Tlajtolmej tlen ika peua

Nochtin akinmej nankitlasojtlaj Jehová:

Jesús okijto: “Nonkixmatiskeh tlan milák, iwa tlan milák nomechmakixtis” (Juan 8:​32). ¡Melauak techyolchikauaj ­ninmej tlajtolmej! Kema, ok uelis tikixmatiskej tlen melauak maski tikatej itech “iksemi tonatijmeh” noso itlamian tonalmej, kanin sapanoa tlakajkayauaj (2 Timoteo 3:1). ¿Tikilnamikij ijkuak opejki timomachtiaj tlen melauak itech iTlajtol toTajtsin Dios? ¡Melauak omitsyolpakti tlen otimomachtiaya!

Maski sapanoa ipati tikmatiskej tlen melauak uan tikintlapouiskej oksekimej itech non, moneki noijki ika tikyekanaskej tonemilis. Ik non, moneki tiyetoskej itech itlasojtlalis toTajtsin Dios. Pero ¿ken uelis tikchiuaskej? Itech yoak ijkuak yikimiktiskiaj Jesús, ye okinmilui itlatitlaniluan: “Tla nonkitlakitah tlan nomechnawatia, nochipa nomechtlasojtlas, ijkó kemi Ne niktlakita tlan nechnawatia Notajtsi, yika Ye nechtlasojtla” (Juan 15:​10).

Ken tikitaj, Jesús okatka itech itlasojtlalis toTajtsin Dios pampa okintlakamatiayaj itlanauatiluan iTajtsin. Noijki ­ijkon moneki ma tikchiuakan. Pampa tiyetoskej itech itlasojtlalis toTajtsin Dios, moneki timoyekanaskej ika tlen melauak itech nochi tonemilis. Ijkon ken okijto Jesús itech non yoak: “Tla nonkajsikamatih iwa nonkichiwah tlan nomechilijtok, nonkipiaskeh miak pakílistli” (Juan 13:​17).

Ika nochi toyolo timechiluiaj, ma ­namechpaleui nin amochtli pampa nanmoyekanaskej ika tlen melauak uan ­nanyetoskej “itech itlasojtlalis toTajtsin Dios, ijkuak nankichiaj [...] yolilistli tlen kajki namoixpan tlen amo keman tlamis” (Judas 21, TNM).