiktlakamati itlanauatiluan. “Tla tiktlasojtlaj in Dios [en]tonces ma tikchiuakan tlan technauatia. Iuan tlan Yej technauatia ma tikchiuakan mach sa tekitl tesotlaj.” (1 Juan 5:3.)

Xikchiua ijkon ken timomachtia. Jesús okijto se neskayotl tlen kinextia nin tlamantli. Se tlakatl ixtlamatki okichijchi ikal ipan tetl, uan se tlakatl tlen amo ixtlamatki okichijchi ipan xali. Ijkuak ouala se ueyi ejekakiauitl, kali tlen ochijchijtoya ipan tetl amo ouetsik, uan kali tlen ochijchijtoya ipan xali chikauak omokak ijkuak ouetsik. Jesús okijto ke tlaltikpaktlakamej tlen kikakij itlamachtiluan yejuan katej ken tlakatl ixtlamatki tlen okichijchi ikal ipan tetl. Noijki okijto ke akinmej kikakij itlamachtiluan uan amo kichiuaj yetokej ken tlakatl tlen amo ixtlamatki tlen okichijchi ikal ipan xali. ¿Itech nin ome tlakamej, ken akin tikneki tikchiuas? (Mateo 7:24-27.)

Ximotemaka inauak toTajtsin Dios. Uelis tikiluis Jehová itech tlatlaujtilis ke tikneki tikchiuas itlanekilis pampa nochipa. Tla tikchiuaj itlanekilis toTajtsin Dios, tikteititiaj tiimachtijkauan Jesucristo (Mateo 11:29).

Ximoapolakti. “Ximokuateeki [“ximoapolakti”, NM]. Xikmotlatlaujtili in Señor ma mitschipaua de motlajtlakol.” (Hechos 22:16.)

Xiktekichiuili toTajtsin Dios ika nochi moyolo. “Iuan nochi tlan ankichiuaskej, xikchiuakan ika nochi amoyolo, kej yeskia ankichiuaj para yen toSeñor [“Jehová”, NM] iuan amo para akaj okse tlakatl.” (Colosenses 3:23.)