Naui telpokamej okitlakamatkej Jehová

Nabucodonosor okinuikak Babilonia príncipes tlen okatkaj itech Judá uan okilui se tlayekanki tlen omotokayotiaya Aspenaz ma kinmalui. Noijki okinauati ma kintemo telpokamej tlen okachi chikauakej uan ixtlamatkej itech nonmej príncipes. Eyi xiuitl kuali kinmachtiskiaj ninmej telpokamej uan satepan tlayekanaskiaj Babilonia. Omonekiaya momachtiskiaj kitlajtoltiskiaj se amatl, tlajkuiloskiaj uan momachtiskiaj tlajtoli acadio tlen otlajtoayaj itech Babilonia. Noijki, kikuaskiaj nochi tlen okikuayaj itech ikalijtik ueyi tekiua. Naui itech ninmej telpokamej omotokayotiayaj Daniel, Hananías, Misael uan Azarías. Pero Aspenaz okintlalili intoka ken babilonios: Beltsasar, Sadrac, Mesac uan Abednego. ¿Tikneltoka ninmej telpokamej kikauaskiaj Jehová porque kinmachtiskiaj miak tlamantli?

Ninmej naui telpokamej okinekiayaj kitlakamatiskej Jehová. Okimatiayaj amo uelis kikuaskiaj tlen okikuaya ueyi tekiua porque iTlanauatil Jehová amo okinkauiliaya ma kikuakan seki tlakuali. Ik non, okiluijkej Aspenaz: “Timitstlatlaujtiaj, amo techchiualti ma tikkuakan tlen kikua ueyi tekiua”. Pero Aspenaz okinmilui: “Tla amo kuali nantlakuaj, ueyi tekiua kitas nanmokokoaj uan nechmiktis”.

Daniel itlaj omokuayejyeko uan okilui Aspenaz: “Timitstlatlaujtiaj, majtlaktli tonal techmaka san kilitl uan atl. Uan satepan techita uan noijki xikinmita telpokamej tlen okikuajkej tlen kikua ueyi tekiua”. Aspenaz okitak kuali tlen okijto Daniel.

Ijkuak opanok majtlaktli tonal, Daniel uan eyi iyolikniuan omotayaj okachi chikauakej amo ken oksekimej telpokamej. Jehová oyolpakik ijkuak okitak okitlakamatkej. Noijki okimakak Daniel ixtlamatilistli uan ijkon ye okimatiaya tlen okijtosnekiaya ijkuak ikaj itlaj okinextiliayaj noso okochtemikiaya.

Aspenaz okinmachti telpokamej eyi xiuitl, satepan okinuikak ixpan Nabucodonosor. Nin ueyi tekiua omotlapoui iuan telpokamej uan okitak Daniel, Hananías, Misael uan Azarías okatkaj okachi ixtlamatkej. Ik non, okintlali ma tekitikan inmiuan akinmej okipaleuiayaj ueyi tekiua. Ueyi tekiua okintlajtlaniaya ninmej telpokamej tlen kichiuaskia ijkuak okipejpenaya itlaj tlen miak ipati. Jehová okinmakak miak ixtlamatilistli. Yejuan okatkaj okachi ixtlamatkej amo ken tlakamej uan akinmej otetlajchiuiayaj tlen okipaleuiayaj ueyi tekiua.

Daniel, Hananías, Misael uan Azarías amo okatkaj itech inmialtepe, pero nochipa okilnamikiayaj Jehová. ¿Nochipa tikilnamikis Jehová maski amo mouan yetoskej motatajuan?